Lo Jokõne Ibwiljin Armij ro an Anij

“I naj kamolol Yuk ilo jar eo elap.”​—SAM 35:18.

1-3. (a) Ta eo emaroñ tellok jet dri Kristian ro ñõn kõmõn bwe kõtan eo air iben Jeova en ber ilo kauwatata? (b) Ia eo armij ro an Anij remaroñ lo kejbãrok ie?

 KE RAR ber ilo juõn ien kakije, Joe im lio belen rar etal im turoñ im aluije ijo elõñ wõd ie im eobrõk kin iik ko eaibujuij unokair im ekajjo joñair. Rar wõnmetolok jidrik kin air kõnan lale wõd ko. Ke rar turoñ metolok ñõn ijo elukkun mulõl, lio belen Joe ear ba, “Einwõt elap arro wõnmeto.” Joe ear uak im ba, “Kwon jab inebata, ijela ta eo ij kõmõne.” Ejjabto tokelik, Joe ear kajitõk iben mõke, ‘Ewi aolep iik ko?’ Ear lukkun lelñoñ ke ear jela ta unin. Juõn bako ear waloktok jen ijo emulõl im jibareklok e. Ilo ijin, ejelok men en ear maroñ kõmõne ñõn kejbãrok e jen bako eo. Ke bako eo ear jejjo wõt ne etolok, ear mõke jeõr im jokolok.

² Juõn dri Kristian emaroñ lukkun mad kin menin kareelel ko an jukjuk im ber in an Setan einwõt menin kamõnõnõ ko, jerbal, mweiuk ko, im ejjab kile bwe ej etal ñõn an ber ilo kauwatata. Joe eo ej juõn dri Kristian elder ej ba, “Men eo iar iione ear kõmõn aõ lemnok kin wõn ro jej kõmao ibeir. Turoñ wõt ilo jikin eo ejjab kauwatata im emõn, ej congregation eo!” Ilo kõkkar, jab wõnmetolok ñõn jikin eo emulõl, ijo kwomaroñ mõkelok iam jen congregation eo im ber ilo kauwatata. Elañe kwoj lo am ber ijin, kwon mõkõj im wõnene lok ñõn ijo ejjab kauwatata. Elañe kwojjab, kõtan eo am iben Jeova enaj ber ilo kauwatata.

³ Ranin, lõl in ej juõn jikin ekauwatata ñõn dri Kristian ro. (2 Tim. 3:​1-5) Setan ejela bwe jidrik wõt ien iben, im ej bukot ro rejjab ekil bwe en kõñ ir. (1 Pit. 5:8; Rev. 12:12, 17) Bõtab, eor kein kejbãrok kij. Emwij an Jeova letok juõn jikin kone ilo jitõb ñõn armij ro an, ej congregation eo an Kristian.

4, 5. Ewi iñjake eo an elõñ armij kin ilju im jeklaj eo air, im etke?

⁴ Jokõne eo jej bõke jen men ko an lõl in eor joñõn meñe kin aikwij ko ilo kõniek ak iñjake. Elõñ armij rej iñjake bwe mour eo air ejjab lukkun jokõne kin an or kowaroñ, lej, lap wõnan mour, im bareinwõt kin an jorranlok mejatoto im lojit. Aolep rej jelmae abañ ko kin ridtolok im nañinmij. Im ro jet me eor air jerbal, moko imweir, ebwe air jããn, im ebwe an emõn ejmour eo air rejjab jela ewi toõn an jerammõn kein naj berwõt ibeir.

