1, 2. (1) Ta eo Jeova ear ba ñan Moses bwe en kõm̦m̦ane? (2) Im ta eo Jeova ear kallim̦uri Moses kake?

 PIJAIK m̦õk am̦ jutak im̦aan mejãn rũtõl eo eutiejtata ilo lal̦ in im kõnono ippãn kõn armej ro an Anij. Enaaj kar ta eñjake n̦e am̦? Bõlen kwõnaaj kar ikkũm̦kũm̦, mijak, im ñak kwõn ba ta. Ta eo enaaj kar jipañ eok ñan jel̦ã ta eo kwõn ba? Kwõnaaj ke kar peran im kwal̦o̦k naan ko an Anij?

² Eñin kar men eo ear wal̦o̦k ñan Moses. Moses ear juon armej elukkuun ettã bũruon. (Bõnbõn 12:3, UBS) Ak armej eo me Jeova ear jilkinl̦o̦k Moses bwe en ilen kõnnaan ippãn ear juon em̦m̦aan me ekar lukkuun nana im utiej bũruon. Jeova ear kajjitõk ippãn Moses bwe en jiroñ Pero ñan kanemkwõj armej ro An jãn aer kõm̦akoko. Im oran armej rein ekar kepaak 3 milien. (Exodus 5:1, 2) Kiiõ jemel̦el̦e etke Moses ear kajjitõk ippãn Jeova im ba: “Wõn ña, bwe in ilo̦k ñan ippãn Pero, im bwe in ãñinl̦o̦k ro nejin Israel jãn Ijipt?” Moses emaroñ kar pere e make im l̦õmn̦ak bwe ejjel̦o̦k an maroñ ñan kõnnaan ippãn Pero. Ak Jeova ear kallim̦uri bwe enaaj jipañe im bwe eban make iaan. Ear ba ñan Moses, “Inaaj pãd ippam̦.”​—Exodus 3:9-12.

3, 4. (1) Etke Moses ear mijak? (2) Etke kwõmaroñ bar mijak ãinwõt kar Moses?

³ Etke Moses ear mijak? Ear mijak ñe Pero enaaj kõjekdo̦o̦ne im  ban tõmake bwe Jeova Anij ear jilkinl̦o̦ke. Moses ear bar mijak ñe RiIsrael ro reban tõmak bwe Anij ear kããlõt e bwe en tõl er im kadiwõjl̦o̦k er jãn aelõñ in Ijipt. Eñin unin Moses ear ba ñan Jeova: “Rejãmin tõmak eõ, ak eo̦roñ ainikiõ, bwe renaaj ba, ‘Jeova ear jab wal̦o̦k ñan eok.’”​—Exodus 3:15-18; 4:1.

⁴ Ak kwe, kwõj ke mijak? Bõlen kwõban aikuj jutak im̦aan mejãn juon ruutiej im kõnnaan ippãn. Ak ta el̦aññe epen am̦ kõnnaan ippãn armej ro ilo jikin eo kwõj kwal̦o̦k naan ie kõn Jeova im Aelõñ eo an? Eokwe, men eo Jeova ear jiroñ Moses bwe en kõm̦m̦ane im men ko rar wal̦o̦k tokãlik remaroñ katakin kõj juon men ekanooj aorõk. Jen lale ta eo ear wal̦o̦k.

5. (1) Ta eo Jeova ear kõm̦m̦ane ñan jokon̦ eo Moses ear jibwe? (2) Menin kabwilõñlõñ in ear kaperan Moses ñan ta? (Lale pija eo ilo jinoin katak in.)

