Jemaroñ Kõm̦m̦ani Men ko Rejim̦we Meñe Ejjab M̦ool an Elõñ Armej Jerbal

“Kõm kõn̦aan kõm̦m̦ani men ko rejim̦we iien otemjej.”​​—HIBRU 13:​18, UBS.

MEÑE jejjab weeppãn im jej iioon kapo jãn Tepil̦ eo ekoba armej ro jej mour ibwiljier ak ewõr ad maroñ ñan jum̦ae aolep men kein bwe ren jab jelõt kõj. Ewi wãween? Ej ilo ad kõm̦m̦an bwe en epaakl̦o̦k wõt kõtaan eo ad ippãn Anij im ilo ad jerbale naan in tõl ko jãn Naan eo an, Baibõl̦ eo. Aolep iien naan in tõl kein an rej jejjet im jerbal. Jen kiiõ lale ruo waanjoñak ko.

NAAN IN TÕL JÃN BAIBÕL̦: “Kom̦win jab anõk m̦antin lal̦ in.”​—Rom 12:​2, UBS.

Bwebwenato: Juon em̦m̦aan etan Guilherme jãn Brazil ewõr juon an peejnej im el̦ap tõprak ilo peejnej in an. L̦ein ej ba bwe ejjab pidodo ñan jerbal ilo jim̦we im m̦ool. Ear ba: “Emaroñ pidodo an juon jino kõm̦m̦ani jerbal ko rejjab jim̦we im m̦ool ilo peejnej eo an. Unin ej kõnke bõlen el̦ap an ekkõl im inepata ñe ejjab tõprak mejãnkajjik ko an kom̦bani eo ak bõlen kõn an l̦ap jiãiik doon ikõtaan peejnej ko ak armej ro. Elõñ armej rej l̦õmn̦ak bwe ejjab nana im ejjel̦o̦k jorrããn ñe rej wiaik bũruon doon kõn jããn. Ñe juon ej kab kajutak juon an peejnej im ej iioon apañ kõn jããn, men in emaroñ kõm̦m̦an bwe en pen ñan an jerbal ilo jim̦we im m̦ool.”

Meñe wãween kein rej wal̦o̦k ak Guilherme ear maroñ jum̦ae menin kapo ko ñan kõm̦m̦ani jerbal ko rejjab jim̦we im m̦ool. Ear ba: “Meñe elõñ armej ilo peejnej ko rejjab m̦ool ilo aer jerbal im rej kõtl̦o̦k an men kein wal̦o̦k ak ewõr ad maroñ ñan jum̦ae men in. Im ewõr ad bar maroñ ñan jerbal wõt ilo jim̦we im m̦ool.” Ta eo ej jipañ kõj ñan kõm̦m̦ane men in? L̦ein ej ba: “Ej aikuj l̦ap ad kaorõk men ko rejim̦we im m̦ool. Baibõl̦ eo ear jipañ eõ ñan lo bwe ewõr jeraam̦m̦an ko rej wal̦o̦k ñe juon ej jerbal ilo jim̦we im m̦ool. Juon eo ej m̦ool enaaj em̦m̦an an mour kõnke ejel̦ã bwe Anij ej buñbũruon kake e. Bareinwõt, enaaj aenõm̦m̦an im m̦õn̦õn̦õ kõn emake. Joñak in an em̦m̦an emaroñ jipañ armej ro me rej pãd ibwiljin.”

NAAN IN TÕL JÃN BAIBÕL̦: “Ro rekõn̦aan bwe ren m̦weiie, rej po ilo kapo im l̦orak ilo aujiid in kõn̦aan ko rebwebwe im remenin ko̦kkure, ko rej tõll̦o̦k armej ñan jorrããn. Bwe arõk m̦ani ej unin nana otemjej.”​—1 Timote 6:​9, 10, UBS.

Bwebwenato: Juon em̦m̦aan etan in André ewõr an juon kom̦bani me ej kõl̦l̦aak alarm ko ilowaan m̦oko bwe ren jañ ñe ewõr ri ko̦o̦t. Juon iaan customer ro an kar juon kul̦ab in soccer. Juon raan, ãlikin an kar jem̦l̦o̦k iien iukkure soccer, André ear etal ñan opij eo aer im lel̦o̦k peba eo me ej kwal̦o̦k on̦ean jerbal ko kom̦bani eo an ear kõm̦m̦ani ñan er. Ri jerbal ro ilo opij in rar lukkuun poub in bwini jããn ko me rar itok jãn opij in wiakake tũkõt ko. Innem, kõn aer kar lukkuun rum̦wij, mãnija eo ear ekaiuriur im kõl̦l̦ãiki armej ro rar itok ikijjeen kom̦bani ko aer ekoba André.

André ej ba: “Ilo ial̦ eo aõ l̦o̦k ñan m̦weo im̦õ, ij kab kile bwe el̦ap jããn eo mãnija eo ear kõl̦l̦ãik eõ kake. Iar jel̦ã bwe bõlen mãnija in eban jel̦ã wõn eo el̦ap jãn joñan an kar kõl̦l̦ãiki. Bõtab, iar bũrom̦õj kake e kõnke enaaj aikuj in kõjerbal jããn ko an make ñan kõl̦l̦ãik  joñan jããn eo me ejako. Kõn men in, iar jepl̦aak ñan ijo. Elukkuun kar obrak jikin eo kõn armej ro me rej alwõj soccer, ak iar maroñ etal ibwiljier l̦o̦k ñan ijo me ij ilen karo̦o̦le jããn eo ñane. Mãnija eo ear lukkuun bwilõñ kõnke ejjañin kar wõr juon ear karo̦o̦l jabdewõt jããn ñan e.”

André ej bar ba: “Kõn aõ kar m̦ool ilo aõ jerbal, men in ear kõm̦m̦an an mãnija eo kautiej eõ. Elõñ iiõ remootl̦o̦k kiiõ im iaan aolep kom̦bani ko me rar jerbal m̦oktata ippãn kul̦ab in soccer in, kom̦bani eo aõ wõt ewõr an contract ippãn ñan rainin. El̦ap aõ m̦õn̦õn̦õ im kam̦m̦oolol bwe kõn aõ jerbale naan in tõl ko ilo Baibõl̦ kõn mour jim̦we, men in ear kõm̦m̦an bwe en em̦m̦an eta ippãn armej ro.”

Ekaenõm̦m̦an ñan jel̦ã bwe ikijjeen jipañ eo jãn Anij, ewõr ad maroñ ñan kõjparok kõj jãn menin kapo ko me rej kõm̦m̦an bwe en jab jim̦we im m̦ool jerbal ko ad. Bõtab, ejjel̦o̦k ad maroñ ñan lukkuun jol̦o̦ke men in jekdo̦o̦n ñe jej lukkuun kate kõj bwe en jako. Armej rejjab weeppãn im rejjab maroñ kõm̦adm̦õde men in kõn maroñ ko aer make. Innem, mel̦el̦ein ke bwe jerbal ko rejjab jim̦we im m̦ool renaaj wal̦o̦k wõt ñan indeeo? Katak eo tok ãliktata enaaj kwal̦o̦k uwaak eo ilo Baibõl̦ me enaaj kaenõm̦m̦an kõj.