Ewi Wãwen Kwomaroñ Anjo Ion Iñjake ko Rekabwerer?

KWONAÑIN ke kar bõk iñjake ko rekabwerer? Ilo mol, enañin aolep armij ro rej iion wãwen in. Rainin, ekkã an armij ro iion abañ ko kin jããn, an laplok koaroñ, im ekajet jab jimwe. Kin wõt men kein, elõñ armij ro rej barõk, elap air narueir make, im rej bõk iñjake eo bwe ejelok tokjeir.

Ekauwatata kain iñjake rõt kein kinke remaroñ kalaplok ad berre kij make, kõmman bwe jen jab maroñ kajerbal lolokjen eo ad, im bwe en jako ad lõñliñ. Baibel eo ej ba: “Elañe kwoj ebbwer ilo ien ko rebbin, innem kwoj juõn armij eo emõjno.” (Jabõn Kennan Ko 24:10, UBS) Jej aikwij kajur bwe jen jab kõtlok bwe lal in enana en kabwer kij. Kin men in, eaurõk ñan ad kejbãrok bwe iñjake ko rekabwerer ren jab le jen joñan air jelet kij. *

Baibel eo ej kwalok jet melele ko me remaroñ jibañ kij tõrinae iñjake ko rekabwerer. Jeova Anij, dri Kõmmanman eo im dri Kejbãrok mour, ejjab kõnan bwe iñjake ko rekabwerer ren anjo iom. (Sam 36:9) Inem jen etale jilu wãwen ko Nan eo an Anij, Baibel eo, emaroñ jibañ kij ñan anjo ion iñjake ko rekabwerer.

Kwon Jelã bwe Jeova Ej Kea Kake Yuk

Jet armij rej bõk lemnak eo bwe elap an Anij boub kin men ko jet im ejelok an ien ñan an jibañ ir. Eñin ke wãwen am lemnak? Ilo mol, Baibel eo ej kalimur ñan kij bwe ewor an dri Kõmmanman eo ad kea kin iñjake ko ad. Dri jeje sam ear je: “[Jeova] ej ebak ñõn ro rej ebbwer. Ej lomoren ro ejako air kejatdrikdrik.” (Sam 34:18, UBS) Elap an kainemõn kij ñan jelã bwe Iroij Bõtata eo ad ej ebake kij ñe jej bed ilo iñtan!

Anij ejelã kin iñjake ko ad im ejjab etolok jen kij. Baibel eo ej ba bwe ‘Anij ej yokwe.’ (1 Jon 4:8) Ej yokwe armij ro im ej tiriamokake ro rej iion iñtan. Ñan wanjoñok, ke dri Israel ro rar dri kamakoko ro ilo Ijipt enañin 3,500 yiõ ko remotlok, ear ba: “Emol I ar lo iñtan an ro droõ rej ber i Ijipt, im I ar roñjake air lamij kin ro rej kejerbal ir; bwe I jela buromõj ko air; im emwij aõ wõnlõltok bwe In lomor ir.”—Exodus 3:7, 8.

Elap an Anij melele kin iñjake ko ad. Men in ej eindrein kinke “E ar kõmõnmõn kij” im jab kij make. (Sam 100:3) Kin men in, ñe jej bõk iñjake eo bwe ro mõttad rejjab melele kin iñjake eo ad, jemaroñ liki bwe Anij emelele. Baibel eo ej ba: “Jeova e jab lo einwõt armij ej lo; bwe armij ej lale elikin armij, a Jeova ej lale buruen.” (1 Samuel 16:7) Iñjake ko ad remulal rejjab nojak jen Anij.

Emol bwe Jeova ej bareinwõt jelã kin likjab im bwid ko ad. Bõtab, jemaroñ kwalok ad kamolol bwe dri Kõmmanman eo ad eyokwe ej mõnõnõ in jeorlok bwid ko ad. Dri jeje Baibel eo Devid ear ba: “Einwõt jemeir ej tiriamokake ro nejin, ein drein Jeova ej tiriamokake ro remjõk E. Bwe E jela wãwen kõmõnmõn kim; E kememej bwe kim bõñõlñõl.” (Sam 103:13, 14) Meñe jemaroñ kalimjek wõt men ko renana kin kij make, ak eoktak wãwen an Anij lemnak kin kij. Ej bukot men ko remmõn jej kõmmani im ejjab lemnak kin men ko renana  jej kõmmani elañe jej ukwelok jen jerawiwi ko ad.—Sam 139:1-3, 23, 24.

