ILO am̦ kar riiti naan kein itulõñ, ewi wõt iaaer kwõj bar errã ie? Elõñ rej lo bwe naan ko an Saul rar kakajoor im kaenõm̦m̦an er. Saul ej jãn Tarsõs im ãt eo juon etan ej rijjilõk Paul. (Jerbal 17:26, 27, UBS) Ebar wõr kein kam̦ool ko ilo Baibõl̦ me rej kwal̦o̦k bwe jemaroñ jel̦ã kõn Anij. Ñan waanjoñak, ilo juon iaan jar ko an Jijej, ear ba bwe rũkal̦oor ro an remaroñ jel̦ã kõn Anij im bwe Anij enaaj kajeraam̦m̦an er.​—Jon 17:3, UBS.

Bõtab, rũmmãlõtlõt ro ãinwõt Philo rar jab errã ilo men in. Rar ba bwe jejãmin jel̦ã kõn Anij kõnke jeban mel̦el̦e kake e. Innem ta am̦ l̦õmn̦ak, jemaroñ ke jel̦ã kõn Anij?

Baibõl̦ ej kwal̦o̦k bwe ewõr jet men kõn Anij me enaaj pen an armej mel̦el̦e kaki. Ñan waanjoñak, jeban lukkuun mel̦el̦e kõn toon an kar Anij pãd, kõn joñan an mãlõtlõt, im kõn joñan jel̦ãl̦o̦kjen̦ eo an me ejjel̦o̦k armej emaroñ jel̦ã im kõmel̦el̦eiki. Bõtab, ejjab mel̦el̦ein bwe men kein renaaj kabõjrak kõj jãn ad jel̦ã kõn Anij. Ilo m̦ool ñe jej kõl̦mãnl̦o̦kjen̦ kõn wãween kein rel̦l̦ap kõn Anij enaaj jipañ kõj ñan “ruwaakl̦o̦k” ñane. (Jemes 4:8) Jen lale jet iaan men ko jejjab maroñ lukkuun jel̦ã im mel̦el̦e kaki kõn Anij. Innem, jenaaj bar lale wãween ko rem̦m̦an kõn Anij me jemaroñ jel̦ã im mel̦el̦e kaki.

AN ANIJ PÃD: Baibõl̦ ej ba bwe Anij ej “jãn indeeo ñan indeeo.” (Sam 90:2) Mel̦el̦ein men in bwe ejjel̦o̦k jinoin Anij im ejjel̦o̦k jem̦l̦o̦kin. Innem, armej rejjab maroñ “bwine oran iiõ ko an.”—Job 36:26, UBS.

Tokjãn ñan kwe: Anij ej kallim̦ur bwe kwõnaaj mour ñan indeeo el̦aññe kwõj m̦ool ilo am̦ kõn̦aan jel̦ã kõn e. (Jon 17:3, UBS) Innem enaaj ke kar m̦ool kallim̦ur in ñe Anij eban kar mour ñan indeeo? E eo ej “Kiiñ indeeo” im e wõt emaroñ kam̦ool kallim̦ur in.​—1 Timote 1:17, UBS.

L̦ÕMN̦AK KO AN ANIJ: Baibõl̦ ej katakin kõj bwe ejjel̦o̦k emaroñ “kappukot jel̦ãl̦o̦kjen̦” eo an Anij kõnke l̦õmn̦ak ko An reutiej jãn l̦õmn̦ak ko ad. (Aiseia 40:28; 55:9) Kõn men in, Baibõl̦ ej kwal̦o̦k juon kajjitõk me jemaroñ l̦õmn̦ak kake. Ej ba: “Wõn ear jel̦ã l̦ol̦ãtãt an Irooj, bwe en katakin E?”​—1 Korint 2:16.

