Ta eo Kũrjin ro Rainin Rej Aikuj Kõm̦m̦ane?

KŨRJIN ro rem̦ool rainin rejjab bõk kun̦aaer ilo m̦akũtkũt im aituerõk ko an kien. Etke? Kõnke rej anõke joñok eo an Jijej. Jijej ear ba kõn e make: “Ijjab an lal̦.” Im ikijjeen rũkal̦oor ro an, ear ba: “Kom̦ jab an lal̦.” (Jon 15:19; 17:14, UBS) Jen lale jet iaan un ko unin an Kũrjin ro jab aikuj bõk kun̦aaer ilo m̦akũtkũt im aituerõk ko an kien.

1. Ejabwe maroñ ippãn armej. Baibõl̦ eo ej kwal̦o̦k bwe armej ro rejjab maroñ irooj iooer make im ejjab tõllo̦keer ñan irooj. Ri kanaan Jeremaia ear je: “Ejjel̦o̦k en emaroñ peek ilju eo an; Ejjel̦o̦k en emaroñ peek men otemjej ilo mour eo an.”​—Jeremaia 10:23, UBS.

Ãinwõt ke kar jab kõm̦anm̦an armej ro ñan ekãke ãinwõt bao ko, ejja ãindein kar jab kõm̦anm̦an armej bwe ren irooj iooer make. Ilo an kõnono kõn joñan maroñ ko an kien ko, ri jeje bwebwenato eo im etan David Fromkin ear je: “Kien ko rej ejaakin armej ro. Kõn men in, renaaj baj likjab wõt im rejaje kõn ta ilju im jekl̦aj. Meñe ewõr aer kajoor im maroñ, bõtab ewõr joñan.” Eñin unin Baibõl̦ eo ej kakkõl kõj bwe jen jab lõke armej!​—Sam 146:3.

2. Setan im enjel̦ ro renana rej tõl. Ke Setan ear kareel Jijej ñan irooj ioon lal̦, Jijej ear jab kariab Tepil̦ eo im ba bwe ejjel̦o̦k an Tepil̦ eo maroñ ñan lel̦o̦k ñane aelõñ ko otemjej an lal̦. Ilo  m̦ool, juon iien tokãlik, Jijej ear n̦aetan Setan “irooj in lal̦ in.” Im jet iiõ tokãlik, rijjelõk Paul ear kwal̦o̦k kõn Setan bwe ej “anij in lal̦ in.” (Jon 14:30; 2 Korint 4:4) Paul ear jeje ñan Kũrjin ro m̦õttan: “Adwõj oktaak e jab ippãn bõtõktõk im kanniõk, a ippãn jiõb ro, ippãn ro re kajoor, ippãn ro irooj in marok i lal̦, ippãn jaran jetõb re nana ijo ko i lañ.” (Epesõs 6:12) Ilo an armej ro jab kile, Setan im enjel̦ ro renana rej ro im rej lukkuun irooj in lal̦ in. Ewi wãween men in ej jelõt l̦õmn̦ak eo ad kõn m̦akũtkũt im aituerõk ko an kien?

L̦õmn̦ak kõn men in: Ãinwõt an wa jiddik ko pel̦o̦k ilo aet ko rekajoor, ãindein an kien ko an armej pãd ium̦win kajoor eo an Setan im enjel̦ ro renana. Im ãinwõt an dik maroñ ippãn ri jerakrõk rein ñan kajebwebweik wa ko ilo aet ko rekajoor, ãindein an dik maroñ ippãn ri kien ro ñan n̦amejal̦an apañ ko rel̦l̦ap an armej im ñan anemkwoj jãn kajoor eo an Setan im enjel̦ ro renana. Jetõb rein rekajoor rej lukkuun kate er ñan ko̦kkure armej ro im kõm̦m̦an bwe en jerata lal̦ in. (Revelesõn 12:12) Kõn men in, jej aikuji wõt eo im ekajoorl̦o̦k jãn Setan im enjel̦ ro renana ñan n̦amejal̦an apañ ko ilo lal̦ in. Wõn in? Jeova Anij wõt.​—Sam 83:18; Jeremaia 10:7, 10.

3. Kũrjin ro rem̦ool rej rejetake wõt Aelõñ eo an Anij. Jijej im rũkal̦oor ro an rar jel̦ã bwe Anij enaaj kajutak juon kien ilañ ilo iien eo em̦õj an karõke. Im kien in enaaj irooj ioon aolepen lal̦. Baibõl̦ ej n̦aetan kien in, Aelõñ eo an Anij, im ej kwal̦o̦k bwe Jijej Kũraij ej Kiiñ ilo Aelõñ eo an Anij. (Revelesõn 11:15) Kõnke Aelõñ in ej jelõt aolep armej, Jijej ear kõm̦m̦an bwe nuuj eo em̦m̦an kõn “aelõñ in Anij” en men eo el̦aptata an katakin armej ro kake. (Luk 4:43) Ear bar katakin rũkal̦oor ro an ñan jar im ba: “En itok am̦ aelõñ.” Etke? Kõnke ium̦win irooj eo an Aelõñ in Anij, enaaj lukkuun jejjet ankilaan Anij ilañ im ioon lal̦.​—Matu 6:9, 10.

Innem, ta eo enaaj wal̦o̦k ñan kien ko an armej? Baibõl̦ eo ej ba bwe kien ko ilo “aolepen lal̦” renaaj jako. (Revelesõn 16:14; 19:19-21) El̦aññe juon armej ej lukkuun tõmak bwe m̦õttan jidik Aelõñ eo an Anij enaaj jol̦o̦k aolep kien ko an armej, enaaj kile bwe ejjab aikuj bõk kun̦aan ilo m̦akũtkũt im aituerõk ko an kien. Ilo m̦ool, el̦aññe ej rejetake kien ko an armej, ej ãinwõt ñe ej jum̦ae Anij.

[Naan ko ilo peij 6]

Ri Kõnnaan ro an Jeova rej poub im rejetake Aelõñ eo an Anij im ejjab kien ko an armej