Kin men in, ñe jej iñtan kin ad bõk iñjake eo bwe ejelok tokjed, jej aikwij kate kij ñan anjo ion iñjake in. Jej aikwij kememej wãwen lemnak eo an Anij kin kij!—1 Jon 3:20.

Kwon Ejaak Juõn Jimjera Ebak Ibben Anij

Elañe jej bõk lemnak eo an Anij kin kij, ewi wãwen jenaj bõk tokjen men in? Jenaj lo bwe enaj laplok an biruru ñan ad bõk buñten ne eo juõn ñan anjo ion iñjake ko rekabwerer, eñin bwe jen ejaake juõn jimjera ebak ibben Anij. Jemaroñ ke kõmmane men in?

Einwõt juõn Jemen eyokwe, Jeova Anij ej mõnõnõ in jibañ kij ñan ejaake juõn jimjera ebak ibben. Baibel eo ej rejañ kij: “Komin druaklok ñõn Anij, im E naj druakwoj ñõn kom.” (Jemes 4:8) Lemnak kin men in elap an emmõn: Meñe jej mõjno im jerawiwi, jemaroñ ejaake juõn jimjera ebak ibben Iroij Bõtata eo ijoko otemjej ilañ im ilal.

Anij ear kwalok kin kadkad ko kadkadin ilo Baibel eo bwe jen maroñ jelã kajen. Ilo ad ekkeini ad riit Baibel eo, jenaj jelã kin kadkad kein remmõn kadkadin Anij. * Ilo ad kalomõnlokjen kin jelãlokjen in, jenaj iñjake ad ebakelok wõt Jeova. Enaj emmõnlok ad kile bwe emol an juõn Jemed eyokwe im ej tiriamokake kij.

Ad kalomõnlokjen kin men ko jej riit ilo Baibel eo enaj laplok wõt an jibañ kij. Ilo ad kõmman bwe lemnak ko an Jeova ren bed ilo lemnak ko ad im buruer im kõtlok bwe ren kajimwe, kainemõn, im tel kij, men in enaj jibañ kij druaklok ñan E. Jej aikwij kõmmane men in elaptata ñe jej jelmae lemnak im iñjake ko me rej kainebataik kij. Dri jeje sam ear ba: “Ñe ij inebata im jorrãn kwoj kainemmõn iõ im kalõñliñ iõ.” (Sam 94:19, UBS) Baibel eo emaroñ lap an kainemõn kij. Elañe ilo etã buru jej bõk ñan buruer ennan in mol eo an Anij, inem jidrik kin jidrik ainemõn eo me Ej letoke enaj bõk jikin iñjake ko ad rekabwerer. Ilo wãwen in, Jeova ej kainemõn kij einwõt an juõn jemen eyokwe kainemõne ajiri eo nejin ñe ej metõk ak illu.

Bar juõn wãwen eaurõk jemaroñ erom ro jeran Anij ej kitibuj ad keini ad konono ibben. Baibel eo ej kalimur ñan kij bwe “elañe jej kajitõk iben kin jabrewõt men eo ekar ñõn ankil An, [Anij] Ej roñjake kij.” (1 Jon 5:14) Jekron kain rõt mijak ak inebata ko ewor ibbed, jemaroñ jar ñan Anij im kajitõk ibben kin jibañ. Elañe jej kwalok buruer ñan Anij, jenaj bõk ainemõn. Dri jilik Paul ear je: “Ilo men otemjej kin jar im akwelap kab kamolol, kajitõk ko ami ren walok ñõn Anij. Im ainemõn jen Anij, eo ej elã jen jela otemjej, e naj kejbãrok buruemi im lemnok ko ami ilo Kraist Jisõs.”—Dri Pilippai 4:6, 7.

