Kajoor eo an Anij Ej Ke Tõl Eok?
Kajoor eo an Anij Ej Ke Tõl Eok?
‘Em̦m̦an ñe Kwõj kajerbal kajoor eo Am̦, Kwõn tõl eõ ilo ãne in wãnõk.’—SAM 143:10.
1, 2. (a) Kwal̦o̦k jet wãween ko me Anij ear kajerbal kajoor eo an ñan jipañ im tõl ro ri karejaran ilo iien ko etto im ilo raan kein. (b) Anij ej ke kajerbal kajoor eo an ilo iien ko rel̦ap wõt? Kõmmel̦el̦e.
TA EO ejiktok ilo l̦õmn̦ak eo am̦ ñe kwõj roñ kõn wãween an Anij kajerbal kajoor eo an? Kwõj ke l̦õmn̦ak kõn iien ko me Anij ear jipañ Gideon im Samson bwe ren maroñ kõm̦m̦ani men ko rekabwilõñlõñ? (Eka. 6:33, 34; 15:14, 15) Bõlen kwõj l̦õmn̦ak kõn ro jeid im jatid ilo iien ko an rijjelõk ro im kõn aer peran in kwal̦o̦k naan. Bareinwõt ke Stipen ear aenõm̦m̦an wõt ke ej kwal̦o̦k m̦ool eo ñan ro im rar ekajete. (Jrb. 4:31; 6:15) Ak ta kõn raan kein ad? Ilo kweilo̦k ko rel̦ap ro jeid im jatid jãn elõñ aelõñ ko rej lañlõñ im m̦õn̦õn̦õ ippãn doon. Ilo jet aelõñ ko ro jeid im jatid rej tiljek wõt meñe rej kalbuuj er kõn aer jab bõk kun̦aaer ilo m̦akũtkũt ko an kien. Bareinwõt ekanooj l̦ap tõprak ko ilo jerbal in kwal̦o̦k naan ipel̦aakin lal̦. Men kein otemjej rej kwal̦o̦k kõn wãween ko me Anij ej kajerbal kajoor eo an.
2 Anij ej ke kajerbal kajoor eo an ilo iien ko rel̦ap wõt? Jaab. Baibõl̦ eo ej ba bwe ro im rej Kũrjin rej ‘etetal kõn kajoor eo an Anij’ im ‘kajoor eo an Anij ej tõl er.’ Bareinwõt ej ba bwe rej ‘mour kõn kajoor eo an Anij.’ (Ga. 5:16, 18, 25) Naan kein rej kalikkar bwe Anij emaroñ kajerbal kajoor eo an bwe en tõl kõj iien otemjej. Kajjojo raan jej aikuj akwel̦ap ñan Jeova bwe en kajerbal kajoor eo an ñan tõl kõj. Enaaj alikkar ilo wãween ad l̦õmn̦ak, kõnono im men ko jej kõm̦m̦ani. (Sam 143:10) El̦aññe jej kõtl̦o̦k bwe kajoor an Anij en tõl kõj, jenaaj maroñ jebar leen ko rej wal̦o̦k jãn kajoor eo an. Kõn men in jenaaj maroñ in kakajoor ro jet im bõktok nõbar ñan Anij.
3. (a) Etke eaorõk bwe kajoor eo an Anij en tõl kõj? (b) Ta kajjitõk ko jenaaj uwaaki ilo katak in?
3 Etke eaorõk bwe kajoor eo an Anij en tõl kõj? Kõnke ewõr bar juon men im ej kajjioñ tõl kõj. Men in ej jerbal n̦ae kajoor eo an Anij. Ta in? Baibõl̦ eo ej ba bwe ej ‘kõn̦aan ko an armej.’ Kõn̦aan kein rej wal̦o̦k kõn ad jab weeppãn im bõdañe Adam. (Ga. 5:17, UBS) El̦aññe jekõn̦aan bwe kajoor eo an Anij en tõl kõj, ta eo jej aikuj kõm̦m̦ane? Ewõr ke men ko jemaroñ kõm̦m̦ani ñan ad jum̦ae kõn̦aan ko ad renana? Jenaaj uwaaki kajjitõk kein ñe jej etali leen ko jet rej wal̦o̦k jãn kajoor an Anij, ãinwõt, ‘meanwõd, jouj, em̦m̦an, tõmak, ineem̦m̦an im jel̦ã irooj iood make.’—Ga. 5:22, 23.
