Ebream​—Juon Armej Ettã Bũruon

Ebream ear jijet ilowaan im̦õn kabbed eo an ilo juon raan ekanooj det jilõñlõñ. Ke ej bõk mejen im reil̦o̦k, ej lo jilu em̦m̦aan rej itok ñan jikin eo. * (Lale kõmel̦el̦e eo itulal̦.) Ebream ear kaiur im ettõrl̦o̦k im wõnm̦aik erjil im ear akwel̦ap bwe ren kakkije jidik im kõttari men ko enaaj kõpooji ñan er. Ear ba ñan er bwe enaaj bõktok “jidik pilawã,” ak ear etal im kõpooje juon m̦õñã l̦apl̦ap. Ear wõr pilawã rej kab mat, im bõta im milik, im kanniõk ko repidodo im renno̦. Ilo an kar Ebream naajdik ri lotok rein an, ear kwal̦o̦k bwe ear jab baj lukkuun jel̦ã karwainene wõt ak ear bareinwõt ettã bũruon. Jenaaj etale ewi wãween ear kwal̦o̦k an ettã bũruon.​—Jenesis 18:1-8.

TA IN ETTÃ BÕRO? Ettã bõro eoktak jãn utiej bõro ak jua. Juon armej ettã bũruon ej kile bwe ewõr men ko me ro jet remaroñ jel̦ãl̦o̦k jãn e ak em̦m̦anl̦o̦k jãn e. (Pilippai 2:3) Ej roñjake ñe ro jet rej kwal̦o̦k l̦õmn̦ak ko aer im em̦õn̦õn̦õ in kõm̦m̦ani jerbal ko rettã ñan ro jet.

EWI WÃWEEN EBREAM EAR KWAL̦O̦K ETTÃ BÕRO? Ebream ear m̦õn̦õn̦õ in jerbal ñan ro jet. Ãinwõt kar kwal̦o̦k kake ilo jinoin, ke Ebream ear lo ri lotok ro jilu, ear kaiur im kõpooji men ko ri lotok rein an rar aikuji. Sera, lio pãleen, ear m̦õkaj im kõpooji m̦õñã ko. Bõtab, eo im el̦apl̦o̦k an kar jerbal ilo iien in ej Ebream. Etke? Kõnke Ebream eo ear ettõrl̦o̦k im wõnm̦aik ri lotok ro im ear ba enaaj bõktok kijeer m̦õñã. Ear bar ettõr ñan menin mour ko nejin im kããlõt juon menin mour bwe ren m̦ane, im ear bõktok aolep m̦õñã ko im likũti im̦aan mejen ri lotok ro an. Ijello̦kun an lel̦o̦k aolep jerbal kein ñan ri karejar ro an, armej in ettã bũruon ear make jutak im kõm̦m̦ani jerbal kein rettã. Ear jab l̦õmn̦ak bwe eutiej ñan an jerbal ñan ro jet.

Ebream ear roñjake ro rar pãd ium̦win maroñ eo an. Baibõl̦ eo ej kwal̦o̦k jet wõt iaan men ko Ebream im Sera rar kõnono kaki. Ak, ej kwal̦o̦k  bwe ruo alen Ebream ear roñjake ke Sera ear kwal̦o̦k l̦õmn̦ak ko an im ear l̦oori men ko ear ba. (Jenesis 16:2; 21:8-14, UBS) Ilo juon iaan iien kein, Sera ear kwal̦o̦k an l̦õmn̦ak kõn juon men me ilo jinoin “ear kanooj eddo ippãn Ebream.” Bõtab, ke Jeova ear kõnnaan ñan Ebream im ba bwe em̦m̦an l̦õmn̦ak eo an Sera, Ebream ear kõttãik bũruon im l̦oore men eo Sera ear ba.

TA KO JEMAROÑ KATAK JÃN MEN IN? El̦aññe em̦ool an ettã bũruod, jenaaj m̦õn̦õn̦õ in jerbal ñan ro jet. Ñe jej kate kõj kõm̦m̦an jabdewõt men me enaaj em̦m̦an ñan ro jet, men in enaaj kalañlõñ kõj.

Jemaroñ bareinwõt kwal̦o̦k ad ettã bõro ilo wãween ad uwaake ro jet ñe rej kwal̦o̦k l̦õmn̦ak ko aer. Jen jab kajekdo̦o̦ne men ko rej ba kõnke ear jab ãindein ad l̦õmn̦ak. Em̦m̦an bwe jen bõk l̦õmn̦ak ko an ro jet. (Jabõn Kõnnaan 15:22) Ad kõm̦m̦ane men in emaroñ jipañ kõj, el̦aptata ro im kar lel̦o̦k maroñ ñan er bwe ren loloorjake jet ri jerbal ro. Juon em̦m̦aan etan Jon me kar jitõñe ñan tõl jet jerbal ko im ewõr an kapeel im imminene ilo jerbal eo, ear ba: “Ij kile bwe el̦aññe juon ri tõl ekõn̦aan bwe en em̦m̦an mejatoto eo ilo jikin jerbal, ej aikuj kõtl̦o̦k bwe armej ro jet ren bar kwal̦o̦k l̦õmn̦ak ko aer. Ejjab pidodo ñan kõttãik kõj im roñjake juon ri jerbal ej pãd ium̦win peid me emaroñ em̦m̦anl̦o̦k l̦õmn̦ak ko an jãn kõj. Bõtab, jej aikuj lukkuun ettã bõro ñan kõm̦m̦ane men in. Ilo m̦ool, ejjel̦o̦k juon armej me e wõt em̦m̦an l̦õmn̦ak im pepe ko an. Men in ej bar jerbal ñan ro rej tõl im loloorjake juon jerbal.”

Ñe jej anõke joñak eo an Ebream ilo ad roñjake ñe ro jet rej kwal̦o̦k l̦õmn̦ak ko aer im ilo ad kõm̦m̦ani jerbal ko rettã ñan er, jej kabuñbũruon Jeova. Baibõl̦ eo ej ba: “Anij ej jum̦ae ro eutiej bũrueer, ak ej jouj ñan ro ettã bũrueer.”​—1 Piter 5:5.

[Komel̦el̦e eo itulal̦]