Baam̦le ko im Rej Kũrjin, Kom̦win “Pojak” Wõt

“Kom̦win pojak barãinwõt: bwe Nejin armej enaaj itok ilo awa eo ñe kom̦ jab l̦õmn̦ak kake.”—LUK 12:40.

1, 2. Etke jej aikuj likũt ilo bũruod naan in kakkõl eo an Jisõs ñan “pojak” wõt?

 “ÑE NEJIN armej enaaj itok ilo wõj eo an” im kõjepel “ri aelõñ otemjej,” ta eo enaaj wal̦o̦k ñan baam̦le eo am̦? (Matu 25:31, 32) Kõnke men in enaaj wal̦o̦k ilo awa eo jejjab kõtmãne, ekanooj aorõk bwe jen likũt ilo bũruod naan in kakkõl eo an Jijej me ej ba jen “pojak” wõt!—Luk 12:40.

² Ilo kar katak eo l̦o̦k, jaar etale ewi wãween ro uwaan baam̦le eo remaroñ jipañ doon bwe ren “emmij im ekkõl” wõt ñan raan eo el̦ap an Jeova. Ewi wãween? Eokwe, ikijen aer kõm̦m̦ane ijo kun̦aaer ilo baam̦le eo. Jen etale bar wãween ko jet im jemaroñ kõm̦m̦ani ñan jipañ baam̦le eo ad.

Kõjparok Mejed im Jab M̦ad

3, 4. (a) Ta eo baam̦le ko im rej Kũrjin rej aikuj kõjparok bwe ren jab m̦ad kake? (b) Jijej ear ba bwe en “em̦m̦an” mejed. Ta mel̦el̦ein men in?

³ Bwe baam̦le ko ren pojak wõt ñan itok eo an Kũraij, rej aikuj kõjparok bwe ren jab m̦ad jãn aer kabuñ ñan Jeova. Rej aikuj kõjparok bwe ren jab bo ilo menin karreelel ko an lal̦ in. Arõk m̦weiuk ej men eo ekkã an kam̦ad elõñ baam̦le ko. Eñin unin Jijej ear ba bwe en “em̦m̦an” mejed. (Riit Matu 6:22, 23.) Juon l̦aam̦ emaroñ kameraml̦o̦k maan ad ial̦ bwe jen jab tibbok. Ilo ejja wãween in wõt, ñe emeraml̦o̦k ‘mejãn bũruod’ ilo kõkkar, enaaj kõjparok kõj bwe jen jab buñ im jerawiwi.—Ep. 1:18.

 ⁴ Bwe en alikkar an juon kallimjek juon men, ej aikuj em̦m̦an mejen im an loe men eo ej kallimjeke. Ãindein, ñe em̦m̦an mejed ilo kõkkar, jenaaj kallimjek juon wõt men. Jãn ad m̦ad kõn m̦weiuk ko ak poub wõt ñan kabwe aikuj ko an baam̦le eo, jen kallimjek wõt ak poub wõt kõn men ko im remaroñ kakajoorl̦o̦k jem̦jerã eo ad ippãn Jeova. (Matu 6:33) Mel̦el̦ein men in bwe jej jokwane wõt kõn men ko ewõr ippãd. Im jej likũt bwe ad karejar ñan Anij en men eo aorõktata ilo mour ko ad.—Hi. 13:5.

