KATAK KO KÕN TAITÕL̦IN BOK IN | KWÕMAROÑ MEL̦EL̦E KÕN KOBBAN BAIBÕL̦
Etke Jej Aikuj Mel̦el̦e kõn Baibõl̦?
“Baibõl̦ ej juon bok me elõñ armej rejel̦ã kake. Bõtab, ej juon bok an armej in aelõñ ko jet im ejjab jejjet ñan kõm RiJaina.”—LIN, jãn JAINA.
“Enaaj ewi wãween aõ mel̦el̦e kõn kobban Baibõl̦ ke ijjab mel̦el̦e kõn kobban bok kan̦ rekkwõjarjar an kabuñ e aõ, Hindu?”—AMIT, jãn INDIA.
“Ij kautiej Baibõl̦ kõnke ej juon bok in etto im ij roñ bwe elukkuun lõñ armej rej wia aer. Bõtab, ijjañin ellolo Baibõl̦ ilo mour e aõ.”—YUMIKO, jãn JEPAAN.
Elõñ armej ipel̦aakin lal̦ in rej lukkuun kautiej Baibõl̦. Bõtab, elõñ rejjab lukkuun jel̦ã kake im jel̦ã kõn kobban. Em̦ool men in kõnke elõñ milien armej ro ilo Eijia rejaje kõn Baibõl̦. Bõtab, ebar lõñ armej ro rejaje kõn kobban Baibõl̦ ilo aelõñ ko me ewõr Baibõl̦ ie.
Kwõmaroñ kajjitõk im ba, ‘Etke ij aikuj mel̦el̦e kõn kobban Baibõl̦?’ Eokwe, kõnke ñe kwõmel̦el̦e kõn ta ko bok in eokkwõjarjar ej ba, men in enaaj jipañ eok bwe kwõn:
-
Lo jokwane im m̦õn̦õn̦õ
-
Jel̦ã kõm̦adm̦õdi apañ ko ilowaan baam̦le eo am̦
-
Jel̦ã kijenmej ñe kwõj iioon inepata ko
-
Kõm̦m̦an bwe en em̦m̦an jem̦jerã eo am̦ ippãn ro jet
-
Kõjerbal jããn ilo mãlõtlõt
L̦õmn̦ak m̦õk kõn juon kõrã etan Yoshiko, jãn Jepaan. Ear kõn̦aan jel̦ã ta ko Baibõl̦ ej kwal̦o̦k kaki im ear pepe in riiti. Ta tokjãn an kar riiti Baibõl̦ eo? Ej ba: “Baibõl̦ ear jipañ eõ bwe in lo unin aõ mour im bwe en wõr aõ kõjatdikdik kõn ilju im jekl̦aj.” Ear wõnm̦aanl̦o̦k im ba: “Ejako aõ l̦õmn̦ak bwe ejjel̦o̦k tokja.” Amit, em̦m̦aan eo me ewal̦o̦k naan ko an itulõñ, ear pepe in riiti im etale Baibõl̦ eo ippãn make. Ej ba: “Iar lukkuun bwilõñ. Elõñ mel̦el̦e ko ilo Baibõl̦ me remaroñ jipañ aolep armej.”
Baibõl̦ ear jipañ elõñ milien armej ro ilo mour ko aer. Etke kwõjjab baj riiti im lale wãween an maroñ jipañ eok?
