Jeova Ej Roñjake Kajitõk ko an Ro Rej Buromõj

EINWÕT an kar kiñ in Israel eo emeletlet Solomon ba, “ien im men in walok rej itok ñõn [kij] otemjej.” (Ekk. 9:​11) Juõn jorran elap ak juõn melejoñ ebin emaroñ lukkun kabwer kij. Ñõn wanjoñok, an juõn eo jej ebake ilo baamle eo ar mij ilo jidimkij emaroñ lukkun kaburomõj kij. Ilo wik ko im aliñ ko elikin an mij, iñjake in buromõj im bãrok emaroñ laplok. Juõn armij emaroñ lukkun buromõj im lemnok bwe ejelok tokjen, im men in emaroñ kõmõn an ebwer in kebak Jeova ilo jar.

Ilo ien rõt kein, eo eburomõj ej aikwij nan in rejañ jen ro jet, air kwalok air itoklimo kake e im yokwe e. Dri jeje sam eo Devid, ear kwalok nan kein rekõkãtõk ke ear al: “Jeova ej kejerkak im drebij ro otemjej re buñ; im kajutõk ro otemjej re kumliklik.” (Sam 145:14) Baibel eo ej ba bwe “mejen Jeova rej etõrlok im etõrtok ilo aolepen lõl, im mõke kwalok E kajur in jibõñ ro burueir re wãppen ñõn E.” (2 Kron. 16:9) Jeova ej ber ‘iben eo e inemõn im etã buruen, bwe en kemour an eo dri etã, im kemour buruen eo eburomõj.’ (Ais. 57:15) Ewi wãwen an Jeova jibõñ im kainemõn ro reburomõj?

“Juõn Nan ilo Ien Ekar”

Juõn ian wãwen ko Jeova ej letok jibõñ ilo ien eo ekar ej ikijen an kajerbal dri Kristian ro jeer im jãter. Baibel eo ej rejañ dri Kristian ro ñõn ‘kaberan ro rebãrok.’ (1 Tes. 5:​14) An dri tõmak ro mõtõd kwalok air itoklimo im yokwe ñõn eo eburomõj emaroñ lukkun kakajur e ilo ien eo ej buromõj im ebwer. Meñe emaroñ karu air bwebwenato iben ak nan in kainemõn ko rej kwaloki ñõn eo eburomõj remaroñ lukkun kõkãtõk e. Kain nan rõt kein remaroñ itok jen juõn eo ear kijenmij ilo ejja wãwen in wõt. Ak remaroñ itok jen juõn mõtõn im ear iion ejja wãwen eo wõt ej iione. Jeova emaroñ jibõñ eo ej bãrok bwe en joko an buromõj ikijen wãwen kein dri Kristian ro jeer im jãter rej kõmõni.

Lemnok kin bwebwenato eo an juõn elder etan Alex, eo im lio belen ear mij ilo jidimkij elikin wõt airro kar mare kinke ear bõk juõn nañinmij ejelok juõn wãwen ñõn kamarmire. Juõn eo ej itoitak im lolok congregation ko ear kwalok nan in kainemõn ko ñõn Alex. E bareinwõt ear mij lio belen, bõtab tokelik ear bar mare. Dri lotok in ear kwalok kin wãwen ear lukkun buromõj. Ear  emõn an mour ke ear ber iben ro jet ilo kwalok nan im ilo kwelok ko an congregation eo. Bõtab, ke ear dreloñ ilo rum eo an im kiil kejem eo, ear lukkun buromõj kin an mõke ian. Alex ej ba, “Ear menin kainemõn ñõn jela bwe ejjab ña wõt ak ro jet rej bar bõk iñjake rõt kein.” Emol, “juõn nan ilo ien ekar” emaroñ einwõt juõn menin kainemõn ilo ien buromõj.​—Ken. 15:23.

