M̦okta jãn an kar Jeova Anij kõm̦anm̦an armej ro, ear kõm̦anm̦an elõñ milien enjel̦ ro. (Job 38:4, 7) Enjel̦ rein rej jetõb ro im el̦ap aer kajoor. Rej rijerbal ro an Anij, im ear wõr iien ko me ear jilkintok er ñan tõl im kõjparok rũkarejar ro an ijin ioon lal̦. (Sam 91:10, 11, UBS) Ilo raan kein, enjel̦ ro rej jipañ armej ro bwe ren jel̦ã kõn nuuj eo em̦m̦an me rũkal̦oor ro an Jijej rej kwal̦o̦k kake.​—Riit Revelesõn 14:6, 7, UBS.

Ekkar im jim̦we ke bwe jen jar ñan enjel̦ ro ñan jipañ kõj? Ejjab. Etke? Kõnke eo me jej jar ñane, ej eo jej kabuñ ñane. Im Anij ej tõllo̦kũn ad kabuñ wõt ñane. (Revelesõn 19:10, UBS) Bareinwõt, enjel̦ ro rej rijerbal an Anij im rej roñjake naan ko an Anij wõt im jab armej ro. Kõn men in, jej aikuj jar wõt ñan Anij ikijjeen Jijej.​—Riit Sam 103:20, 21; Matu 26:53, UBS.

Ãinwõt armej, ewõr an enjel̦ ro maroñ in kããlõt ñan kõm̦m̦ani men ko rem̦m̦an im nana. Ekabũrom̦õjm̦õj bwe elõñ enjel̦ ro rar oktak im jum̦ae Anij. (2 Piter 2:4) Enjel̦ eo m̦oktata me ear oktak im jum̦ae ej Setan. Tokãlik, enjel̦ ro jet rar oktak im l̦oore. Innem, kar jolal̦tak Setan im enjel̦ ro renana jãn lañ ñan ijin ioon lal̦.​—Riit Revelesõn 12:7-9.

Men ko renana im kowadoñ rar l̦apl̦o̦k jãn kar iiõ eo 1914. Men in ej kaalikkar bwe m̦õttan jidik Anij enaaj ko̦kkure Setan im enjel̦ ro renana. Ãlikin, Anij enaaj kõm̦m̦an bwe lal̦ in en oktak im erom juon pedetaij.​—Riit Revelesõn 12:12; 21:3, 4.