Ineem̦m̦an im Meanwõd Rej Kõjparok Aenõm̦m̦an ilo Congregation Eo
4. Ewi wãween ineem̦m̦an im meanwõd rej kõjparok aenõm̦m̦an ilo congregation eo?
4 Riit Kolosse 3:12, UBS. El̦aññe jej kwal̦o̦k ineem̦m̦an im meanwõd, men in enaaj kõjparok aenõm̦m̦an iloan congregation eo. Wãween kein ruo rej jipañ kõj bwe jen jouj ñan ro jet im jel̦ã kõmmaanwa. Bareinwõt renaaj jipañ kõj bwe jen jab ukot nana kõn nana meñe ro jet rej ba naan ko rejjab jouj ak kõm̦m̦ani men ko renana ñan kõj. El̦aññe ewõr apañ ikõtaad im juon iaan ri tõmak ro m̦õttad jej aikuj kwal̦o̦k meanwõd. Men in enaaj jipañ kõj bwe jen jab l̦õmn̦ak bwe ejej unin ad kepaake eo jeid im jatid kõnke eban oktak. Bõtab enaaj kõm̦m̦akũt kõj ñan kamat ad maroñ kõm̦m̦an aenõm̦m̦an ippãn. M̦ool ke bwe jej aikuj ineem̦m̦an im meanwõd ñan doon? Aet, kõnke kõj aolep jejjab weeppãn.
5. Ta apañ eo ear wal̦o̦k ikõtaan Paul im Barnebas, im ta eo jej katak jãn bwebwenato in?
5 L̦õmn̦ak kõn apañ eo ear wal̦o̦k ikõtaan Paul im Barnebas. Ium̦win elõñ iiõ ko erro kar jerbal ippãn doon ñan kajeded nuuj eo em̦m̦an. Erro jim̦or kar armej em̦m̦an. Bõtab juon iien juon men ear wal̦o̦k im ‘el̦ap aerro akwããle doon, innem rar jepel jãn doon.’ (Jrb. 15:36-39) Bwebwenato in ej kalikkar bwe meñe ro im rekajoor ilo tõmak ak jet iien emaroñ wõr apañ ikõtaaer im ro jet. El̦aññe juon ej inepata ippãn juon armej, ta eo emaroñ kõm̦m̦ane bwe ren jab akwããl im jujen wõt nana kõtaaerro?
6, 7. (a) M̦okta jãn ad illu im akwããl ippãn juon armej, ta naan in kakapilõk ko ilo Baibõl̦ eo jemaroñ l̦oori? (b) Ta tokjãn ko rem̦m̦an rej wal̦o̦k el̦aññe ej ‘m̦õkaj ad roñjake, rum̦wij ad kõnono, im rum̦wij ad illu’?
6 Apañ eo ikõtaan Paul im Barnebas ear jidimkij an wal̦o̦k. Kõn men in, ear l̦ap “airro akwããle doon.” El̦aññe juon ej kile bwe ej jino an illu ke ej kõnnaan ippãn juon, ej aikuj l̦oore naan in kakapilõk in ilo Jemes 1:19, 20. Ej ba: “Jabdewõt armej en m̦õkaj an roñjake, en rum̦wij an kõnono, en rum̦wij an illu; Bwe illu an armej e jab jerbale [wãnik, NW] an Anij.” M̦okta jãn an juon illu im akwããl em̦m̦an bwe en ukot bwebwenato eo ak ikõñ wõt ak ilo̦k jãn ijo.—JK. 12:16; 17:14; 29:11.