Bar juõn elder im ejela kajen jet ian ro me rar luji ro beleir ilo mij ear kwalok jet nan in rejañ ko ñõn Alex. Ilo tiriamokake im joij, ear kwalok bwe Jeova ejela kin iñjake im aikwij ko ar. Elder in ear ba, “Ilo aliñ ak yiõ ko rej berotok, elañe kwoj lo bwe kwoj aikwiji juõn rejetam, juõn jerammõn Jeova ej kebellok ñõn kwe kiõ ej bwe kwomaroñ bar mare.” Ilo mol, ejjab aolep ro im ear mij eo beleir im tokelik rej kõnan mare enaj biruru ñõn air maroñ bar mare. Bõtab, ke ej lemnok kin nan ko an brother eo, Alex ear ba, “An juõn kakememej yuk bwe mare ej juõn menin letok jen Jeova ej jibõñ yuk ñõn jolok lemnok eo ebwir bwe elañe kwoj bar mare, kwojjab tiljek ñõn eo kar beleõm ak ñõn karõk eo an Jeova kin mare.”​—1 Kor. 7:​8, 9, 39.

Dri jeje sam eo Devid, eo im ear iion elõñ melejoñ ko rebin, ear ba: “Mejen Jeova ñõn ro remõn, im lojiliñin rebellok ñõn air kir.” (Sam 34:15) Jemaroñ liki bwe Jeova emaroñ uake jar ko an ro reburomõj ilo ien eo ekkar ikijen nan in kainemõn ko rejoij an dri Kristian ro mõtair. Wãwen in ñõn jibõñ ro reburomõj elap an aurõk im keie.

Bõk Jibõñ Ikijen Kwelok ko an Kristian

Ebiruru an armij eo eburomõj bõk lemnok ko rejjab emõn im remaroñ kõmõn bwe en kamakelok ian. Bõtab, Jabõn Kennan Ko 18:1 ej kakkil: “Eo ej mõkelok ian, ej kabukot kõnan eo an, im ej lej nae meletlet otemjej e keie.” Alex ej ba: “Emol men in bwe ñe kwoj luji eo beleõm ilo mij, lemnok eo am eobrõk kin men ko rejjab emõn.” Ej kememej an kar kajitõk iben mõke: “ ‘Eor ke men ko jet remõn in kar kõmõni ñõn e?  Imaroñ ke kar kalaplok aõ lemnok kake e im melele kin iñjake ko an?’ Iar jab kõnan bwe in mõke iaõ im ejelok beleiõ. Elukkun bin ñõn bwijrõk jen am lemnok ilo wãwen in kinke ran otemjej kwoj lo am mõke iam.”

Men eo elaplok an eo eburomõj aikwiji kiõ jen kar mokta ej kõmao ko remõn. Emaroñ lo men in ilo kwelok ko an congregation eo. Ilo kwelok ko, jej bõk lemnok ko remõn im rekõkãtõk an Anij.

Kwelok ko an congregation eo rej jibõñ kij ñõn bõk juõn lemnok ejime kin wãwen eo jej iione. Ilo ar roñjake im kalomõnlokjen kin ennan ko jen Baibel eo, ej jibõñ kij ñõn jab lemnok wõt kin ar buromõj ak bwe jen lemnok kin aurõkin aituerõk ko kar bũkmantak kin jime in iroij potata eo an Jeova im kokwojarjar ãt eo etan. Bareinwõt, ñe jej katak kin Jeova ilo kwelok ko, ej menin rejañ ñõn jela bwe elap an Jeova jela im melele kin wãwen eo jej iione, meñe ro jet rejaje kake im rejjab melele kin iñjake ko ar. Jeova ejela bwe “kin buromõj in buruen, emwij rupe an.” (Ken. 15:13) Anij eo emol ekõnan jibõñ kij, im men in ej lujur kij im kakajur kij ñõn kijenmij wõt.​—Sam 27:14.