⁵ Elõñ rar jab maroñ lo air jokõne ilo iñjake. Ekaburomõjmõj bwe elõñ armij ro me rar kõtõmene bwe renaj lo ainemõn im juburu ilo mour in mare im baamle rar jab lo tõbrõk. Ikijen men ko lor jitõb, elõñ ro rej etal ñõn imõn jar ko rar bwok. Rej berre elañe eor tokjen nan in tel ko rej bõki. Elaptata ñe rej lemnok kin mwil eo enana mwilin dri tel ro ilo kabuñ eo air im katak ko air rejjab berber ion Baibel eo. Kin men in, armij ro rej iñjake bwe men eo wõt remaroñ kõmõne ej likit air kejatrikrik ilo tõbrõk ko scientist ro rej loi ak ilo joij im jerbal ko rejime an armij. Inem ejjab menin bwilõñ bwe ro rej ber ibelakir elap air jab jokõne im emõnlok ibeir ñõn jab lukkun lemnok kin ilju im jeklaj eo air.

6, 7. (a) Ta unin an oktõk lemnok eo an ro rej korijer ñõn Anij ñe keiri iben lemnok eo an ro rejjab? (b) Ta eo jenaj etale?

 ⁶ Elap an oktõk lemnok eo an ro rej mõtõn congregation eo an Kristian jen ro rejjab! Meñe kij armij ro an Anij, jej bar jelmae ejja abañ ko wõt ro dri turid rej jelmaiki, bõtab wãwen ar emakõt kin men kein eoktõk. (Riit Aiseia 65:13, 14; Malkai 3:​18.) Etke? Kinke jej lo kemelele ko rekajuburu ilo Baibel eo kin abañ ko armij ro rej jelmaiki, im jej pojõk ñõn kamarmir abañ ko ilo mour in. Men in ej kõmõn bwe en jab le jen joñõn ar inebata kin ilju im jeklaj. Ar kabuñ ñõn Jeova ej kejbãrok kij jen lemnok ko rejjab jime im rejjab ekkar ñõn Baibel eo, mõnit ko retton, im jen tokjen ko rej walok jen men kein. Ro uan congregation eo an Kristian rej lo ainemõn eo me ro jet rejjab jela kake.​—Ais. 48:17, 18; Pil. 4:​6, 7.

⁷ Eor jet wanjoñok ko remaroñ jibõñ kij ñõn kalomõnlokjen kin mour eo ejokõne an ro rej korijer ñõn Jeova ñe keiri iben ro rejjab. Wanjoñok kein remaroñ kamakõt kij ñõn etale lemnok im kõmõn ko ar mõke im ñõn lale elañe jemaroñ kalaplok ar jerbale nan in kakabilek ko an Anij me kar litok ñõn kejbãrok kij.​—Ais. 30:21.

“Buñten Neiõ R’ar Nañin Jir”

8. Ta eo ro dri korijeran Jeova rar aikwij kõmõne ien otemjej?

⁸ Jen jinoin bwebwenato an armij, ro rar kãlet ñõn korijer im bokake Jeova rar kajeoñ kejbãrok ir jen air kobalok iben ro rejjab korijer ñõn e. Emol, Jeova ear kalikar bwe enaj kar or kijirãt ikõtan dri kabuñ ro an im ro rej lor Setan. (Jen. 3:​15) Kinke rej jutõk bin wõt kin nan in tel ko jen Anij, kõmõn ko an armij ro an Anij rar oktõk jen ro rar mour ibelakiir. (Jon 17:15, 16; 1 Jon 2:​15-​17) Air jutõk bin wõt ear jab aolep ien biruru. Aet, jet ien ro jet jen ibwiljin dri korijer ro an Jeova rar berre elañe ej menin meletlet ñõn air mour ilo juõn wãwen rej karmijete ir mõke.

9. Kwalok abañ eo armij eo ear je Sam 73 ear jelmaiki.

 ⁹ Juõn ian ro dri korijeran Jeova me ear jino lemnok elañe ear kõmõni jokãlet ko remeletlet ej eo ear je Sam 73, me bwelen ear itok jen ro inen Esap. Dri jeje sam in ear kajitõk etke ekkã an dri nana ro jerammõn, mõnõnõ, im mweie, ak ro jet im rej kate ir ñõn korijer ñõn Anij rej iion abañ ko rebin.​—Riit Sam 73:​1-​13.

