Kõmmani Men ko Rej Kabuñburuen Jeova Enaj Tellok Kij ñan Mour Indrio

“Iroij, kwoj kejerammon ro rej bokake yuk; Am joij ej kejbarok ir einwõt juõn likibbijñak.”—SAM 5:12, UBS.

1, 2. Ta eo Ilaija ear kajitõk ibben kõrã eo bwe en kõmmane, im ta eo ear kalimuri bwe Anij enaj kõmmane?

 KÕRÃ eo im ladrik eo nejin rar lukkun kwole. Dri kanan eo an Anij ear bareinwõt kwole. Ke kõrã jen Zarephath eo im ejako leo belen ear bojak in kejo kijeek eo an, dri Kanan Ilaija ear kajitõk limen aibõj im kijen bilawã. Kõrã in ear mõnõnõ in lelok limen aibõj, bõtab ear jab lelok kijen kinke ewor ‘wõt jidrik bilawã ukood ibben ilo juõn bowl, bõkan wõt juõn bã, im jidik oil in olive ilo juõn bato.’ Ear ba ñan dri kanan in bwe ejabwe mõñã ibben ñan an maroñ najirik e.—1 Kiñ 17:8-12, UBS.

² Dri kanan Ilaija ear wõnmanlok wõt im ba: “Mokta kwon kematte juõn loaf jidrikdrik im bõktok ñõn ibba, innem kwon kematte bwe eo ñõn komro ladrik eo nejũm. Bwe eñin nan eo Iroij, Anij in Israel, ej ba: ‘Ejamin maat bilawã jen bowl eo kab oil jen bato eo.’”—1 Kiñ 17:13, 14, UBS.

3. Ta bebe eo ibbed im jej aikwij kõmmane?

³ Ewor juõn bebe elaplok im eaurõklok kõrã in ear aikwij kõmmane jen an baj bebe in lelok ekkan eo ejabwe ibben ñan dri kanan eo. En ke liki Jeova bwe en kejbãrok e im ladrik eo nejin? Ak en ke likit aikwij ko an mokta jen an kõmmane men eo ej kabuñburuen Jeova, im kaurõk kõtan eo an ibben? Einwõt kõrã in, ewor juõn jokãlet ibbed im jej aikwij bar kõmmane. Jen ke kwalok bwe jej kõnan kõmmani men ko rej kabuñburuen Anij ak jen ke likiti kõnan im aikwij ko ad moktata? Elõñ un ko unin ad aikwij liki Anij im jerbal ñan e. Im elõñ buñten ne ko jemaroñ kõmmani ñan ad kabuñburuen.

 ‘Ekar ñan Kwe Anij bwe Ren Kabuñ ñan Yuk’

4. Etke ej tellokin Jeova bwe jen kabuñ ñan e?

⁴ Ej tellokin Anij bwe en kõtõmene an armij ro kabuñ ñan e ilo wãwen eo ej kabuñburuen. Jet ian dri karejar ro an rej kamole men in ilo air ba: “Ekar ñõn Kwe, O Iroij im am Anij, bwe kwon bõk aibujuij im nebar im kajur; bwe kwar kõmõnmõn men ko otemjej, im kin ankilam rar ber im emwij kõmõnmõni.” (Rev. 4:11) Kinke ear kõmmanman men otemjej, ej tellokin bwe jen kabuñ ñan e.

5. Ta juõn ian un ko raurõk jej aikwij karejar ñan Jeova, im etke?

⁵ Un eo juõn unin ad aikwij karejar ñan Jeova ej kinke elap an yokwe kij. Baibel eo ej ba bwe “Anij e ar kõmõnmõn armij ilo wãwen wõt E, ilo wãwen Anij e ar kõmõnmõn e; man im kõra E ar kõmõnmõn i.” (Jen. 1:27) Kajjojo armij ej aikwij make kãlet elañe enaj kabuñ ñan Jeova, kinke ewor air maroñ ñan kõmmane bebe in. Jeova ej jemen aolep kinke ear letok mour ñan kij wõj. (Luk 3:38) Einwõt juõn jemen eyokwe, ear kõmmanman men otemjej ñan an kabwe aikwij ko an ro nejin bwe ren mõnõnõ. “Ej kõtak al  . . . im kowut” ion lal in eaibujuij bwe en edrek ekkan ko ie.—Matu 5:45.

