Mõnni Ej ke Unjen Mõnõnõ eo Emol?

SONIA ear lotak ilo Spein. Ke ear juõn ajiri, ear etal iben jinen ñõn kwelok ko an Dri Kennan ro an Jeova. Bõtab ke ear ridtolok, ear emakõtlok ñõn London, England, im ilo ijo ear jerbal einwõt juõn eo ej jibõñ business ko koorlok jããn.

Sonia ear lukkun mõnõnõ kin jerbal eo an. Ear koorlok elap mõnni ñõn business ko ear jerbal ie im lolorjake jããn ko air. Jerbal eo an ear lukkun kaitoktoklimo im ear lo elap tõbrõk. Aolep ien Sonia ej jerbal 18 auõ kajjojo ran im jet boñ emaroñ or wõt ruo ak jilu auõ in an kiki. Jerbal eo an kar men eo eaurõktata ilo mour eo an. Inem, ilo idriñ, ear or oktõk ilo mour eo an. Ear mij rãjetin enbwinin Sonia, bwelen kinke ear lukkun boub ilo jerbal eo an. Ear 30 wõt an yiõ.

Kin an kar bõk nañinmij in, taktõ ro rar jab lukkun jela elañe enaj bar konono. Jinen ear mõkõj im etal ñõn England ñõn jibõñ e. Ke Sonia ear jino bar etetal, jinen ear ba ñõn e, “Ña ij etal ñõn kwelok ko an congregation, im kwoj aikwij itok iba tok kinke ijjab kõnan kamõkelok iam.” Sonia ear errã ñõn etal iben lok. Inem ta eo ear walok?

Sonia ear ba, “Aolep men ko iar roñ rar mol im lukkun emõn. Iar mõnõnõ in katak Baibel iben juõn ian ro me ear karuwaineneik iõ ilo ien eo jinoin tata ke iar etal ñõn imõn kwelok eo an Dri Kennan ro an Jeova. Ro mõta mokta rar bwijrõk jen air bar lotok iõ, ak ro mõta rekãl rar lukkun kwalok air yokwe im kea kake iõ.”

Jidrik kin jidrik, Sonia ear bar maroñ konono, im ear emõn an wõnmanlok ilo an katak Baibel. Ilo ejja yiõ eo wõt, ear baptais. Elõñ ro mõtõn rekãl rar likit jerbal in kwalok nan einwõt jerbal eo elaptata ilo mour eo air, im ear lo bwe rar lukkun mõnõnõ kin jerbal in air. Sonia ear lemnok, “Ikõnan bwe in einwõt ir. Ikõnan korijer ñõn Jeova kin aolepen aõ!” Kiõ Sonia emwij an likit bwe jerbal in kwalok nan en jerbal eo elaptata ilo mour eo an.

Ta eo Sonia ear katak jen men eo ear iione? “Meñe jerbal eo kar aõ ear lukkun kõmõn aõ mweie, ak ear lukkun lap an kamõk iõ im iar jab jela elañe enaj to an ber, im men in ear kõmõn aõ inebata im jab mõnõnõ. Iar jino kile bwe men eo eaurõktata ilo mour ej bwe in bõk juõn kõtan emõn iben Jemeruij ilõñ, Jeova. Kiõ ij lo mõnõnõ eo emol.”

Dri jilik Paul ear je nan kein: “Arõk mõnni ej okran nana otemjej, eo ke jet r’ar arõk r’ar jebwãbwe jen tõmak im mõke wie ir kin elõñ men in kaburomõj.” (1 Timote 6:​10) Ejelok berre, Sonia emaroñ kamole nan kein jen wõt men eo ear iione ilo mour eo an.