5. Ta eo juon jiroñ ear kõm̦m̦ane im ej kalikkar bwe ear jab m̦ad jãn an jerbal ñan Anij?

⁵ Ewõr tokjãn ñe rũtto ro rej katakin ajri ro nejier bwe ren jab m̦ad kõn men ko an lal̦ in. L̦õmn̦ak kõn bwebwenato eo an juon jiroñ ilo aelõñ in Itiopia. Joñan an mãlõtlõt, ke ear kadiwõjl̦o̦k jãn high school, rar lel̦o̦k jããn in jipañ ñan e bwe en etal ñan college. Bõtab, ear jab m̦ad. Ear kõn̦aan poub wõt ilo an jerbal ñan Jeova. Kõn men in, ear jab bõk jããn eo im emaroñ kar jipañ e bwe en etal ñan college. Ejjabto tokãlik, juon ear ba ñan e bwe ñe enaaj jerbal ippãer, renaaj kõl̦l̦ãik e kõn tarrin $4,200 ilo juon allõñ. On̦ean in el̦ap jãn joñan on̦ean enañin aolep ri jerbal ro ilo aelõñ eo an. Bõtab, jiroñ in ear jab reel kõnke ear kõn̦aan poub wõt ilo jerbal in kwal̦o̦k naan. Ear jab aikuji an jinen im jemen ba ñan e bwe en jab bõk jerbal eo. Ta eo jinen im jemen rar kõm̦m̦ane kõn pepe eo an jiroñ in nejierro? Rar kanooj m̦õn̦õn̦õ im rar ba ñan e bwe el̦ap aer utiej bũrueer kake e!

6, 7. Ta men ko rekauwatata jej aikuj ‘lale im kõjparok’ kõj jãni?

⁶ Men eo Jijej ear kajjioñ ba ilo Matu 6:22, 23 ej ñan kakkõl n̦ae kũbbon̦. Baibõl̦ eo ej kajerbal naan kein ‘mej em̦m̦an’ im ‘mej enana.’ Ilo kajin Grik ‘mej eo enana’ ej mel̦el̦ein an̦kon̦ak im kũbbon̦. (Matu 6:23) Ta l̦õmn̦ak eo an Jeova kõn an̦kon̦ak ak kũbbon̦? Baibõl̦ eo ej ba: “A l̦õñ, im ettoon otemjej, ak an̦okn̦ak [ak kũbbon̦], en jab wal̦o̦k etaer ippemi.”—Ep. 5:3.

⁷ Epidodol̦o̦k ad kile an armej ro jet kũbbon̦ ak epen ad kile el̦aññe jekũbbon̦. Kõn men in, ej menin mãlõtlõt ñan l̦oore naan in kakapilõk eo an Jijej. Ear ba: “Kom̦win lale, im kõjparok kom̦ jãn jabdewõt arõk m̦weiuk.” (Luk 12:15) El̦aññe jej l̦oor naan kein an Jijej, jenaaj etale kõj make bwe jen jel̦ã ta men ko jej kaorõki im rej pãd ilo bũruod. L̦eo im lio pãleen kab ajri ro nejierro rej aikuj l̦õmn̦ak kõn ewi joñan aer jol̦o̦k jããn im iien ñan kein kam̦õn̦õn̦õ ko. Bareinwõt, ñe rej pãd ilo iien kalimomo ko im wia elõñ m̦weiuk ko.

8. Ewi wãween jej kwal̦o̦k ad mãlõtlõt ñe jej iten wiaik juon men?

⁸ Ñe jej iten wiaik juon men, jej aikuj l̦õmn̦ak m̦okta el̦aññe ebwe jããn ippãd ñan wiaiki ak jaab. Bõtab, ebar wõr men ko jet jej aikuj l̦õmn̦ak kaki. Jen kajjitõk ippãd make: ‘Inaaj ke kajerbal men in aolep iien im kõjparok e bwe en jab jorrããn? Enaaj ke m̦õkaj aõ katak kilen kajerbale ak enaaj bõk iien?’ Kom̦ jodrikdrik ro, jab tõmak aolep men ko lal̦ in ej karreelel kaki. Ej m̦on̦e kom̦ bwe kom̦win wiaik nuknuk ko ak juuj ko me rej make wõt kããl im el̦ap on̦aer im rejjab menin aikuj. Katak kilen drebij kõn̦aan ko ami make. Bareinwõt, l̦õmn̦ak kõn ta eo enaaj wal̦o̦k el̦aññe kom̦ij wiaik men kein. Enaaj ke jipañ baam̦le eo ami ñan pojak ñan raan eo Nejin armej enaaj itok? Komin lõke kallim̦ur in an Jeova, ej ba: “I jãmin likũt eok, im I jãmin ilo̦k jãn kwe indeeo.”—Hi. 13:5.

