Katak Jãn Naan In Anij

Anij Enaaj Ke Bõktok Juon Kien ñan Kiene Aolepen Lal̦ In?

Katak in ej uwaake jet kajjitõk ko me bõlen ekkã am̦ kajjitõk kaki. Im ej kwal̦o̦k eoon ta ko kwõmaroñ lo uwaak in kajjitõk kein ie ilo Baibõl̦ eo. Ri Kõnnaan ro an Jeova renaaj lukkuun m̦õn̦õn̦õ in kõmel̦el̦eik uwaak kein ñan eok.

1. Etke armej rej aikuji juon kien bwe en kiene aolepen lal̦ in?

Rainin, elukkuun lõñ apañ ko rej wal̦o̦k ñan armej ro ipel̦aakin lal̦ in. Ilo jet aelõñ ko, enañin aolep armej ro ie rejeramel im el̦ap aer eñtaan. Ak ilo bar jet aelõñ ko, elukkuun l̦e jãn joñan an armej ro ie m̦weiie im rejjab aikuj jabdewõt. Men in ej kaalikkar bwe jej aikuji juon kien ñan kiene aolepen lal̦ in me emaroñ ajeji aikuj ko an armej eo bwe ren joñan wõt juon.​—Riit Ekklisiastis 4:1; 8:⁠9.

2. Wõn ri tõl eo jemaroñ lõke bwe en kiene aolepen lal̦ in?

Alikkar bwe ejjel̦o̦k juon enaaj m̦õn̦õn̦õ ñe juon wõt armej ej tõl ak kiene aolepen lal̦ in. Etke? Kõnke jejel̦ã bwe ejjel̦o̦k juon em̦m̦aan ak kõrã emaroñ lo tõprak ilo an tõl aolep armej ro ioon lal̦ in. Ñe en kar wõr juon wõt armej ej tõl ak kiene aolepen lal̦ in, ejjel̦o̦k pere bwe men in eban kar em̦m̦an ippãn aolep armej ro. Bareinwõt, ekkã wõt an armej ro oktak im nana ãlikin aer erom ri tõl ro reutiej im ewõr aer maroñ ioon armej ro. Innem, ealikkar bwe jenaaj kar mijak in kõtl̦o̦k bwe juon armej elãj im nana en tõl ak kiene aolepen lal̦ in.​—Riit Jabõn Kõnnaan 29:2; Jeremaia 10:⁠23.

Jeova Anij ear kããlõt Nejin, Jijej, bwe en tõl ilo kien eo an me enaaj pãd ñan indeeo. Kien in enaaj irooj ioon aolep armej ro ipel̦aakin lal̦ in. (Luk 1:​32, 33) Jijej ear mour ioon lal̦ in im emelele kõn aikuj ko an armej. Ke ear pãd ioon lal̦ in, ear kõmour ro renañinmej, katakin ro rettã bũrueer, im bõk an iien ippãn ajri ro. (Mark 1:​40-42; 6:34; 10:​13-16) Kõn men in, Jijej wõt ej Ri Tõl eo ejejjet im em̦m̦antata ñan kiene aolepen lal̦ in.​—Riit Jon 1:⁠14.

 3. Juon wõt armej emaroñ ke kiene aolepen lal̦ in?

Anij ear jitõñ Nejin bwe en tõl ak kiene lal̦ in meñe ej pãd ilañ. (Daniel 7:​13, 14) Ñan waanjoñak, juon bũreejtõn ejjab aikuj jokwe ilo aolep jikin ko ilo aelõñ eo ej bũreejtõn ñane. Ãindein, Jijej ejjab aikuj pãd ioon lal̦ in ñan an maroñ tõl ak kiene.​—Riit Matu 8: 5-9, 13.

Aolep renaaj ke m̦õn̦õn̦õ in bõk Jijej bwe en aer Ri Tõl? Ejjab aolep renaaj. Armej ro wõt me rej kõm̦m̦ani men ko rem̦m̦an renaaj m̦õn̦õn̦õ in bõk Jijej bwe en aer Ri Tõl. Jeova enaaj ko̦kkure aolep ro rej kõjekdo̦o̦n Ri Tõl eo ear kããlõte me ewãnõk im el̦ap yokwe ippãn.​—Riit Matu 25:​31-33, 46.

4. Ta eo Ri Tõl eo enaaj kõm̦m̦ane ñan aolepen lal̦ in?

Ãinwõt an juon jabõt ainitok jiip ko an, Jijej ej ainitok armej ro rettã bũrueer jãn aelõñ ko otemjej im katakin er bwe ren kwal̦o̦k yokwe ãinwõt Anij. (Jon 10:16; 13:​34) Armej rein relukkuun m̦õn̦õn̦õ in rejetake an Jijej irooj im tõl. (Sam 72:8; Matu 4:​19, 20) Ilo pel̦aakin lal̦ in, rein me rej kwal̦o̦k aer tiljek ñan Jijej rej bõrokuk ilo aer kõjjel̦ãik aolep armej bwe em̦õj an Jijej jino irooj ilañ.​—Riit Matu 24:⁠14.

M̦õttan jidik Jijej enaaj kwal̦o̦k an kajoor ilo an jol̦o̦k aolep kien ko an armej. Ear kããlõt jet iaan rũkal̦oor ro an retiljek bwe ren kiiñ ippãn ilañ. Rein im Jijej renaaj tõl ak kiene aolepen lal̦ in. (Daniel 2:44; 7:​27) Ium̦win tõl eo an Jijej, aolep armej ro renaaj jel̦ã kõn Jeova im lal̦ in enaaj bar ro̦o̦l ñan pedetaij eo m̦okta me ear jako.​—Riit Aiseia 11:​3, 9; Matu 19:⁠28.

Ñan kal̦apl̦o̦k am̦ mel̦el̦e, jouj im lale katak 8 ilo bok in me Ri Kõnnaan ro an Jeova rar kõm̦m̦ane. KATAK KO REM̦OOL JÃN BAIBÕL̦ EO