10. Etke kajitõk ko dri jeje sam eo ear bũkmantak rej aurõk ñõn yuk?

¹⁰ Kwonañin ke kar lemnok kin ejja kajitõk kein wõt me dri jeje sam in ear jei? Elañe aet, kwojjab aikwij inebata ak lemnok bwe emõjinolok tõmak eo am. Ilo mol, elõñ ian dri korijer ro an Jeova, ekoba ro jet me Jeova ear kajerbal ir ñõn je Baibel eo rar bõk ejja kain lemnok kein wõt. (Job 21:​7-​13; Sam 37:1; Jerm. 12:1; Hab. 1:​1-4, 13) Emol, aolep ro rej kõnan korijer ñõn Jeova rej aikwij lukkun lemnok kake im tõmak uak eo ñõn kajitõk in: Korijer im bokake Anij ej ke men eo emõntata ñõn kõmõne? Men in ej ekkejellok ñõn aituerõk eo Setan ear bõkmantak ilo jikin kallip in Iden. Ej juõn wãwen eaurõk ñõn uake aituerõk eo kar bõkmantak kin Iroij Potata eo an Anij. (Jen. 3:​4, 5) Inem kij aolep jej aikwij etale men eo dri jeje sam eo ear bõkmantak. Jej ke junmare ro rejua kin air jerammõn? Jen ke ellok jen ar korijer ñõn Jeova im lor wãwen mour eo air? Ilo mol, eñin men eo Setan ekõnan bwe jen kõmõne.

11, 12. (a) Ewi wãwen an kar dri jeje sam eo jolok an berre, im ta eo men in ej katakin kij kake? (b) Ta eo ear jibõñ yuk ñõn bõk ejja jemlok eo wõt an kar dri jeje sam eo?

¹¹ Ta eo ear jibõñ dri jeje sam eo ñõn jolok an berre? Meñe ear kile bwe mõtõn wõt jidrik en kar ellok jen mour eo ekwojarjar, lemnok eo an ear oktõk ke ear ilok ñõn “jikin kwojarjar an Anij,” melelen ke ear kobalok iben armij ro ilo tempel eo an Anij me rar likit bwe kabuñ en men eo imantata, im ke ear kalomõnlokjen kin karõk eo an Anij. Inem ear jino alikar ñõn dri jeje sam eo bwe ear jab kõnan iion ejja wãwen ko wõt rej walok ñõn ro rej kõmõni men ko renana. Ear lo bwe wãwen mour im jokãlet ko air rar kõmõn bwe ren ber ilo “jikin jirlok.” Dri jeje sam eo ear kile bwe aolep ro rej ilok jen Jeova kin mour etton renaj mij kin “men in kalelñoñ” ko rejidimkij, bõtab Jeova enaj jibõñ ro rej korijer ñõn e. (Riit Sam 73:16-​19, 27, 28.) Ejelok berre bwe emwij am lo an mol nan kein. Juõn mour eanemkwoj im ejelok koutiej kien Anij ie emaroñ kareel elõñ armij, bõtab ejelok juõn emaroñ ko jen tokjen ko renana rej waloktok jen kain wãwen mour rõt in.​—Gal. 6:​7-9.

¹² Bar ta eo jej katak jen wãwen eo dri jeje sam eo ear iione? Ear lo jokõne im meletlet ibwiljin armij ro an Anij. Ear jino bõk lemnok eo ejime ke ear etal ñõn jikin eo rar kabuñ ñõn Jeova ie. Eindrein ranin, jemaroñ lo dri kakabilek ro remeletlet im lõñliñ kin katak ko remol jen Baibel eo ilo kwelok ko an congregation eo. Inem, eor unin an Jeova jiroñ dri korijer ro an ñõn ber ilo kwelok ko. Renaj bõk kõkãtõk im naj lujur ir ñõn jerbal ilo meletlet.​—Ais. 32:​1, 2; Hib. 10:24, 25.

Kãlet Ro Mõtõm ilo Meletlet

13-15. (a) Ta wãwen eo Daina ear iione, im ej kwalok kin ta? (b) Etke kõmao iben dri Kristian ro mõtar ej juõn kein kejbãrok?

