Ruwaakl̦o̦k Ñan Anij

“Ta eo Jeova Ej Pukot jãn Eok?”

TA KO Jeova ej kõtmãne jãn ro rekõn̦aan kabuñ ñane ilo jim̦we im m̦ool? Ej ke kõtmãne bwe jen weeppãn meñe ejel̦ã bwe kõj armej ri jerawiwi im kõn men in enaaj pen ad kabuñbũruon aolep iien? Ak ekõn̦aan ke bwe jen karejar ñane ekkar ñan joñan maroñ ko ad? El̦aññe jekõn̦aan lo lañlõñ ilo ad karejar ñan Anij, eaorõk bwe jen jel̦ã uwaak ko ñan kajjitõk kein. Jen etale ewi wãween ri kanaan Maika ear kwal̦o̦k kõn men ko Anij ekõn̦aan bwe jen kõm̦m̦ani.​—Riit Maika 6:⁠8.

“Em̦õj An kwal̦o̦k ñan eok . . . ta em̦m̦an.” Jejel̦ã kadede ta ko Anij ekõn̦aan bwe jen kõm̦m̦ani. Em̦õj an kwal̦o̦k ñan kõj im je aolep men ko ekõn̦aan bwe jen kõm̦m̦ani ilo Baibõl̦. Men ko Anij ej kajjitõk bwe jen kõm̦m̦ani ‘rem̦m̦an.’ Rejjab nana im eddo ñan kõj. Baibõl̦ ej ba bwe “Anij yokwe.” Kõn men in, ej letok kien ko an kõnke ejel̦ã ta eo em̦m̦antata ñan kõj. (1 Jon 4:8; 5:⁠3) Ad pokake kien ko an Anij ejjab baj kabuñbũruon wõt ak ej bareinwõt jipañ im kajeraam̦m̦an kõj.​—Duteronomi 10:​12, 13.

“Ta eo Jeova ej pukot jãn eok?” Ewõr ke an Anij maroñ ñan kajjitõk jabdewõt men jãn kõj? Aet, ewõr an maroñ! Jej aikuj pokake e kõnke ear letok mour ñan kõj im ej Wũnjãn mour. (Sam 36:⁠9) Innem, ta eo ej “pukot” ak kajjitõk jãn kõj? Maika ear kwal̦o̦k jilu men ko Anij ekõn̦aan bwe jen kõm̦m̦ani. Men ko ruo jinointata me ear kwal̦o̦k kaki rej jitõñl̦o̦k ñan wãween ad kõm̦m̦an ñan ro jet. Im men eo kein kajilu ej jitõñl̦o̦k ñan kõtaan eo ad ippãn Anij.

“Kõm̦m̦an jim̦we.” Juon bok in kõmel̦el̦e ej ba bwe ekkar ñan kajin Hibru, naan in “kõm̦m̦an jim̦we” ej kitibuj an jim̦we im em̦m̦an ad kõm̦m̦an ñan armej ro jet. Anij ej kõtmãne bwe en jim̦we im em̦m̦an ad kõm̦m̦an ñan ro jet ekkar ñan kien ko an. Jej kõm̦m̦an jim̦we ilo ad jab kalijekl̦o̦k, im ilo an m̦ool ad jerbal ippãn ro jet. (Livitikõs 19:15; Aiseia 1:17; Hibru 13:​18) Ñe ej jim̦we ad kõm̦m̦an ñan ro jet, men in emaroñ kõm̦akũt er ñan bar kõm̦m̦an ejja wãween dein ñan kõj.​—Matu 7:⁠12.

“Yokwe jouj.” Anij ejjab baj kõtmãne wõt bwe jen kwal̦o̦k jouj ak ej bar kõtmãne bwe jen yokwe men in. Naan in Hibru eo cheʹsedh me kar ukote ñan “jouj” ilo eoon in, ej bar jitõñl̦o̦k ñan “yokwe eo etiljek im m̦ool.” Juon eo etijem̦l̦o̦k kõn kobban Baibõl̦ ear ba: “Naan in cheʹsedh ej mel̦el̦ein men kein jilu aolep: yokwe, tũriam̦okake, im jouj. El̦aññe ejako juon iaan men kein, eban jim̦we im jejjet ñan mel̦el̦ein naan in. Aolep men kein jilu rej aikuj koba ippãn doon ñan kajejjet mel̦el̦ein naan in cheʹsedh.” El̦aññe jej kwal̦o̦k jouj im yokwe jouj, jenaaj m̦õn̦õn̦õ in jipañ ro rej aikuj. Ilo jem̦l̦o̦kin, jenaaj lo bwe el̦apl̦o̦k m̦õn̦õn̦õ ilo lel̦o̦k.​—Jerbal 20:⁠35.

“Kwõn etetal ippãn am̦ Anij kõn bõro ettã.” Ñe Baibõl̦ ej kõjerbal naan in “etetal,” ej mel̦el̦ein “l̦oore juon kain wãween mour.” Jej etetal ippãn Anij ilo ad l̦oore wãween mour eo em̦õj an kwal̦o̦k kake ilo Baibõl̦. El̦aññe jekõn̦aan mour ilo wãween in, jej aikuj ‘ettã bõro.’ Ewi wãween? Ñe jej kwal̦o̦k ad ettã bõro im̦aan mejãn Anij, jenaaj kile bwe kõj ri jerawiwi im ewõr joñan maroñ ko ad. Kõn men in, ‘etetal ippãn Anij kõn juon bõro ettã’ ej mel̦el̦ein bwe en jim̦we wãween ad l̦õmn̦ak kõn ta ko Anij ekõn̦aan bwe jen kõm̦m̦ani im kõn joñan eo jemaroñ lel̦o̦k ñan e.

El̦ap ad kam̦m̦oolol bwe Jeova ejjab kajjitõk bwe jen kõm̦m̦ani men ko el̦ap jãn ad maroñ. Ej m̦õn̦õn̦õ ippãd kõn ad kate kõj joñan wõt ad maroñ ñan karejar ñane jãn aolepen bũruod. (Kolosse 3:​23) Emel̦el̦e bwe kõj armej bũñalñal im ewõr joñan maroñ ko ippãd. (Sam 103:​14) El̦aññe jej kwal̦o̦k ettã bõro ilo ad kile joñan maroñ ko ad, men in enaaj kõm̦m̦an bwe jen lañlõñ ilo ad mour ekkar ñan wãween eo Anij ekõn̦aan. Etke kwõjjab katak bwe kwõn jel̦ã ewi wãween kwõmaroñ mour ekkar ñan wãween eo Anij ekõn̦aan? El̦aññe kwõnaaj kõm̦m̦ane men in, Anij enaaj lukkuun kajeraam̦m̦an eok.​—Jabõn Kõnnaan 10:⁠22.