1, 2. а) Могай ситуацийыште Павел Ефесян-влаклан серышым возен, да молан тудо нунылан возен? б) Могай йодыш-влакым ме лончылен налына?

 КУНАМ Павел Римыште мӧҥгысӧ арестыште лийын, тудо иза-ака-влакым кумылаҥдынеже ыле. Тудо нунын дене вашлиялтын кертын огыл, сандене нунылан серыш-влакым возен. Нунын гыч иктыжым тудо ефесян-влаклан мемнан эран иктаж 60 але 61 ийыште возен (Еф. 1:1; 4:1).

² 10 ий наре ончыч Павел Ефесыште шуко жапым эртарен: поро уверым таныклен да тунемше-влакым ямдылен (Ап. паш. 19:1, 8—10; 20:20, 21). Павел иза-ака-влакым пеш чот йӧратен да нунылан Иеговалан ӱшанле кодаш полшынеже ыле. Но молан тудо саде шӱрымӧ христиан-влаклан пычкемыш да волгыдо нерген возен? Павелын каласымыж гыч ме мо́лан тунемын кертына? Айста нине йодыш-влаклан вашмутым пален налына.

ПЫЧКЕМЫШ ГЫЧ ВОЛГЫДЫШ

3. Павел ефесян-влакым мо дене таҥастарен?

³ Павел Ефесыште илыше христиан-влаклан возен: «Ондак те пычкемыш лийында, а ынде... волгыдо улыда» (Еф. 5:8). Тидын дене тудо палемден, мыняр чот нуно вашталтыныт. Айста лончылен налына, молан Павел ефесян-влаклан «ондак те пычкемыш лийында» манын каласен.

4. Ефесян-влак религиозный пычкемыште лийыныт манын, молан каласаш лиеш?

⁴ Религиозный пычкемыш. Чыным пален налме да христиан  лийме деч ончыч ефесян-влак Юмо нерген шоя туныктымашлан да магийлан ӱшаненыт. Ефес олаште кумдан палыме Артемидан храмже лийын, кудыжо акрет жапыште тӱнясе шым чудо-влак гыч иктыжлан шотлалтын. Еҥ-влак тушко идол-влаклан кумалаш толыныт. Артемидан изи храмже-влакым ыштымаш да ужалкалымаш шуко оксам конден (Ап. паш. 19:23—27). Тыгак ту олан илыше-влак юзыланеныт (Ап. паш. 19:19).

5. Ефесыште илыше-влак нравственный пычкемыште лийыныт манын, молан каласаш лиеш?

⁵ Нравственный пычкемыш. Ефесыште илыше-влак яжарланен иленыт. Ту жапыште театрыште шындыме спектакль-влак да религиозный пайрем-влак чӱчкыдын секс теме дене кылдалтыныт (Еф. 5:3). Ефесян-влак гыч шукыштым совестьышт индырен огыл, вес семынже, нуно корштымашлан шижмашым йомдареныт (Еф. 4:17—19). Нуно пален огытыл, мом Иегова порылан шотла, а мом — осаллан. Сандене совестьышт нунылан ик йӱкымат пуэн огыл. Нуно Юмо ончылно мутым кучышаш улыт манын шижын огытыл. Теве молан Павел нунын нерген возен: «Нунын ушыштым пычкемыш авалтен... [нуно] Юмын илыш деч ӧрдыжтӧ улыт».

6. Молан Павел ефесян-влаклан каласен: «Ынде... волгыдо улыда»?

⁶ Но южо ефесян-влак пычкемыш гыч лектыныт. Павел возен: «Ынде, Господь дене ушнен, волгыдо улыда» (Еф. 5:8). Нуно корныштым волгалтарыше Юмын Мутшым илышыш пурташ шонен пыштеныт (Пс. 118:105). Нине ефесян-влак идол-влаклан кумалмым да яжар илышым коденыт. Нуно Юмо деч примерым налаш тӱҥалыныт да тудым служымашышт дене куандараш тыршеныт (Еф. 5:1).