 Ilo am lor juõn lajrak in riit Baibel, kalomõnlokjen kake, im jar, ejelok berre kwonaj lo bwe kwoj ejaake juõn kõtan ebak ibben Jemeduij ilañ. Kõtan eo ad ibben enaj lap an jibañ kij anjo ion iñjake ko rekabwerer. Bar ta eo emaroñ jibañ?

Lemnak Wõt kin Kejatrikrik eo Emol kin Ilju im Jeklaj

Meñe jej iion wãwen ko relukkun bin, ak jemaroñ lemnak wõt kin men ko remmõn. Ewi wãwen? Anij ej letok ñan kij juõn kejatrikrik emol kin ilju im jeklaj. Dri jilik Piter ear kwalok kin kejatrikrik in emmõn ilo nan kein: “A ekar ñõn kalimur eo An, jej kõtõmene kin lõñ ko rekãl im lõl ekãl, eo kwojarjar ej jokwe iloan.” (2 Piter 3:13) Ta melelen men in?

Nan ko “lõñ ko rekãl” rej jitõñlok ñan juõn kien, eo ej Ailiñ eo an Anij ilañ im Jisõs Kraist ej iroij ie. “Lõl ekãl” ej jitõñlok ñan jukjuk im bed eo ekãl in armij ro ion lal me Anij ej buñburuen kake ir. Iomin iroij eo an “lõñ ko rekãl,” jukjuk im bed eo ekãl in armij ro renaj bõk anemkwoj jen aolep men ko im rej unjen iñjake ko rekabwerer. Ikijen armij ro retiljek im renaj mour ilo ien in, Baibel eo ej kalimur ñan kij bwe Anij “e naj kõmõraik jen mejeir dren in kemjãlãl otemjej, im e naj ejelok bar mij, im re jamin bar liãjlol, ak jõñ, ak iñtan.”—Reveles̃õn 21:4.

Ejelok berre kwoj errã bwe nan kein rekalõñliñ im kõketak. Eñin unin Baibel eo ej konono kin kejatrikrik ko kin ilju im jeklaj me Anij ear kalimur kaki ñan dri Kristian ro remol einwõt “men in kejatrikrik im kamõnõnõ.” (Taitõs 2:13) Elañe jej lemnak wõt kin kalimur ko an Anij kin ilju im jeklaj eo an armij ro, im kin un ko unin jemaroñ liki bwe kalimur kein remol, jenaj kõmman bwe en jakolok an walok iñjake ko rekabwerer ibbed.—Dri Pilippai 4:8.

 Baibel eo ej keidi kejatrikrik eo ad kin lomor ñan juõn helmet. (1 Dri Tessalonika 5:8) Ilo ien ko etto, juõn dri tõrinae eban kõnan bõk kwonan ilo juõn tõrinae elañe ear ejelok an helmet. Ear jelã bwe helmet eo enaj kar kejbãrok bõran jen jorrãn. Inem einwõt juõn helmet, kejatrikrik eo emol ej kejbãrok lemnak ko ad. Ad kalomõnlokjen kin lemnak ko im rej letok kejatrikrik ñan kij emaroñ jibañ kejbãrok kij jen iñjake ko rekabwerer im kõmman bwe jen jab mijak.

Aet, jemaroñ anjo ion iñjake ko rekabwerer. Ewor am maroñ ñan kõmmane men in! Kwon kalomõnlokjen kin wãwen an Anij lemnak kin kwe, kwon druaklok ñan e, im lemnak wõt kin kejatrikrik eo am kin ilju im jeklaj. Inem, kwomaroñ liki bwe kwonaj lo ran eo ñe iñjake ko rekabwerer renaj jako ñan indrio!—Sam 37:29.

[Kamelele eo Itulal]

[Kareelel ilo peij 19]

“I jela buromõj ko air.”​—EXODUS 3:7, 8

[Kareelel ilo peij 20]

“Ñe ij inebata im jorrãn kwoj kainemmõn iõ im kalõñliñ iõ.”​—SAM 94:19, UBS

[Kareelel ilo peij 21]

“Ainemõn jen Anij, eo ej elã jen jela otemjej, e naj kejbãrok buruemi im lemnok ko ami.”​—DRI PILIPPAI 4:7

[Box im Pija ilo peij 21]

Eon ko Rekainemõn kin Jeova Anij

“Jeova e ar elã iman mejen, im E ar kwalok men in, Jeova, Jeova, juõn Anij ej tiriamokake, im E joij, e rumij an illu, im elap an tiriamokake im mol.”—EXODUS 34:6.