⁵ Ke Moses ear ba ñan Jeova bwe emijak ñe armej ro reban tõmake, Anij ear jipañe ñan kile bwe ejjab aikuj mijak im bwe enaaj baj lo wõt tõprak. Baibõl̦ ej ba: “Irooj ear kajjitõk ippãn [Moses] im ba, ‘Ta n̦e kwõj jibwe?’ Im ear ba, ‘Juon jokon̦.’ Im Irooj ear ba, ‘Kwõn jol̦o̦k ioon bwidej.’ Innem ke Moses ear jolal̦l̦o̦k jokon̦ eo, ear erom jedpãnit, im ear ko jãne. Innem Irooj ear ba ñan Moses, ‘Kwõn jillo̦k im jibwe l̦okwan.’ Innem Moses ear jillo̦k im jibwe im ear bar oktak ñan juon jokon̦. Im Irooj ear ba, ‘Kwõn kõm̦m̦an men in bwe en menin kam̦ool ñan RiIsrael ro bwe Irooj . . . ear wal̦o̦k ñan eok.’” (Exodus 4:2-5, UBS) Anij ear kõjerbal kajoor eo an im kõm̦m̦an bwe jokon̦ eo an Moses en erom juon jedpãnit! Menin kabwilõñlõñ in enaaj kar kam̦ool bwe Anij ear jilkinl̦o̦k Moses im bwe kajoor eo an Anij epãd ippãn. Jeova ear ba ñane: “Kwõn bõk jokon̦ in ippam̦; kwõnaaj kõm̦m̦ani men ko rekabwilõñlõñ kake.” (Exodus 4:17, UBS) Men in ear kaperan Moses ñan ilo̦k im kõnnaan ippãn Pero im armej ro doon Anij.​—Exodus 4:29-31; 7:8-13.

6. (1) Ta eo jej aikuj jibwe ñe jej kwal̦o̦k naan, im etke? (2) Etke Baibõl̦ ej ba bwe “Naan in Anij ej mour”? (3) Ta eo ej kaalikkar bwe Naan in Anij ej “jerbal wõt”?

⁶ Ñe jej kwal̦o̦k naan ñan ro jet, ta eo jej jibwe? Eokwe, jej jibwe Baibõl̦ eo im jej kijooror in riiti l̦o̦k ñan armej ro. Jet armej remaroñ l̦õmn̦ak bwe Baibõl̦ ej baj juon bok em̦m̦an wõt. Bõtab, el̦ap an Baibõl̦ kajoor im naan ko ie rej an Anij ñan kõj. (2 Piter 1:21, UBS) Bareinwõt, Baibõl̦ ej kwal̦o̦k kallim̦ur ko an Anij im ta eo Aelõñ eo an enaaj kõm̦m̦ane. Paul ear ba: “Naan in Anij ej mour im jerbal wõt.” (Riit Hibru 4:12.) Etke Baibõl̦ ej ba bwe Naan in Anij ej mour? Ej mour kõnke aolep kallim̦ur ko an Jeova rej wõnm̦aanl̦o̦k wõt m̦ae iien eo rejejjet kitieer. Im aolepeer renaaj jejjet im m̦ool. (Aiseia 46:10; 55:11) Im ñe juon armej ej kile bwe em̦ool Naan in Anij, men ko ej riiti ilo Baibõl̦ remaroñ lukkuun jelõt bũruon ñan kõm̦m̦an oktak ilo mour eo an. Men in ej kaalikkar bwe Naan in Anij ej jerbal wõt.

7. Ta eo jej aikuj kõm̦m̦ane bwe en jim̦we ad katakin armej kõn Baibõl̦?

⁷ Em̦õj an Jeova letok Baibõl̦ eo ak Naan eo an me ej mour im jerbal wõt. Ikijjeen Baibõl̦, jemaroñ kam̦ool ñan ro jet bwe men ko jej ba rem̦ool im rej itok jãn Anij. Eñin unin ke Paul ear katakin Timote, ear rõjañe bwe en ‘jim̦we an katakin ro jet kõn naan eo em̦ool an Anij.’ (2 Timote 2:15, UBS) Ta eo jej aikuj kõm̦m̦ane bwe en jim̦we ad katakin armej kõn Baibõl̦? Jej aikuj lukkuun lale ta eoon ko rejejjet im em̦m̦an ñan ad riiti ñan armej ro. Mejãnkajjik eo ad ej ñan tõpar bũruon ro rej roñjake kõj. Eñin unin ilo kar 2013 eo, doulul in ear kõm̦m̦ani tũrããk ko rekããl im litok bwe ren jipañ kõj.

