KATAK KO KÕN TAITÕL̦IN BOK IN | ETKE JET ARMEJ REJ L̦ÕMN̦AK BWE EPEN ÑAN YOKWE ANIJ?
M̦ool Ke bwe Anij Ej Kaeñtaan Kõj?
TÕMAK EO AN ELÕÑ ARMEJ
“Ãlikin wõt an juon ri nana mej, aan ej kajju ñan hell. Im ilo ijin, ej bwil im eñtaan ilo kijeek eo ej urur ñan indeeo.”—Bok in kajjitõk im uwaak an kabuñ in Katlik etan Catechism of the Catholic Church.
MEN EO BAIBÕL̦ EJ BA
“Ro remej ejjel̦o̦k aer jel̦ã.” (Ekklisiastis 9:5) El̦aññe ro remej ejjel̦o̦k aer jel̦ã kõn jabdewõt, kwõl̦ak baj lale remaroñ ke eñjake aer eñtaan ilo kijeek eo ej urur ñan indeeo?
Ilo jet ukok in Baibõl̦ ko rar ukot naan in Geena ñan naan eo Hell. Bõtab, naan in Geena ejjab mel̦el̦ein juon jikin ebwil me ro renana rej eñtaan ie ñan indeeo. Ak ej mel̦el̦ein mej ñan indeeo im ejjel̦o̦k kõjatdikdik ñan bar mour. (Matu 5:29) Baibõl̦ ej bar kwal̦o̦k kõn “lom̦al̦o in kijeek.” (Revelesõn 20:10) Ta mel̦el̦ein men in? Eokwe, Baibõl̦ ej ba: “Eñin mej kein karuo, lom̦al̦o in kijeek.” (Revelesõn 20:14; 21:8) Kõn men in, “lom̦al̦o in kijeek” ejjab lukkuun juon jikin ebwil im ejjab lukkuun juon kijeek. Ñe Baibõl̦ ej kwal̦o̦k kõn ro me rej eñtaan indeeo ilo lom̦al̦o in kijeek, ej mel̦el̦ein bwe rein rej “mej kein karuo” ak mej ñan indeeo im ejjel̦o̦k aer kõjatdikdik in bar mour.
UNIN AN AORÕK ÑAN JEL̦Ã M̦OOL EO
Ñe jej roñ bwe Anij ej kaeñtaan armej ro, men in ej kattol̦o̦k kõj jãn e. Juon kõrã etan Rocío im ej jokwe ilo Mexico ej ba: “Jãn ke iar ajri iar roñ bwe Anij ej kaeñtaan armej ro renana ilo hell. Kõn men in, iar mijak im l̦õmn̦ak bwe Anij ejjab juon Anij em̦m̦an, ak ej juon Anij elãj im ejjel̦o̦k an tũriam̦o.”
Ke Rocío ear katak im lo m̦ool eo jãn Baibõl̦ kõn wãween an Anij ekajet im ta eo ej wal̦o̦k ñan ro remej, men in ear ukot wãween an l̦õmn̦ak kõn Anij. Ej ba: “Aõ jel̦ã m̦ool eo ear kanemkwõj eõ. Kiiõ ejako aõ inepata im lõl̦ño̦ñ. Im ij tõmak bwe Anij ekõn̦aan bwe jen m̦õn̦õn̦õ. Ijel̦ã kiiõ bwe ej yokwe kõj im bwe imaroñ bar yokwe e. Ej ãinwõt juon jemãn me ej jibwe pein ajri ro nejin im tõl er, im ekõn̦aan bwe ren m̦õn̦õn̦õ ilo mour ko aer.”—Aiseia 41:13.
Elõñ armej rej lukkuun kate er ñan pokake kien ko an Anij kõn aer mijak ñe renaaj bwil ilo Hell. Bõtab, Anij ejjab kõn̦aan bwe jen kabuñ ñan e kõnke jej lõl̦ño̦ñ im mijake. Jijej ear ba: “Kwõn yokwe Irooj am̦ Anij.” (Mark 12:29, 30) Bareinwõt, ad jel̦ã bwe Anij ej kõm̦m̦ani men ko rem̦m̦an ñan armej ro, ej jipañ kõj ñan lõke bwe Anij eban ekajete armej ilo an kaeñtaan er ilo Hell. Jenaaj ãinwõt Ilaihu, l̦eo m̦õttan Job ke ear ba: “En ettol̦o̦k jãn Anij bwe En kõm̦m̦an nana, im jãn Eo Ekajoor Bõtata bwe En kõm̦m̦an jab wãnõk.”—Job 34:10.
