Juõn Bwij im Juõn S̃eperd

“Kom naj bareinwõt jijõt ion joñoul im ruo tron, im ekajet joñoul im ruo bwijin Israel.”​—MATU 19:28.

1. Ta kõtan eo an Jeova iben ro inen Ebream, im etke men in ejjab melelen bwe ear kejekron armij ro jen ailiñ ko jet?

 JEOVA ear yokwe Ebream, kin men in Ear yokwe ro inen. Iomin elõñlok jen 15 ebeben ko, Jeova ear watõk ailiñ in Israel, ro inen Ebream bwe ren armij ro ear kãlet ir einwõt ro dron, ro “driloabjen ñõn E wõt.” (Riit Duteronomi 7:6.) Men in ej ke melelen bwe Jeova ear kejekron armij ro jen ailiñ ko jet? Jaab. Ilo ien eo, ro rejjab jen ailiñ in Israel im rar kõnan kabuñ ñõn Jeova, kar kamelim air kobalok iben ailiñ in. Kar watõk armij rein jen ailiñ ko bwe rej mõtõn ailiñ in Israel. Rar aikwij kõmõn ñõn ir einwõt ro jeir im jãtir. (Liv. 19:33, 34) Im rar aikwij bokake aolepen kien ko an Jeova.​—Liv. 24:22.

2. Ta ennan eo ekailbõkbõk Jisõs ear kwaloke, im men in ej tellok ñõn kajitõk ta ko?

² Mekarta, dri Ju ro ilo ran ko an Jisõs rar ilbõk ke ear jiroñ ir nan kein: “Naj bõk ailiñ in Anij jen kom, im lelok ñõn dri ailiñ rej kõmõn leen kaki.” (Matu 21:43) Wõn ro renaj ejaake ailiñ in ekãl, im ewi wãwen oktõk in ej jelet kij ranin?

Juõn Ailiñ Ekãl

3, 4. (a) Ewi wãwen an kar dri jilik Piter kalikare ailiñ in ekãl? (b) Wõn ro rej ejaake ailiñ in ekãl?

³ Dri jilik Piter ear lukkun kalikar ailiñ in ekãl. Ear je nan kein ñõn dri Kristian ro mõtõn: “Ak kom bwij eo emwij kãlete, priest ro an King eo, ailiñ eo ekkwojarjar, armij ro an Anij make, eo ear kãlet kom bwe komin kwalok jerbal ko rekabwilõñlõñ an Anij, eo ear kir kom jen marok ñõn meram eo an eaibuijuij.” (1 Pit. 2:9, 10, UBS) Einwõt kar kanan kake, dri Ju ro me rar bõk Jisõs einwõt Messaia eo, rej ro moktata uan ailiñ in ekãl. (Dan. 9:​27, UBS; Matu 10:6) Tokelik, kar bar kobaiktok elõñ armij jen ailiñ ko jet ñõn ailiñ in, kinke Piter ear wõnmanlok im ba: “Ilo ien ko remotelok kom kin jab dri ailiñ, a kiõ kom dri ailiñ an Anij.”​—1 Pit. 2:​10.

⁴ Wõn rein Piter ej kennan kake ir? Ilo jinoin letter eo an, ear ba: “[Anij] e ar bar keutak kij ñõn kejatrikrik emour kin jerkakbiji an Jisõs Kraist jen ro remij, ñõn jolit eo e jamin wabõnbõn im jab etton ak mejkwun, im emwij likit e ilõñ ñõn kom.” (1 Pit. 1​:3, 4) Kin men in, ailiñ in ekãl ej ejaakin Kristian dri kabit ro im kejatrikrik eo air ej ñõn mour ilõñ. Rein rej “Israel an Anij.” (Gal. 6:​16) Ilo juõn vis̃õn, dri jilik Jon ear loe bwe oran “Israel an Anij” ej 144,000. “Rein emwij wiaik ir jen ian armij ro, einwõt jomõkõj ñõn Anij im ñõn Lam” ñõn jerbal einwõt “pris” im ñõn “kiñ iben [Jisõs] iomin juõn tausan yiõ.”​—Rev. 5:​10; 7:​4; 14:​1, 4; 20:6; Jem. 1:1​8.