8. Ta eo juon em̦m̦aan me ej loloorjake jerbal in kwal̦o̦k naan ear ba kõn tũrããk ko rekããl?

⁸ Kar kõm̦m̦ane aolep tũrããk ko rekããl ilo  juon wõt wãween. Kõn men in, ñe jejel̦ã kilen kõjerbal juon iaaer ilo jerbal in kwal̦o̦k naan, mel̦el̦ein bwe jenaaj jel̦ã kilen kõjerbal aolepeer. Juon em̦m̦aan me ej loloorjake jerbal in kwal̦o̦k naan ilo eklejia eo an ilo Awai ear ba: “Jaar jaje ke enaaj kar l̦ap tõprak ej wal̦o̦k jãn ad kõjerbali tũrããk kein ñe jej kwal̦o̦k naan jãn em̦ ñan em̦ kab ilo jikin ko elõñ armej ie.” Etke armej ro rem̦õn̦õn̦õ in bwebwenato ippãd ñe jej kõjerbal tũrããk kein? Em̦m̦aan in ej ba bwe unin ej kõnke epidodo an armej ro kããlõt juon iaan uwaak ko ñan kajjitõk eo itum̦aan in tũrããk ko. Kõn men in, rejjab mijak im l̦õmn̦ak bwe enaaj bõd aer uwaak. Im rem̦õn̦õn̦õ in kwal̦o̦k l̦õmn̦ak ko aer ñan kõj im bwebwenato ippãd.

9, 10. (1) Elemen an tũrããk ko rekããl jipañ kõj ñan kõjerbale Baibõl̦? (2) Ewi wõt iaan tũrããk ko rekããl el̦ap am̦ lo tõprak ñe kwõj kõjerbale, im etke?

⁹ Ilo kajjojo iaan tũrããk ko rekããl, em̦õj je juon eoon ilowaaer bwe jen riiti ñan rũm̦weo. Ñan waanjoñak, ñe kwõj kõjerbal tũrããk eo me ej ba Enaaj Ke Jem̦l̦o̦k Ad Eñtaan? kwõmaroñ kwal̦o̦k kajjitõk in ñan rũm̦weo. Innem, rũm̦weo emaroñ kããlõt juon iaan uwaak kein “aet,” “eban,” ak “bõlen.” Jekdo̦o̦n nãj ta uwaak eo an, ak kwõmaroñ ãlõkl̦o̦k ñan lowaan tũrããk in im baj ba, “Eñin men eo Baibõl̦ ej ba.” Innem, riiti naan ko rej itok jãn Revelesõn 21:3, 4.

¹⁰ Ebar ejjel̦o̦k oktak ñe kwõj kõjerbale tũrããk eo me ej ba Ta L̦õmn̦ak eo Am̦ kõn Baibõl̦? Ãlikin am̦ bõkm̦aantak kajjitõk in im rũm̦weo ej kããlõt juon iaan uwaak ko jilu, kwõmaroñ ãlõkl̦o̦k ñan lowaan tũrããk eo im ba: “Baibõl̦ ej ba bwe ‘Jeje ko otemjej em̦õj letok kõn kakũrm̦ool an Anij.’” Im kwõmaroñ wõnm̦aanl̦o̦k wõt im ba: “Em̦m̦an jen riiti aolepen eoon in im lale ta ko jet ej ba kõn Baibõl̦ eo.” Innem, kepel̦l̦o̦k Baibõl̦ eo am̦ im riiti 2 Timote 3:16, 17.

11, 12. (1) Elemen am̦ maroñ kõjerbali tũrããk ko ilo juon wãween me enaaj kãitoklimoik eok kõn jerbal in kwal̦o̦k naan? (2) Ewi wãween an tũrããk ko maroñ jipañ eok ñan pojak in bar jepl̦aak ippãn armej ro?

¹¹ Ñe kwõj lo bwe rũm̦weo eitoklimo in roñjake, kwõmaroñ wõnm̦aanl̦o̦k wõt im bwebwenato ippãn kõn aolepen tũrããk eo. Ak jekdo̦o̦n ñe armej ro rej itoklimo ak jaab, men eo wõt eaorõk ej bwe jaar bwebwenato jidik ippãer kõn mel̦el̦e ko ilo tũrããk eo im riiti Naan in Anij ñan er. Meñe kwaar riiti juon ak ruo eoon ilo iien eo jinoin am̦ iioone, ak kwõmaroñ bar jepl̦aak tokãlik im bwebwenato ippãn kõn ejja men eo wõt komiro ar kõnono kake.