7 Ta tokjãn ko rem̦m̦an rej wal̦o̦k el̦aññe jej l̦oore naan in kakapilõk in? Eokwe, ñe kwõj kõttar an med bũruom̦, jar ñan Jeova kõn apañ eo im l̦õmn̦ak kõn ta eo kwõmaroñ ba, kwõj kõtl̦o̦k bwe kajoor eo an Anij en tõl eok. (JK. 15:1, 28, UBS) Innem, ñe Anij ej tõl eok ikijen kajoor eo an, kwõnaaj maroñ ineem̦m̦an im meanwõd wõt. Ilo wãween in, enaaj pidodo am̦ l̦oor naan in kakapilõk in ilo Epesõs 4:26, 29: “Kom̦win illu im jab jero̦wiwi . . . Ejjel̦o̦k naan ettoon en wal̦o̦ktok jãn lo̦ñemi, a jabdewõt eo em̦m̦an im naan in kalõk ekkar ñan aikuj, bwe en lel̦o̦k jouj ñan eo ej roñjake.” El̦aññe jej ineem̦m̦an im meanwõd wõt jenaaj kõjparok bwe en wõr aenõm̦m̦an im bõrokuk ilo congregation eo.
Kwõn Jouj im Em̦m̦an ñan Baam̦le eo Am̦
8, 9. Ewi wãween jej kile juon armej ejouj im em̦m̦an, im ta eo ej wal̦o̦k ñe baam̦le eo ej jouj im em̦m̦an ñan doon?
8 Riit Epesõs 4:31, 32; 5:8, 9. Jouj im em̦m̦an rej kam̦õn̦õn̦õik kõj. Ej ãinwõt ñe ej em̦m̦an ad mour kõn an elladikdik im ad m̦õñã ice lukor ilo juon raan edet jilõñlõñ. Baam̦le eo ad enaaj m̦õn̦õn̦õ el̦aññe jej jouj im em̦m̦an ñan doon. Juon armej ejouj ej l̦õmn̦ak kõn ro jet. Men in enaaj alikkar kõn an jipañ er im kõnono ñan er ilo jouj. Jouj im em̦m̦an rej ãinl̦o̦k wõt juon. Juon armej em̦m̦an ej kõm̦m̦ani men ko rem̦m̦an ñan ro jet. Ej alikkar men in kõn an m̦õn̦õn̦õ in lel̦o̦k jãn tum̦wilal̦ in bũruon. (Jrb. 9:36, 39; 16:14, 15) Bõtab, ejjab baj ãindein juon armej em̦m̦an.
9 Juon armej em̦m̦an erreo mour eo an. Ejjab baj kõm̦m̦ani men ko rem̦m̦an wõt ak bareinwõt em̦m̦an bũruon im l̦õmn̦ak ko an. Ej ãinwõt juon leen wõjke etõñal im ejjab nana. Ejjab liro̦uwe kilin im loan ñan jidik. Ãindein ñe kajoor eo an Anij ej tõl mour eo an juon Kũrjin, enaaj kõm̦m̦ani men ko rem̦m̦an ilo aolepen wãween an mour.
10. Ta eo emaroñ jipañ ro uwaan baam̦le eo bwe ren jouj im em̦m̦an, im kwal̦o̦k leen ko jet rej wal̦o̦k jãn kajoor eo an Anij?
10 Ta eo emaroñ jipañ ro uwaan baam̦le eo im rej Kũrjin bwe ren jouj im em̦m̦an ñan doon? Rej aikuj katak kõn Naan in Anij. (Kol. 3:9, 10) Jet baam̦le ko rej katak kõn leen kajoor eo an Anij ilo Iien Kabuñ eo an Baam̦le eo kajjojo wiik. Rej yokwe, lañlõñ, aenõm̦m̦an, meanwõd, jouj, em̦m̦an, tõmak, ineem̦m̦an im jel̦ã irooj ioom̦ make. Ejjab pen ñan katak kõn men kein. Kom̦ maroñ kããlõt juon iaaer im kappok mel̦el̦e ko kake ilo bok ko ewõr ilo kajin eo ami. Kom̦ maroñ etale jet pãrokõrããp kajjojo wiik im etale kajjojo iaaer. Ñe kom̦ij katak, kom̦win riiti kamel̦el̦e ko im lali eoon ko. Pukot wãween ko kom̦ maroñ mour ekkar ñan men ko kom̦ar katak kaki. Bareinwõt kom̦win jar ñan Jeova bwe en jipañ kom̦ kõm̦m̦ani men kein. (1 Ti. 4:15; 1 Jon 5:14, 15) El̦aññe baam̦le ko rej katak kõn men kein enaaj em̦m̦anl̦o̦k wãween aer kõm̦m̦an ñan doon. Em̦ool ke men in?
