1, 2. Библийым лудаш да шымлаш могай эн сай йӧн уло? Примерым кондыза.

 ШОНАЛТЫЗА, пуйто те пӧртым налаш шонеда. Решенийым лукмо деч ончыч мом ончалмыда шуэш? Пӧртын фотографийжым веле мо? Уке. Очыни, те шке шинча дене пӧртым ончалыда, тудым йыр савырнен лектыда, чыла пӧлемым ончалашлан кӧргышкыжӧ пуреда. Можыч, тендан эше пален налмыда шуэш, кузе тиде пӧрт чоҥымо лийын. Очыни, налаш шонымо пӧртым чыла детальге ончен лекмыда шуэш.

² Тиде примерым Библийым лудмылан да шымлымылан келыштараш лиеш. Ик библеист тиде книгам келге негызан да кӱкшӧ башнян кугу зданий дене таҥастарен. Библийыште чыла возымым пален налаш лиеш мо? Те тудым вашке гына лудын лектыда гын, тунам Библийын тӱҥ шинчымашыжым веле пален налыда (Евр. 5:12). Но кузе каласышна, пӧртым налаш шонымо годым кӧргышкыжӧ пураш да чыла детальжым шымлаш кӱлеш. Тыгела, Библийым шымлаш пеш сай йӧн — тиде ужаш тыршаш, кузе тудын тӱрлӧ ужашыже икте-весе дене кылдалтеш. Умылаш тыршыза, могай туныктымашыжлан те ӱшанеда да молан тидлан ӱшанеда.

3. Апостол Павел иза-ака-влакым мом ышташ кумылаҥден да молан? (Ефесян-влаклан 3:14—19).

³ Библийым сайын умылашлан тудым келгын шымлаш кӱлеш. Апостол Павел иза-ака-влакым Юмын Мутшым тыршен шымлаш таратен. Тидлан кӧра нуно чынын «лопкытшым, кужытшым, келгытшым да кӱкшытшым» умылен кертыныт. Тиде нунылан ӱшанымашыштым пеҥгыдемдаш полшен. (Ефесян-влаклан 3:14—19 лудын лекса.) Мыланнат тидым ыштыман. Юмын Мутшын смыслжым умылашлан  кузе тудым шымлаш кӱлеш? Айста ончалына.

4. Иегова дек эше лишылрак лияшлан мом ыштен кертына? Примерым кондыза.

⁴ Христиан семын мемнан Библийын тӱҥ туныктымашыжым гына огыл, тыгак «Юмын келгытшым» умылымына шуэш. Ме палена: святой шӱлышлан кӧра тидым ыштен кертына (1 Кор. 2:9, 10). Тыланда келшыше темым але йодышым ойырен налза да келгынрак шымлен лекса. Тыгай шымлымаш тыланда Иегова дек эше лишылрак лияш полша. Мутлан, шымлен лекса, кузе Юмо ожно шке служитлышыже-влак дек йӧратымашыжым ончыктен да, Иегова мемнамат йӧрата манын, кузе тиде ӱшандара. Але таҥастарыза, мо дене израильтян-влакын Юмылан служитлымышт тачысе христиан-влакын служитлымышт дене икгай. Эше тыгай ончылгоч каласымаш-влакым шымлен лекташ лиеш, кудышт Иисусын мландыште илымыж да служитлымыж годым шукталтыныт.

5. Уло мо тыгай теме, кудыжым те Библийым шкетын шымлыме годым келгынрак шымлен налнеда?

⁵ Опытан Библийым шымлыше-влакым каласаш йодыныт, могай темым нуно сайрак умылен налнешт. Южо вашмут-влак « Шкетын шымлыме годым тыгай йодыш-влакым шымлаш лиеш» рамкыште палемдалтыныт. Тыгай шымлымашым эртараш пеш оҥай. Тидым ышташ «Индекс публикаций Сторожевой башни» але «Путеводитель по публикациям Свидетелей Иеговы» полшен кертыт. Библийым келге шымлымаш тыланда Юмо нерген шинчымашым муаш да ӱшанымашдам пеҥгыдемдаш полша (Прит. 2:4, 5). Айста икмыняр келге библийысе туныктымашым ончалына, кудыштым те шымлен налын кертыда.