 ¹² Ilo likin tũrããk ko, em̦õj je naan kein, “Jouj im L̦õmn̦ak kõn Kajjitõk In.” Im ilo lal̦in naan kein, ewõr juon kajjitõk im jet eoon me kwõmaroñ bwebwenato ippãn rũm̦weo kaki ñe kwõj jepl̦aak. Ñan waanjoñak, ilo tũrããk eo me ej ba Enaaj Ewi Wãween Mour ilo Lal̦ in Ilju im Jekl̦aj? kar je kajjitõk in ilo tulik, “Ta eo Anij enaaj kõm̦m̦ane bwe en em̦m̦anl̦o̦k mour ilo lal̦ in?” im epãd Matu 6:9, 10 im Daniel 2:44 iturin kajjitõk in. Ikijjeen tũrããk eo me ej ba Ro Remej Renaaj Ke Bar Mour? ewal̦o̦k kajjitõk in ijo itulik: “Etke jej rũttol̦o̦k im mej?” im ebar wal̦o̦k eoon kein ilo Jenesis 3:17-19 im Rom 5:12.

13. Kwal̦o̦k m̦õk elemen ad kõjerbal tũrããk ko rekããl ñan jino katak Baibõl̦ ippãn armej ro.

¹³ Kar je tũrããk kein ñan jipañ kõj kajju katak Baibõl̦ ippãn armej ro. Juon armej emaroñ jikããne ak pijaiki kout eo ilo likin tũrããk ko rekããl im enaaj kajju wal̦o̦k Weep jait eo ad. Enaaj lo ijo me ej rõjañe ñan kajjitõk bwe juon en ilo̦k im katak Baibõl̦ ippãn. Kwõnaaj lo bwe ilo tũrããk kein, ewõr pijain bok eo me ej ba Juon Ennaan Em̦m̦an Jãn Anij! Im kajjojo iaan tũrããk ko rekããl rej jitõñl̦o̦k ñan juon iaan katak ko ilowaan bok in. Ñan waanjoñak, ilo tũrããk in, Lal̦ in Ej Pãd Ium̦win Pein Wõn? ej jitõñl̦o̦k ñan katak 5 ilo bok in Juon Ennaan Em̦m̦an Jãn Anij! Im tũrããk eo etan Ta eo Baam̦le eo Am̦ Ej Aikuji bwe Kom̦win M̦õn̦õn̦õ? ej jitõñl̦o̦k ñan katak 9 ilo bok in. Kar je tũrããk kein ñan jipañ kõj bwe jen kõjerbal Baibõl̦ ilo jinoin ad iioone armej ro im ñe jej jepl̦aak ippãer. Ilo wãween in, enaaj lõñl̦o̦k ad rũkkatak Baibõl̦. Bar ta ko jet jemaroñ kõm̦m̦ani bwe en jim̦we ad katakin armej kõn Baibõl̦ im lo tõprak?

14, 15. Elemen am̦ maroñ anõke joñak eo an Paul ñe kwõj kwal̦o̦k naan?

¹⁴ Ke Paul ear kwal̦o̦k naan, ear kanooj itoklimo kõn l̦õmn̦ak ko an ‘elõñ armej joñan wõt an maroñ.’ (Riit 1 Korint 9:19-23, UBS.) Etke? Kõnke ear kõn̦aan jipañ “armej otemjej,” RiJu im riaelõñ ko jim̦or, bwe ren jel̦ã m̦ool eo im maroñ bõk lo̦mo̦o̦r. (Jerbal 20:21, UBS) Ewi wãween ad maroñ anõke joñak eo an Paul ñe jej kõppojak ñan kwal̦o̦k naan im ñe jej kwal̦o̦k naan ippãn “armej otemjej”?​—1 Timote 2:3, 4.

