ആവർത്തനം 9:1-29
9 “ഇസ്രായേലേ, കേൾക്കുക. ഇന്നു നിങ്ങൾ യോർദാൻ കടന്നുചെന്ന്‌+ നിങ്ങളെക്കാൾ വലുപ്പവും ശക്തിയും ഉള്ള ജനതകളെ ഓടിച്ചുകളയും;+ ആകാശത്തോളം എത്തുന്ന കോട്ടകളുള്ള മഹാനഗരങ്ങൾ നിങ്ങൾ പിടിച്ചടക്കും.+
2 ഉയരവും ശക്തിയും ഉള്ള അവിടത്തെ ജനങ്ങളെ, അനാക്യവംശജരെ,+ നിങ്ങൾ തോൽപ്പിക്കും. അവരെ നിങ്ങൾക്ക്‌ അറിയാമല്ലോ. ‘അനാക്കിന്റെ വംശജരോട്‌ എതിർത്തുനിൽക്കാൻ ആർക്കു കഴിയും’ എന്ന ചൊല്ലും നിങ്ങൾ കേട്ടിട്ടുണ്ടല്ലോ.
3 അതുകൊണ്ട്‌ ഇന്നു നിങ്ങൾ ഇത്‌ അറിഞ്ഞുകൊള്ളുക: നിങ്ങളുടെ ദൈവമായ യഹോവ നിങ്ങൾക്കു മുമ്പേ അവിടേക്കു പോകും.+ ദൈവം ദഹിപ്പിക്കുന്ന അഗ്നിയാണ്‌,+ ദൈവം അവരെ നിശ്ശേഷം നശിപ്പിക്കും. നിങ്ങളുടെ കൺമുന്നിൽ അവരെ കീഴടക്കും. അങ്ങനെ യഹോവ നിങ്ങളോടു വാഗ്‌ദാനം ചെയ്‌തതുപോലെ നിങ്ങൾ അവരെ പെട്ടെന്നു തുരത്തിയോടിക്കുകയും* നശിപ്പിക്കുകയും ചെയ്യും.+
4 “നിങ്ങളുടെ ദൈവമായ യഹോവ അവരെ നിങ്ങളുടെ മുന്നിൽനിന്ന്‌ ഓടിച്ചുകളയുമ്പോൾ, ‘ഞാൻ നീതിയുള്ളവനായതുകൊണ്ടാണ്‌ ഈ ദേശം കൈവശമാക്കാൻ യഹോവ എന്നെ കൊണ്ടുവന്നത്‌’+ എന്നു നീ ഹൃദയത്തിൽ പറയരുത്‌. ഈ ജനതകളുടെ ദുഷ്ടത കാരണമാണ്‌+ യഹോവ അവരെ നിങ്ങളുടെ മുന്നിൽനിന്ന്‌ ഓടിച്ചുകളയുന്നത്‌.
