Ekkar Ñan Baibõl̦ Eo

Kwõj Aikuj Ke Abwinmake?

Ilo jet jikin ko ilo Nigeria im China armej ro rej tõmak bwe rej aikuj kautiej ri mij ro. El̦aññe rejjab kalibwin ri mij eo ekkar ñan m̦anit ko aer, ri mij eo enaaj wal̦o̦k im ko̦kkure ak mõn er.

ELÕÑ armej ro ipel̦aakin lal̦ in rej tõmak bwe ñe armej eo emij, ewõr jetõb ak an me ej mour m̦aanl̦o̦k wõt. Rej bareinwõt tõmak bwe ri mij eo emaroñ wal̦o̦k im kõjparok ak ko̦kkure er.

Em̦ool ke men in? Ewõr ke jetõb ak an me ej mour m̦aanl̦o̦k wõt ãlikin an juon armej mij? Ri mij ro remaroñ ke wal̦o̦k im kõjparok ak ko̦kkure kõj? Ekkar ñan Baibõl̦ eo, ta eo ej wal̦o̦k ñan armej ro ñe rej mij?

Ro Remij Ejjel̦o̦k Aer Jel̦ã

Baibõl̦ eo ej ba bwe ‘ro remij ejjel̦o̦k aer jel̦ã.’ (Ekk. 9:5) Baibõl̦ eo ejjab kajerbal naan ko repen ilo an kõmel̦el̦e kõn mij. Ej kajerbal naan ko me epidodo ad mel̦el̦e kaki, ãinwõt “kiki.” (Sam 13:3) Ñan waanjoñak, ke juon leddik 12 an iiõ ear mij Jijej ear ba: ‘E jab mij, ak ej kiki.’ Armej ro rar ‘kajjirere kake, kõn aer jel̦ã bwe e mij.’ Meñe leddik eo ear mij, Jijej ear kõmour e ãinwõt ñe leddik eo ear kiki.—Luk 8:51-54.

Ke Lazerõs ear mij Jijej ear kajerbal ejja naan in wõt, “kiki.” Jijej ear jiroñ ri kal̦oor ro an bwe enaaj ilo̦k im “kọruj e jān [an] kiki.” Ri kal̦oor ro an rar jab mel̦el̦e kõn naan kein an Jijej. Kõn men in Jijej ear ba ñan er ilo alikkar, ‘Lazerõs e mij.’ Rijjelõk Paul ear bareinwõt kwal̦o̦k bwe ro “rej kiki” ilo mij renaaj jerkakpeje ilo iien eo Anij ear karõke.—Jon 11:11-14; 1 Tes. 4:13-15.

Ejjel̦o̦k eoon ilo Baibõl̦ eo ej kwal̦o̦k bwe ewõr juon an ak jetõb ippãn armej ro im ej mour m̦aanl̦o̦k ãlikin aer mij. Kõn men in, ejjel̦o̦k unin ad aikuj abwinmake. Katak in ear itok jãn ia? Wõn eo ekõn̦aan bwe armej ro ren abwinmake?

Juon Katak Eriab

Kabuñ ko reriab rej katakin armej ro bwe ñe armej ro rej mij, ilo m̦ool rejjab lukkuun mij. Katak in ear wal̦o̦k jen kar jinoin. Ñan waanjoñak, ke irooj ro an Ijipt rar mij armej ro rar bareinwõt m̦an ri jerbal ro aer. Etke? Bwe ren jipañ irooj in aer ilo mour ko aer tokelik.

Elõñ armej ro rej abwinmake kõnke jetõb ro rej kabõn̦õn̦õik er. Rej tõmak bwe jetõb rein rej ro im rar mij kõnke  ãindein an armej ro ba ñan er. Rej tõmak bwe jetõb rein rej ro nukuer me rar mij im rej wal̦o̦k kõn aer jab m̦õn̦õn̦õ ippãer. Bõtab, Baibõl̦ eo ej kalikkar bwe men in ejjab m̦ool. Jetõb rein rej enjel̦ ro me rar oktak im jum̦ae Anij. Enjel̦ rein renana rej kabõn̦õn̦õik im kalõl̦ño̦ñ armej ro.—Luk 9:37-43; Ep. 6:11, 12.

Baibõl̦ eo ej kwal̦o̦k bwe Setan ej “jemãn riab.” Ej “ukõt e make bwe en einwõt juõn enjel in meram.” E im enjel̦ ro an renana rej “m̦on̦i aolepen lal̦.” (Jon 8:44; 2 Kor. 11:14, UBS; Rev. 12:9) Katak in me ro re mij remaroñ wal̦o̦ktok im ko̦kkure armej ro ej juon katak eriab. Katak in ear itok jãn Setan.

Armej ro im rej tõmak katak ko rem̦ool jãn Baibõl̦ eo rejjab l̦orak ilo katak ko reriab an Setan. Armej rein rej kile bwe Setan ej kajjioñ m̦on̦e armej ro ñan aer tõmak bwe ro remij remaroñ wal̦o̦ktok ñan ro remour. Rej tõmak naan ko ilo Baibõl̦ eo me ej ba: “Ro re mour re jel̦ã bwe renaaj mej; a ro re mej ejjel̦o̦k aer jel̦ã.” (Ekk. 9:5) Aet, Baibõl̦ eo ej kwal̦o̦k katak ko rem̦ool kõn ro remij!—Jon 8:32.

EWI AM̦ L̦ÕMN̦AK?

◼ Ewõr ke an ro remij jel̦ã?—Ekk. 9:5.

◼ Wõn eo ekõn̦aan bwe armej ro ren tõmak bwe ri mij ro remaroñ wal̦o̦ktok?—Jon 8:44.

◼ Ia eo jemaroñ lo katak ko rem̦ool kõn ro remij?—Jon 8:32; 17:17.

[Caption on page 7]

Wõn ro rej kabwinmakeik armej ro? Enjel̦ ro renana