Секоја учебна година, вакви сценарија се повторуваат во илјадници училници низ целиот свет. Што треба да прават Питер и учениците како него? Зарем не се согласуваш дека треба самите да истражат и да донесат информирана одлука? Тие треба да ги испитаат доказите за еволуција и доказите за создавање, и потоа самите да одлучат во што ќе веруваат.

Всушност, Библијата нѐ предупредува да не веруваме слепо во секое учење. Еден библиски писател напишал: „Лековерниот верува на секој збор, а паметниот внимава на своите чекори“ (Изреки 14:15). Библијата нѐ поттикнува да го користиме „својот разум“ и да се увериме во работите за кои сме поучувани (Римјаните 12:1, 2).

Оваа брошура не е направена за да ги поддржи напорите на религиозни групи кои сакаат децата на училиште да учат и за создавање. Целта на брошурата е да се испитаат тврдењата на оние што поучуваат дека животот настанал случајно и дека библискиот извештај за создавањето е мит.

Ќе се концентрираме на клетката бидејќи таа е основна градбена единица на сите живи организми. Ќе имаш можност да разгледаш некои восхитувачки факти за градбата на клетките. А ќе можеш и да ги анализираш претпоставките што ја поддржуваат теоријата на еволуција.

Порано или подоцна, секој од нас ќе се соочи со прашањето: „Дали животот бил создаден или настанал по пат на еволуција?“ Веројатно, веќе сериозно си размислувал за ова прашање. Во оваа брошура ќе се зборува само за некои од доказите кои им помогнале на многумина да се уверат дека животот бил создаден.