Ruwaakl̦o̦k Ñan Anij​

Jouj im Karo̦o̦l Waj Kõm

Em̦õj ke am̦ bõjrak jãn am̦ karejar ñan Jeova? Ewõr ke iien kwõj kõn̦aan bar jepl̦aak im karejar ñan Jeova ak kwõj mijak bwe eban m̦õn̦õn̦õ ippam̦? El̦aññe aet, jouj im lukkuun riiti katak in. Kar je katak in ñan aolep el̦aptata ñan kwe.

JUON kõrã ear bõjrak jãn an karejar ñan Anij. Jãn ke ear dik, jinen im jemen rar katakin e kõn Baibõl̦ bõtab ear ilo̦k jãn katak kein. Tokãlik ear ba: “Iar jar ñan Jeova bwe en jol̦o̦k aõ bõd kõn aõ kar kabũrom̦õje im bwe en jouj im karo̦o̦ltok eõ bwe in bar karejar ñane.” Kwõj ke tũriam̦okake kõrã in? Kwõj ke l̦õmn̦ak ippam̦ make: ‘Ewi wãween an Anij l̦õmn̦ak kõn ro me rar bõjrak aer karejar ñane? Ej ke keememej wõt er? Ekõn̦aan ke bwe ren bar ro̦o̦l ñan e?’ Ñan lo uwaak in kajjitõk kein, jen etale naan ko Jeremaia ear jei. Ejjel̦o̦k pere bwe uwaak ko renaaj lukkuun kõm̦akũt bũruom̦ im kaenõm̦m̦an eok.​—Riit Jeremaia 31:18-20.

L̦õmn̦ak kõn men ko rar wal̦o̦k ñan Ri Israel ro elõñ iiõ ko m̦okta jãn an kar Jeremaia ba naan ko an. Ilo iiõ eo 740 m̦okta jãn Kũraij, Jeova ear kõtl̦o̦k an Ri Assiria ro anjo̦ ioon bwij ko joñoul an Israel im kajipo̦kweik er. * (Lale kõmel̦el̦e eo itulal̦.) Ri Israel ro rar jino kõm̦m̦ani men ko renana im kajekdo̦o̦n naan in kakkõl ko an ri kanaan ro an Anij. Kõn men in, Anij ear kajeik er ilo an kar kõtl̦o̦k bwe ren lo jorrããn. (2 Kiiñ 17:5-18) Armej ro rar ke oktak kõn aer kar lo jorrããn ke rar el̦l̦o̦k jãn Anij eo aer im ettol̦o̦k jãn ijo kapijukuneer? Jeova ear ke mel̦o̦kl̦o̦k er? Ear ke m̦õn̦õn̦õ in bar kajepl̦aaktok er ñan ippãn?

“Iar Ukel̦o̦k”

Ke armej ro rar jipo̦kwe rar kile bwe rar bõd, innem rar ukel̦o̦k. Jeova ear lo bwe em̦ool aer ukel̦o̦k. Jen lale wãween an Jeova kwal̦o̦k kõn l̦õmn̦ak im eñjake ko an bwij ko joñoul an Israel, ak jemaroñ ba Epraiem, ke rar jipo̦kwe.

Jeova ej ba: “Iar lukkuun roñ Epraiem ke ear liaajlo̦l̦.” (Eoon 18) Ear roñ ainikien an Ri Israel ro jañ im bũrom̦õj kõn tokjãn aer kar jerawiwi im kõm̦m̦ani men ko renana. Rar ãinwõt juon likao enana m̦wilin me tokãlik ear kajjeboulul bõran kõn an ajl̦o̦k im bũrom̦õj kõn men ko renana ear kõm̦m̦ani im ekõn̦aan bar jepl̦aak ñan m̦weo im̦õn. (Luk 15:11-17) Ta ko Ri Israel ro rar ba?

“Kwaar kajeik eõ . . . ãinwõt juon koon in kau e jañin katakin e.” (Eoon 18) Armej ro rar kile bwe ej tõllo̦keer ñan bõk kaje. Em̦ool bwe rar ãinwõt juon koon in kau me rejañin katakini. Ta mel̦el̦ein men in? Juon bok ear kõmel̦el̦e bwe un eo wõt unin aer deñl̦o̦ke juon kau ej kõnke kau eo ej pen awiia im jeor jãn ial̦ eo. Eñin kar men eo ear wal̦o̦k ñan Ri Israel ro.

 ‘Kwõn karo̦o̦l waj eõ, im inaaj oktak, bwe Kwe Jeova aõ Anij.’ (Eoon 18) Armej ro rar kõttãik bũrueer im kũr ñan Anij. Rar jebwãbwe ilo aer kar kõm̦m̦ani men ko renana ak kiiõ rej akwel̦ap im kajjitõk bwe ren bar ro̦o̦l ñan Anij.

“Iar ukel̦o̦k . . . iar jook.” (Eoon 19) Armej ro rar bũrom̦õj kõnke rar jerawiwi. Rar kile bwe rar bõd im rar jab n̦aruon bar juon. Bareinwõt rar jook im nana aer mour.​—Luk 15:18, 19, 21.

