Ruwaakl̦o̦k ñan Anij

Jeova Ear Tũriam̦okake

J UON em̦m̦aan ear rũttol̦o̦k ilo m̦ool eo, bõtab tokãlik ear ilo̦k jãn m̦ool eo. Ke ear jino kõm̦m̦an oktak ko ilo mour eo an, l̦ein ear l̦õmn̦ak bwe Anij eban jol̦o̦k an bõd. Ear ba, “Elukkuun ejjel̦o̦k tokja.” Bõtab, bwebwenato eo kõn Menassa ilo 2 Kronikel 33:1-17 ear kakajoor l̦ein. Kwõj ke l̦õmn̦ak bwe ejjel̦o̦k tokjem̦ kõnke elõñ men ko renana kwaar kõm̦m̦ani ilo iien ko remootl̦o̦k? Kwoj ke l̦õmn̦ak bwe Anij eban jol̦o̦k bõd ko am̦? El̦aññe aet, bwebwenato in kõn Menassa emaroñ kaenõm̦m̦an yuk.

Menassa ear katak kõn Jeova jãn ke ear dik. Etan jemen in Hezekaia. Hezekaia ear juon iaan kiiñ ro rem̦m̦antata ilo aelõñ in Juda. Jeova ear kõmour Hezekaia jãn juon nañinmej ilo kabwilõñlõñ. Jilu yiõ ko tokãlik, Menassa ear l̦otak. (2 Kiiñ 20:1-11) Hezekaia ear watõke l̦addik in nejin ãinwõt juon menin letok jãn Jeova. Ear kajjioñ katakin Menassa bwe en kabuñ ñan Jeova im yokwe kien ko an. Bõtab, ejjab aolep ajri rej l̦oore joñak ko rem̦m̦an an jineer im jemãer. Eñin ejja men eo wõt ear wal̦o̦k ñan Menassa.

Ke ear 12 an Menassa iiõ, jemen ear mij. Ekabũrom̦õjm̦õj bwe Menassa ear rũttol̦o̦k im ‘kõm̦m̦ani men ko renana im̦aan mejãn Jeova.’ (2 Kronikel 33:1, 2) Baibõl̦ eo ejjab kwal̦o̦k etke Menassa ear kõm̦m̦ani aolep men kein renana. Bõtab, Baibõl̦ eo ej kwal̦o̦k bwe Menassa ear juon kiiñ eo elãj im ej kabuñ ñan ekjab. Menassa ekar kalõk lokatok ko ñan anij ko an ri aelõñ ko im katok kõn l̦addik ro nejin ilo kijeek. Ear anijnij im kajutak juon ekjab ekilep iloan tampel̦ eo an Jeova i Jerusalem. Menassa eban kar l̦otak el̦aññe Jeova ear jab kaitokl̦o̦k mour eo an Hezekaia, jemen. Meñe ãindein ak Menassa ear jab kõn̦aan roñjake naan in kakkõl ko jãn Jeova.—2 Kronikel 33:3-10.

Innem Jeova ear kõtl̦o̦k bwe ri Assiria ro ren kamakokoik Menassa im bõke ñan Babilõn. Ke ear kalbuuj, Menassa ear kõl̦mãnl̦o̦kjen̦ kõn aolep men ko renana ear kõm̦m̦ani ilo mour eo an. Ear kile bwe anij ko ear kabuñ ñan er rar jab lo̦mo̦o̦ren e jãn ri kõjdat ro an. Emaroñ kar bar keememejtok aolep men ko jemen ear katakin e kõn Jeova. Jejjab lukkuun jel̦ã kõn ta eo ear wal̦o̦k ilo iien in, bõtab jejel̦ã bwe Menassa ear jino oktak. Ekkar ñan bwebwenato in, Menassa ‘ear akwel̦ap ñan Jeova Anij, im kanooj kõttãik e make im Anij ear tũriam̦okake e.’ (2 Kronikel 33:12, 13) Jeova enaaj ke jol̦o̦k bõd ko an kiiñ in elãj im elukkuun nana men ko ear kõm̦m̦ani?

Jeova ear ukot an l̦õmn̦ak ke ej lo an Menassa oktak. Kõn men in, Jeova ear ‘eo̦roñ an akwel̦ap, im bar bõkl̦o̦k e ñan Jerusalem ñan aelõñ eo an.’ (2 Kronikel 33:13) Ñan kam̦ool bwe eoktak bũruon jãn kar m̦okta, Menassa ear kate im kajim̦we aolep jerbal ko an renana. Ear jol̦o̦k aolep ekjab ko im anij ko an ri aelõñ ko jen aelõñ in Juda. Bareinwõt, ear rõjañ armej ro an “bwe ren karijer ñan Jeova.”—2 Kronikel 33:15-17.

El̦aññe kwoj l̦õmn̦ak bwe ejjel̦o̦k tokjem̦ kõnke kwaar kõm̦m̦ani men ko renana ilo iien ko remootl̦o̦k, bwebwenato in an Menassa emaroñ kaenõm̦m̦an eok. Anij ear likũt bwebwenato in ilo Baibõl̦ eo kõnke eaorõk ñan kõj. (Rom 15:4) Jeova ej kalikkar ñan kõj bwe ‘ekõn̦aan jol̦o̦k bõd’ ko ad. (Sam 86:5) Jeova ejjab kallimjek bõd ko an armej ro. Ej lale im etale bũrueer. Juon eo ear kõm̦m̦ane juon bõd el̦ap ej aikuj kõttãik e make im jar kõn aolepen bũruon ñan Jeova. Ej aikuj bõjrak jãn men eo enana ear kõm̦m̦ane, im kate joñan wõt an maroñ ñan kõm̦m̦ani men ko rejim̦we. El̦aññe ej kõm̦m̦ani men kein, Jeova enaaj tũriamokake e ãinwõt an kar tũriamokake Menassa.—Aiseia 1:18; 55:6, 7.