Юмо чыла ужеш да шке кумылжым кеч-куштат шуктен кертеш (Притчи 15:3; Еврей-влаклан 4:13). Но Библий огеш туныкто, пуйто Юмо ик жапыштак чыла вере да кеч-мон кӧргыштыжӧ лийын кертеш. Библий дене келшышын, Юмо — тиде личность, да тудо ик палемдыме верыште ила.

•   Юмын илыш формыжо. Юмо — тиде шӱлыш (Иоаннын 4:24). Еҥ-влак кокла гыч тудым нигӧат ужын огыл (Иоаннын 1:18). Библийыште возымо кончымаш-влак гыч ме пален налына: Юмо палемдыме верыште ила. Тудо ик жапыштак чыла вере улеш манын, нигуштат ок ойлалт (Исаия 6:1, 2; Почмаш 4:2, 3, 8).

•   Юмын илыме верже. Юмо духовный тӱняште ила, кушто физический закон-влак огыт ыште. Тушто, каваште, Юмын палемдыме илыме верже уло (1 Царей 8:30). Библийыште возымо ик случайым, кунам суксо-влак Иегова a ончылан толын шогалыныт. Лектеш, Юмо ала-могай ик верыште ила (Иов 1:6).

Юмо чыла вере улшо огыл гын, тудо мыланем полшен кертеш мо?

 Кертеш. Тудо кажне еҥ верч тырша. Юмо духовный тӱняште ила гынат, тудлан чынжымак йӧраш тыршыше еҥ-влаклан вниманийжым ойыра да нунылан полша (1 Царей 8:39; 2 Летопись 16:9). Ончен лектына, кузе Иегова тудлан ӱшанле еҥ-влак верч тырша.

•   Кунам ме кумалына. Кумалмынам Иегова колеш (2 Летопись 18:31).

•   Кунам ме ойгырена. «Ойгырышо шӱман-шамычлан Юмо лишыл да ӱҥышӧ шӱлышан-шамычым утара» (Псалом 33:19).

•   Кунам ме она пале, мом ышташ. Иегова мыланна умылымашым пуаш да шке Мутшо гоч, Библий гоч, мемнам туныкташ ямде улеш (Псалом 31:8).

Юмын чыла вереат улмыжо нерген йоҥылыш шонымаш-влак

 Йоҥылыш шонымаш. Юмын чыла вере улмыжо нерген Псаломышто 138:8 возымо: «Пылпомышко кӱзем гын, Тый тушто улат; тамыкышке волем гын, Тый тушто улат».

 Факт. Тиде почеламутышто Юмын кушто улмыжо нерген ок ойлалт. Тиде Псаломышто поэтический мут дене Юмын мыланна полшашлан кеч-кушкат шуын кертмыже нерген каласыме.