¹⁵ Ilo Ad Jerbal ñan Anij ko ad kajjojo allõñ, em̦õj je men ko jemaroñ ba ñe jej kwal̦o̦k naan. Kajjioñ kõjerbale men kein. Ak ta el̦aññe armej ro ilo bukwõn eo am̦ rej inepata im l̦õmn̦ak kõn bar juon men me ejjab pãd ilo Ad Jerbal ñan Anij eo? Eokwe, kwõmaroñ kõpooje ta eo kwõnaaj ba kõn men in me rej l̦õmn̦ak kake. L̦õmn̦ak kõn ta apañ ko rej wal̦o̦k ñan armej ro. Innem, kããlõt juon eoon me ejejjet ñan apañ eo rej iioone. Juon em̦m̦aan me ej lol̦o̦k eklejia ko im kõrã eo pãleen rar kwal̦o̦k ta eo erro ar kõm̦m̦ane ñan kal̦apl̦o̦k aerro kõjerbal Baibõl̦ ilo jerbal in kwal̦o̦k naan. Rej ba: “Enañin aolep armej ro rar m̦õn̦õn̦õ in kõtl̦o̦k ammim riiti juon eoon ñe ekadu ammim kõnnaan im ealikkar men eo kõmij kõnnaan kake. M̦okta jãn ammim yokyokwe armej ro, em̦õj ammim kepel̦l̦o̦k Baibõl̦ eo kadede bwe kõmin pojak in riiti eoon eo ñan er.” Ilo pãrokõrããp ko tok jet, renaaj kwal̦o̦k jet iaan apañ ko im men ko rar kãitoklimoiki ro jet, ekoba kajjitõk ko im eoon ko me ro jet rar lo tõprak ilo aer kar kõjerbali. Bõlen kwõmaroñ l̦oore juon iaan wãween kein ñe kwõj kwal̦o̦k naan ilo bukwõn eo am̦.

16. Kwal̦o̦k m̦õk kilen ad kõjerbal Aiseia 14:7 ilo jerbal in kwal̦o̦k naan.

¹⁶ El̦aññe kwõj jokwe ilo juon jikin me el̦ap an armej lãj im kowadoñe ro jet, kwõmaroñ ba ñan juon armej: “Baj l̦õmn̦ake m̦õk an nuuj in em̦m̦an pãd ilo peij eo jinointata ilo nuujpeba eo, ej ba: ‘Kiiõ rũlal̦ in rej kakkije im pãd ilo aenõm̦m̦an, im armej otemjej rej kwal̦o̦k aer m̦õn̦õn̦õ ilo al ko aer.’ Eñin men eo Baibõl̦ ej ba ilo Aiseia 14:7 (UBS). Im kwõjel̦ã ta, elukkuun lõñ men ko Anij ej kallim̦ur kaki kõn ilju im jekl̦aj  ñe aolep armej renaaj aenõm̦m̦an im jokwane, im m̦õttan jidik men kein renaaj wal̦o̦k.” Innem, riitil̦o̦k juon iaan kallim̦ur kein jãn Baibõl̦.

17. Elemen ad kõjerbal Luk 11:28 ñe jej bwebwenato ippãn armej ro?

¹⁷ Epen ke an em̦m̦aan ro ilo bukwõn eo am̦ kajjioñ kabwe aikuj ko an baam̦le ko aer? El̦aññe aet, kwõmaroñ bõkm̦aantak kajjitõk in: “Jete jããn juon em̦m̦aan ej aikuji ñan an kõm̦m̦an bwe baam̦le eo an en m̦õn̦õn̦õ?” Ãlikin an uwaak, kwõmaroñ ba: “Eokwe, elõñ em̦m̦aan ro el̦ap on̦ãer im elõñ aer jããn ak baam̦le ko aer rejjab m̦õn̦õn̦õ. Innem, ta eo rej lukkuun aikuji bwe ren m̦õn̦õn̦õ?” Kiiõ, kwõmaroñ riiti Luk 11:28 im kajjitõk ñe em̦õn̦õn̦õ in katak Baibõl̦.

18. Elemen am̦ naaj kõjerbal Jeremaia 29:11 ñan kaenõm̦m̦an ro jet?

¹⁸ Armej ro ilo aelõñ eo am̦, eapañ ke im pen aer mour kõn an kar wal̦o̦k juon jorrããn el̦ap? Eokwe, kwõmaroñ ba ñan armej ro: “Ij itok bwe in lewaj jet naan in kaenõm̦m̦an ko jãn Baibõl̦. (Riit Jeremaia 29:11, UBS.) Ekkar ñan eoon in, Anij ekõn̦aan kajeraam̦m̦an kõj kõn juon kõjatdikdik em̦m̦an kõn ilju im jekl̦aj. Im ad jel̦a kõn men in, ej kaenõm̦m̦an bũruod. Ak m̦ool ke bwe jeraam̦m̦an kein renaaj wal̦o̦k?” Kiiõ, kwõmaroñ ãlõkl̦o̦k ñan katak eo ejejjet ñan men in ilo bok eo Ennaan eo Em̦m̦an.

