Unin Elõñ Rar Yokwe Dorkas
Katakin Ajri ro Nejõm̦
Unin Elõñ Rar Yokwe Dorkas
KÕJ aolep jekõn̦aan bwe armej ro ren yokwe kõj. Ãindein ke bar kõn̦aan eo am̦? — * Baibõl̦ eo ej kwal̦o̦k kõn juon kõrã me elõñ armej ro rar lukkuun yokwe e. Etan kõrã in ej Dorkas.
Dorkas ear jokwe ilo Joppa, juon bukwõn iturin Lom̦al̦o Mediterranean. Ettol̦o̦kin Joppa jãn Jerusalem ej 35 m̦ail̦. Dorkas ear juon rũkal̦oor an Jijej.
Ewi am̦ l̦õmn̦ak, etke elõñ armej ro rar lukkuun yokwe Dorkas?— Eokwe, Baibõl̦ eo ej ba bwe Dorkas ear kõm̦m̦ani elõñ men ko rem̦m̦an ñan armej ro. Ej bareinwõt ba bwe Dorkas ear lel̦o̦k men ko rem̦m̦an ñan ro jet. Ear keke nuknuk ro rem̦m̦an im lel̦o̦k an kõrã ro emej ro pãleer. Ear bareinwõt katakin elõñ armej ro kõn Anij eo em̦ool Jeova, ãinwõt kar Jijej.
Kwõjel̦ã ke ta men eo enana ear wal̦o̦k ñan Dorkas kiiõ?— Ear jino nañinmej im tokãlik mej. Ro m̦õttan rar lukkuun bũrom̦õj. Kõn men in rar jilkinl̦o̦k jet armej bwe ren ãñintok Piter jãn bar juon bukwõn. Ijo me Piter ej pãd ie ej tarrin 10 m̦ail̦ ettol̦o̦kin. Armej rein rar kajjitõk ippãn bwe en m̦õkaj in itok ñan ijo me Dorkas ej pãd ie. Ke Piter ej tõpartok ijo ear wanlõñl̦o̦k ñan ruum̦ eo ilõñ me ri mej eo ej pãd ie. Im kõrã ro rej jañ im rej kwal̦o̦k nuknuk ko Dorkas ear kiiji im lel̦o̦k aer.
Kiiõ, Piter ej ba ñan aolep bwe ren diwõjl̦o̦k jãn ruum̦ eo. Elõñ menin bwilõñ ko Piter im rijjelõk ro jet rekõn kõm̦m̦ani. Bõtab, rejañin kar kõmour armej ro jãn mej. Ta eo Piter enaaj kõm̦m̦ane?—
Piter ej jijet iturin ãnbwin eo im jar ñan Jeova. Tokãlik ej ba ñan Dorkas bwe en jerkak im Dorkas ej mour! Im Piter ej lel̦o̦k pein im jipañ kejerkak e. Ãlikin, ej kũrtok armej ro ñan kwal̦o̦k bwe Dorkas emour. Kwõmaroñ ke pijaik joñan m̦õn̦õn̦õ eo aer ilo iien in?—
Ta eo kwõmaroñ katak jãn bwebwenato in kõn Dorkas? Eokwe, armej ro renaaj yokwe eok el̦aññe kwõj jipañ er. El̦aptata, Anij enaaj keememej jerbal ko am̦ im enaaj yokwe eok. Ejamin mel̦o̦kl̦o̦k men ko rem̦m̦an kwõj kõm̦m̦ani ñan ro jet. Im enaaj kajeraam̦m̦an eok kõn mour indeeo ioon lal̦ in me ri wãnõk ro renaaj jokwe im m̦õn̦õn̦õ wõt ie.
Riiti Eoon Kein
[Kamelele eo itulal]
^ El̦aññe kwõj riit ippãn juon ajri im kwõj loe kakõl̦l̦e in (—) jouj im bõjrak im kõtl̦o̦k an ajri eo kwal̦o̦k l̦õmn̦ak ko an.