7. Ефесыште илыше христиан-влак дене мо шотышто ме икгай улына?

⁷ Ефесян-влак семын чыным пален налме деч ончыч ме религиозный да нравственный пычкемыште лийынна. Мемнан гыч южышт шоя религийын пайремже-влакым пайремленыт, а иктажше яжарланен илен.  Но кунам ме пален налынна, мом Иегова порылан да осаллан шотла, ме вашталтынна. Юмым куандарашлан мемнан тудын святой нормыжлан келшен толаш кумылна лектын. Тидлан кӧра илышна сай могырыш вашталтын (Ис. 48:17). Но тиде огеш ончыкто, пуйто ме пычкемышыш угыч она логал. Мыланна тудын деч ӧрдыжтырак лияш да «волгыдын йочашт семын» ышташ кӱлеш. Кузе ме тидым ыштен кертына?

ПЫЧКЕМЫШ ДЕЧ КОРАҤЗА

8. Ефесян-влаклан 5:3—5 дене келшышын, Ефесыште илыше христиан-влаклан мо деч кораҥаш кӱлеш ыле?

⁸ Ефесян-влаклан 5:3—5 лудын лекса. Нравственный пычкемыш деч тораштырак лияшлан Ефесыште илыше христиан-влаклан Иеговалан келшыдыме паша деч кораҥаш кӱлеш ыле. Тышке яжарланен илымаш гына огыл, тыгак ару огылым ойлымаш пурен. Павел ефесян-влаклан шарныктен: тыге ыштыше айдемын «Христосын да Юмын Кугыжанышыште нимогай наследствыже уке».

9. Удам але яжарланыме дене кылдалтшым ончаш, колышташ але тидын нерген мутланаш молан чот лӱдыкшӧ?

⁹ «Пычкемышын саскадыме пашаж деке» ушнаш огыл манын, мыланнат тӱткӧ лийман (Еф. 5:11). Кузе илыш ончыкта, айдеме удам але яжарланыме дене кылдалтшым онча, колыштеш але тидын нерген мутлана гын, тиде тудым языкым ышташ таратен кертеш (Тӱҥ. 3:6; Иак. 1:14, 15). Ик элыште Танык-влак гыч шогышо кугу группо соцсетьыште мутланаш тӱҥалын. Эн ончыч нуно Иегова да чын нерген мутланеныт. Но жап эртымеке, нуно ару огыл теме-влакымат тарваташ тӱҥалыныт. Мутланымышт чӱчкыдын секс нерген лийын. Лектышыже уда лийын. Южыжо сексуальный сулыкым ыштен. Нунын гыч южышт варажым каласеныт: сулыкым ышташ нуным саде ару огыл мутланымаш-влак таратеныт.

10. Кузе Сатана мемнам ондалаш тырша? (Ефесян-влаклан 5:6).

¹⁰ Сатанан тӱняже мемнам ӱшандараш тырша, пуйто яжарланен илымаште да ару огыл койыш-влакыште нимогай удаже уке (2 Пет. 2:19). Тиде мемнам огеш ӧрыктаре. Еҥ-влак сайым уда деч ойырен налын ынышт мошто манын, Диавол эре нуным ондалаш тыршен (Ис. 5:20; 2 Кор. 4:4). Теве молан шуко сайт, фильм да телешоу Иегован чын нормыжым шотыш налде илаш кумылаҥда. Сатана мемнам тыге шонаш тарата, пуйто ару огыл койыш да яжарланымаш эҥгекым огыл, а мӧҥгешла куаным гына конда. (Ефесян-влаклан 5:6 лудын лекса.)

11. Ефесян-влаклан 5:7 гыч каҥаш кызытат пайдале манын, Анжелан случайже кузе ончыкта? (Тыгак сӱретым ончыза.)