Ke ear iion elap ijjibed jen dri kijirãt ro an, Kiñ Devid ear kir ñõn Anij: “Aõ e kijelok ilo ña; buruõ ilo ña e men in jeebeplok.” (Sam 143:4) Ekkã an wãwen ko rebin kõmõn bwe juõn armij en mõjino ilo enbwin im iñjake, im bareinwõt kokkure buruen. Jorran ko remaroñ itok ikijen nañinmij ko ak ñe juõn ej utame ilo enbwin. Jemaroñ liki bwe Jeova enaj jibõñ kij ñõn kijenmij. (Sam 41:​1-3) Meñe ranin Anij ejjab kejmour juõn ilo kabwilõñlõñ, ak ej lelok kajur im meletlet eo ej aikwiji ñõn an kijenmij ilo abañ eo ej ber ie. Kememej bwe ke Devid ear iion melejoñ ko rebin, ear reilok ñõn Jeova kin jibõñ. Ear al im ba: “I kememej ran ko mokta: I kalomõnlokjen kin men ko Kw’ar kõmõnmõni; ij lemnok kin jerbal ko an peiõm.”​—Sam 143:5.

Kinke kar je nan kein rekakõrmol ilo Nan eo an Anij kin lemnok im iñjake ko an armij, men in ej kalikar bwe Jeova emelele kin wãwen iñjake ko ar. Nan kein rej kamol bwe ej roñjake kij ñe jej eowore. Elañe jej kõtlok bwe Jeova en jibõñ kij, ‘enaj kejbãrok kij.’​—Sam 55:22.

“En Jab Jokwõr Ami Jar”

Jemes 4:8 ej ba: “Komin druaklok ñõn Anij, im E naj druakwoj ñõn kom.” Juõn wãwen ñõn druaklok ñõn Anij ej ikijen ar jar ñõn e. Dri jilik Paul ej rejañ kij bwe en ‘jab jokwõr ar jar.’ (1 Tes. 5:​17) Meñe ebin ar kemeleleiki iñjake ko ar, ak kajur eo an Anij ej “akwelap kin kij ilo ñõr ko, je ban konono kaki.” (Rom 8:​26, 27) Emol, Jeova emelele kin iñjake ko ar.

Monika, eo ej lo mõnõnõ kin juõn jimjera ebak iben Jeova, ej ba: “Ikijen aõ jar, riiti Baibel eo, im katak iba mõke, men kein rar jibõñ iõ ñõn druaklok ñõn Jeova einwõt juõn mõta ij ebake. Joñõn aõ lukkun ebake e ij kile an jibõñ iõ aolep ien. Ej menin kainemõn ñõn jela bwe meñe ijjab maroñ kemeleleik ta eo ij iñjake ilo tuloa ak Jeova emelele. Ijela bwe ejelok jemlokõn an joij im an kejerammõn kij.”

Inem, jen mõnõnõ in bõk nan in kainemõn ko rejoij an dri Kristian ro mõtar, jerbale nan in kakabilek im kakememej ko jej roñjaki ilo kwelok ko an Kristian, im kwalok aolepen buruer ñõn Jeova ilo jar. Aolep men kein rej wãwen ko Jeova ej kajerbali ñõn kwalok an kea kin kij. Ilo an konono jen wãwen eo e mõke ear iione, Alex ej ba, “Elañe jej kõmõne ijo kwonad ñõn jerbali aolep menin letok kein jen Jeova ñõn kakajur wõt kõtan eo ar iben, enaj or iber “maroñ eo e kanuij lap” ñõn ar kijenmij iomin jabrewõt melejoñ jej jelmaiki.”​—2 Kor. 4:7.

[Box/Pija ilo peij 18]

Kainemõn ñõn Ro Rej Buromõj

Buk in Sam eobrõk kin lemnok im iñjake ko an armij ro im bareinwõt nan in kainemõn ko im rej kalikar bwe Jeova ej roñjake jar ko an ro rej buromõj. Lale jet ian nan ko an armij ro itulõl:

“Ilo aõ jorran I ar kir ñõn Jeova, im I ar lamij ñõn aõ Anij. E ar roñjake ainikiõ jen tempel eo An, im aõ kir ear dreloñ ilo lojiliñin.”​—Sam 18:6.

“Jeova ej ebak ñõn ro erup burueir, im Ej lomoren ro retã wõt ilo air.”​—Sam 34:18.

“[Jeova] ej kãejmour ro erup burueir; Ej kitimi kinej ko kinjeir.”​—Sam 147:3.

[Pija ilo peij 17]

Juõn “nan emõn” emaroñ juõn menin kainemõn ilo ien buromõj!