Eor ke Bar Ro Jet Rej Mõtõn Ailiñ In?

5. (a) Nan in “Israel an Anij” ej jitõñlok ñõn wõn? (b) Etke nan in, “Israel,” elõñlok jen juõn melelen?

⁵ Elukkun alikar bwe, nan in “Israel an Anij” eo ej walok ilo Dri Galetia 6:​16 ej jitõñlok ñõn Kristian dri kabit ro wõt. Bõtab, eor ke ien Jeova ej kajerbale ailiñ in Israel einwõt juõn wanjoñok me ej kitibuji dri Kristian ro ijellokin baj dri kabit ro wõt? Jemaroñ loe uak eo ilo nan kein an Jisõs ñõn  dri jilik ro an retiljek: “Ij likit ñõn kom juõn ailiñ einwõt Jema e ar likit ñõn Iõ: Bwe komin mõña im irak iturin Aõ tebel ilo Aõ ailiñ; im kom naj jijõt ion tron ko, im ekajet joñoul im ruo bwijin Israel.” (Luk 22:28-​30) Enaj jejit kitien men in ilo lõl eo “ekãl,” iloan Juõn Tausan Yiõ in Iroij eo an Kraist.​—Riit Matu 19:28, UBS.

6, 7. Ekkar ñõn Matu 19:28 im Luk 22:30, bwij ko “joñoul im ruo bwijin Israel” rej jitõñlok ñõn wõn?

⁶ Rein 144,000 renaj jerbal einwõt kiñ, pris im dri ekajet ro ilõñ iomin Juõn Tausan Yiõ iben Jisõs. (Rev. 20:4) Wõn ro renaj ekajete ir im iroij ioir? Buk in Matu 19:28 im Luk 22:30, rej jiroñ kij bwe renaj ekajete “joñoul im ruo bwijin Israel.” Ilo eon kein, bwij kein “joñoul im ruo bwijin Israel” rej jitõñlok ñõn wõn? Rej jitõñlok ñõn aolep armij ro me kejatrikrik eo air ej ñõn mour ilõl, im rej likit air tõmak ilo binmour eo an Jisõs, im rein rejjab mõtõn dri kabit ro. (Kar jab kitibuji bwijin Livai ilo lajrõkin bwij ko 12 bwijin Israel.) Ilo kemelele in, ro me bwij ko 12 ej jitõñlok ñõne, ej ro renaj bõk tokjen jen jerbal in pris eo an dri kabit ro 144,000. Rein rejjab bõk jerbal in pris ak rej bõk tokjen jen jerbal ko an ro rej pris, Anij ej bareinwõt bõk ir einwõt armij ro an im ej yokwe ir. Kin men in, ekkar bwe jen ba bwe armij rein rej einwõt dri Israel ro an Anij ilo ien ko etto.

⁷ Ejime men in, kinke elikin an kar dri jilik Jon loe air sili dri kabit ro 144,000 mokta jen iñtan eo elap, ear bareinwõt loe juõn “jar elap” im ejelok emaroñ in bwini me rej itok jen “ailiñ otemjej.” (Rev. 7:9) Rein renaj ellã jen iñtan eo elap im mour iomin Iroij eo an Jisõs Kraist iomin Juõn Tausan Yiõ. Kobatok iben rein, enaj lõñ billion ro me renaj jerkakbiji. (Jon 5:​28, 29; Rev. 20:13) Rein aolep ilo kõkkar, renaj ejaake “joñoul im ruo bwijin Israel,” ro me Jisõs im ro 144,000 renaj ekajete ir.​—Jerb. 17:31; 24:15; Rev. 20:​12.

