Улыт тыгай эл-влак, кушто ӱдырамаш-влакым кокымшо сортлан шотлат. Боливий гыч Ханс лӱман районым эскерыше иза ойла: «Южо эрге-влакым изинек туныктат, пуйто чын пӧръеҥ торжа да шкаланже гына ӱшаныше лийшаш да ӱдырамаш-влакым пагалышаш огыл». Тайвань гыч Шэн Сянь кугурак иза манеш: «Мемнан калыкыште тыге шотлат: ӱдырамашын шке шонымыжым ойлаш праваже уке да тудо пӧръеҥын пашашкыже шӱшкылтшаш огыл. Пӧръеҥ ӱдырамашын шонымыжым шотыш налеш гын, йолташыж-влак тыгай пӧръеҥым пагалымым чарнат». Вес пӧръеҥ-влак ӱдырамаш-влакым пагалыдымым вес семын ончыктат. Мутлан, нуно ӱдырамаш-влак нерген чапыштым волтышо мыскарам ойлат.

Мемнан пиалешна, айдеме кеч-могай калыкыште кушкеш гынат, вашталтын кертеш. Шочмо-кушмо кундемыштыда пӧръеҥ-влак шкеныштым ӱдырамаш-влак деч кӱшкырак шындат гын, теат тыге ыштышаш улыда манын, тиде огеш ончыкто (Еф. 4:22—24). Шкем вес семын кучаш Иегован примерже полша. Тиде статьяште ме кум йодышлан вашмутым налына: Ӱдырамаш-влак шотышто Иегован отношенийже могай? Иза-влаклан ӱдырамаш-влак шотышто Иегова гай шонаш да шкем кучаш мо полша? Кузе кугурак иза-влак ака-влакым пагалымаш шотышто примерым ончыктен кертыт?

ӰДЫРАМАШ-ВЛАК ШОТЫШТО ИЕГОВАН ОТНОШЕНИЙЖЕ МОГАЙ?

Иегова эн сай примерым ончыкта, могай отношений ӱдырамаш-влак деке лийшаш. Тудо чаманыше Ача да чыла шке йочаже-влакым йӧрата (Иоан. 3:16). А тудлан ӱшаныше ӱдырамаш-влакым тудо йӧратыме ӱдыржӧ-влаклан шотла. Айста ончен лектына, ӱдырамаш-влакым Иегован пагалымыже кушеч коеш.

 Тудо пӧръеҥ-влакымат, ӱдырамаш-влакымат ик семын онча. Иегова пӧръеҥ ден ӱдырамашым шке тӱсшӧ почеш ыштен (Тӱҥ. 1:27). Тудо пӧръеҥ-влаклан шукырак уш-акылым але моштымашым пуэн огыл да огеш шоно, пуйто нуно ӱдырамаш-влак деч сайрак улыт (2 Лет. 19:7). Пӧръеҥ-влакат, ӱдырамаш-влакат библийысе чыным умылен кертыт да Юмын чапле койышыж-влакым ончыктен кертыт (2 Пет. 1:1). Тыгак Иегова пӧръеҥ-влакымат, ӱдырамаш-влакымат ӱшанымашыштлан акла. Тудо чылаштланат рай мландыште курымеш илаш але каваште кугыжа да священник лияш йӧным пуэн. Раш коеш: Иегова ӱдырамаш-влакым пагала да нунын нерген удам огеш шоно.

