Kwõnañin ke l̦õmn̦ak ippam̦ make kõn unin ad mour? Ej ke bwe jen limo, jerbal, m̦are, wõr ad baam̦le, im rũttol̦o̦k? (Job 14:1, 2, UBS) Baibõl̦ ej kwal̦o̦k bwe armej ro relukkuun mãlõtlõt rar bar l̦õmn̦ak kõn men in.​—Riit Ekklisiastis 2:11, UBS.

Ewõr ke unin ad mour? M̦okta, em̦m̦an jen kõl̦mãnl̦o̦kjen̦ kõn ewi wãween an kar mour jino ejaak. Ãlikin an elõñ armej ekkatak kõn kõmãlij eo ad im m̦õttan ko ilo ãnbwinnid, rej kile bwe ewõr juon eo emãlõtlõt im ear kõm̦anm̦an kõj. (Riit Sam 139:14.) El̦aññe ewõr juon eo ear kõm̦anm̦an kõj, mel̦el̦ein bwe ewõr unin an kar kõm̦anm̦an kõj! Ad jel̦ã un eo enaaj jipañ kõj ñan kile bwe ewõr tokjãn ad mour.

Anij ear kajeraam̦m̦an armej ro ruo m̦oktata im lel̦o̦k ñan erro juon jerbal ekanooj in em̦m̦an. Anij ear kõn̦aan bwe ren kobrak lal̦ in, kõm̦m̦an bwe en erom pedetaij, im mour ñan indeeo.​—Riit Jenesis 1:28, 31.

Kõn̦aan in an Anij ear jab jejjet kũtien kõnke armej ro ruo m̦oktata rar jum̦ae wãween an tõl. Bõtab, ear jab bõjrak kõn̦aan in an Anij ñan kõj. Baibõl̦ ej jipañ kõj ñan jel̦ã bwe Anij ej wõnm̦aanl̦o̦k wõt im kõjparok armej ro rej tiljek ñane im bwe kõn̦aan eo an ñan lal̦ in enaaj jejjet kũtien! Kõn men in, ekõn̦aan bwe kwõn kab mour ilo tõre eo me enaaj jejjet kũtien men in bwe kwõn maroñ jel̦ã wãween mour eo me ear kõn̦aan jãn jinoin! (Riit Sam 37:29.) Kwõmaroñ katak jãn Baibõl̦ kõn jeraam̦m̦an ko kwõnaaj loi ñe enaaj jejjet kũtien kõn̦aan in an Anij.