Kõm̦m̦an Mejãnkajjik ko im Jibadeki

9. Ta eo enaaj walok ñan juon baam̦le el̦aññe rej kõmman mejãkajjik ko?

⁹ Ebar wõr juon wãween me ro uwaan baam̦le eo remaroñ kõm̦m̦ane ñan kakajoorl̦o̦k tõmak eo aer im jem̦jerã eo aer ippãn Jeova. Rej aikuj kõm̦m̦an mejãnkajjik ko im kate er ñan tõpari. Men in enaaj jipañ baam̦le ko ñan kile el̦aññe rej kõm̦m̦an wõnm̦aanl̦o̦k ko ilo aer karejar ñan Jeova. Enaaj bareinwõt jipañ er ñan etale er make im lale ewi wõt  men eo eaorõktata ilo mour eo aer.—Riit Pilippai 1:10.

10, 11. Ta mejãnkajjik ko baam̦le eo am̦ ej kõm̦m̦ani kiiõ? Ta mejãnkajjik ko kom̦ kõn̦aan jibadeki ilju im jekl̦aj?

¹⁰ Meñe baam̦le ko rej kõm̦m̦ani mejãnkajjik ko redik ak men kein remaroñ lukkuun jipañ er. Ñan waanjoñak, remaroñ lale unin tõl in raan eo kajjojo raan. Ñe lio im ajri ro rej kwal̦o̦k l̦õmn̦ak ko aer kõn unin tõl eo, enaaj jipañ l̦eo bwe en jel̦ã ewi joñan an kajoor jem̦jerã eo aer ippãn Jeova. El̦aññe baam̦le eo ej kõm̦m̦an mejãnkajjik eo ñan riiti Baibõl̦ raan otemjej, men in emaroñ jipañ ajri ro katak kilen riit. Bareinwõt, emaroñ jipañ ajri ro bwe ren jel̦ã im mel̦el̦e kobban Baibõl̦ eo. (Sam 1:1, 2) Bar juon mejãnkajjik em̦m̦an ej ñan kakõm̦anm̦anl̦o̦k wãween ad jar. Remaroñ bareinwõt kõm̦m̦an mejãnkajjik eo ñan kal̦apl̦o̦k aer yokwe, lañlõñ, aenõm̦m̦an, im wãween ko eierlok wõt. (Ga. 5:22, 23) Ak jemaroñ pukot wãween ko jemaroñ kwal̦o̦k ad itoklimo kake armej ro jej iione er ilo kwal̦o̦k naan. El̦aññe jej kõm̦m̦ani men in ippãn doon ãinwõt juon baam̦le, enaaj jipañ ajri ro ñan jel̦ã tũriam̦o kõn ro jet. Men in enaaj bareinwõt lujur er ñan kõn̦aan kalapl̦o̦k ijo kun̦aaer ilo jerbal in kwal̦o̦k naan ãinwõt pioneer ak mejinede.

¹¹ Etke kwõj jab l̦õmn̦ak kõn jet iaan mejãnkajjik ko me kwe im baam̦le eo am̦ emaroñ kõm̦m̦ani? Baam̦le eo am̦ remaroñ ke kõm̦m̦an mejãnkajjik ñan kal̦apl̦o̦k kun̦aaer ilo kwal̦o̦k naan? Kom̦ maroñ ke kate kom̦ bwe kom̦win jab mijak in kwal̦o̦k naan ilo telephone, tõreren ial̦, ak jikin jerbal ko? Ak ta kõn jikin ko me el̦ap aikuj ri kwal̦o̦k naan ro ie? Juon iaan baam̦le eo am̦ emaroñ ke katak bar juon kajin bwe en maroñ jipañ kowõnmanlok nuuj eo em̦m̦an ñan ro jãn aelõñ ko jet?