6, 7. (a) Ta jorrãn eo Adam ear bõktok ion aolep ro inen? (b) Ta eo binmour eo an Kraist enaj kõmmane ñan aolep ro rej kabuñburuen Anij?

⁶ Jeova ear bareinwõt jibañ kij jen men ko renana im rej walok itok wõt jen jerawiwi. Ro nejin Adam rar jab maroñ bõk jerammõn eo ñan mour indrio kinke ear bõke jerammõn in jen ir ilo an kar jumae Jeova. Kin bebe eo an ekibbon, ear kõmman bwe ro nejin ren jab wãppen. Eñin unin armij rej iion buromõj, nañinmij, im tokelik mij. Bwe juõn dri kamakoko en maroñ anemkwoj, juõn ej aikwij kõllã wõnãn. Ilo ejja wãwen in lok wõt, Jeova ear kõllã wõnad bwe jen maroñ anemkwoj jen aolep men kein renana im rej walok itok wõt jen ad jerawiwi. (Riit Dri Rom 5:21.) Jisõs Kraist ear kõmmanman ankilan Jemen ilo an kar “lelok An mour bwe En binmour ñõn ro relõñ.” (Matu 20:28) Mõttan jidrik aolep ro rej kabuñburuen Anij renaj bõk aolepen jerammõn ko jen binmour eo an Jisõs.

⁷ Jeova, Dri Kõmmanman eo ad, ear kõmmane aolep men kein ñan kij bwe jen maroñ mour ilo mõnõnõ. Elañe ej buñburuen ibbed, jenaj loe wãwen an namejelan aolep jorrãn kein rej walok ñan armij ro. Jeova enaj kwalok ñan kij kajjojo wãwen “an lelok jinekjij ñõn ro rej kabukot E.”—Hib. 11:6.

‘Ro Drom Renaj Mõnõnõ im Lewõj Ir Make’

8. Ta eo jemaroñ katak jen bwebwenato in an Aiseia ilo ad karejar ñan Anij?

⁸ Ñan kabuñburuen Jeova ej aikwij jimwe ad kajerbal maroñ eo ad ñan kãlet kinke ejjab jibed jabrewõt bwe ren karejar ñan e. Ilo ran ko an Aiseia, Jeova ear kajitõk: “Wõn eo In jilkinlok e, im wõn eo e kõnan ilok kin kim?” Jeova ear kwalok kautiej ñan dri kanan in ilo an kar kõtlok bwe en make kãlet. Baj antonelok mõk joñan an Aiseia kar mõnõnõ ke ear uak im ba: “Ña e; Kwon jilkinlok iõ.”—Ais. 6:8.

9, 10. (a) Ewi wãwen ad aikwij karejar ñan Anij? (b) Etke ejimwe bwe jen kabuñ ñan Jeova kin aolepen burued?

⁹ Ej an armij ro bebe elañe rekõnan karejar ñan Anij ak jaab. Jeova ekõnan bwe jen karejar ñan e jen burued. (Riit Joshua 24:15.) Jeova ejjab buñburuen elañe armij ro rej makoko ilo air karejar ñan e, im ejjab mõnõnõ ibben ro im unin air karejar ñan e ej kinke rekõnan kabuñburuen armij ro jet. (Kol. 3:22) Ejjab buñburuen Jeova ibben ro  rejjab karejar ñan e “kin aolepen burueir” kinke rej kõtlok bwe men ko rejitokjeir ren kamad ir. (Sam 119:2) Jeova ejelã bwe ad kabuñ ñan e kin aolepen burued ej men eo emmõn ñan kij. Moses ear rejañ dri Israel ro bwe ren kãlet mour ilo air ‘yokwe Jeova Anij, bokake ainiken, im edrep ñan E.’—Dut. 30:19, 20.