¹³ Lio nejin Jekõb etan Daina ej juõn joñok kin ro im rar lo jorran kin air kar kõmao iben dri lõl in ro mõtair. Bwebwenato eo kin e ilo buk in Jenesis ej jiroñ kij bwe ear juõn mõnit iben bwe en lolok jiroñ in Kenean ro ilo bukwon eo baamle eo an rar jokwe ie. Armij ro ilo Kenean rar jab koutiej mour erreo einwõt dri kabuñ ro an Jeova. Jen an eindrein, men ko ro rej ekkatak kin mour an armij in etto rar loi rej kamol bwe wãwen mour eo an dri Kenean ro ear kõmõn bwe en obrõk  eneo eneir kin kabuñ ñõn ekjõp, mour etton, kajerbal mour in ejej ilo air kabuñ, im lej. (Exod. 23:23; Liv. 18:​2-25; Dut. 18:9-12) Kememej men eo ear walok kin an kar Daina kõmao iben armij rein.

¹⁴ Shikem, juõn eman ilo bukwon eo im Baibel eo ej kwalok bwe “e ñiãjo jen ro nukin jemen otemjej,” ear lo Daina im ear “bõk e im babu iben im kananaik e.” (Jen. 34:​1, 2, 19) Elap wõt an men in kaburomõjmõj! Kwoj lemnok Daina ear ke jela bwe men in enaj kar walok ñõn e? Bwelen ear kõnan mõtaik jodrikdrik ro ilo bukwon eo, ro me ear jab lemnok renaj kar kõmõn jabrewõt men enana ñõn e. Bõtab, kar lukkun mone Daina.

¹⁵ Ta eo bwebwenato in ej katakin kij kake? Bwe jejjab maroñ kõmao iben ro dri jab tõmak im kejatrikrik bwe jeban lo jorran. Baibel eo ej ba bwe “kõmao ko renana rej kakõt mõnit ko remõn.” (1 Kor. 15:33) Ijo turãjet, kõmao iben armij ro rej ber ilo tõmak, koutiej mour erreo, im yokwe Jeova ej juõn kein kejbãrok. Kõmao rõt in enaj rejañ yuk ñõn jerbal ilo meletlet.​—Ken. 13:20.

“Emwij Kwoli Kom”

16. Ta eo Paul ear ba kin jet ian ro ilo congregation eo ilo Korint?

¹⁶ Congregation eo an Kristian ear jibõñ elõñ ñõn karreoik ir mõke jen mõnit ko renana. Ke dri jilik Paul ear je letter eo an ken kajuõn ñõn congregation eo ilo Korint, ear nebar dri Kristian ro ijin kin oktõk ko rar kõmõni ñõn mour ekkar ñõn kien ko an Anij. Jet rar dri lũñ, dri kabuñ ñõn ekjõp, dri lejen, dri Sodom, dri kwot, dri karek, im ko eierlok wõt. Paul ear jiroñ ir: “A emwij kwoli kom.”​—Riit 1 Dri Korint 6:​9-​11.

17. Ewi wãwen mour ekkar ñõn kien ko ilo Baibel ear ukot mour an elõñ armij?

¹⁷ Armij ro me ejelok air tõmak ejelok kien ko ñõn tel ir. Rej mõke beek mour ko air, ak rej kõtlok bwe ren bo ilo mour etton ko an armij ro ibelakiir einwõt kar ro ilo Korint mokta jen air kar erom dri tõmak ro. (Ep. 4:​14) Bõtab, jelalokjen eo ejime kin Nan in Anij im karõk ko an, elap an kajur ñõn ukot mour an armij ro rej tõmak nan in tel ko ilo Baibel eo im jerbali. (Kol. 3:​5-​10; Hib. 4:​12) Ranin, elõñ ro ilo congregation eo an Kristian remaroñ kwalok ñõn yuk bwe mokta jen air kar katak im jerbali kien ko rekwojarjar an Jeova ilo mour ko air, rar mour ekkar ñõn kõnan ko air mõke. Ak, rar jab juburu im mõnõnõ. Rej kab lo ainemõn ke rar jino kobalok iben armij ro an Anij im mour ekkar ñõn nan in tel ko ilo Baibel eo.