12. Ta eo bõran baam̦le ko remaroñ kõm̦m̦ane ñan jipañ baam̦le eo aer kakajoorl̦o̦k jem̦jerã eo aer ippãn Jeova?

 ¹² Bõran baam̦le eo ej aikuj lale ta eo ro uwaan baam̦le eo an rej aikuj kõm̦m̦ane ñan kakajoorl̦o̦k jem̦jerã eo aer ippãn Jeova. Innem kõm̦m̦an mejãnkajjik ko me renaaj jipañ kom̦ ñan kõm̦m̦ane men in. Mejãnkajjik ko kom̦ij kõm̦m̦ani ren ekkar ñan dettan ajri ro im joñan maroñ ko an baam̦le eo. (JK. 13:12) Ebõk iien ñan jibadek mejãnkajjik ko. Innem kwõn kajerbal iien eo kwõn kar alwõj TV ñan kajejjet mejãnkajjik ko am̦. (Ep. 5:15, 16) Kwõn kate eok bwe kwe im baam̦le eo am̦ ren maroñ tõpar mejãnkajjik ko ami. (Ga. 6:9) Ami ‘wõnm̦aanl̦o̦k enaaj alikkar ñan armej ro otemjej’ ñe kwe im baam̦le eo am̦ rej jibadek mejãnkajjik ko.—1 Ti. 4:15.

Katak Baibõl̦ Ippãn Baam̦le eo Kajjojo Wiik

13. Ta oktak eo kar kõm̦m̦ane kõn raan in kweilo̦k ko kajjojo wiik, im ta kajjitõk ko jej aikuj kajjitõkin kõj make?

¹³ Ewõr juon men me emaroñ jipañ baam̦le ko bwe ren “pojak” ñan iien eo ñe ej itok Nejin armej. Ta in? Ilo Jãnwõde 1, 2009 kar kõm̦m̦ane juon oktak el̦ap kõn raan in kweilo̦k ko. Kiiõ, jejjab aikuj kajenolo̦k juon jota ñan ad kweilo̦k in Book Study. Ilo jinoin jekõn ba Book Study ak kiiõ jej ba Katak Baibõl̦ An Congregation eo. Kweilo̦k in ej koba ippãn kweilo̦k in Jikuul̦ in Kwal̦o̦k Naan eo im Ad Jerbal ñan Aelõñ Eo. Taunin rar kõm̦m̦ane oktak in? Kõnke baam̦le ko ren maroñ kakajoorl̦o̦k jem̦jerã eo aer ippãn Jeova ilo aer kajenolo̦k juon iien kajjojo wiik ñan katak ippãn doon. Rar kõm̦m̦ane oktak in elõñl̦o̦k jãn 2 iiõ ko remootl̦o̦k. Innem jen kajjitõkin kõj make: ‘Ij ke katak ippãn baam̦le eo aõ ilo boñõn in kar kepel̦l̦o̦k ñan ad katak? El̦aññe ejjel̦o̦k pãleeõ im ro nejũ ij ke katak ippa make? Inañin ke lo tokjãn ko rem̦m̦an kõn aõ l̦oor karõk in?’

14. (a) Ta unleplep in ad katak Baibõl̦ ippãn baam̦le ko ad ak ippãd make kajjojo wiik? (b) Etke eaorõk bwe jen kajenolo̦k juon iien ñan ad katak Baibõl̦ kajjojo wiik?

¹⁴ Unleplep in ad aikuj katak Baibõl̦ ippãn baam̦le eo ad ak ippãd make kajjojo wiik ej bwe jen ruwaakl̦o̦k ñan Anij. (Jem. 4:8) Ñe jej keini ad katak Baibõl̦ eo im kalapl̦o̦k ad jel̦ã kajjien Ri Kõm̦anm̦an eo ad, ekajoorl̦o̦k kõtaan eo ad ippãn. Ñe jej epaakel̦o̦k wõt Jeova, jenaaj yokwe e ‘kõn aolepen bũruod, im kõn aolepen ad, im kõn aolepen ad l̦õl̦ãtãt, im kõn aolepen ad kajoor.’ (Mark 12:30) Aet, jenaaj kõn̦aan pokake Jeova im kajeoñwe e. (Ep. 5:1) Eñin unin el̦ap an aorõk bwe baam̦le ko ren katak Baibõl̦ ippãn doon kajjojo wiik. Ilo wãween in, enaaj jipañ ro uwaan baam̦le eo ñan “pojak” wõt ke jej kõttar an ‘iien eo enaaj l̦ap eñtaan’ itok. (Matu 24:21) El̦aññe kwõj kõn̦aan el̦l̦ã im mour, kwõj aikuj kõm̦m̦ane men in.