Тудо нуным колыштеш. Иеговалан ӱдырамаш-влакын шижмашышт да тургыжланымашышт садиктак огыл. Ме палена: тудо Рахиль ден Аннан кумалмыштым колыштын да нунын йодмыштым шуктен (Тӱҥ. 30:22; 1 Сам. 1:10, 11, 19, 20). Тыгак Юмо Библийыш тыгай пӧръеҥ-влак нерген каласкалымаш-влакым пуртен, кудышт ӱдырамаш-влакын мутыштым шотыш налыныт. Мутлан, Авраам Иегован кӱштымыжым колыштын да Сарра ватыжын мутшо почеш ыштен (Тӱҥ. 21:12—14). Давид кугыжа Авигеям колышт налын. Иегова тыйым мый денем мутланен налаш колтен манын, эсогыл тудо каласен (1 Сам. 25:32—35). Эре Ачаж деч примерым налше Иисус Мария аважын мутшым колыштын да шотыш налын (Иоан. 2:3—10). Нине пример-влак ончыктат: Иегова ӱдырамаш-влакым колыштеш да тыге нуным пагалымым ончыкта.

Тудо нунылан ӱшана. Мутлан, Иегова Адам ден Евалан мландым темаш да озаланаш заданийым пуэн (Тӱҥ. 1:28). Тудо Евам марийжылан полышкалыше семын ыштен. Тыге Юмо ончыктен, мыняр чот Евам акла. Тыгак Иегова Девора ден Хулдам шке калыкшылан пророк ӱдырамаш лияш шогалтен. Нунын дене эсогыл судья ден кугыжа каҥашеныт (Суд. 4:4—9; 2 Цар. 22:14—20). Тачат Иегова ӱдырамаш-влаклан тӱрлӧ заданийым ӱшанен пуа. Мемнан акана-влак поро уверым каласкалат, пионерлан да миссионерлан служитлат. Нуно Вашлиймаш зал ден Вефиль комплекс-влакын проектыштым ыштат, нине зданий-влакым чоҥымаште да ачалымаште тыршат. Южышт Вефильыште служитлат, а весышт — торасе кусарымаш офисыште. Нине ака-влак Иегован эрыкшым шуктышо ик кугу войска семын улыт (Пс. 67:12). Чынжымак, Иегова огеш шоно, пуйто ӱдырамаш-влак тептердыме улыт да нимогай пашам ыштен огыт мошто.

ИЗА-ВЛАКЛАН ӰДЫРАМАШ-ВЛАК ШОТЫШТО ИЕГОВА ГАЙ ШОНАШ ДА ШКЕМ КУЧАШ МО ПОЛША?

Иза-влак, кузе умылен налаш: ӱдырамаш-влак шотышто мемнан отношенийна Иегован гаяк мо? Тидлан мыланна шкенан шонымаш ден ыштымашнам терген налаш кӱлеш. Тидым ышташ мыланна мо полша? Кузе врач рентген аппаратым кучылтын ужын кертеш: айдемын шӱмжӧ таза але начар — тыгак сай йолташ ден Юмын Мутшо мыланна ужаш полшат: ӱдырамаш-влак деке отношенийна уда але уке. Тиде полышым налашлан мыланна мом ыштыман?

Йолташетын шонымыжым пален нал (Прит. 18:17). Мемнан поро да уш-акылан йолташна уло гын, тудын деч йодаш лиеш: «Кузе шонет, ака-влак дене мый кузе мутланем да нунын дене шкем кузе кучем? Мый нуным пагалем манын, нуно ужыт мо? Мыланем иктаж-мом вашталташ кӱлеш мо?» Йолташ каҥашым пуа гын, тиде каҥашым кораҥдаш ит тӧчӧ, а уло вийым пыштен илышыш пурто.

Библийын полшымыж дене шкем терге. Библий — эн сай ӱзгар, кудыжо мыланна ака-влак деке отношенийнам тергаш полша (Евр. 4:12). Тушто ме тӱрлӧ пӧръеҥ нерген историйым лудын кертына. Нине пӧръеҥ-влак гыч иктышт ӱдырамаш-влак дене поро лийыныт, а весышт торжа лийыныт. Юмын Мутшым шымлыме годым шкенан ыштымынам нунын ыштымышт дене таҥастараш лиеш. Тыгак Библийыште уло возымым шотыш налаш кӱлеш. Тунам ик почеламут гыч веле ӱдырамаш-влак шотышто йоҥылыш иктешлымашым она ыште. Мутлан, южо кусарымаште 1 Петрын 3:7 почеламутышто ӱдырамашым «нечке ате» манме b.  Но тиде огеш ончыкто, пуйто пӧръеҥ ӱдырамаш дене таҥастарымаште ушанрак да тудын шукырак моштымашыже уло. Петрын мутшым Галат-влаклан 3:26—29 почеламутлаште возымо дене таҥастарыза. Тушто возымо дене келшышын, Иисус дене пырля каваште вуйлаташлан Иегова пӧръеҥ-влакымат, ӱдырамаш-влакымат ойырен налеш. Юмын Мутшым шымлена да сай йолташ дене каҥашена гын, тунам акана-влакым пагалаш тунемына.

