Wãwen eo Jisõs Ej Kalikar bwe Anij Ewãnik

“Eo Anij e ar kwalok E [Kraist] bwe En ken mirik, kin tõmak, ilo bõtõktõkin, bwe En bakajen An wãnik.”​—ROM 3:​25.

1, 2. (a) Ta eo Baibel eo ej katakin kij kake kin ta eo ear walok ñõn armij ro? (b) Ta kajitõk ko jenaj etali ilo katak in?

 BWEBWENATO eo ilo Baibel kin jumae eo ear walok ilo jikin kallip in Iden elukkun buñbuñ. Kij aolep jej iion tokjen ko rej walok jen jerawiwi eo an Adam einwõt an nan kein kemelele: “Einwõt kin juõn armij, jerawiwi ej dreloñ ilo lõl, im mij kin jerawiwi; im ein drein mij e ar itok ion armij otemjej, bwe ir otemjej r’ar jerawiwi.” (Rom 5:​12) Jekron ewi joñõn ar kate kij ñõn kõmõne men eo ejime, ak ekkã wõt ar kõmõn bwir ko im jej aikwij bõk jeorlok bwir jen Anij. Ilo buromõj, dri jilik Paul ear ba: “Men eo emõn I kõnan, I jab kõmõne: a nana eo I jab kõnan, eñin ij kõmõne. O ña armij iñtan!”​—Rom 7:​19, 24.

² Kinke kij aolep jar jolit jerawiwi, emõn bwe jen kajitõk: Ewi wãwen Jisõs, dri Nazeret eo, ear maroñ lotak im jab jolit jerawiwi im etke ear baptais? Ewi wãwen mour eo an Jisõs ear kalikar bwe Jeova ewãnik? Im kajitõk eo elaptata an aurõk, ta eo mij eo an Jisõs ear kõtõbrõke?

Kar Jumae Wãnik eo an Anij

3. Ewi wãwen an kar Setan mone Iv?

³ Ilo jab meletlet, jemer im jiner moktata, Adam im Iv, rar karmijete wãwen iroij eo an Anij im kãlet bwe “serpent e ridto, naetan devil im Setan” en iroij ioir. (Rev. 12:9) Lemnok kin wãwen an kar men in walok. Setan ear aituerõke wãwen iroij eo ewãnik an Anij. Ear kõmõne men in ilo an kajitõk iben Iv: “Emol ke Anij e ar ba, Komin jab mõña jen wijki otemjej ilo jikin kallip eo?” Iv ear ba bwe Anij ear kakien irro bwe juõn wõt wijki ren jab uñire, bwe elañe renaj uñire, renaj mij. Inem Setan ear kariõp Anij ilo an ba, “Kom jamin mij otem mij.” Ear mone Iv bwe en tõmak bwe Anij ej drebij juõn men emõn jen e im elañe ej mõña leen wijki eo, enaj einwõt Anij, ilo an jela ta eo emõn im nana.​—Jen. 3:​1-5.

4. Ewi wãwen an kar armij ber iomin iroij eo an Setan?

⁴ Ilo etao, Setan ear ba bwe enaj laplok an armij mõnõnõ elañe rejenolok jen Anij. Jen an rejetake wãwen iroij eo ewãnik an Anij, Adam ear roñjake lio belen im mõña jen leen wijki eo kar kemoik airro mõña jene. Kin men in, Adam ear luji kõtan eo an ewãppen iben Jeova im ear bõktok jerawiwi im mij ior. Ilo ejja ien eo wõt, jerawiwi eo an Adam ear kõmõn bwe armij ro ren ber iomin iroij eo an Setan, “anij in lõl in.”​—2 Kor. 4:4; Rom 7:​14.

5. (a) Ewi wãwen an kar Jeova kajejite nan ko an? (b) Ta kejatrikrik eo Anij ear lelok ñõn ro nejin Adam im Iv?