“Mejen Jeova rej etõrlok im etõrtok ilo aolepen lõl, im mõke kwalok E kajur in jibõñ ro burueir re wãppen ñõn E.”—2 KRONIKEL 16:9.

“Jeova ej ebak ñõn ro erup burueir, im Ej lomoren ro retã wõt ilo air.”—SAM 34:18.

“Bwe Kwe Iroij kwoj emõn, im kõnan jeõrlok.”—SAM 86:5.

“Jeova emõn ñõn ro otemjej, im men in joij ko An ilõñin men ko otemjej E ar kõmõnmõni.”—SAM 145:9.

“Bwe Ña Jeova, am Anij, I naj kapjere anbijmaroñõm, im ba ñõn yuk, Kwon jab mijõk; I naj jibõñ yuk.”—AISEIA 41:13.

“Jen nebar Anij . . . Jemen tiriamokake, im Anij in ainemõn otemjej.”—2 DRI KORINT 1:3.

“Je naj karel buruer iman mejen. Bwe elañe buruer ej liakelok kij, Anij elap jen buruer im E jela men otemjelok.”—1 JON 3:19, 20.

[Box im Pija ilo peij 22]

Rej Anjo Ion Iñjake ko Rekabwerer

“Jema ej juõn eo ekarekrek im men ko ear kõmmani ear lap air kaiñtan iõ. Eto aõ kar bõk iñjake eo bwe ejelok tokjeõ. Bõtab, ke iar jino katak Baibel ibben juõn ian Dri Kennan ro an Jeova, iar katak kin kalimur eo kin mour indrio ion lal. Kejatrikrik in ear lap an kalõñliñ iõ. Iar jino aõ riit Baibel eo jen ran ñan ran im aolep ien ij bõk Baibel eo ibbã. Ñe ij bõk iñjake ko rekabwerer, ij kebellok Baibel eo im riiti eon ko rekainemõn. Aõ riit kin kadkad ko remmõn kadkadin Anij ej kamol kin joñan aõ aurõk iman mejen.”—Kátia, juõn kõrã 33 yiõ drettan. *

“Iar juõn eo ekarekrek, iar añũr marijuana, cocaine, im iar kakiajaj juõn kain glue ekajur. Kinke iar luji enañin aolep men ko mweiõ, iar oktak im juõn eo ejerata. Bõtab elikin aõ kar jino katak Baibel ibben Dri Kennan ro an Jeova, iar kõmõn elap oktak ko ilo mour eo aõ. Iar jino bõk juõn kõtan ebak ibben Anij. Meñe ij wõnmanlok wõt im kate iõ ñan anjo ion iñjake eo bwe ewor ruõ im ejelok tokjeõ, iar katak ñan atartar ion Anij kinke etiriamokake im yokwe. Ewor aõ liki bwe Anij enaj wõnmanlok wõt im kakajur iõ bwe in anjo ion iñjake ko aõ rekabwerer. Aõ jelã kin mol eo ilo Baibel eo ej men eo emmõntata im ear walok ñan iõ.”—Renato, juõn eman 37 an yiõ.

“Jen ke iar drik, ekkã aõ kar keidi ña make ñan ibben leo jeiõ eridtotata. Ien otemjej iar bõk iñjake eo bwe elaplok an emmõn jen ña. Ij bõk wõt iñjake eo bwe ejelok ej yokwe iõ im elap aõ berre maroñ ko aõ. Bõtab ij kate iõ bwe in anjo ion men kein. Iar keini aõ jar ñan Jeova, im ear jibañ iõ ñan anjo ion iñjake ko aõ rekabwerer. Elap an kõketak ñan jelã bwe emol an Anij yokwe im kea kake iõ!”—Roberta, juõn kõrã 45 an yiõ.

[Kamelele eo Itulal]