Ri Israel ro rar ukel̦o̦k. Rar kanooj bũrom̦õj im rar kwal̦o̦k rueer ñan Anij, im bõjrak jãn aer kõm̦m̦ani men ko renana. Anij ear ke m̦õn̦õn̦õ ippãer ke rar ukel̦o̦k? Ear ke karo̦o̦ltok er ñan ippãn?

“Inaaj Tũriam̦o Kake E”

Jeova ear epaake im kaorõke Ri Israel ro. Ear ba: “Ij jemen Israel, im Epraiem ej m̦aanjeõ.” (Jeremaia 31:9) Juon jemen el̦ap an yokwe likao eo nejin ejamin m̦akoko in karo̦o̦ltok ñan ippãn ñe ej ukel̦o̦k jãn bõd eo an. Jen lale wãween Jeova ej kwal̦o̦k an yokwe armej ro an, ãinwõt juon Jemen ñan ajri ro nejin.

“Epraiem e jab nejũ jitõnbõro ke? E jab juon ajri ej kam̦õn̦õn̦õik Eõ ke? Bwe toun wõt Aõ kar kõnnaan n̦ae e, Iar kanooj keememej e wõt.” (Eoon 20) El̦ap wõt an jouj im em̦m̦an naan kein! Ãinwõt an juon jemen ak jinen kajim̦we eo nejin kõn an yokwe, ãindein Anij ear aikuj kõnnaan “n̦ae” ro nejin ikijjeen an kar kakkõl er bwijin alen kõn men ko renana rar kõm̦m̦ani. Ke rar bõt im pen awiia, ear kõtl̦o̦k bwe ren jipo̦kwe im etal jãn ijo kapijukuneer. Bõtab meñe ear aikuj kaje er, ear jab mel̦o̦kl̦o̦k er. Enaaj kar keememej wõt er. Juon jemen ej yokwe ajri ro nejin ejjab mel̦o̦kl̦o̦k er. Ak kar ewi wãween an Jeova eñjake ke ear lo an ajri ro nejin lukkuun ukel̦o̦k jãn bõd ko aer?

“E pok bũruõ kõn e; ilo m̦ool Inaaj tũriam̦o kake e.” (Eoon 20) Jeova ear lukkuun kõn̦aan karo̦o̦ltok ajri ro nejin ñan ippãn. Ke rar ukel̦o̦k jãn bõd ko aer, men in ear jelõt bũruon im ear kõn̦aan bwe ren jepl̦aaktok ñan ippãn. Ãinwõt jemen likao eo ejerwaan ilo waanjoñak eo an Jijej, Jeova ear “tũriam̦o kake” ajri ro nejin im kijooror in karo̦o̦ltok er ñan ippãn.​—Luk 15:20.

“Jeova Ear Karo̦o̦ltok Eõ!”

Naan ko ilo Jeremaia 31:18-20 rej jipañ kõj ñan mel̦el̦e kõn joñan an Jeova jouj im tũriam̦okake. Anij ejjab mel̦o̦kl̦o̦k ro rar bõjrak jãn aer karejar ñan e. Ta el̦aññe armej rein rekõn̦aan bar ro̦o̦l ñan Anij? Anij ej pojak in “jol̦o̦k bõd.” (Sam 86:5) Ejamin kõjekdo̦o̦n ro rej ukel̦o̦k jãn bũrueer. (Sam 51:17) Bareinwõt, ej m̦õn̦õn̦õ in karo̦o̦ltok rein ñan ippãn.​—Luk 15:22-24.

Kõrã eo kar kwal̦o̦k kake ilo jinoin, ear bõk buñtõn n̦e eo ñan bar jepl̦aak im karejar ñan Jeova im etal im kweilo̦k ilo juon eklejia an Ri Kõn̦aan ro an Jeova ilo bukwõn eo ej pãd ie. Ilo jinoin, ear aikuj jol̦o̦k l̦õmn̦ak im eñjake ko renana me rar kabũrom̦õj im kabbeer e. Ej ba: “Iar watõk bwe ejjel̦o̦k tokja.” Bõtab, em̦m̦aan ro rej lale eklejia eo rar lel̦o̦k naan in rõjañ ñane im jipañe bwe en bar kajoor kõtaan eo an ippãn Jeova. Ilo an lukkuun kam̦m̦oolol, ej ba: “Elukkuun em̦m̦an bwe Jeova ear karo̦o̦ltok eõ ñan ippãn!”

El̦aññe kwaar bõjrak jãn am̦ karejar ñan Jeova im kiiõ kwõj kõn̦aan bar karejar ñane, kõmij rõjañ eok bwe kwõn etal im kweilo̦k ilo eklejia eo an Ri Kõnnaan ro an Jeova ilo bukwõn eo am̦. Keememej bwe Jeova ej jouj im tũriam̦okake ro rej ukel̦o̦k im rej kũr ñan e im ba, ‘Jouj im karo̦o̦l waj kõm.’

Riiti Jebta Kein Ilo Allo̦n̦ In Eprõl̦:

◼ Jeremaia 17-31

[Komel̦el̦e eo itulal̦]