⁵ Jeova ear kajejit nan ko an ilo an kar liakelok Adam im Iv ñõn mij. (Jen. 3:​16-​19) Bõtab ejjab melelen men in bwe karõk eo an Anij ejamin naj jejit kitien. Ke Jeova ear kajeik Adam im Iv, ear lelok ñõn ro nejiir juõn kejatrikrik emõn. Ear kõmõne men in ilo an kar kwalok bwe enaj kajutõk juõn ‘ine,’ eo Setan enaj kokkure jimwin neen. Bõtab, ilo kõkkar kinej eo ilo jimwin neen Ine eo kar kalimur kake enaj mo, inem enaj ‘kokkure bõran Setan.’  (Jen. 3:​15) Baibel eo ej kemelele kin tibrikin men in ilo an kar ba ikijen Jisõs Kraist: “Nejin Anij e ar walok kin men in, bwe En kokkure jerbal ko an devil.” (1 Jon 3:8) Ak ewi wãwen mwilin Jisõs im an kar mij rej kaibujuij Anij bwe ewãnik?

Melelen Baptais eo an Jisõs

6. Ewi wãwen ar jela bwe Jisõs ear jab jolit jerawiwi jen Adam?

⁶ Ke Jisõs ear juõn eman, ear aikwij wãppen einwõt kar Adam. (Rom 5:​14; 1 Kor. 15:45) Melelen men in bwe ear aikwij lotak einwõt juõn armij ewãppen. Ewi wãwen an kar maroñ eindrein? Enjel eo etan Gebriel ear lelok melele in ealikar ñõn Meri, jinen Jisõs: ‘Kajur eo jen Anij e naj kalur yuk; im kin men in Eo kwojarjar e naj lotak naj likit etan Nejin Anij.’ (Luk 1:​35) Ke Jisõs ear juõn ajiri, bwelen Meri ear kwalok ñõn e kin jet men ko rar walok ikijen lotak eo an. Eñin unin, ilo juõn ien ke Meri im Josep, eo ear kakajiririik e, rar lo Jisõs ilo tempel eo an Anij, ajiri in edrik ear kajitõk: “Kom ar jaje ke bwe emõn In ber ilo imõn Jema?” (Luk 2:​49) Alikar bwe jen ke Jisõs ear drik, ear jela bwe e Nejin Anij. Kin men in, ear lukkun aurõk iben ñõn an kaibujuij Anij bwe ewãnik.

7. Ta men ko raurõk ear or iben Jisõs?

⁷ Jisõs ear kwalok an lukkun itoklimo ilo katak ko an Anij ilo an kar keini an ber ilo kwelok ko an kabuñ. Kin an or iben juõn lemnok ewãppen, ear maroñ katak im melele men otemjej ear roñ im riiti jen Jeje ko ilo kajin Hibru. (Luk 4:​16) Bar juõn men eaurõk ear or iben kar juõn enbwin ewãppen me ear maroñ katok kake kin armij otemjej. Ke ear baptais, Jisõs ear jar im bwelen ear lemnok kin kanan eo ilo Sam 40:​6-8.​—Luk 3:​21; riit Dri Hibru 10:​5-​10. *

8. Etke Jon dri Baptais ear kajeoñ in bõprae Jisõs jen an baptais?

⁸ Ilo jinoin, Jon dri Baptais ear kõnan bõprae Jisõs jen an baptais. Etke? Kinke Jon ear baptaisi dri Ju ro ñõn kalikar bwe rar ukwelok jen jerawiwi ko air me rar nae Kien eo. Einwõt juõn nukin ebak, Jon ear jela bwe Jisõs ej juõn armij ewãnik im kin men in ear jab aikwij ukwelok. Jisõs ear kalikar ñõn Jon bwe ekkar bwe En baptais. Ear kemelele, “Ilo wãwen in jej kajejjet ankilan Anij.”​—Matu 3:​15, UBS.