18. Ta eo ear walok ñõn juõn sister ke ear jodrikdrik, ta eo men in ej kamole?

¹⁸ Okõtõn men in, ro jet me ilo jinoin rar beek ñõn ilok jen ijo ejelok kauwatata ie ak congregation eo an Kristian, rej lukkun ajlok kiõ kin bebe eo air. Tanya * ej kemelele bwe ke ear “drik ekin kobalok iben ro rej ber ilo mol eo,” ak ke ear 16 an yiõ, ear ilok jen congregation eo bwe en “jibarek menin kamõnõnõ ko an lõl in.” Tokjen men in ear bõroro im mõn lojen, eñin ej jet ian men ko rar walok ñõn e. Kiõ ej ba: “Men ko iar kõmõni iomin yiõ ko jilu ke iar joko jen congregation eo rar kanejnej iñjake ko aõ im men in ebin an joko. Juõn men ijjab maroñ melokloke ej kin aõ kar mõn niñniñ eo nejiõ. . . . Ikõnan ba ñõn aolep jodrikdrik ro rej kõnan  ‘erjoñe’ menin kamõnõnõ ko an lõl in meñe iomin jidrik wõt ien: ‘Komin jab!’ Emaroñ kamõnõnõ ilo jinoin, ak ilo jemlokõn ekanuij nana. Ejelok men en emõn ilo lõl in, ak buromõj wõt. Ijela kin men in. Emwij aõ iione. Komin berwõt ilo rolul eo an Jeova! Eñin ej ial eo wõt ñõn mour eo elemõnõnõ.”

19, 20. Ta kejbãrok eo jemaroñ loe ilo congregation eo an Kristian, im ewi wãwen?

¹⁹ Baj lemnok mõk kin ta eo enaj kar walok ñõn yuk elañe kwar ilok jen jikin kone eo ilo congregation eo. Elõñ rejjab kõnan lemnok kin wãwen mour eo air me ejelok tokjen mokta jen air kar jela mol eo. (Jon 6:​68, 69) Kwomaroñ wõnmanlok im lo jokõne im kejbãrok jen jerata im iñtan ko me ekkã air walok ilo lõl in an Setan ikijen am ber ebake dri Kristian ro jeõm im jãtõm. Am kobalok ibeir im keini am ber ilo kwelok ko an congregation eo enaj kakememej wõt yuk kin meletlet eo ej itok jen kien ko rewãnik an Jeova im rejañ yuk ñõn mour ekkar ñõn kien kein. Elõñ un ko unin ñõn am ‘kamolol Jeova ilo jar eo elap,’einwõt kar dri jeje sam.​—Sam 35:18.

²⁰ Emol, kin un ko rekajjo wãweir, aolep dri Kristian ro rej jelmae ien ko me emaroñ bin ñõn air drebij tiljek eo air. Remaroñ baj aikwiji wõt an juõn kwalok ñõn ir ial eo ejime rej aikwij etal ie lok. Ilo ien kein, ta eo kwe im aolep ro uan congregation eo kom maroñ kõmõne ñõn jibõñ dri tõmak ro mõtami? Katak eo tok juõn enaj kwalok kin ewi wãwen kwomaroñ ‘kainemõne im kalek,’ ro jeõm im jãtõm.​—1 Tes. 5:​11.

[Kamelele eo itulal]

Ewi Wãwen Kwonaj Uak?

• Ta eo jej katak jen wãwen ko armij eo ear je Sam 73 ear jelmaiki?

• Ta eo jej katak jen men eo ear walok ñõn Daina?

• Etke kwomaroñ lo jokõne ilo congregation eo an Kristian?

[Kajitõk ko ñan katak]

[Pija ilo peij 7]

Turoñ wõt ilo jikin eo ejjab kauwatata ilo am berwõt ilo congregation eo!