Tokjãn ñan kwe: Anij emaroñ roñjake jar ko an elõñ milien armej ro ñe rej jar ñane ilo juon wõt iien. (Sam 65:2) Ebar jel̦ã kõn kajjojo iaan bao sparro ko rej wõtlo̦k ñan lal̦. L̦õmn̦ak ko an Anij emaroñ ke obrak ñan joñan eo me ejjab maroñ roñjake eok? Ejjab, kõnke ejjel̦o̦k joñan l̦õmn̦ak ko an. El̦aptata kõnke ‘el̦ap am̦ aorõk jãn elõñ bao sparro.’​—Matu 10:29, 31.

MEN KO ANIJ EJ KÕM̦M̦ANI: Baibõl̦ ej ba bwe armej “rejjab maroñ in lo men eo Anij ear kõm̦m̦ane jãn jinoin im ñan jem̦l̦o̦kin.” (Ekklisiastis 3:11) Innem jeban jel̦ã aolep men kõn Anij. Men ko Anij ej kõm̦m̦ani rej ekkejell̦o̦k wõt ippãn mãlõtlõt im jel̦ãl̦o̦kjen̦ eo ippãn. Joñan aer l̦ap, “jejjab maroñ anõki!” (Rom 11:33) Bõtab, Anij ej m̦õn̦õn̦õ in kwal̦o̦k men ko ej kõm̦m̦ani ñan ro rekõn̦aan kabuñbũruon.​—Amos 3:7.

Tokjãn ñan kwe: El̦aññe kwõnaaj riiti Baibõl̦ eo im katak jãne, eban bõjrak am̦ katak elõñ men ko rekããl kõn Anij im men ko ej kõm̦m̦ani. Mel̦el̦ein men in bwe eban jem̦l̦o̦k ad ruwaakl̦o̦k ñan Jemãd ilañ.

Meñe elõñ wãween ko kõn Anij jejjab maroñ jel̦ã im mel̦el̦e kaki ak ejjab mel̦el̦ein bwe jeban jel̦ã kõn e ñan jidik. Baibõl̦ ej kwal̦o̦k elõñ mel̦el̦e ko remaroñ jipañ kõj ñan jel̦ãl̦o̦k kõn Anij. Jen lale waanjoñak kein:

ETAN ANIJ: Baibõl̦ ej katakin kõj bwe Anij ear make kõm̦m̦an etan. Ej ba: “Ña Jeova, eñin Eta.” Ãt eo etan Anij wõt ej wal̦o̦k 7,000 alen ilo Baibõl̦. Ejjel̦o̦k bar juon ãt ej wal̦o̦k el̦apl̦o̦k jãn joñan in ilo Baibõl̦.​—Aiseia 42:8.

Tokjãn ñan kwe: Jijej ear jar im ba: “Jememwõj ilañ, En Kwõjarjar Etam̦.” (Matu 6:9) Innem kwõmaroñ bar kõjerbal etan Anij ñe kwõj jar ñane. Jeova ej m̦õn̦õn̦õ in lo̦mo̦o̦ren jabdewõt eo ej kwal̦o̦k an kautiej ãt eo Etan.​—Rom 10:13.

IJO ANIJ EJ PÃD IE: Ewõr ruo jikin ko Baibõl̦ ej kwal̦o̦k kaki. Juon ej ijin ioon lal̦ me armej ro wõt rej pãd im mour ie. Kein karuo ej ijo me ro wõt rej nemãmeen jetõb rej pãd im mour ie. (Jon 8:23, UBS; 1 Korint 15:44) Innem ñe Baibõl̦ ej ba “lañ” ekkã an jitõñl̦o̦k ñan ijo wõt me ro rej ilo nemãmeen jetõb rej pãd ie. Ñan waanjoñak, ijo jikin Rũkõm̦anm̦an eo ad ej ilo “lañ.”​—1 Kiiñ 8:43.

Tokjãn ñan kwe: Kiiõ em̦m̦anl̦o̦k am̦ jel̦ã im mel̦el̦e kõn Anij. Rũkõm̦anm̦an eo ad ejjab baj juon jetõb me ej pãd aolep jikin im pãd ilo aolep men. Jeova ej ilo nemãmeen jetõb im em̦ool an pãd. Meñe  ewõr make jikin ak “ejjel̦o̦k men en̦ emaroñ in n̦ojak jãn Anij.”​—Hibru 4:13, UBS.