15. Ta eo emaroñ wal̦o̦k ñan baam̦le ko ñe rej katak ippãn doon kajjojo wiik?

¹⁵ Bar juon unin kar kõm̦m̦an karõk bwe baam̦le ko ren katak Baibõl̦ ippãn doon kajjojo wiik ej bwe ro uwaan baam̦le eo ren epaakel̦o̦k doon. Ñe baam̦le ko rej kõm̦m̦ao ippãn doon kõn Jeova im Baibõl̦ eo kajjojo wiik, men in enaaj jelõt wãween aer kõm̦m̦an ñan doon. Ñe ri pãlele ro rej katak Baibõl̦ ippãn doon im roñjake an doon kwal̦o̦k l̦õmn̦ak ko aer kõn katak eo, renaaj m̦õn̦õn̦õ im kajoorl̦o̦k kõtaan eo aerro. (Riit Ekklisiastis 4:12.) Enaaj ãindein ippãn ro jemen im jinen im ajri ro nejier. Renaaj epaakel̦o̦k doon im yokwe doon. Yokwe in ej “lukoj men otemjej bwe ren kon ibben dron.”—Kol. 3:14, UBS.

16. Kwal̦o̦k kõn ewi wãween jilu jeid im jatid lel̦l̦ap rej bõk tokjãn jãn aer karõk ñan katak Baibõl̦ ippãn doon kajjojo wiik.

¹⁶ L̦õmn̦ak kõn ewi wãween jilu jeid im jatid lel̦l̦ap rar bõk tokjãn jãn karõk eo ñan katak Baibõl̦ ippãn doon. Lel̦l̦ap rein etto aer jel̦ã kajjien doon im rar jokwe ilo juon wõt bukwõn. Rar kõn̦aan kal̦apl̦o̦k aerjel iien ippãn  doon kab kakajoor kõtaan ko aer ippãn Jeova. Kõn men in, meñe rejjab nukwik doon, ak rar karõk ñan katak Baibõl̦ ippãn doon kajjojo wiik. Rar jino katak kõn bok eo im ej kwal̦o̦k kõn jerbal in kwal̦o̦k naan eo an rijjelõk ro. Juon iaan lel̦l̦ap rein ej ba: “Joñan amjel lukkuun itoklimoem kõn men ko kõmjel ej katak kaki, enañin aolep iien emootl̦o̦k jãn juon awa in amjel katak. Kõmij kajjioñ in pijaik ilo l̦õmn̦ak ko amjel kõn men ko rar wal̦o̦k ñan ro jeid im jatid ilo raan ko an rijjelõk ro. Innem kõmjel ej bwebwenato kõn ta ko kõm naaj kar kõm̦m̦ani el̦aññe men kein renaaj wal̦o̦k ñan kõm. Im ñe kõmij kwal̦o̦k naan, kõmij kajjioñ jerbale men ko kõmar katak kaki. El̦apl̦o̦k amjel m̦õn̦õn̦õ ilo am kwal̦o̦k naan im kõm̦m̦an ri kal̦oor ro im bareinwõt el̦apl̦o̦k tõprak ko kõmij loi jãn m̦okta.” Men in ear kakajoorl̦o̦k kõtaan eo aer ippãn Jeova im kõm̦m̦an aerjel lukkuun epaake doon. Rej ba: “El̦ap amjel kaorõke karõk in.”