8. Ewi wãwen makõtkit ko ilo Ran in Kilajrõk eo ej annañelok oktõk eo ikõtan ro 144,000 im armij ro jet?

⁸ Makõtkit ko ilo Ran in Kilajrõk eo ear annañelok oktõk eo ikõtan ro 144,000 im armij ro jet. (Liv. 16:​6-​10) Moktata, pris eo elap ear aikwij katok kin juõn kau koman einwõt juõn kein jortak kin jerawiwi “ñõn e mõke, im ñõn mweo imõn.” Ilo ejja wãwen in wõt, binmour eo an Jisõs ear jerbal mokta ñõn 144,000 dri kabit ro me renaj pris iben ilõñ. Bareinwõt ilo Ran in Kilajrõk eo ilo ien ko etto, kar katok kin ruo goat ñõn jerawiwi ko an dri Israel ro jet. Ilo wãwen in, pris ro rej jitõñlok ñõn ro 144,000, inem armij in Israel ro jet rej jitõñlok ñõn aolep ro eor air kejatrikrik ñõn mour ion lõl. Kemelele in ej kwalok bwe nan kein “joñoul im ruo bwijin Israel” ilo Matu 19:28 ejjab jitõñlok ñõn dri kabit ro, ak ej jitõñlok ñõn aolep ro im rej tõmak ilo binmour eo an Jisõs. *

9. Ilo vis̃õn eo an Ezekiel kin tempel eo, pris ro rej jitõñlok ñõn wõn, im dri Israel ro jen bwij ko jet rej jitõñlok ñõn wõn?

 ⁹ Jen etale bar juõn wanjoñok. Kar kwalok ñõn dri kanan Ezekiel juõn vis̃õn kin tempel eo an Jeova. (Ezek., jap. 40-​48, UBS) Ilo vis̃õn in, pris ro rej jerbal ilo tempel eo, im rej lelok nan in katak ko im bõk nan in kakabilek im kowe jen Jeova. (Ezek. 44:23-​31, UBS) Ilo ejja vis̃õn in wõt, armij ro jen bwij ko jet rej itok ñõn air kabuñ im lelok menin jortak ko. (Ezek. 45:16, 17, UBS) Ilo kemelele in, pris ro rej jitõñlok ñõn dri kabit ro, im dri Israel ro jen bwij ko jet rej jitõñlok ñõn ro im kejatrikrik eo air ej ñõn mour ion lõl. Vis̃õn in ej lukkun kalikar bwe kumi kein ruo rej jerbal iben dron ilo burukuk, im kumi in pris ro ej tel kabuñ eo erreo.

10, 11. (a) Ta nan ko rekõkãtõk an Jisõs emwij ar lo air jejit kitieir? (b) Ta kajitõk eo kar bõkmantak kin s̃ip ro jet?

¹⁰ Jisõs ear konono kin ‘s̃ip ro jet’ me rejjab jen “worwor” eo an “bwij erik” ak dri kabit ro dri kaloran. (Jon 10:16; Luk 12:32) Ear ba: “Emõn bareinwõt In añintok ir, im re naj roñ ainikiõ; im re naj juõn wõt bwij, im juõn s̃eperd.” Elap an kõkãtõk ñõn lo an jejit kitien nan kein! Kumi kein ruo emwij air kobatok iben dron, kumi in bwij eo edrik an dri kabit ro im jar eo elap jen s̃ip ro jet. (Riit Zakeraia 8:23, UBS.) Meñe s̃ip ro jet rejjab jerbal iloan worwor in tempel eo ilo jitõb, rej jerbal inabijin tempel eo ilo kõkkar.

¹¹ Ak elañe jet ien kar kajerbal ro me rejjab bõk jerbal in pris ilo Israel eo etto ñõn pijaiklok s̃ip ro jet, rein me kejatrikrik eo air ej ñõn mour ion lõl rej ke aikwij bar mõña bred im irak wain? Jenaj etale kiõ uak eo ñõn kajitõk in.

Bujen eo Ekãl

12. Ta karõk eo ekãl Jeova ear kanan kake?

¹² Jeova ear kanan kin juõn karõk ekãl kin armij ro an ke ear ba: “Eñin bujen eo inaj kõmmõne ibben ri Israel: inaj likit kien ko aõ ilo lemnak ko air im jei ilo burueir. Inaj air Anij, im renaj ro droõ.” (Jerm. 31:31-​33, UBS) Ikijen bujen in ekãl, kalimur eo an Jeova ñõn Ebream enaj kar lukkun jejit kitien ñõn indrio.​—Riit Jenesis 22:18.

13, 14. (a) Wõn ro rej bõk kwonair ilo bujen in ekãl? (b) Wõn ro rej bõk tokjen jene im ewi wãwen rej “drebij” bujen in ekãl?

