Иисус тунемшыж-влаклан каласен: «Те тӱня деч огыдал» (Иоаннын 15:19). Тиде теве мом ончыкта: христиан-влак нейтралитетым аралышаш улыт. Вес семынже ме политике да сар шотышто нигӧн могырышкыжо она шогал. Мутат уке, нейтралитетым аралаш южгунам йӧсӧ. Тыгай христианский позицийлан кӧра ме еҥ-влаклан ужмышудымо лийын кертына да нуно мемнам мыскылен кертыт. Кузе нейтралитетым аралаш да Иегова Юмылан тӱрыснек ӱшанле кодаш?

1. Вуйлатыше-влак шотышто чын христиан-влак мом шонат?

Христиан-влак вуйлатыше-влакым пагалат. Ме Иисусын туныктымыжо почеш ыштена да «кесарьлан кесарьыным» пуэна. Вес семынже, илыме элнан законжо-влакым колыштына (Маркын 12:17). Мутлан, ме чыла йозакым тӱлена. Библийыште возымо дене келшышын, вуйлатыше-влаклан властьым Иегова пуэн, сандене нуно вуйлатат (Римлян-влаклан 13:1). Тышечын ужаш лиеш: Юмын властьше дене таҥастарымаште нунын властьышт шагалрак. Юмо да кавасе Кугыжанышыже гына чыла тӱнямбалысе проблемым кораҥден кертыт.

2. Юмын правительствын могырыштыжо шогымынам кузе ончыктен кертына?

Иисус семынак ме политикыш она пуро. Кунам еҥ-влак Иисусын ыштыме чудыжо-влакым ужыныт, нуно тудым кугыжаштлан шогалтынешт ыле. Но Иисус нунылан тидым ышташ пуэн огыл (Иоаннын 6:15). Молан? Вара тудо умылтарен: «Мыйын Кугыжанышем тиде тӱня деч огыл» (Иоаннын 18:36). Ме Христосын тунемшыже улына, сандене сарыш она кошт. (Михей 4:3 лудын лекса.) Тыгак ме национальный символ-влакым, мутлан флагым, пагалена, но нуным святойлан она шотло (1 Иоаннын 5:21). Ме нимогай политический партийын але кандидатын могырышкыжо она шогал. Нунын ваштарешат огынал. Тыге ме Юмын правительствыжлан, Кугыжанышыжлан, тӱрыснек ӱшанле улмынам ончыктена.

 КЕЛГЫНРАК ШЫМЛЕН НАЛЗА

3. Чын христиан-влак нейтралитетым аралат

Кузе тидым ышташ, Иисус ден икымше христиан-влак мыланна примерым ончыктеныт. Римлян-влаклан 13:1, 5—7 да 1 Петрын 2:13, 14 лудын лекса. Вара ВИДЕОРОЛИКЫМ ончалза да вашмутым пуыза:

• Молан мыланна вуйлатыше-влакым пагалаш кӱлеш?

• Вуйлатыше-влакым колыштмынам кузе ончыктен кертына?

Сар годым южо эл-влак ойлат, пуйто нигӧн могырыштышт огыт шого, но пашашт дене весым ончыктат. Нуно чынжымак нейтралитетым ончыктат мо? Иоаннын 17:16 лудын лекса. Вара ВИДЕОРОЛИКЫМ ончалза да вашмутым пуыза:

• Кузе чынжымак нейтралитетым аралаш?

Вуйлатыше-влак Юмын законжым пудырташ таратат гын, мом ышташ? Апост. пашашт 5:28, 29 лудын лекса. Вара ВИДЕОРОЛИКЫМ ончалза да вашмутым пуыза:

• Правительствын иктаж-могай законжо Юмын законжылан тореш улеш гын, тунам ме кӧм колыштшаш улына?

• Христиан-влак могай ситуацийыште вуйлатыше-влакым колышташ огыт тӱҥал?

 4. Нейтралитетым шонымаш да паша дене ончыктыза

1 Иоаннын 5:21 лудын лекса. Вара ВИДЕОРОЛИКЫМ ончалза да вашмутым пуыза:

• Молан Айенге политический партийыш пураш да нациоаналистический церемонийыште, мутлан флаглан чапым пуымаште, участвоватлаш келшен огыл?

• Кузе шонеда, тудо чын ыштен мо?

Могай эше ситуацийыште ме нейтралитетым аралышаш улына? ВИДЕОРОЛИКЫМ ончалза да вашмутым пуыза:

• Тӱрлӧ эл гыч спортсмен-влакын таҥасымашыштым ончен, молан мыланна нейтралитетым аралыман?

• Политик-влакын решенийышт лач мыланна эҥгекым але пайдам кондат гын, тунам нейтралитетым аралена манын, кузе ончыкташ?

• Телевизор, радио але интернет гыч увер-влак да еҥ-влакын ойлымышт нейтралитетым аралаш кузе мешаен кертыт?

 ТӰҤ ШОНЫМАШ

Христиан-влак нейтралитетым шонымаш, мут да паша дене ончыктат.

Ушештарымаш

• Вуйлатыше-влакым пагалымым кузе ончыктен кертына?

• Молан ме политике шотышто нейтралитетым аралена?

• Могай ситуацийыште нейтралитетым аралаш йӧсӧ лийын кертеш?