¹¹ Ме Иеговам йӧратыдыме-влак дене лишыл кылым кучаш тӱҥалына гын, Сатана чот куанен колта. Вет тунам мыланна библийысе нормо почеш илаш йӧсырак лиеш. Павел тиде лӱдыкшӧ нерген пален, сандене ефесян-влакым Юмын шонымаште осалым ыштыше-влак дене нимогай кылым кучаш огыл таратен (Еф. 5:7). Но мыланна эше тӱткырак лийман. Вет таче еҥ-влак икте-весе дене вашлийын гына огыл, тыгак соцсетьыште мутланат. Азий гыч Анже́ла a шкат ужын, соцсеть-влак мыняр чот лӱдыкшӧ улыт. Тудо ойла: «Тиде вапш семын лийын кертеш. Мый шкежат шижын омыл, кузе шонымашем вашталташ тӱҥалын. Мый соцсетьыште тыгай еҥ-влак дене  йолташ лийынам, кӧ Библийым огеш пагале. Жап эртымеке, мый шонаш тӱҥалынам, пуйто шке кумыл почеш илет гын да Иегован шонымыжым шотыш от нал гын, тыште нимогай уда уке». Пиалешыже, йӧратыше кугурак иза-влак Анжелалан вашталташ полшеныт. Тудо манеш: «Кызыт ушыштем икымше верыште соцсеть-влак огыл, а Иегова да тудын шонымашыже-влак».

12. Иегован нормыжо почеш илаш мыланна мо полша?

¹² Тиде тӱнясе еҥ-влакын шонымашышт нравственный шотышто пужлен. Нуно мемнамат тыге шонаш таратат. Но ме палена: нуно йоҥылыш шонат (Еф. 4:19, 20). Шкенам аралашлан нине йодыш-влак нерген шонкален налза: «Пырля пашам ыштыше, тунемше да Иегован нормыжо почеш илыдыме моло еҥ-влак дене кыл кучымым иземдаш тыршем мо? Мыйым фанатик манаш тӱҥалыт гынат, Иегован нормыжо почеш умбакыжат илем мо?» Мыланна христиан погынымаштат йолташым ойырен налме годым тӱткӧ лийман. Лачак тидын нерген Павел 2 Тимофейлан 2:20—22 возен. Ме тыгай еҥ-влак дене йолташ лийнена, кӧ мемнам Иегова деч огеш кораҥде да кӧ тудлан умбакыжат ӱшанлын служитлаш полша.

«ВОЛГЫДЫН ЙОЧАШТ СЕМЫН ИЛЫЗА»

13. «Волгыдын йочашт семын» илымаш мом ончыкта? (Ефесян-влаклан 5:7—9).

¹³ Павел христиан-влакым пычкемыш деч кораҥаш гына огыл, тыгак «волгыдын йочашт семын» илаш таратен. (Ефесян-влаклан 5:7—9 лудын лекса.) Мом тиде ончыкта? Кӱчыкын каласаш гын, шкенам эре чын христиан семын кучыман. Тыге ышташ мыланна мо полша? Библийым да Библиеш негызлыме публикаций-влакым мыланна шонкален лудаш да шымлаш кӱлеш. Но поснак Иисус Христосын илыш ден туныктымыжым шымлаш кӱлешан, вет тудо «тӱнян волгыдыжо» (Иоан. 8:12; Прит. 6:23).

14. Кузе мыланна святой шӱлыш полша?

¹⁴ Мыланна «волгыдын йочашт» лияшлан тыгак святой шӱлыш кӱлеш. Молан? Молан манаш гын, тудын деч посна тиде пужлышо тӱняште ме ару кодын она сеҥе (1 Фес.  4:3—5, 7, 8). Святой шӱлыш мыланна тиде тӱнян шонымашыж дене кучедалаш полша. Тиде шонымашыш тыгай шонымаш ден философий-влак пурат, кудышт Юмын туныктымыжлан тореш улыт. А эше святой шӱлыш мыланна порым ышташ да чын илаш полша (Еф. 5:9).