5 നിങ്ങൾക്കു നീതിയോ ഹൃദയശുദ്ധിയോ ഉള്ളതുകൊണ്ടല്ല നിങ്ങൾ അവരുടെ ദേശം അവകാശമാക്കാൻപോകുന്നത്‌. ഈ ജനതകളുടെ ദുഷ്ടത കാരണവും നിങ്ങളുടെ പൂർവികരായ അബ്രാഹാം,+ യിസ്‌ഹാക്ക്‌,+ യാക്കോബ്‌+ എന്നിവരോട്‌ യഹോവ സത്യം ചെയ്‌ത വാക്കു പാലിക്കുന്നതിനുവേണ്ടിയും ആണ്‌ നിങ്ങളുടെ ദൈവമായ യഹോവ അവരെ നിങ്ങളുടെ മുന്നിൽനിന്ന്‌ ഓടിച്ചുകളയുന്നത്‌.+
6 അതുകൊണ്ട്‌, നിങ്ങൾ നീതിയുള്ളവരായതുകൊണ്ടല്ല നിങ്ങളുടെ ദൈവമായ യഹോവ ഈ നല്ല ദേശം നിങ്ങൾക്ക്‌ അവകാശമായി തരുന്നതെന്ന്‌ അറിഞ്ഞുകൊള്ളുക. നിങ്ങൾ ദുശ്ശാഠ്യമുള്ള ഒരു ജനമാണല്ലോ.+
7 “വിജനഭൂമിയിൽവെച്ച്‌ നിങ്ങൾ നിങ്ങളുടെ ദൈവമായ യഹോവയെ പ്രകോപിപ്പിച്ചത്‌ എങ്ങനെയാണെന്ന്‌ ഓർക്കുക, അക്കാര്യം നിങ്ങൾ ഒരിക്കലും മറന്നുകളയരുത്‌.+ ഈജിപ്‌ത്‌ ദേശത്തുനിന്ന്‌ പുറപ്പെട്ടതുമുതൽ ഇവിടെ എത്തുംവരെ നിങ്ങൾ യഹോവയെ ധിക്കരിച്ചു.+
8 ഹോരേബിൽവെച്ചുപോലും യഹോവയെ കോപിപ്പിച്ചു. നിങ്ങളെ നശിപ്പിച്ചുകളയാൻ തുനിയുന്ന അളവോളം യഹോവയുടെ കോപം ആളിക്കത്തി.+
9 യഹോവ നിങ്ങളുമായി ചെയ്‌ത ഉടമ്പടിയുടെ കൽപ്പലകകൾ+ സ്വീകരിക്കാൻ മലയിലേക്കു കയറിച്ചെന്ന ഞാൻ ആഹാരം കഴിക്കുകയോ വെള്ളം കുടിക്കുകയോ ചെയ്യാതെ 40 രാവും 40 പകലും അവിടെ ചെലവഴിച്ചു.+
10 പിന്നെ, സ്വന്തം കൈവിരൽകൊണ്ട്‌ എഴുതിയ രണ്ടു കൽപ്പലകകൾ യഹോവ എനിക്കു തന്നു. നിങ്ങൾ കൂടിവന്ന ദിവസം യഹോവ മലയിൽവെച്ച്‌ തീയുടെ മധ്യേനിന്ന്‌ നിങ്ങളോടു പറഞ്ഞ വചനങ്ങളെല്ലാം അവയിലുണ്ടായിരുന്നു.+
11 യഹോവ ആ രണ്ടു കൽപ്പലകകൾ, ഉടമ്പടിയുടെ പലകകൾ, 40 രാവും 40 പകലും കഴിഞ്ഞപ്പോൾ എനിക്കു തന്നു.
12 യഹോവ എന്നോടു പറഞ്ഞു: ‘എഴുന്നേറ്റ്‌ വേഗം താഴേക്കു ചെല്ലുക. നീ ഈജിപ്‌തിൽനിന്ന്‌ കൊണ്ടുവന്ന നിന്റെ ജനം വഷളത്തം കാണിച്ചിരിക്കുന്നു.+ ഞാൻ അവരോടു കല്‌പിച്ച വഴിയിൽനിന്ന്‌ അവർ പെട്ടെന്നു മാറിപ്പോയി. അവർ തങ്ങൾക്കുവേണ്ടി ഒരു ലോഹവിഗ്രഹം* ഉണ്ടാക്കിയിരിക്കുന്നു.’+