6. а) План ден шонен пыштымаш коклаште могай ойыртем уло? б) Мланде да еҥ-влак шотышто Иегован шонен пыштымашыже курымашлык улеш манын, молан каласаш лиеш? (Ефесян-влаклан 3:11).

⁶ Мутлан, ончалына, мом Библий Юмын шонен пыштымашыже нерген ойла. План  ден шонен пыштымаш коклаште кугу ойыртем уло. Планым ойырен налме корно дене таҥастараш лиеш, кудыжо мемнам шонен пыштыме верыш наҥгая. Корнышто чарак лектеш гын, ме тиде корно дене кайыме верыш, очыни, шуын она керт. А шонен пыштымашым тиде вер дене таҥастараш лиеш, кушко мияш шонена. Ме раш палена, кушто ме лийнена, но кузе тушко миен шуына — тӱҥ огыл. Иктаж-могай нелылык лектеш гын, вес корным ойырен кертына. Иеговалан тау, вет ме мланде да еҥ-влак шотышто курымашлык шонен пыштымыжым палена, кудыжым тудо эркын-эркын Библий гоч умылаш полшен (Еф. 3:11). Тудо эрыкшым шукташлан чылажымат ышта. Сандене могай-гынат нелылык огеш лек, Иегова шонен пыштымыжым эре шукта (Прит. 16:4). Тидым ышташ тудлан нигӧат нигунамат мешаен огеш керт. Иегован шонен пыштымашыже могай? Тудым шукташлан тудлан могай вашталтышым ышташ логалын?

7. Иегова икымше еҥ-влакын ваштареш шогалмышт деч вара шке шонен пыштымыжым шукташлан мом ыштен? (Матфейын 25:34).

⁷ Юмо икымше еҥ-влаклан палдарен, мом тудо нунылан шонен пыштен. Тудо нунылан каласен: «Тӱлаҥза да шукемза, мландым темыза да озаланыза... мландӱмбалне чыла... чонанлан оза лийза» (Тӱҥ. 1:28). Адам ден Еван Юмо ваштареш шогалмыштлан кӧра тӱняш сулык пурен, но тиде Иеговалан шонен пыштымыжым шукташ мешаен огыл. Шонымыжым шукташлан тудо вес йӧным кучылтын. Юмо вигак решенийым луктын: кавасе Кугыжанышым шогалта, кудыжо мланде да еҥ-влак шотышто шонен пыштымыжым шукта. (Матфейын 25:34 лудын лекса.) Шке жапыште Иегова мландыш ик шкет Эргыжым колтен. Иисус еҥ-влаклан тиде Кугыжаныш нерген каласкален да мемнам сулык ден колымаш деч тӱлен налашлан шке илышыжым пуэн. Тыге Иегова кугу йӧратымашыжым ончыктен. Вара Иисус Юмын Кугыжанышыште Кугыжа лияшлан кавасе илышлан ылыжтыме лийын. Но Юмын шонен пыштымыже нерген эше шуко мом пален налаш лиеш.

8. а) Библийын тӱҥ темыже могай? б) Ончыкыжым Иегова мом эше ышта? (Ефесян-влаклан 1:8—11). (Журнал комышто сӱретым ончыза.)

⁸ Библийын тӱҥ темыже могай? Ончыкыжым Иегова шке лӱмжым амыртыме деч эрыкта. Христосын кугыжаланымыж годым мланде шотышто шонен пыштымыжым шуктен, Иегова тидым ышта. Тудын шонен пыштымашыже ок вашталт. Юмо чыла сӧрымашыжым шукташ гарантийым пуа (Ис. 46:10, 11; Евр. 6:17, 18). Жап эртымеке, мланде райыш савырна, да тиде райыште Адам ден Еван сулыкдымо, чын ыштыше тукымжо курымеш куанен илаш тӱҥалеш (Пс. 21:27). Но тиде гына огыл Юмын шонен пыштымашкыже пура. Иегова мландыште да каваште илыше чыла служитлышыже-влакым уша. Нуно чыланат Кӱшылсӧ Юмым колышташ тӱҥалыт да тудлан ӱшанле лийыт. (Ефесян-влаклан 1:8—11 лудын лекса.) Мемнам чот ӧрыктара, кузе Иегова шке эрыкшым шукта!