¹³ Jisõs ear jitõñlok ñõn bujen in ekãl ilo boñin eo mokta jen an mij ke ear ba: “Cup in ej bujen ekãl an Anij, emwij kabine ilo bõtõktõkũ, eo naj torlok kin kom.” (Luk 22:20, UBS; 1 Kor. 11:25) Ekoba ke aolep dri Kristian ro ilo bujen in ekãl? Jaab. Jet wõt, einwõt dri jilik ro me rar irak jen kõp in ilo ien kejota eo, rein rej ro rej bõk kwonair ilo bujen eo ekãl. * Jisõs ear  bar kõmõne juõn bujen ibeir ñõn iroij iben ilo Ailiñ eo an. (Luk 22:28-​30) Renaj bõk kwonair ilo air iroij iben Jisõs ilo Ailiñ eo.​—Luk 22:15, 16.

¹⁴ Ak ta kin ro renaj mour ijin ion lõl iomin iroij eo an ilo Ailiñ eo? Rein rej ro rej bõk tokjen jen bujen eo ekãl. (Gal. 3:​8, 9) Meñe rein rejjab bõk kwonair ilo bujen eo ekãl, ak rej “drebij” bujen in ikijen air bokaki kien ko jene einwõt an kar Aiseia kanan kake: “Ro drua maijet rej koba iben Jeova, bwe ren korijer ñõn E, im bwe ren yokwe etan Jeova, bwe ren korijeran, jabrewõt eo ej kejbãrok ran in Sabat jen kokkure, im drebij wõt bujen eo Aõ; rein I naj ãñinlok ir ñõn tol eo Aõ e kwojarjar, im kamõnõnõik ir ilo imõn jar eo Aõ.” Inem Jeova ej ba: “Bwe naj naetan mweo imõ juõn imõn jar ñõn ro dri ailiñ ko otemjej.”​—Ais. 56:6, 7.

Wõn Ro Rej Aikwij Mõña Bred im Irak Wain?

15, 16. (a) Ta jerammõn eo Paul ear ba bwe ro rej mõtõn bujen eo ekãl renaj bõke? (b) Etke ro im kejatrikrik eo air ñõn mour ijin ion lõl rejjab aikwij mõña bred im irak wain ilo ien Kwojkwoj eo?

¹⁵ Ro rej mõtõn bujen eo ekãl rej “beran in dreloñ iloan jikin kwojarjar.” (Riit Dri Hibru 10:15-​20.) Rein rej ro im renaj “bõk ailiñ eo e ban makõtkit.” (Hib. 12:28) Inem, ro wõt renaj kiñ im pris iben Jisõs Kraist ilõñ rej aikwij irak jen “kõp” eo im ej kõkkar kin bujen eo ekãl. Rein im rej bõk kwonair ilo bujen eo ekãl rej ro me kar kalimur kake bwe renaj belek Lam eo. (2 Kor. 11:2; Rev. 21:​2, 9) Aolep ro jet me rej ber ilo ien Kwojkwoj in Kememej ran in mij eo an Jisõs kajjojo yiõ, rej ber ilo ien in eaurõk ñõn kwalok air koutieje ien in meñe rejjab mõña bred im irak wain.

¹⁶ Paul ej bareinwõt jibõñ kij ñõn melele bwe ro me kejatrikrik eo air ej ñõn mour ijin ion lõl rejjab mõña bred im irak wain ilo ien Kwojkwoj eo. Ear ba ñõn dri Kristian dri kabit ro: “Bwe ien otemjej komij mõña bred in, im irak kõp in, komij kwalok mij an Iroij ñõn ien eo Ej itok.” (1 Kor. 11:26) Ñãt eo Iroij eo enaj “itok”? Ilo ien eo ej itok im bõk bween dri kabit ro ñõn ijo jikiir ilõñ. (Jon 14:​2, 3) Ealikar bwe, Kwojkwoj in Kejota eo an Iroij me ej walok kajjojo yiõ eban wõnmanlok ñõn indrio. “Bween inen” kõra eo me rej ber ion lõl renaj wõnmanlok wõt im mõña bred im irak wain ilo ien kejota eo mae ien aolepeir rej bõk ãjinkij eo air ñõn mour ilõñ. (Rev. 12:17) Bõtab, elañe ro renaj mour ion lõl ñõn indrio en kar tellokir ñõn mõña bred im irak wain, inem Kwojkwoj in Kejota eo enaj kar aikwij wõnmanlok wõt ñõn indrio.

