Wãween Kwõmaroñ Katakin Ajri ro kõn Anij​—Men ko Kwõmaroñ Kõm̦m̦ani ñan Katakin Ajri ro Nejõm̦

“Lale kwar meloklok kien kein otemjej ij liwõj ñõn yuk rainin. Kwon katakin ajiri ro nejũm kaki. Kwon eliji ñe kwoj bed imweo imõm im ñe kwoj ettolok jene, ñe kwoj kakkije im ñe kwoj jerbal.”​​—DUTERONOMI 6:​6, 7, UBS.

EDDO eo ñan lale im katakin ajri ro ejjab juon men epidodo. Jet iien ro jinen im jemen rej m̦õk ilo aer kõm̦m̦ane eddo in aer. Ñe rej kappok jipañ ippãn ro nukũer im ro m̦õttaer, ekkã an oktak l̦õmn̦ak ko aer. Ro nukũer im ro m̦õttaer remaroñ kwal̦o̦k elõñ mel̦el̦e ko im jet iien rejjab jim̦we im jejjet.

Baibõl̦ eo emaroñ jipañ rũtto ro kõn ta ko rej aikuj katakin ro nejier kaki im ewi wãween remaroñ kõm̦m̦ane men in. Ãinwõt an bok in Duteronomi 6:​6, 7 kwal̦o̦ke, ro jinen im jemen rej aikuj kate er ñan kõnono ippãn ajri ro nejier kõn Anij kajjojo raan. Jenaaj etale emãn naan in kakapilõk ko jãn Baibõl̦ eo im em̦õj aer jipañ elõñ to̦ujin ro jemen im jinen ajri ro ipel̦aakin lal̦ in.

1. Menin kõm̦anm̦an ko an Anij. Rijjelõk Paul ear ba: “Jen jinoin an Anij kar kõmõnmõn lõl, men ko rej kin Anij im armij reban loi rekar alikkar wõt, einwõt kein: kajur eo an ñõn indrio, kab mour eo an ekkwojarjar. Armij remaroñ kile men kein ilo men ko Anij ear kõmõnmõni. Innem ejjelok air kein jekbin ñõn jidrik!” (Rom 1:​20, UBS) Ro jemen im jinen remaroñ katakin ajri ro nejier kõn Anij ikijjeen aer katak kõn menin kõm̦anm̦an ko an. Remaroñ jipañ ajri ro nejier ñan kile kain Anij rot Jeova ilo aer katak kõn menin kõm̦anm̦an kein.

Jijej ear kõjerbal menin kõm̦anm̦an ko an Anij ke ear katakin rũkal̦oor ro an. Ñan waanjoñak, ear ba: “Lemnak mõk kin bao ko rej ekkãke, rejjab kallib, rejjab madmid, ak Jememi ilõñ ej wonaki! Ta, komij jab aurõklok jen bao ko ke?” (Matu 6:​26, UBS) Jijej ear kõjerbale waanjoñak in ñan kõmel̦el̦e bwe Jeova ej juon Anij eo el̦ap an yokwe im tũriam̦o. Bõtab, ejjab men in wõt ear katakin rũkal̦oor ro an kake. Ear jipañ rũkal̦oor ro an ñan make mel̦el̦e ewi wãween an Anij kwal̦o̦k yokwe im tũriam̦o ñan ro nejin.

Kiiñ Solomon ear kõjerbal l̦oñ ko reddik ñan kwal̦o̦k kõn joñan mãlõtlõt eo Anij ear lel̦o̦k ñan menin mour jiddik kein. Jemaroñ katak jãn naan kein an Solomon. Ear ba, ‘Ri jowan ren ekkatak jãn wãween mour an l̦oñ ko. Ejjel̦o̦k aer ri tõl, ak irooj, ak ri utiej, bõtab rej aini men ko kijeir ilo iien rak im pojak ñan  iien añõneañ.’ (Jabõn Kõnnaan 6:​6-8, UBS) L̦oñ kein reddik rej katakin kõj kõn aorõkin ad aikuj kõm̦m̦an mejãnkajjik ko im kate kõj bwe jen tõpari.

Kwõmaroñ katak jãn wãween an kar Jijej im Solomon katakin armej ro ilo am̦ kõm̦m̦ane men kein jilu. (1) Kajjitõk ippãn ajri ro nejõm̦ ta menin mour ak menin eddek ko me rem̦m̦an ippãer. (2) Ãlikin, kwõn katak kõn menin mour ak menin eddek kein bwe en l̦apl̦o̦k am jel̦a kaki. (3) Kõjerbal menin mour kein ak menin eddek kein ñan katakin ajri ro nejõm̦ kõn Anij.