11, 12. Ta tõprak ko ri pãlele ro rar loi ke rar katak kõn jouj?
11 Juon jiroñ im likao im rej kab m̦are rar peek ñan katak kõn juon iaan leen kajoor eo an Anij. Ewi iaaer? Jouj. Rar kõm̦m̦ane men in bwe en jab jako aerro m̦õn̦õn̦õ ippãn doon. Rar ke lo tõprak? Lio ej ba: “Kõmro ar katak bwe ñe kõmro ej kwal̦o̦k jouj, kõmro naaj tiljek ñan doon. Men in ear jipañ kõmro ñan kakõm̦anm̦anl̦o̦k wãween amro kõm̦m̦an ñan doon. Ear katakin kõmro ñan jel̦ã kõttãik bũruemro im jol̦o̦k an doon bõd. Bareinwõt ear jipañ kõmro ñan ba ‘kom̦m̦ool’ im ‘jol̦o̦k aõ bõd.’”
12 Bar jet ri pãlele rar kile bwe ear dikl̦o̦k aerro m̦õn̦õn̦õ kõnke rar jab jouj ñan doon. Kõn men in, rar etale katak ko rej kõnono kõn jouj. Ta eo ear wal̦o̦k jãn aer kõm̦m̦ane men in? L̦eo ej ba: “Ke kõmro kar katak kõn kilen kwal̦o̦k jouj, ear jipañ kõmro ñan kallimjek em̦m̦an ko an doon im jab l̦õmn̦ak nanaik doon. Tokãlik ear jino l̦apl̦o̦k amro l̦õmn̦ak kõn aikuj ko an doon. Iar kajjitõk ippãn lio pãleõ ñan kwal̦o̦k bũruon, im ilo jouj iar roñjake im jab illu kõn men ko ear ba. Bõtab, iar aikuj kõttãik bũruõ. Ke kõmro ar jouj ñan doon ear dikl̦o̦k amro jojomare likjab ko amro make. Ear kanooj em̦m̦anl̦o̦k amro mour.” Baam̦le eo am̦ emaroñ bareinwõt lo tõprak el̦aññe kom̦ij katak kõn leen ko rej wal̦o̦k jãn kajoor eo an Anij.
Tõmak eo Am̦ En Kajoor Ñe Kwõj Make Iaam̦
13. Ta men ko remaroñ ko̦kkure jem̦jerã eo ad ippãn Jeova im jej aikuj kõjparok kõj jãni?
13 Kũrjin ro rej aikuj kõtl̦o̦k bwe kajoor eo an Anij en tõl er ñe elõñ armej im ñe rej make iaaer. Rainin el̦ap an lal̦ in an Setan kajeded pija ko rettoon im kein kam̦õn̦õn̦õ ko renana. Men kein remaroñ ko̦kkure jem̦jerã eo ad ippãn Jeova. Kõn men in, ta eo juon Kũrjin ej aikuj kõm̦m̦ane? Baibõl̦ eo ej ba: “Komin lale kom make jen manit ko retton im mwil ko renana otemjej. Kõttãik kom ñõn Anij im bõk wõt nan eo ear kalbwini ilo buruõmi, eo emaroñ in lomoren kom.”(Jem. 1:21, UBS) Jen lale ewi wãween tõmak, bar juon m̦õttan leen kajoor eo an Anij, emaroñ jipañ kõj ñan dãpij wõt ad erreo im̦aan mejen Jeova.