19. Kwal̦o̦k m̦õk elemen ad nãj kar kõjerbal Revelesõn 14:6, 7 ñe jej kwal̦o̦k naan ippãn armej ro el̦ap aer tõmak ilo Anij.

¹⁹ Kwõj ke pãd ilo juon jikin me armej ro ie rej tõmak ilo Anij? El̦aññe aet, kwõmaroñ kajjitõk ippãer: “El̦aññe juon enjel̦ ear kõnnaan waj ñan kwe, kwõnaaj ke kar roñjake ta eo ej ba? (Riit Revelesõn 14:6, 7, UBS.) Enjel̦ in ej ba ‘Kom̦win mijak Anij,’ ak wõn Anij in me ear kõnono kake? Eoon in ej wõnm̦aanl̦o̦k wõt im ba bwe ej ‘eo ear kõm̦anm̦an lañ im lal̦.’ Wõn in kab etan?” Riiti Sam 124:8 me ej ba: “Am jipañ ej ilo etan Jeova, eo Ear kõm̦anm̦an lañ im lal̦.” Innem, ba ñane bwe kwõm̦õn̦õn̦õ in jipañe ñan kal̦apl̦o̦k an jel̦ã kõn Jeova Anij.

20. (1) Elemen an Jabõn Kõnnaan 30:4 jipañ kõj ñan katakin ro jet kõn etan Anij? (2) Ta eoon eo el̦ap am̦ kar kõjerbale ilo kwal̦o̦k naan im el̦ap an kãitoklimoik armej ro?

²⁰ El̦aññe kwõj iioon juon jo̦dikdik, kwõmaroñ ba ñane: “Ikõn̦aan riiti waj juon eoon me ej kwal̦o̦k juon kajjitõk elukkuun aorõk. (Riit Jabõn Kõnnaan 30:4.) Jejel̦ã bwe ejjel̦o̦k juon armej emaroñ kõm̦m̦ani men kein, innem alikkar bwe eoon in ej kõnono kõn Rũkõm̦anm̦an eo. Ak kwõjel̦ã ke etan Rũkõm̦anm̦an eo? Im̦õn̦õn̦õ in kwal̦o̦k ñan kwe jãn Baibõl̦.”

21, 22. (1) Elemen an juon eoon me ejejjet ad kããlõte maroñ ukot mour eo an juon armej? (2) Ta eo kwõn kõjerbale aolep iien ñe kwõj kwal̦o̦k naan?

²¹ Ñe ejim̦we im jejjet eoon eo kwaar kõpooje ñan kõjerbale ilo kwal̦o̦k naan, eoon in emaroñ lukkuun kareel bũruon armej ro. Ñan waanjoñak, ruo Ri Kõnnaan an Jeova ilo Aujtõrõlia rar kal̦l̦al̦l̦al̦ ilo kõjãmin m̦weo im̦õn juon jiroñ. Juon iaaer ear kajjitõk ippãn, “Kwõjel̦ã ke etan Anij?” im rar riitil̦o̦k Sam 83:18. Jiroñ in ear ba: “Ikar lukkuun bwilõñ! Ãlikin aer kar etal, iar bõk wa eo waõ im ettõr 35 m̦ail̦ ñan juon m̦õn wia bok. Innem, iar jããke ukok in Baibõl̦ ko jet im bar lale ta mel̦el̦ein ãt in ilo tũkjinede. Ke iar kam̦oole ippa make ke etan Anij ej Jeova, iar kõn̦aan jel̦ã bar ta ko jet ijjab jel̦ã kaki.” Ejjabto tokãlik, jiroñ in im likao eo jeran rar jino katak Baibõl̦ im tokãlik rar m̦are im peptaij.

²² Joñan an kajoor Naan in Anij, emaroñ ukot mour ko an armej ro. Ñe juon ej riiti Baibõl̦, men in enaaj kõm̦m̦an bwe en lukkuun tõmak ilo kallim̦ur ko an Jeova. Tõmak enaaj kõm̦akũti ñan mour ekkar ñan men ko ej katak kaki. (Riit 1 Tessalonika 2:13, UBS.) El̦apl̦o̦k an kajoor naan ko ilo Baibõl̦ jãn naan ko jej ba. Kõn men in, ñe jej kwal̦o̦k naan jen kate kõj ñan kõjerbale Naan in Anij aolep iien. Bwe Naan in Anij emour!