¹⁰ Kiñ Devid ear al ñan Jeova im ba: ‘Ro drom renaj mõnõnõ im lewõj ir make ilo ran in Am kajur: ilo wõlio ko in kwojarjar, jen lojien ejiboñ: ibõm molawi an ien emõn drer.’ (Sam 110:3) Elõñ armij ro rainin rej likit moktata ilo mour ko air mweiuk im menin kamõnõnõ ko. Ak ro rej yokwe Jeova, jerbal eo air ñan Jeova ej men eo moktata ilo mour ko air. Air kijejeto ilo jerbal in kwalok nan ej lukkun kalikar kin men eo elaptata air kaurõke ilo mour ko air. Elap air liki bwe Jeova enaj kabwe aikwij ko air ran otemjej.—Matu 6:33, 34.

Menin Katok ko Anij Ej Buñburuen Kaki

11. Ta eo ej walok ñe dri Israel ro rej lelok menin katok ko rekkar ñan Jeova?

¹¹ Ilo Kien Moses, armij ro an Anij rar katok kin menin katok ko rekkar bwe ren maroñ kabuñburuen Anij. Book in Livitikõs 19:5, ej ba, “Elañe komij mõn juõn menin mour bwe en ami menin katok in kelajrak, innem komin kejbarok kien ko iar liwõj bwe in mõnõnõ kin menin katok eo.” Ej wõnmanlok wõt im ba: “Im ñe komij katok men in katok kin kamolol ñõn Jeova, komin katok kake bwe komin kabuñburuen.” (Liv. 22:29) Ke dri Israel ro rar katok kin menin mour ko ilo lokatok eo, baat eo ear einwõt juõn “bwin enno ñõn Jeova.” (Liv. 1:9, 13) Ear buñburuen kin an armij ro kõmmane men kein kin air yokwe e. (Jen. 8:21) Ilo kien kein an kar Jeova ñan dri Israel ro, ewor men ko jemaroñ katak jeni. Ro rej lelok menin jurtak ko rekkar ñan Jeova rej kabuñburuen. Ta menin jurtak ko ilo kõkkar jej lelok ñan Jeova ilo ran kein ad? Jen etale men kein ruo ilo mour ko ad, mwilid im wãwen ad konono.

12. Ta ko remaroñ kõmman bwe enbwinid en jab juõn menin jurtak erreo iman mejen Anij?

¹² Ilo letter eo an ñan dri Rom ro, dri jilik Paul ear ba: “Komin lelok enbwinemi men in jurtak emour, ekwojarjar, men in kabuñburuen Anij.” (Rom 12:1) Ñan kabuñburuen Anij, juõn ej aikwij kejbãrok enbwinin bwe en erreo. Elañe enaj kattone menin jurtak eo an, enbwinin, kin an kõbatat, meme betel nut, kajerbal uno ko rekajur, ak kadrek, eban erreo iman mejen Anij. (2 Kor. 7:1) Bareinwõt, kinke armij eo ej “lũñ ej mõke jerawiwi nae enbwinin,” kin men in  Jeova eban buñburuen kake menin jurtak eo an. (1 Kor. 6:18) Ñan kabuñburuen Anij, juõn ej aikwij ‘kwojarjar ilo men otemjej ej kõmmõni.’—1 Pit. 1:14-16, UBS.

13. Etke ekkar bwe jen nebar Jeova?

¹³ Wãwen ad konono ej bar juõn menin jurtak eo im emaroñ kabuñburuen Jeova. Ro rej yokwe Jeova rej nebar e ilobwilij im ilo moko imweir. (Riit Sam 34:1-3.) Riit Sam 148-150, im lale jete alen an japter kein rejañ kij ñan nebar Jeova. “Kom ri wãnik . . . komin nebare, kom otemjej ro rej bokake e!” (Sam 33:1, UBS) Jisõs Kraist, eo ej juõn joñok emmõn, ear kalikar kin joñan an aurõk bwe jen nebar Anij ilo ad kwalok nan kin nuuj eo emõn.—Luk 4:18, 43, 44.