9. Библийым лудын, мыняр чот мӱндыркӧ ончалын кертына?

⁹ Ончен лектына ончылгоч каласымашым, кудыжым Иегова Эдем садыште пуэн. Тудын нерген Тӱҥалтыш 3:15 почеламутышто возымо b. Тушто Юмо умылтарен, кузе шке шонен пыштымыжым шукта. Но тушто палемдыме событий-влак икмыняр тӱжем ий эртымеке веле эркын-эркын шукталташ  тӱҥалыныт. Мутлан, Юмо Авраамлан тукымет гыч Христос лектеш манын каласен (Тӱҥ. 22:15—18). Вара мемнан эран 33 ийын Иисус йолтаганже гыч чӱҥгалме лийын (Ап. паш. 3:13—15). А тӱрыснек тиде ончылгоч каласымаш шукталтеш тунам, кунам Иисус Сатанан вуйжым тошкалеш да тыге тушманжым пытара. Тидыже 1 000 ий эртымеке веле лиеш (Почм. 20:7—10). Армагеддон деч ончыч лийшаш событий-влак нерген Библий гыч эше шуко мом пален налын кертына.

10. а) Ончыкыжым могай событий-влак лийыт? б) Кузе ме ямдылалт кертына? (Сноскым ончыза.)

¹⁰ Библий гыч ончылгоч каласыме ӧрыктарыше событий-влак нерген шоналтыза. Эн ончыч калык-влак «Тыныслык, лӱдыкшӧ уке» манын ойлаш тӱҥалыт (1 Фес. 5:2, 3). А вара нуно чыла шоя религий ӱмбак кержалтыт (Почм. 17:16). Тыге кугу азап тӱҥалеш. Тидын деч вара еҥ-влак «кавасе пыл ӱмбалне кугу куат да чап дене толшо Айдеме Эргым» ужыт. Очыни, тунам еҥ-влак чот ӧрыктарыше пале-влакым ужыт (Матф. 24:30). Вара Иисус еҥ-влакым судитлаш тӱҥалеш да шорык-влакым каза-влак деч ойыра (Матф. 25:31—33, 46). Но тугодым Сатана яра шинчаш огеш тӱҥал. Юмын калыкшым ужмышудымылан кӧра тудо наций-влакын коалицийыштым (Магог мланде гыч Гогым) Иегован служитлышыже-влак ӱмбак кержалташ тарата (Иез. 38:2, 10, 11). Мландыште илыше шӱрымӧ-влак ик палемдыме жапыште каваште погымо лийыт. Нуно Христос да тудын кавасе войскаж дене пырля Армагеддон сарыште кучедалаш тӱҥалыт. Тиде кугу азапын мучаштыже лиеш (Матф. 24:31; Почм. 16:14, 16) c. А вара Христосын тӱжем ий вуйлатымыже тӱҥалеш (Почм. 20:6).

11. Курымашлык илыш тыланда могай йӧным пуа? (Тыгак сӱретым ончыза.)

¹¹ Айста шоналтена, Христосын тӱжем ий вуйлатымыж деч вара мо эше лиеш. Библий дене келшышын, Юмо «еҥ-влакым курымеш илаш кумыл дене ыштен» (Эккл. 3:11). Шоналтыза, могай пайдам тиде тыланда конда  да кузе тиде Иегова дене кыл кучымылан влиятла. «Приближайся к Иегове» манме книгаште, 319 страницыште, тыгай сылне шомакым возымо: «Шӱдӧ, тӱжемле, миллионло да эсогыл миллиардле ий илымеке, Иегова Юмына нерген шинчымашна кызытсе деч шукырак лиеш. Но ме умбакыжат тудын нерген эше шуко мом пален налына. Курымашлык илыш пеш оҥай да шуко куан дене темше лиеш! Но эн тӱҥжӧ — ме кавасе Ачана дене кыл кучымынам курым-курымеш пеҥгыдемден кертына». А кызыт, Юмын Мутшым умбакыжат шымлен, мом ме эше пален налын кертына?