“Renaj Armij ro Droõ”

17, 18. Ewi wãwen ear jejit kitien kanan eo ilo Ezekiel 37:26, 27?

¹⁷ Jeova ear kanan kin an naj burukuk armij ro an ilo an kar ba: “Inaj kõmmõn juon aõ bujen ibbeir eo enaj kejerammõn ir ñan indrio. Inaj kakajur ir im bareinwõt koorlok ir, im kajutak Temple eo aõ ilo eneo eneir, ijo enaj bed ie ñan indrio. Inaj jokwe ibbeir im inaj air Anij, im renaj armij ro droõ.”​—Ezek. 37:26, 27, UBS.

 ¹⁸ Aolep armij ro an Anij rejerammõn kinke rej maroñ bõk tokjen jen jejit in kitien kalimur in kin bujen in ainemõn eo ñõn dri Kristian ro. Aet, Jeova ej kalimur bwe aolep ro dri korijeran renaj lo ainemõn. Leen jitõb kwojarjar eo an Anij ej alikar ibwiljiir. Tempel eo an ekwojarjar me ej pijaiklok kabuñ eo erreo an Kristian, ej ber ibwiljiir. Emwij air erom armij ro an kinke rar jolok aolep wãwen mõtõn kabuñ ñõn ekjõp, im rej kabuñ ñõn Jeova Anij wõt.

19, 20. Wõn ro rej kobalok iben ro Jeova ej kir ir “ro droõ,” im ta eo bujen eo ekãl ear kajejit kitien?

¹⁹ Elukkun kamõnõnõ ñõn lo an kumi kein ruo burukuk iben dron ilo ran kein ar! Meñe jar eo elap ejelok air kejatrikrik ñõn mour ilõñ, rej mõnõnõ in jerbal ilo burukuk iben ro renaj mour ilõñ. Rej kobalok iben Israel an Anij. Ilo air kõmõn eindrein, rej ber ibwiljin ro Jeova ej kir ir “ro droõ.” Jej lo jejit in kitien kanan in ibeir: “Elõñ ailiñ ko renaj itok ñõn Iroij im erom ro dron. Enaj jokwe ibwiljimi.”​—Zek. 2:11; 8:21, UBS; Riit Aiseia 65:22; Reveles̃õn 21:​3, 4.

²⁰ Jeova ear kajejit kitien aolep men kein ikijen bujen eo ekãl. Elõñ million armij ro jen ailiñ ko jet rar erom mõtõn ailiñ eo an Jeova im ej kaurõke. (Maik. 4:1-​5, UBS) Emwij air jek ilo burueir ñõn wõnmanlok wõt im kejbãroke bujen in, ikijen air mõnõnõ in bõk tokjen ko jen bujen in im bokake kien ko an. (Ais. 56:​6, 7) Ilo wãwen in, rej kobalok iben Israel an Anij im lõñliñ kin jerammõn ko relõñ ikijen ainemõn eo ejamin jemlok. Jej kõtõmene bwe kwonaj iion jerammõn kein kiõ, im ilo bar ran ko rej berotok!

[Kamelele eo itulal]

Kwoj ke Kememej?

• Wõn “bwij ko joñoul ruo bwijjin Israel” me ro 144,000 renaj ekajet ir?

• Ta oktõk eo ikõtan dri kabit ro im s̃ip ro jet ilo bujen eo ekãl?

• Aolep dri Kristian ro rej aikwij ke mõña bred im irak wain ilo ien Kwojkwoj in Kememej eo?

• Ta burukuk eo kar kanan kake bwe enaj walok ilo ran kein ar?

[Kajitõk ko ñan katak]

[Kamelele in juõn pija ilo peij 25]

Elõñ armij ro rej jerbal iben Israel an Anij kiõ

7,313,173

4,017,213

1,483,430

373,430

1950 1970 1990 2009