14, 15. Ta ko Hosea ear jiroñ dri Israel ro bwe ren kõmmane ñan Jeova, im kar ta lemnak eo an Jeova?

¹⁴ Jej kwalok ad yokwe Jeova im kõnan kabuñburuen ilo ad kijejeto kin jerbal in kwalok nan. Ñan wanjoñok, lemnak kin wãwen an dri kanan Hosea kar rejañ dri Israel ro rar jab kabuñburuen Jeova kin air kar kabuñ ñan ekjab. (Hos. 13:1-3, UBS) Ear jiroñ ir ñan kajitõk im akwelap ñan Jeova: “Jolok amuij jerawiwi, im kwon eoroñ am jar, im kim naj nebar yuk.”—Hos. 14:1, 2, UBS.

¹⁵ Ewi wãwen an kar Jeova lemnak kin jar in nebar ko an armij in Israel ro? Ear ba: “Inaj yokwe ir kin aoleben buruõ.” (Hos. 14:4, UBS.) Ro rar lelok menin jurtak kein ñan e, Jeova ear jolok air bwid, buñburuen kake ir, im rar erom ro jeran.

16, 17. Elañe tõmak eo an juõn armij ilo Jeova ej lujur e ñan an kwalok nan, ta lemnak eo an Jeova kin jerbal ko an armij in?

¹⁶ Jen kar jinoin, juõn wãwen elukkun aurõk ilo ad kabuñ ñan Jeova ej ilo ad nebare ilobwilij. Joñan an kar men in lukkun aurõk ibben dri jeje Sam ear akwelap ñan Anij im ba: “Jeova, Kwon bõk men in jurtak ko in lõniõ.” (Sam 119:108) Ta kin kij ranin? Aiseia ear kanan bwe juõn jar in armij elap ilo ran kein ad renaj ‘kwalok nebar ko an Jeova im bõktok men in kabuñburuen ion lokatok eo An.’ (Ais. 60:6, 7) Emwij an jejjet kitien kanan in ilo ran kein ad kinke elõñ million armij ro rej lelok ñan Anij ‘wijtak ien otemjej im leen tier rej kwalok kin etan.’—Hib. 13:15.

¹⁷ Ak ta kin kwe? Kwoj ke lelok menin katok ko rekkar ñan Anij? Elañe kwojjab, kwonaj ke kõmman oktak ko bwe kwon maroñ bõk kwonam ñan nebare Jeova ilobwilij? Elañe tõmak eo am ilo Anij ej lujur yuk ñan kwalok kin nuuj eo emmõn, menin jurtak in am “enaj kabuñburuen Jeova elap jen kau.” (Riit Sam 69:30, 31.) Ejelok berre bwe ilo wãwen in, kwonaj kabuñburuen Jeova im enaj “mõnõnõ kake menin katok ko” am. (Ezek. 20:41, UBS) Kwonaj lukkun mõnõnõ elañe enaj walok men in.

‘Jeova Enaj Kajerammõn Ro Rej Bokake E’

18, 19. (a) Ta eo ekkã an armij ro rainin lemnak kin jerbal ko an Anij? (b) Ta eo enaj walok ñan kij elañe jejjab kabuñburuen Anij?

¹⁸ Einwõt armij ro ilo ran ko an Malkai, elõñ armij ro ranin rej ba: “Ejjelok tokjen ad jerbal ñõn Anij. Ta tokjen ad kõmmõni men ko ej ba?” (Mal. 3:14, UBS) Kin air kõtlok bwe kõnan ko air kin mweiuk en tel ir, rej lemnak bwe karõk eo an Anij eban jejjet  kitien im ejelok tokjen kien ko an. Rej lemnak bwe jerbal in kwalok nan ejjab aurõk im elap an kabnõnõik armij ro.