12. Каваште мо лиймым ужаш мыланна мо полшен кертеш? Примерым кондыза.

¹² Юмын Мутшо мыланна изишак умылаш полша, каваште Иегова воктене лиймаш мом ончыкта (Ис. 33:5). Библий мыланна Иегова да организацийжын кавасе ужашыже нерген ӧрыктарыше подробность-влакым палдара (Ис. 6:1—4; Дан. 7:9, 10; Почм. 4:1—6). Мутлан, ме лудын кертына, могай ӧрыктарыше кончымаш Иезекиильлан пуымо лийын, кунам кава почылтын (Иез. 1:1).

13. Иисусын кавасе служитлымыж гыч те мом акледа? (Еврей-влаклан 4:14—16).

¹³ Тыгак шоналтыза, могай верым Иисус каваште налеш. Тудо вуйлатыше Кугыжа да чаманыше Первосвященник. Тудлан кӧра ме Юмын «порылык престолжо» деке лишемын кертына. Вес семынже, Юмылан кумалме годым ме пеҥгыдын ӱшанен кертына: тудо мемнан дек поро лиеш да «кӱлеш жапыште» мыланна полша. (Еврей-влаклан 4:14—16 лудын лекса.) Айста кажне кечын шонкалена, мом Иегова да Иисус мыланна кава гыч ыштеныт да ыштат. Йӧратымашышт мемнамат нуным вашешышт йӧраташ да Иеговалан уло чон дене служитлаш таратышаш (2 Кор. 5:14, 15).

14. Иегова ден Иисуслан тауштымашнам кузе ончыктен кертына? (Тыгак сӱрет-влакым ончыза.)

 ¹⁴ Эн сай йӧн-влак гыч иктыже, кузе Юмылан да Эргыжлан тауштымашнам ончыкташ, — тиде еҥ-влаклан Иегован Таныкше да Иисусын тунемшыже лияш полшаш (Матф. 28:19, 20). Павел тыгакак ыштен, вет тудо Юмылан да Христослан тауштышо лийын. Тудо пален: Иегован кумылжо почеш чыла еҥ утаралтшаш да чыным пален налшаш (1 Тим. 2:3, 4). Павел служымаште уло вийым пыштен да кӧлан кертын, чылаштлан таныклен. Сандене, кеч южыштым кузе-гынат утарашлан мый чылажымат ыштенам манын, тудо каласен кертын (1 Кор. 9:22, 23).

15. Псалом 1:2 дене келшышын, мо́лан кӧра ме пиалан лийын кертына?

¹⁵ Псаломым мурышо каласен, кӧ тыгай пиалан айдеме. Тыгай айдеме Иегован законжо деч куаным налеш да тиде закон нерген йӱдшӧ-кечыже шонкала (Пс. 1:1—3). Тиде почеламут нерген ойлен, Библийым кусарыше Джозеф Ротергам тыгай айдеме нерген каласен: «...тудо Юмын туныктымашыжым чот йӧрата, тудым кычалеш, келгын шымла да шуко жап тудын нерген шонкала. [...] ...Кече мучаште библийысе уш-акылым ындыжым сайрак умылем манын каласен огеш керт гын, тыгай кече арам эртен» (Joseph Rotherham. Studies in the Psalms). Библий шуко кӱлешан шонымаш дене темын. Пеш оҥай шымлаш, кузе нуно икте-весе дене кылдалтыт. Чынжымак, Юмын Мутшым келге шымлымаш шуко куаным конда!

16. Вес статьяште мом лончылен налына?

¹⁶ Шке Мутшо гоч Иегова шуко чапле шинчымашым пуа. Иктаж-кӧ шонен кертеш: «Мый нуным нигунамат умылен ом керт». Но тыге шонаш вашкаш огеш кӱл. Вес статьяште ме ик тыгай келге туныктымашым шымлен лектына. Иегован кугу духовный храмже нерген мутланен налына. Тудын нерген апостол Павел еврей-влаклан серышыштыже возен. Тиде статьям шымлымаш тыланда шуко куаным конда.