Men ko Jisõs Ear Katakin Kin E Mõke

“Jisõs ear jela kin wõn e, ia eo ear itok jene, etke ear itok ñõn lõl, im ta eo enaj kar walok ñõn e ilju im jeklaj.”​—DRI JEJE HERBERT LOCKYER.

MOKTA jen ar maroñ tõmak ilo men ko Jisõs ear kwalok kaki, jej aikwij jela kajen. Kar wõn Jisõs? Ia eo ear itok jene? Kar ta kõtõbar eo an ilo mour? Ilo Gospel ko Matu, Mark, Luk, im Jon, jemaroñ lo uak ko an Jisõs ñõn kajitõk kein.

Ear mour mokta jen an kar lotak ion lõl Jisõs ear ba: “Mokta jen Ebream Ij ber.” (Jon 8:​58) Ebream ear mour enañin 2,000 yiõ ko mokta jen an kar Jisõs lotak. Bõtab, Jisõs ear mour moktalok jen e. Inem, ia eo Jisõs ear ber ie? Ear kemelele im ba: “I ar itok jen lõñ.”​—Jon 6:​38.

Nejin Anij Elõñ enjel ro nejin Jeova, bõtab Jisõs ej enjel eo ejejuan. Ear konono kin e mõke einwõt “juõn wõt Nejin Anij e ar keutak.” (Jon 3:​18) Nan kein rej melelen bwe Jisõs wõt ej e eo me Anij mõke ear kõmõnmõn e. Ikijen Jisõs, eo ej mõke wõt Nejin, Anij ear kõmõnmõn aolep men ko jet.​—Dri Kolosse 1:​16.

“Nejin armij” Elõñlok alen an kar Jisõs kajerbal nan kein ke ear konono kin e mõke jen an kajerbal nan ko jet. (Matu 8:​20) Ilo wãwen in ear kwalok bwe ear jab juõn enjel eo ej kõnõk enbwinin armij ak ukot mõran ñõn juõn armij. Jen men in, ear lukkun juõn armij. Ikijen jitõb kwojarjar eo, Anij ear ukot mour eo an Nejin jen ilõñ ñõn ion lõl, im kõmõn bwe virjin eo Meri en bõroro kin Jisõs. Tokjen men in, Jisõs ear juõn armij ewãppen im ejelok jerawiwi iben.​—Matu 1:​18; Luk 1:​35; Jon 8:​46.

Messaia eo kar kalimur kake Juõn kõra in Sameria ear ba ñõn Jisõs, “I jela bwe Messaia ej itok.” Inem Jisõs ear uak im ba ñõn e, “Ña E, Ña Ij konono ñõn yuk.” (Jon 4:​25, 26) Nan ko “Messaia” im “Kraist” rej jimor melelen “Eo Emwij Kabiti.” Anij ear kabiti Jisõs ak kãlet e ñõn an kõmõne jerbal eo ejejuan ñõn kajejit aolep kalimur ko an Anij.

Unleplep in an kar itok ñõn lõl Jisõs ear ba: “In kwalok nan emõn an ailiñ in Anij ñõn jikin kwelok ko jet; bwe ar jilkintok Iõ kin men in.” (Luk 4:​43) Meñe ear kõmõn elõñ jerbal ko remõn ñõn jibõñ armij ro me rar ber ilo aikwij, jerbal in kwalok nan kin Ailiñ eo an Anij kar men eo elaptata ilo mour eo an. Jenaj etale tokelik kin men ko ear katakin kaki kin Ailiñ eo.

Alikar, bwe Jisõs ear jab juõn armij bajjek. * Einwõt ar naj lale, mour eo an ilõñ ear kõmõn bwe en laplok melelen nan ko ear ba ion lõl. Inem, jejjab aikwij bwilõñ bwe ennan eo ear kwalok kake ear jelet mour ko an elõñ million armij ro ibelakin lõl.

[Kamelele itulõl]