ВЕРОЈАТНО пред околу 800 години, Маорите поминале илјадници километри преку океан и се населиле на Нов Зеланд. На нивно изненадување, земјата која ја пронашле воопшто не наликувала на тропските полинезиски острови кои ги оставиле зад себе. Таа изобилувала со планини, глечери, термални извори и снежни предели. Околу пет века подоцна, пристигнала нова група доселеници, патувајќи дури од далечната Европа. Денес, повеќето жители на Нов Зеланд ја почитуваат и англосаксонската и полинезиската традиција. Речиси 90 отсто од населението живее во градовите. Градот Велингтон се издвојува по тоа што е најјужниот главен град во светот.

Со својата шаренолика и фасцинантна природна убавина, не е за изненадување што Нов Зеланд, иако  се наоѓа релативно далеку од останатиот свет, секоја година угостува и до три милиони туристи.

Нов Зеланд може да се пофали со прилично разновиден жив свет, со најголем број видови нелетачки птици во светот. Оваа земја е дом и на туатарата, вид рептил сличен на гуштер кој може да живее и до сто години! Од сите цицачи, единствените „староседелци“ се неколку видови лилјаци и некои големи морски цицачи, како што се китовите и делфините.

Во Нов Зеланд, Јеховините сведоци речиси 120 години ги поучуваат другите за Библијата. Тоа го прават на најмалку 19 јазици, меѓу кои се полинезиските јазици ниуе, раротонга, самојски и тонгаски.