КУЗЕ КУГУРАК ИЗА-ВЛАК АКА-ВЛАКЫМ ПАГАЛЫМАШ ШОТЫШТО ПРИМЕРЫМ ОНЧЫКТЕН КЕРТЫТ?

Погынымаште йӧратыше кугурак иза-влакын примерыштым ончен, иза-влак ака-влакым пагалаш тунемын кертыт. Кугурак иза-влак ака-влакым пагалымым кузе ончыктат? Икмыняр примерым ончен лектына.

Нуно ака-влакым моктат. Кугурак иза-влаклан сай примерым апостол Павел ончыктен. Римлян-влаклан колтымо серышыште тудо икмыняр акам мокта (Рим. 16:12). Шоналтыза веле, мыняр чот нине христианке-влак куаненыт, кунам тиде серыш уло погынымаш ончылно лудмо лийын. Тидын семынак кугурак иза-влак ака-влакым нунын сылне койышыштлан да Иегова верч тыршымыштлан уло кумылын моктат. Тыге ака-влак шижыт, мыняр чот нуным пагалат да аклат. Южгунам кугурак изан шке жапыштыже каласыме поро шомакше акалан умбакыжат Иеговалан ӱшанлын служитлаш полшен кертеш (Прит. 15:23).

Ака-влакым моктымо годым кугурак иза-влак тидым уло шӱм дене ыштат да иктаж-могай пашалан але койышлан моктат. Молан? Теве мом Дже́ссика ойла: «Шӱмлан чот ласка, кунам иза-влак тыланет молодец манын ойлат. Но эше сайрак, кунам нуно иктаж-могай пашалан моктат, мутлан, кузе ака йочаже-влакым вашлиймаште шып шинчаш туныкта але шымлышылан Вашлиймаш залыш толаш полша». Кунам иза-влак иктаж-могай конкретный пашалан  але койышлан моктат, ака-влак шижыт, мыняр чот погынымаш нуным акла да кӱлешанлан шотла.

Нуно ака-влакым колыштыт. Ӱҥышӧ кугурак иза-влак умылат: сай идей-влак нунын веле огыл, весе-влакынат лийын кертыт. Сандене нуно ака-влакым шке шонымыштым ойлаш таратат, а варажым нуным тӱткын колыштыт. Тыге ыштен, кугурак иза-влак ака-влакым кумылаҥдат да шкат шукылан тунемыт. Вефильыште служышо Гера́рдо кугурак иза ойла: «Ака-влак дене каҥашымаш заданием-влакым сайрак шукташ полша. Иза-влак дене таҥастарымаште ака-влакын иктаж-могай пашаште чӱчкыдын шукырак опытышт уло». Ака-влак гыч шукышт пионер семын служитлат, сандене нуно шке кундемыштышт илыше еҥ-влакым сайын палат. Бра́йан лӱман кугурак иза манеш: «Мемнан акана-влакын шуко сылне койыш ден моштымашышт уло, кудышт организацийлан чотак кӱлыт. Сандене ака-влак дене каҥашыза да нуным аклыза!»