14. Etke ñe em̦õjn̦o̦ tõmak eo ad, epidodo ad l̦orak ilo men ko renana?
14 El̦aññe jej tõmak ilo Anij jenaaj tõmak bwe ej lo kõj im jeban kõn̦aan kabũrom̦õje. Bõtab el̦aññe em̦õjn̦o̦ tõmak eo ad, enaaj pidodo ad l̦orak ilo men ko renana. Lale ta eo ear wal̦o̦k ñan ro doon Anij ilo iien ko etto. Jeova ear ba ñan Ezekiel bwe armej rein rar kõm̦m̦ani men ko rekajõjõ ilo ittino. Jeova ear ba: “Kwõj lo ke ta ko rũtto ro in m̦õn Israel rej kõm̦m̦ani ilo marok, kajjo iaer ilo ruum̦ in ekjab eo an? Bwe rej ba, ‘Jeova e jab lo kõj. Jeova ear ilo̦k jãn ãne eo.’” (Ezk. 8:12) Kwõj ke lo men eo rar likjab kake? Rar jab tõmak bwe Jeova ear lo men ko rar kõm̦m̦ani. Ear m̦õjn̦o̦ tõmak eo aer.
15. Etke ñe ekajoor tõmak eo ad men in enaaj kõjparok kõj?
15 Ear jab ãndein Josep. Meñe ear ettol̦o̦k jãn baam̦le eo an, ak Josep ear jutak pen im ear jab kõn̦aan mour in l̦õñ ippãn lio pãlen Potipar. Etke? Ear ba: “Ta unin aõ naj maroñ kõmmõne juõn men eo etton im jerawiwi nae Anij?” (Jen. 39:7-9, UBS) Aet, Josep ear tõmak ilo Jeova. Ear jel̦ã bwe Jeova ear loe im ear jab kõn̦aan kabũrom̦õje. Ãindein, el̦aññe ekajoor tõmak eo ad, jejamin alwõji pija ko rettoon ak kõm̦m̦ani men ko renana ilo ittino im jejel̦ã bwe Anij ej diki. Jenaaj peek ilo bũruod ñan kõm̦m̦ane ejja men eo ri jeje sam ear ba: “Inaaj etal ilowaan m̦weo im̦õ kõn bũruõ e weeppãn. I jãmin likũt im̦aan meja jabdewõt men e nana.”—Sam 101:2, 3.
Jel̦ã Irooj Ioom̦ Make Enaaj Kõjparok Bũruom̦
16, 17. (a) Ekkar ñan bok in Jabõn Kõnnaan, ewi wãween ‘likao eo im ejjel̦o̦k an mãlõtlõt’ ear bo ilo juon aujiid? (b) Ãinwõt ej wal̦o̦k ilo pija eo ilo peij 26, ewi wãween men in emaroñ wal̦o̦k ñan jabdewõt armej ilo raan kein?
16 Jel̦ã irooj ioom̦ make, eo im ej bar m̦õttan leen kajoor eo an Anij, emaroñ jipañ kõj bwe jen ba jaab ñan men ko Anij ej diki. Men in emaroñ jipañ kõj ñan kõjparok bũruod. (JK. 4:23) L̦õmn̦ak kõn waanjoñak eo ilo Jabõn Kõnnaan Ko 7:6-23. Ej kwal̦o̦k kõn “juon likao im ejjel̦o̦k an mãlõtlõt” me ear bo ippãn juon kõrã ekijoñ. Ear m̦ad ke ear “etetal ilo ial̦ eo epaak ñan kona eo an lio.” Bõlen ear baj ilo̦k iturin m̦weo im̦õn kõrã eo ekijoñ im lale ta eo ej wal̦o̦k. Ear jab kile bwe ej etetal ilo juon aujiid im enaaj m̦õkaj an bo. Ear jaje ke mour eo an ej pãd ilo kauwõtata.
17 Ta eo likao in en kar kõm̦m̦ane bwe en jab bo? Eban kar bo el̦aññe ear pokake naan in kakkõl in: “Kwõn jab jebwãbwe ilo ial̦ ko an [lio].” (JK. 7:25) Ta eo jemaroñ katak jãn men in? Eokwe, el̦aññe jekõn̦aan bwe Anij en letok kajoor eo an ñan tõl kõj, jej aikuj kõjparok kõj jãn men ko im remaroñ tõll̦o̦k kõj ñan kõm̦m̦an jerawiwi. Juon emaroñ etal ilo ejja ial̦ eo wõt ‘likao eo im ejjel̦o̦k an mãlõtlõt’ ear ilo̦k ie l̦o̦k. Ewi wãween? Ikijen an kajju rent pija ko ak ejjab lale kõmel̦el̦e ko ie el̦aññe rem̦m̦an ak renana. Bareinwõt el̦aññe ejjab kõjparok an lale website ko ilo internet. Meñe ej kõtmãne ak jab, jet iien emaroñ wal̦o̦k pija ko renana im remaroñ kõm̦m̦an bwe en wõr kõn̦aan ko renana. Jidik kõn jidik emaroñ kõn̦aan alwõji wõt pija ko renana. Tokãlik emaroñ erom juon m̦anit enana me emaroñ kattoon l̦õmn̦ak ko an im ko̦kkure jem̦jerã eo an ippãn Anij. Kõn men in emaroñ mej.—Riit Galetia 5:19-21.