13 തുടർന്ന്‌ യഹോവ എന്നോട്‌: ‘ഈ ജനം ദുശ്ശാഠ്യമുള്ള ഒരു ജനമാണെന്ന്‌ എനിക്കു മനസ്സിലായി.+
14 നീ എന്നെ തടയരുത്‌, ഞാൻ അവരെ തുടച്ചുനീക്കുകയും അവരുടെ പേര്‌ ആകാശത്തിൻകീഴിൽനിന്ന്‌ മായ്‌ച്ചുകളയുകയും ചെയ്യും. എന്നാൽ നിന്നെ ഞാൻ എണ്ണത്തിലും ശക്തിയിലും അവരെക്കാൾ മികച്ച ഒരു ജനതയാക്കാം.’+
15 “ഞാൻ അപ്പോൾ ഉടമ്പടിയുടെ രണ്ടു കൽപ്പലകകളും കൈകളിലെടുത്ത്‌ മലയിറങ്ങി.+ ആ സമയം മല കത്തിജ്വലിച്ചുകൊണ്ടിരിക്കുകയായിരുന്നു.+
16 ഞാൻ നോക്കിയപ്പോൾ നിങ്ങൾ നിങ്ങളുടെ ദൈവമായ യഹോവയോടു പാപം ചെയ്‌തിരിക്കുന്നതായി കണ്ടു. നിങ്ങൾ ലോഹംകൊണ്ട്‌* ഒരു കാളക്കുട്ടിയെ ഉണ്ടാക്കി, യഹോവ നിങ്ങളോടു കല്‌പിച്ച വഴിയിൽനിന്ന്‌ പെട്ടെന്നു മാറിപ്പോയി.+
17 അതിനാൽ ഞാൻ ആ കൽപ്പലകകൾ രണ്ടും എന്റെ കൈകളിൽ എടുത്ത്‌ നിങ്ങളുടെ കൺമുന്നിൽവെച്ച്‌ എറിഞ്ഞ്‌ തകർത്തു.+
18 പിന്നെ ഞാൻ ആദ്യത്തെപ്പോലെ 40 രാവും 40 പകലും യഹോവയുടെ മുമ്പാകെ സാഷ്ടാംഗം വീണ്‌ നമസ്‌കരിച്ചു. യഹോവയുടെ മുമ്പാകെ തിന്മ പ്രവർത്തിക്കുകയും ദൈവത്തെ കോപിപ്പിക്കുകയും ചെയ്‌തുകൊണ്ട്‌ നിങ്ങൾ ചെയ്‌ത പാപങ്ങളെല്ലാം കാരണം ഞാൻ ആഹാരം കഴിക്കുകയോ വെള്ളം കുടിക്കുകയോ ചെയ്‌തില്ല.+
19 നിങ്ങളെ നശിപ്പിച്ചുകളയാൻ തുനിയുന്ന അളവോളം യഹോവയുടെ കോപം ആളിക്കത്തിയതിനാൽ+ ഞാൻ ഭയന്നുപോയിരുന്നു. എന്നാൽ ആ പ്രാവശ്യവും യഹോവ എന്റെ അപേക്ഷ കേട്ടു.+
20 “അഹരോന്‌ എതിരെയും യഹോവയുടെ കോപം ആളിക്കത്തി; അഹരോനെയും നശിപ്പിച്ചുകളയാൻ ദൈവം ഒരുങ്ങി.+ എന്നാൽ ആ സമയത്ത്‌ ഞാൻ അഹരോനുവേണ്ടിയും ഉള്ളുരുകി പ്രാർഥിച്ചു.
21 പിന്നെ ഞാൻ നിങ്ങൾ ഉണ്ടാക്കിയ ആ പാപവസ്‌തുവിനെ, ആ കാളക്കുട്ടിയെ,+ എടുത്ത്‌ തീയിലിട്ട്‌ കത്തിച്ചു. എന്നിട്ട്‌ ഞാൻ അതു തകർത്തുടച്ച്‌ നേർത്ത പൊടിയാക്കി, മലയിൽനിന്ന്‌ ഒഴുകുന്ന അരുവിയിൽ ഒഴുക്കി.+
22 “പിന്നീട്‌, തബേരയിലും+ മസ്സയിലും+ കിബ്രോത്ത്‌-ഹത്താവയിലും+ വെച്ച്‌ നിങ്ങൾ യഹോവയെ കോപിപ്പിച്ചു.