Кунам ака-влак иктаж-мом темлат, уш-акылан кугурак иза-влак темлымыштым кораҥдаш огыт вашке. Молан? Э́двард лӱман кугурак иза ойла: «Акан шонымыжо да опытшо изалан ситуацийым тӱрлӧ могыр гыч ончалаш да вес еҥ-влакын шижмашыштым шотыш налаш полшен кертеш» (Прит. 1:5). Акан темлымыжым кугурак иза кучылтын огеш керт гынат, тудо шонымашым ойлымылан акам мокта.

Нуно ака-влакым туныктат. Уш-акылан кугурак иза-влак ака-влакым туныктат. Мутлан, нуно умылтарат, кузе таныклымашлан кӱчык вашлиймашым эртараш. Тидлан кӧра ака-влак палат, мом ышташ, кунам тыгай вашлиймаште тынеш пурышо иза-влак огыт лий. Тыгак кугурак иза-влак ака-влакым тӱрлӧ ӱзгарым але техникым кучылташ туныктат. Тыге ака-влак организацийнан зданий-влакым чоҥаш да ончаш полшен кертыт. Вефильыште виктарымаш пашам шуктышо иза-влак ака-влакым тӱрлӧ пашам ышташ туныктат. Тиде техобслуживаний, снабжений, бухгалтерий, программирований да моло паша дене кылдалтын кертеш. Ака-влакым туныктен, кугурак иза-влак ончыктат: нунын шонымаште, ака-влак тунемаш моштышо да ӱшанле улыт.

Христианке-влак гыч шукышт пален налме шинчымашыштым весе-влаклан полшашлан кучылтыт. Мутлан, чоҥымаш пашам шукташ тунемше ака-влак пӱртӱс вий ден лийше эҥгек деч вара пӧрт-влакым ачалаш полшат. А весышт шуко еҥан верлаште таныклаш тунемыныт. Ындыжым нуно вес ака-влакым тиде служитлымашлан туныктат. Ака-влак нуным туныктышо кугурак иза-влак нерген мом ойлат? Теве мом Дже́ннифер манеш: «Шарнем, мый ик Вашлиймаш залым чоҥымаште тыршенам. Тиде проектлан ответственный иза мыйым туныкташлан жапым чаманен огыл. Тудо мыйым ыштыме пашам верч эре моктен. Тудын дене пырля пашам ышташ мыланем келшен. Мыйым аклат да мыланем ӱшанат манын, мый шижынам».

ӰДЫРАМАШ-ВЛАК ШОТЫШТО ИЕГОВА ГАЙ ШОНАШ ДА ШКЕМ КУЧАШ МОЛАН КӰЛЕШ?

Иегова семын ме шергакан акана-влакым йӧратена. Нуно мемнан ешна улыт (1 Тим. 5:1, 2). Ме нуным аклена, да мыланна кугу куан нунын дене пырля Юмылан служитлаш. А кунам нуно йӧратымынам да полшымынам ужыт, ме пиалан улына. Ване́сса ойла: «Иеговалан кугу тау, вет мый тудын организацийыштыже улам. Тушто тынар шуко сай иза уло, кудышт тыланет эре поро мутым ойлаш ямде улыт». А Тайвань гыч ик ака манеш: «Иегова да тудын организацийже ӱдырамаш-влакым чот йӧратат да шижмашыштым шотыш налыт. Тиде чот куандара да ӱшанымашемым пеҥгыдемда. Сандене Юмын калыкыште лияш йӧным мый эше чотрак аклем».

Иза-влак, те ӱдырамаш-влак шотышто Иегова гай шонаш да шкем кучаш тыршеда. Тендан тыршымыдам Юмо ужеш да тендан дене чот кугешна! (Прит. 27:11). Шотландий гыч Бе́нджамин кугурак иза ойла: «Чӱчкыдын тиде тӱняште ӱдырамаш-влакым огыт пагале, сандене, Вашлиймаш залыш толын, нуно пагалымым шижышт манын, кумылна уло». Айста Иегова семын мемнан шергакан акана-влакым йӧратена да пагалена, вет нуно тидлан йӧрышӧ улыт (Рим. 12:10).