9. Ta eo baptais eo an Jisõs ear kõkkar kake?

⁹ Einwõt juõn armij ewãppen, Jisõs emaroñ kar bõk lemnok eo bwe  eor an maroñ ñõn ejaak juõn baamle me en kar kobrõk lõl in kin armij ro rewãppen einwõt Adam. Bõtab, Jisõs ear jab kõnan kain ilju im jeklaj rõt in kinke ejjab eñin men eo Anij ear karõke ñõn e. Anij ear jilkintok Jisõs ñõn lõl bwe en kajejit jerbal eo an einwõt Ine eo kar kalimur kake, ak Messaia eo. Men in ear kitibuj an Jisõs katok kin mour eo an ewãppen. (Riit Aiseia 53:​5, 6, 12.) Ilo mol, baptais eo an Jisõs eoktõk melelen jen baptais eo ar. Baptais eo an ear jab kitibuj an wujleplok e mõke ñõn Jeova kinke Jisõs ear mõtõn ailiñ in Israel, eo kar ajelok ñõn Anij. Jen men in, baptais eo an Jisõs ear kõkkar kin an lelok e mõke ñõn Anij ñõn an kõmõnmõn ankilan einwõt kar kanan kake ilo Jeje ko kin Messaia eo.

10. Einwõt Messaia eo, ta eo ej kitibuj ñõn an kõmõnmõn ankilan Anij, im ewi wãwen an kar Jisõs iñjake kin men in?

¹⁰ Karõk eo an Jeova ñõn Jisõs ear kitibuj an kwalok kin nuuj eo emõn kin Ailiñ in Anij, kõmõn dri kalor ro, im kepoj ir ñõn air kõmõne jerbal in ilo ran ko reber iman. An Jisõs lelok e mõke ear bareinwõt kitibuj an mõnõnõ in kijenmij iomin matõrtõr im juõn wãwen mij ekaiñtanan ñõn kamol bwe ej rejetake iroij eo ewãnik an Jeova Anij. Kinke Jisõs ear lukkun yokwe Jemen ilõñ, ear mõnõnõ in kõmõnmõn ankilan Anij im lelok e mõke einwõt juõn menin katok. (Jon 14:31) Ear bareinwõt mõnõnõ in jela bwe ear maroñ lelok aurõkin mour wãppen eo an ñõn Anij einwõt juõn binmour ñõn kanemkwoj kij jen jerawiwi im mij. Anij ear ke buñburuen ke Jisõs ear lelok e mõke ñõn kajejit erro kein relap? Aet ear buñburuen!

11. Ewi wãwen Jeova ear kwalok an buñburuen kake Jisõs einwõt Messaia eo kar kalimur kake, ak Kraist?

¹¹ Dri jeje ro im rar je Gospel ko emen rar kamol bwe Jeova ear lukkun buñburuen kake Jisõs ke ear ato jen river Jordan. Jon dri Baptais ear kamole men in ilo an kar ba: ‘I ar lo an kajur eo jen Anij kãlõltak, einwõt muli, jen lõñ, im Ej ber ion Jisõs . . . im I ar lo, im kennan bwe E in Nejin Anij.’ (Jon 1:​32-​34) Bareinwõt, ilo ien in Jeova ear kalikar im ba: “E in Nejiõ jitenburu iba, Ij mõnõnõ kake.”​—Matu 3:​17; Mark 1:​11; Luk 3:​22.

Tiljek ñõn Mij

12. Ta ko Jisõs ear kõmõni iomin jilu im jimõtõn yiõ ko elikin an kar baptais?

¹² Iomin jilu im jimõtõn yiõ ko, Jisõs ear kamat aolepen ien ko an ñõn katakin armij ro kin Jemen im bwe wãwen iroij eo an Anij ewãnik. Meñe emaroñ kar mõk kin an etetal ilo aolepen Enen Kalimur eo, ak ejelok juõn men ear maroñ kabwijrõk e jen an kennan kin mol eo. (Jon 4:​6, 34; 18:37) Jisõs ear katakin ro jet kin Ailiñ eo an Anij. Ilo an kar kõmõn menin kabwilõñlõñ ko einwõt kemour ro renañinmij, najirik jar in armij ro rekwõle, im kejerkakbiji ro remij, ear kwalok kin ta ko Ailiñ eo enaj kõtõbrõki ñõn armij otemjej.​—Matu 11:​4, 5.