17. Ta ko jemaroñ kõm̦m̦ani bwe jen bõk tokjãn karõk eo ñan katak Baibõl̦ kajjojo wiik?

¹⁷ Ak ta kõn kwe? Ta tokjãn ko rem̦m̦an rej wal̦o̦k jãn am̦ katak Baibõl̦ ippãn baam̦le eo am̦ ak ippam̦ make? El̦aññe ejeja am̦ kõm̦m̦ane men in, baam̦le eo am̦ eban lukkuun epaake Jeova im epaake doon. Enaaj ãindein bareinwõt ippãn juon eo ej make iaan. Aolep ro ilo baam̦le eo rej aikuj pojak ñan iien eo rar karõke ñan katak Baibõl̦ ippãn doon. Jab kõtl̦o̦k bwe men ko ejjel̦o̦k tokjãer ren kapañ iien ami katak. Bareinwõt, kããlõt katak ko me kom̦ naaj katak kaki im ej ekkar ñan aikuj ko an baam̦le eo am̦. Ta eo kwõmaroñ kõm̦m̦ane bwe iien katak Baibõl̦ ippãn baam̦le eo am̦ en kaitoktoklimo? En em̦m̦an am̦ katakin im jipañ aolep ñan kwal̦o̦k kautiej im aenõm̦m̦an ippãn doon.—Jem. 3:18. *

“Emmij im Ekkõl” im “Pojak” Wõt

18, 19. Ta eo kwe im baam̦le eo am̦ kom̦ij aikuj kõm̦m̦ane bwe kom̦win pojak ñan iien eo ñe enaaj itok Nejin armej?

¹⁸ El̦apl̦o̦k wõt nana ipel̦aakin lal̦ in jãn kar iiõ eo 1914. Men in ej kalikkar bwe epaak jem̦l̦o̦kin jukjuk im pãd in an Setan. Armagedon ej epaak. M̦õttan jidik Nejin armej enaaj bõktok ekajet eo an Jeova n̦ae armej ro renana im ko̦kkure er. (Sam 37:10; JK. 2:21, 22) Men in ejjab ke kõm̦m̦akũt kwe im baam̦le eo am̦ ñan pojak wõt?

¹⁹ Kwõj ke pokake naan in kakapilõk eo an Jijej ñan kõjparok “mejõm” ak jab m̦ad? Armej ro ilo lal̦ in rej jibadek bwe ren m̦weiie, buñbuñ, im kajoor. Ak kwe im ro uwaan baam̦le eo am̦, kom̦ij ke jibadek mejãnkajjik ko im rej kakajoorl̦o̦k kõtaan eo ami ippãn Jeova? Kwõj l̦oore ke karõk eo ñan katak Baibõl̦ ippãn baam̦le eo am̦ kajjojo wiik? Men in enañin ke jipañ kom̦ ñan ruwaakl̦o̦k ñan Anij im epaakel̦o̦k doon? El̦aññe ejjel̦o̦k pãleem̦ im nejõm̦ kwõj ke l̦oor karõk in ñan katak Baibõl̦ ippam̦ make? Ilo katak eo l̦o̦k, jaar katak kõn ijo kun̦aan l̦eo im lio kab jodrikdrik ro ilo baam̦le eo. Kwõj ke ineek ijo kun̦aam̦ im jipañ baam̦le eo am̦ ñan “emmij im ekkõl” wõt kõn raan eo el̦ap an Jeova? (1 Te. 5:6, UBS) El̦aññe kwõj kõm̦m̦ani men kein, kwõnaaj “pojak” ñe enaaj itok Nejin armej.

[Kamelele eo itulal]

Ta eo Kwaar Katak Kake?

• Ewi wãween baam̦le ko im rej Kũrjin remaroñ “pojak” wõt ñe rej . . .

kõjparok mejeir im jab m̦ad?

kõm̦m̦an mejãnkajjik ko im jibadeki?

katak Baibõl̦ ippãn baam̦le eo kajjojo wiik?

[Kajitõk ko ñan katak]

[Pija ilo peij 13]

Jeban m̦ad kõn men ko an lal̦ in el̦aññe jej kõjparok mejed