2. L̦oore joñak eo an Jijej ilo an kõm̦m̦an ñan ro ear katakin er. Aolep men ko Jijej ear ba rar aorõk ñan armej ro. Bõtab, Jijej ear jab baj kõnono wõt. Ear kwal̦o̦k kajjitõk ko bwe en bõk l̦õmn̦ak ko an armej. Ear lukkuun kõn̦aan jel̦ã ta l̦õmn̦ak im eñjake ko an armej ro ear katakin er. (Matu 17:​24, 25; Mark 8:​27-​29) Eaorõk bwe ro jemen im jinen ren katakin ajri ro nejier. Bõtab, rej aikuj kõtl̦o̦k bwe ro nejier ren bar kwal̦o̦k l̦õmn̦ak ko aer, ãinwõt an kar Jijej kõm̦m̦ane ñan ri roñjake ro an. Rũtto ro rej aikuj rõjañ ro nejier ilo jouj bwe ren kõm̦m̦ane men in.

Ak ta el̦aññe ajri eo elukkuun bõt im erum̦wij an katak men ko jej katakini? Jen lale wãween an kar Jijej kõm̦m̦an ñan rijjelõk ro an. Jet iien, rijjelõk ro an rar akwããle doon im kwal̦o̦k an utiej bũrueer. Bõtab, Jijej ear kijenmej wõt ippãer im ear jab ebbeer in kõnnaan ippãer kõn aorõkin aer aikuj kwal̦o̦k etta bõro. (Mark 9:​33, 34; Luk 9:​46-​48; 22:​24, 25) Ro me rej yokwe ro nejier renaaj kijenmej wõt ippãer im kajim̦we er ilo iien ekkar. Bareinwõt, renaaj ãliji katak eo m̦ae iien ajri eo ej lukkuun mel̦el̦e.

3. Kwõn juon joñak em̦m̦an. Ro jemen im jinen rej aikuj l̦oore naan in rõjañ ko an rijjelõk Paul ñan ri tõmak ro ilo Rom. Paul ear ba: “Innãm kwe eo kwõj katakin bar juon, kwõ jab make katakin eok ke? Kwe eo kwõj kwal̦o̦k ren jab ko̦o̦t, kwõj ko̦o̦t ke?”​​—Rom 2:​21.

Etke naan in kakapilõk in elukkuun jejjet? Kõnke el̦apl̦o̦k an ajri ro katak jãn men ko jineer im jemãer rej kõm̦m̦ani jãn aer baj ba wõt. Ñe rũtto ro rej kõm̦m̦ani ejja men ko wõt me rej katakin ajri ro nejier bwe ren kõm̦m̦ani, enaaj pidodol̦o̦k an ajri ro pokake.

4. Katakin ajri ro jãn ke rej dik wõt. Timote ear itoitak im kwal̦o̦k naan ippãn Paul. Likao in ear juon joñak em̦m̦an ilo bukwõn eo ear jokwe ie. (Jerbal 16:​1, 2) Jãn ke Timote ear dik, rar katakin e kõn jeje ko rekwõjarjar. Eñin ej juon iaan un ko ear rũttol̦o̦k im juon likao eo em̦m̦aan m̦wilin. Jinen im jibwũn rar jab baj riit wõt ñan e naan in Anij, ak rar bar katakin e bwe en mel̦el̦e im jerbali.​​—2 Timote 1:5; 3:​14, 15.

Kwõmaroñ Bõk Jipañ jãn Ia?

Ri Kõnnaan ro an Jeova rar kõm̦m̦ani elõñ bok ko me remaroñ jipañ rũtto ro ñan aer katakin ro nejier kõn Anij. Jet iaan bok kein rar jei ñan jipañ ro reddik. Im bar jet iaan bok kein rar kõm̦m̦ani ñan rũtto ro me ewõr nejier jodrikdrik. Bok kein remaroñ jipañ rũtto ro im jodrikdrik ro bwe ren em̦m̦an wõt wãween aer kõm̦m̦ao im bwebwenato ippãn doon. *

Bõtab, m̦okta jãn an rũtto ro maroñ katakin ro nejier, eokwe rej aikuj jel̦ã kadede uwaak in jet iaan kajjitõk ko me ro nejier renaaj bõkm̦aantak. Ñan waanjoñak, el̦aññe ewõr nejõm̦ ajri, jouj im lale el̦aññe kwõjel̦ã uwaak in kajjitõk kein: Etke Anij ej kõtl̦o̦k bwe armej ren eñtaan? Ta ankilaan Anij kõn lal̦ in? Ro remej rej pãd ia? Ri Kõnnaan ro an Jeova renaaj m̦õn̦õn̦õ in jipañ eok bwe kwõn maroñ lo uwaak in kajjitõk kein. Renaaj m̦õn̦õn̦õ in jipañ eok im baam̦le eo am̦ bwe kom̦win maroñ epaakel̦o̦k Anij.​​—Jemes 4:⁠8.

[Kamelele eo itulal]