15. Кузе святой шӱлышым налаш? (Ефесян-влаклан 5:19, 20).

¹⁵ Кузе святой шӱлышым налаш? Тудын нерген кумалаш лиеш. Иисусын каласымыж дене келшышын, Иегова «Тудын деч йодшылан Святой Шӱлышым» пуа (Лук. 11:13). Тыгак ме святой шӱлышым налына, кунам Иеговам христиан вашлиймаште пырля чапландарена. (Ефесян-влаклан 5:19, 20 лудын лекса.) Святой шӱлышын полшымылан кӧра ме Юмым куандарен илен кертына.

16. Уш-акылан решенийым лукташ мо полшен кертеш? (Ефесян-влаклан 5:10, 17).

¹⁶ Кугу решенийым лукмо деч ончыч «Юмын эрыкшым умылаш» да вара тидын дене келшышын ышташ кӱлеш. (Ефесян-влаклан 5:10, 17 лудын лекса.) Кузе Иегован шонымыжым пален налаш? Ситуацийналан келшен толшо библийысе принципым кычал муман. Вара ме нуным кучылтына гын, решенийна, очыни, сай лектышым конда.

17. Кузе жапым уш-акыл дене кучылташ? (Ефесян-влаклан 5:15, 16). (Тыгак сӱретым ончыза.)

¹⁷ Павел Ефесыште илыше христиан-влакым жапым уш-акыл дене кучылташ таратен. (Ефесян-влаклан 5:15, 16 лудын лекса.) Юмылан жапна ынже код манын, Диавол илышнам тиде тӱнян пашаж дене нелемдаш тырша (1 Иоан. 5:19). Христиан шонен кертеш, пуйто окса, образований але паша Иеговалан служитлыме деч кӱлешанрак. Но тудо тыге шона гын, тиде теве мом ончыкта: тудо тиде тӱня семын шонаш тӱҥалын. Мутат уке, нине паша-влак уда огытыл. Но нуным илышыште икымше верыш  шындаш огеш кӱл. «Волгыдын йочашт семын» ышташлан мыланна «жапым пайдалын» кучылтман, вес семынже, чынжымак кӱлешанлан жапым пуыман.

18. Доналд жапшым пайдалынрак кучылташлан мом ыштен?

¹⁸ Иеговалан служымаште шукырак ышташлан тӱрлӧ йӧным кычалза. Кечывалвел Африке гыч Доналд иза лач тыге ыштен. Тудо каласкала: «Мый шке илышемым терген налынам да шукырак таныклашлан Иеговам мыланем полшаш йодынам. Мый тыгай паша нерген кумалынам, кудыжлан кӧра шукырак таныклен кертам ыле. Иегован полшымыж дене мый тыгай пашам муынам. Ындыжым ме ватем дене пырля кечыгут служитлыше семын тыршена».

19. «Волгыдын йочашт семын» ышташ мыланна мо полшен кертеш?

¹⁹ Павелын серышыже Ефесыште илыше христиан-влаклан Юмылан ӱшанле кодаш полшен. Юмо деч нине каҥаш-влак мыланнат пеш пайдале улыт. Мыланна канымашым да йолташ-влакым ойырен налме шотышто уш-акылан лийман. Тыгак чӱчкыдын Библийым шымлыман. Тидлан кӧра чынын волгыдыжо илышнан кажне могыржым волгалтара. Эше мыланна святой шӱлыш чотак кӱлеш, кудыжо мыланна сылне койыш-влакым кушташ полша. Ефесян-влаклан серыш гыч мут-влакым кучылтына гын, уш-акылан решенийым луктын кертына, кудыжо Иегован шонымыжлан келшен толеш. Чыла тиде мемнам ты тӱнян пычкемыш деч арала да «волгыдын йочашт семын» ышташ полша!