¹⁹ Lemnak rõt in ear jino walok ilo jikin kallip in Iden. Setan ear riabe Iv ñan an lemnak bwe ejelok tokjen mour eo Jeova ear lelok ñan e, im ear bareinwõt kabo e bwe en jab kabuñburuen Anij. Rainin elap an Setan mone armij ro ñan tõmak bwe ejelok tokjen ñan kõmmanman ankilan Anij. Bõtab, Adam im Iv rar kile bwe irro naj mij kin airro kar jab kabuñburuen Anij. Men in enaj bar walok ñan ro im rej lore joñok in enana.—Jen. 3:1-7, 17-19.

20, 21. (a) Ta eo kõrã in Zarephath eo ejako belen ear kõmmane, im ewi wãwen an kar Anij kajerammõne? (b) Ewi wãwen jej aikwij kajeoñ joñok in an kõrã in ejako belen, im etke jej aikwij kõmmane men in?

²⁰ Jen kalomõnlokjen kin wãwen ko reoktak rar walok ñan Adam im Iv im ñan kõrã in Zarephath eo ejako leo belen. Elikin an kar roñjake nan ko rekõketak an Ilaija, kõrã in ear ilok im kõmatte bilawã eo im ear mokta lelok kijen dri kanan in meñe edrik. Elikin men in, Jeova ear kajejjet kalimur eo an ñan kõrã in. Baibel ej ba: “Lio ear ilok im kõmmõn einwõt an Elijah kar jiroñe, im ekar wor kijeir iumin elõñ ran. Ear jab maat bilawe jen bowl eo im oil jen bato eo, einwõt an Iroij kar kallimur ñõn Elijah.”—1 Kiñ 17:15, 16, UBS.

²¹ Kõrã in ear kõmmane juõn men me jet wõt armij rainin rej mõnõnõ in kõmmane. Ear lukkun tõmak bwe Anij enaj kejbãroke, im Jeova ear jab kejole. Bwebwenato in im bwebwenato ko jet ilo Baibel eo rej kwalok bwe jej aikwij liki Jeova. (Riit Joshua 21:43-45; 23:14.) Bwebwenato ko an Dri Kennan ro an Jeova rainin rej bareinwõt kwalok bwe eban kejole ro rej kabuñburuen.—Sam 34:6, 7, 17-19. *

22. Etke elukkun aurõk bwe jen jab aibedbed in kabuñburuen Jeova?

²² Ej ebaktok ran in ekajet eo an Anij “ion ro otemjej rej jokwe ion mejen aolepen lõl.” (Luk 21:34, 35) Ejelok juõn enaj joor jen ran in. Nan kein an Jisõs elaplok air aurõk jen mweiuk im mweie ko an lal in. Ear ba: “Komin itok, kom ro Jema ej kejerammõn ir! Itok im amnak ilo ailiñ eo ear bojak.” (Matu 25:34, UBS) Ejelok berre, Jeova enaj ‘kejerammon ro rej bokake; An joij ej kejbarok ir einwõt juõn likibbijñak.’ (Sam 5:12, UBS) Kin men in, kwon kajitõk ibbõm make, ‘Ij ke kabuñburuen Anij?’

[Kamelele eo itulal]

Kwoj Kememej Ke?

• Etke ekkar bwe jen kabuñ ñan Jeova kin aolepen burued?

• Ta menin jurtak ko ilo kõkkar Jeova ej mõnõnõ kaki rainin?

• Etke jej aikwij lelok nan in nebar ko ñan Jeova?

• Etke jej aikwij kabuñburuen Jeova?

[Kajitõk ko ñan katak]

[Pija ilo peij 13]

Ta jokãlet eo dri kanan eo an Anij ear bõkmantak ñan kõrã eo ejeramel im emij leo belen?

[Pija ilo peij 15]

Ta jerammõn ko jej bõki ilo ad nebare Jeova?

[Pija ilo peij 17]

Jeova enaj kajerammõn yuk elañe kwoj liki e kin aolepen buruõm