WÃWEEN KO REM̦M̦AN KÕN ANIJ: Baibõl̦ ej katakin kõj kõn wãween ko relukkuun em̦m̦an kõn Anij. “Anij yokwe.” (1 Jon 4:8) Anij eban riab. (Taitõs 1:2) Ejjab kalijekl̦o̦k, el̦ap an tũriam̦o, ejouj, im erum̦wij an illu. (Exodus 34:6; Jerbal 10:34) Innem, ippãn jet armej, remaroñ bwilõñ bwe Rũkõm̦anm̦an in ad ekõn̦aan bwe ro rej kautieje im pokake ren erom “jeran” me repaake.​—Sam 25:14, UBS.

Tokjãn ñan kwe: Kwõmaroñ epaake Jeova ãinwõt juon jeram̦ ak m̦õttam̦. (Jemes 2:23) Innem, ñe kwõnaaj jel̦ã kõn kain Anij rot Jeova, enaaj l̦apl̦o̦k am̦ mel̦el̦e kõn bwebwenato ko ilo Baibõl̦.

Ealikkar an Baibõl̦ kwal̦o̦k kõn Jeova Anij. Innem ejjab m̦ool men in bwe ejjel̦o̦k juon emaroñ jel̦ã kõn Anij. Ilo m̦ool, Rũkõm̦anm̦an eo ad ekõn̦aan bwe kwõn jel̦ã kõn e. Baibõl̦ ej kallim̦ur im ba: “El̦aññe kwõj pukot E, kwõnaaj lo E.” (1 Kronikel 28:9) Innem, kwõmaroñ jel̦ã kõn Anij ilo am̦ riit im kõl̦mãnl̦o̦kjen̦ kõn bwebwenato ko ilo Baibõl̦. Ñe kwõnaaj kõm̦m̦ane men in, Baibõl̦ ej ba bwe Anij “enaaj ruwaakwaj” ñan kwe.​—Jemes 4:8.

Kwõmaroñ l̦õmn̦ak ippam̦ make im ba ‘ak el̦aññe ijjab maroñ jel̦ã im mel̦el̦e aolep men kõn Anij, enaaj elemen aõ maroñ jeran?’ L̦õmn̦ak m̦õk kõn men in: Armej eo m̦õttan juon taktõ in m̦wijm̦wij ej aikuj ke bar juon taktõ? Ejjab! Armej in emaroñ oktak jerbal eo an. Meñe jerbal ko aerro remaroñ oktak jãn doon ak ejjab mel̦el̦ein bwe erro ban m̦õttãik doon. Men eo wõt eaorõkl̦o̦k ej bwe armej eo m̦õttan taktõ in en jel̦ã kajjien taktõ eo, en jel̦ã kõn ta ko rem̦m̦an ippãn, im kõn ta ko ediki. Eokwe ejjel̦o̦k oktak jãn kõj im Jeova. Kwõj aikuj jel̦ã kõn kain Anij rot e bwe kwõn maroñ jeran. Kwõmaroñ katak kake e ilo Baibõl̦.

Meñe Baibõl̦ eo ejjab kwal̦o̦k aolep mel̦el̦e ko kõn Rũkõm̦anm̦an eo, ak ej kwal̦o̦k mel̦el̦e ko raorõk me jej aikuji ñan ad maroñ jel̦ã kõn e. Kokõn̦aan ke kal̦apl̦o̦k am̦ mel̦el̦e kõn Jeova Anij? Eokwe ejjel̦o̦k on̦ãn an Ri Kõnnaan ro an Jeova katak Baibõl̦ ippãn jabdewõt eo ekõn̦aan katak. Kwõmaroñ kajjioñ tõpar jet iaaer me rej jokwe turum̦ ak kwõmaroñ bar etal ñan weep jait eo ammim, www.dan124.com/mh.