13. Ta eo Jisõs ear katakin kake kin jar?

¹³ Jen an bõk nebar kin katak ko an im an kar kemour armij ro, Jisõs ear likit juõn joñok emõn ilo an kar kõtãik e mõke im lelok nebar ñõn Jeova. (Jon 5:​19; 11:41-​44) Jisõs ear bareinwõt kwalok kin men ko raurõktata me jej aikwij jar kaki. Jar ko ar rej aikwij kitibuj ar kajitõk bwe “En kwojarjar” etan Anij, Jeova, im bwe wãwen iroij eo an Anij ewãnik en bõk jikin wãwen iroij eo enana an Setan ñõn kajejit kitien ankilan Anij “einwõt i lõñ, bareinwõt ion lõl.” (Matu 6:​9, 10) Jisõs ear bareinwõt rejañ kij ñõn ar jerbal ekkar ñõn jar kein ilo ar “bukot mokta ailiñ  in Anij, im kwojarjar eo An [Anij].”​—Matu 6:​33.

14. Meñe Jisõs ear wãppen, etke ear aikwij kate e ñõn kajejit jerbal eo an ilo karõk eo an Anij?

¹⁴ Ke ear ebaktok ien eo ñõn an katok kin mour eo an, ear laplok an Jisõs kile erro eo elap kar lelok ñõn e. Karõk eo an Jemen im an emõn etan ear wawa ion an Jisõs kijenmij iomin jab ekajet jime im juõn mij ekaiñtanan. Lailim ran moktalok jen an kar mij, Jisõs ear jar: “Kiõ ebiuk buruõ; im ta eo I naj ba? Jema, kwon lomor Iõ jen auõ in. A kin men in I ar itok ñõn auõ in.” Inem elikin an kwalok kin iñjake kein biktokin armij, Jisõs ear kwalok an jab kibbon ilo an kar oktõk im lemnok wõt kin men eo elaplok an aurõk ke ear jar: “Jema, kwon kaibujuij etõm.” Ilo mõkõj, Jeova ear uak im ba: “I ar kaibujuij e, im I naj bar kaibujuij e.” (Jon 12:27, 28) Aet, Jisõs ear mõnõnõ in jelmae melejoñ eo elaptata kin tiljek me ejelok jabrewõt armij ear aikwij jelmaiki. Ejelok berre bwe ilo an kar Jisõs roñ nan ko an Jemen ilõñ, men in ear kakajur liki eo an bwe enaj lo tõbrõk ilo an kaibujuij im kamol an jime wãwen iroij eo an Jeova. Aet, ear lo tõbrõk!

Ta eo Mij eo an Jisõs Ear Kõtõbrõke

15. Mokta jen an kar Jisõs mij, etke ear ba: “Emwij”?

¹⁵ Ke Jisõs ear toto ion alal in iñtan eo im ear pojõk in bõk kitoõn, ear ba: “Emwij!” (Jon 19:30) Iomin jilu im jimõtõn yiõ ko, jen ien eo ear baptais mae ien eo ear mij, Jisõs ear maroñ kõtõbrõk elõñ men ko relap kin jibõñ eo jen Anij! Ke Jisõs ear mij, ear walok juõn makõtkit lõl elap, im juõn kapen in jarin tõrinae an Rom, eo ear lolorjake ien mij eo an Jisõs, ear ba: “Emol E in Nejin Anij.” (Matu 27:54) Kapen in ear lo an armij ro kajirere kake Jisõs kin an kar ba bwe e Nejin Anij. Meñe ear iñtan kin elõñ men ko, Jisõs ear drebij wõt an tiljek im ear kamol bwe Setan ej juõn dri riõp elap. Ikijen aolep ro im rej rejetake wãwen iroij eo an Anij, Setan ear bõkmantak aituerõk in: “Men otemjej iben juõn armij e naj lelok kin an mour.” (Job 2:4) Ilo an kar Jisõs tiljek, ear kwalok bwe Adam im Iv remaroñ kar drebij wõt air tiljek iomin melejoñ eo ejjab bin me rar iione. Men eo elaptata an aurõk ej bwe wãwen mour im mij eo an Jisõs ear rejetak im kalikar bwe wãwen an Jeova iroij ewãnik. (Riit Jabõn Kennan Ko 27:11.) Ebar or ke men ko jet mij eo an Jisõs ear kõtõbrõki? Aet!