18. Ewi wãween juon Kũrjin ej kwal̦o̦k an irooj ioon kõn̦aan ko an make, im ta ko emaroñ kõm̦m̦ani ñan kõjparok bũruon?
18 El̦aññe ewal̦o̦k juon pija enana, jej aikuj jel̦ã irooj ioon kõn̦aan ko ad make. Ewi wãween? Ej ilo ad m̦õkaj im kune TV ak computer eo. Enaaj kar em̦m̦anl̦o̦k ñe jaar kõjparok bwe jen jab lo men kein. (JK. 22:3) Bareinwõt, jej irooj ioon kõn̦aan ko ad ñe jej kõm̦m̦an kakien ko ñan kõj make im eddãp wõt ñani. Ñan waanjoñak, jemaroñ kajerbal computer ak alwõj TV ñe elõñ armej. Jet rej lo bwe em̦m̦anl̦o̦k ñe rej kõm̦m̦ani men kein ilo iien eo im ewõr armej ippãer. Ak ro jet rar pepe bwe ren jab Internet. (Riit Matu 5:27-30.) Jen kõm̦m̦an jabdewõt men ñan kõjparok kõj im baam̦le eo ad. Innem, jenaaj maroñ kabuñ ñan Jeova kõn “yokwe jãn bõro erreo, im bõklõkõt em̦m̦an, im tõmak e m̦ool.”—1 Ti. 1:5.
19. Ta tokjãn ko rem̦m̦an rej wal̦o̦k ñe kajoor eo an Anij ej tõl kõj?
19 Elõñ tokjãn ko rem̦m̦an rej wal̦o̦k ñe Anij ej kajerbal kajoor eo an ñan tõl kõj. Ineem̦m̦an im meanwõd rej kõjparok aenõm̦m̦an eo ilo congregation eo. Jouj im em̦m̦an rej kõm̦m̦an bwe baam̦le ko ren m̦õn̦õn̦õ. Tõmak im jel̦ã irooj ioon kõn̦aan ko ad make rej kõm̦m̦an bwe jen epaake Jeova im erreo im̦aan mejen. Bareinwõt, Baibõl̦ ej ba bwe eo ‘ej jeor ine in kajoor eo an Anij, enaaj m̦adm̦õd mour indeeo.’ (Ga. 6:8, UBS) Ikijen mej eo an Jijej, Jeova enaaj kajerbal kajoor eo an ñan lel̦o̦k mour indeeo ñan ro im rej kõtl̦o̦k bwe kajoor in en tõl er.
Ewi Wãween Kwõnaaj Uwaak?
• Ewi wãween ineem̦m̦an im meanwõd renaaj kõjparok aenõm̦m̦an eo ilo congregation eo?
• Ta eo enaaj jipañ baam̦le ko bwe ren jouj im em̦m̦an ñan doon?
• Ewi wãween tõmak im jel̦ã irooj ioon kõn̦aan ko ad make enaaj jipañ juon Kũrjin ñan kõjparok bũruon?
[Kajitõk ko ñan katak]
[Pija ilo peij 24]
M̦okta jãn ad illu im akwããl ippãn juon, ta eo jen kõm̦m̦ane?
[Pija ilo peij 25]
Baam̦le eo am̦ enaaj m̦õn̦õn̦õ ñe kom̦ij katak kõn leen ko rej wal̦o̦k jãn kajoor eo an Anij
[Pija ilo peij 26]
Ta men ko renana tõmak ilo Anij im irooj ioon kõn̦aan ko ad renaaj jipañ kõj bõbraiki?
