ЗОШТО Е ВАЖНА ПОЧИТТА КОН СЕМЕЈСТВОТО

• Во една книга со совети за успешен брак е наведено дека кога сопружниците имаат заемна почит, тие си покажуваат наклоност еден кон друг „не само во големи работи туку и во мали работи од ден на ден“ (The Seven Principles for Making Marriage Work).

• Истражувањата покажуваат дека децата кои ќе научат да ги почитуваат другите имаат поголема самодоверба, подобри односи со своите родители и помалку страдаат од психолошки проблеми.

 ШТО МОЖЕШ ДА ПРАВИШ

Направи план заедно со твоето семејство. Прво, обидете се да имате јасна слика за тоа што е „почит“. Второ, запишете какво однесување се очекува од секој во семејството, а какво однесување да се избегнува. Трето, разговарајте за планот како семејство за да можете и вие и вашите деца да имате заеднички темел на кој ќе градите.

Биди добар пример. Размисли за твоето однесување. Дали ги критикуваш членовите на семејството за нивните грешки, го исмејуваш нивното мислење или ги игнорираш кога зборуваат со тебе или ги прекинуваш?

Предлог: Труди се да гледаш на почитта како на нешто што им го должиш на твојот сопружник и децата, а не нешто што тие треба да го заслужат.

Покажувај почит дури и кога имаш поинакво мислење. Кога разговараш со некој член на твоето семејство, немој да користиш изрази како што се „ти секогаш“ или „ти никогаш“. Таквите остри забелешки го напаѓаат неговиот карактер и можат да претворат едно мало несогласување во голема расправија.