16, 17. (a) Etke dri korijer ro an Jeova im rar mour mokta jen Jisõs, rar maroñ bõk juõn kõtan ewãnik iben Anij? (b) Ewi wãwen an kar Jeova kejerammõn Nejin kin tiljek eo an, im ta eo Iroij Jisõs Kraist ej wõnmanlok wõt im kõmõne?

¹⁶ Elõñ dri korijer ro an Jeova rar mour mokta jen an kar Jisõs itok ñõn lõl. Rar lõñliñ kin juõn kõtan ewãnik iben Anij im kar lelok ñõn ir kejatrikrik eo kin jerkakbiji. (Ais. 25:8; Dan. 12:13, UBS) Bõtab, bwe Anij eo ekwojarjar, Jeova, en maroñ kejerammõn armij ro rejerawiwi ilo wãwen in elap an emõn ear berber ion ta, ekkar ñõn kien eo? Baibel eo ej kemelele: “Eo Anij e ar kwalok E [Jisõs Kraist] bwe En ken mirik, kin tõmak, ilo bõtõktõkin, bwe En bakajen An wãnik kin An kijone jerawiwi ko lok, ilo meanwõr an Anij. Aet, bwe En bakajen An wãnik ilo ien in: bwe En wãnik, im Dri kowãnik eo ej liki Jisõs.”​—Rom 3:​25, 26. *

¹⁷ Jeova ear kejerammõn Jisõs ilo an kar kejerkakbijeik e im lelok ñõn e juõn jerbal eutiejlok jen jerbal eo an kar mokta ke ear ber ilõñ. Kiõ, Jisõs ej lõñliñ kin juõn mour ejjab  wabõnbõn einwõt juõn enjel ilõñ. (Hib. 1:3) Iroij Jisõs Kraist, eo ej Pris Elap im Kiñ, ej wõnmanlok wõt im jibõñ dri kalor ro an ñõn air kaibujuij Anij bwe ewãnik. Im elap ar kamolol bwe Jemeruij ilõñ, Jeova, ej lelok jinekjij ñõn aolep ro rej kõmõne men in im rej kajeoñwe Nejin ilo air tiljek in korijer ñõn E!​—Riit Sam 34:3; Dri Hibru 11:6.

18. Ta eo jenaj etale ilo katak eo tok juõn?

¹⁸ Jen ien ko an Ebel, armij ro retiljek rar lõñliñ kin juõn kõtan ebak iben Jeova kinke rar jerbale tõmak eo air im eor air liki Ine eo kar kalimur kake. Jeova ear jela bwe Nejin enaj drebij wõt an tiljek im bwe mij eo an enaj kalibubu “an lõl jerawiwi.” (Jon 1:​29) Bareinwõt, armij ro im rej mour ranin rej bõk tokjen jen mij eo an Jisõs. (Rom 3: ​26) Inem ta jerammõn ko binmour eo an Kraist emaroñ lewoj ñõn yuk? Eñin men eo jenaj etale ilo katak eo tok juõn.

[Kamelele eo itulal]

Ewi Wãwen Kwonaj Uak?

• Ta aituerõk eo kar bõkmantak kin wãnik eo an Anij?

• Ta eo baptais eo an Jisõs ear kõkkar kake?

• Ta eo mij eo an Jisõs ear kõtõbrõke?

[Kajitõk ko ñan katak]

[Pija ilo peij 9]

Kwojela ke ta eo baptais eo an Jisõs ear kõkkar kake?