23 യഹോവ കാദേശ്‌-ബർന്നേയയിൽനിന്ന്‌+ നിങ്ങളെ അയച്ച്‌, ‘പോയി ഞാൻ നിങ്ങൾക്കു തരുന്ന ദേശം കൈവശമാക്കിക്കൊള്ളുക’ എന്നു പറഞ്ഞപ്പോൾ വീണ്ടും നിങ്ങൾ നിങ്ങളുടെ ദൈവമായ യഹോവയുടെ ആജ്ഞ ധിക്കരിച്ചു.+ നിങ്ങൾ ദൈവത്തിൽ വിശ്വാസമർപ്പിക്കുകയോ+ ദൈവത്തെ അനുസരിക്കുകയോ ചെയ്‌തില്ല.
24 എനിക്കു നിങ്ങളെ അറിയാവുന്ന കാലംമുതൽ നിങ്ങൾ യഹോവയെ ധിക്കരിച്ചുകൊണ്ടിരിക്കുന്നു.
25 “അതിനാൽ ഞാൻ 40 രാവും 40 പകലും+ യഹോവയുടെ മുമ്പാകെ സാഷ്ടാംഗം വീണ്‌ നമസ്‌കരിച്ചു. നിങ്ങളെ നശിപ്പിച്ചുകളയും എന്ന്‌ യഹോവ പറഞ്ഞതുകൊണ്ടാണു ഞാൻ അങ്ങനെ ചെയ്‌തത്‌.
26 ഞാൻ യഹോവയോട്‌ ഇങ്ങനെ ഉള്ളുരുകി പ്രാർഥിച്ചു: ‘പരമാധികാരിയായ യഹോവേ, അങ്ങയുടെ ജനത്തെ നശിപ്പിച്ചുകളയരുതേ. അവർ അങ്ങയുടെ സ്വകാര്യസ്വത്താണല്ലോ,*+ അങ്ങ്‌ അങ്ങയുടെ മാഹാത്മ്യത്താൽ മോചിപ്പിക്കുകയും അങ്ങയുടെ ബലമുള്ള കൈയാൽ ഈജിപ്‌തിൽനിന്ന്‌ വിടുവിക്കുകയും ചെയ്‌തവർ!+
27 അങ്ങയുടെ ദാസരായ അബ്രാഹാമിനെയും യിസ്‌ഹാക്കിനെയും യാക്കോബിനെയും ഓർക്കേണമേ.+ ഈ ജനത്തിന്റെ ശാഠ്യവും ദുഷ്ടതയും പാപവും അങ്ങ്‌ കാര്യമാക്കരുതേ.+
28 അല്ലാത്തപക്ഷം, അങ്ങ്‌ ഞങ്ങളെ വിടുവിച്ച്‌ കൊണ്ടുവന്ന ആ ദേശത്തെ ജനങ്ങൾ, “താൻ വാഗ്‌ദാനം ചെയ്‌ത ദേശത്ത്‌ അവരെ എത്തിക്കാൻ യഹോവയ്‌ക്കു കഴിഞ്ഞില്ല; ആ ദൈവം അവരെ വെറുത്തതുകൊണ്ടാണ്‌ അവരെ കൊല്ലാൻവേണ്ടി വിജനഭൂമിയിലേക്കു കൊണ്ടുപോയത്‌” എന്നു പറയും.+
29 എന്നാൽ, അവർ അങ്ങയുടെ ജനവും സ്വകാര്യസ്വത്തും ആണല്ലോ;+ അങ്ങ്‌ അങ്ങയുടെ മഹാശക്തിയാലും നീട്ടിയ കരത്താലും വിടുവിച്ച്‌ കൊണ്ടുവന്നവർ!’+
അടിക്കുറിപ്പുകള്‍
^ അഥവാ “കുടിയിറക്കുകയും.”
^ അഥവാ “ലോഹം വാർത്തുണ്ടാക്കിയ പ്രതിമ.”
^ അഥവാ “വാർത്ത്‌.”
^ അഥവാ “അവകാശമാണല്ലോ.”