1. സ്‌നേ​ഹ​ത്തി​ന്റെ ഏറ്റവും ഉന്നതമായ രൂപം ഏതാണ്‌, അങ്ങനെ പറയു​ന്നത്‌ എന്തു​കൊണ്ട്‌? (ലേഖനാ​രം​ഭ​ത്തി​ലെ ചിത്രം കാണുക.)

 ശരിയായ തത്ത്വങ്ങളെ അടിസ്ഥാ​ന​മാ​ക്കി​യുള്ള സ്‌നേഹം (അഗാപെ) യഹോ​വ​യിൽനി​ന്നുള്ള ഒരു സമ്മാന​മാണ്‌. യഹോ​വ​യാണ്‌ അതിന്റെ ഉറവ്‌. (1 യോഹ. 4:7) സ്‌നേ​ഹ​ത്തി​ന്റെ ഏറ്റവും ഉന്നതമായ രൂപമാണ്‌ അഗാപെ. അതിൽ വാത്സല്യ​വും അടുപ്പ​വും ഒക്കെ ഉൾപ്പെ​ടു​ന്നു​ണ്ടെ​ങ്കി​ലും മറ്റുള്ള​വ​രു​ടെ നന്മയെ മുന്നിൽക്കണ്ട്‌ ചെയ്യുന്ന നിസ്വാർഥ​മായ പ്രവൃ​ത്തി​ക​ളാണ്‌ അഗാ​പെ​യു​ടെ പ്രത്യേ​കത. ഒരു പുസ്‌തകം പറയു​ന്ന​ത​നു​സ​രിച്ച്‌, അഗാപെ എന്ന സ്‌നേ​ഹത്തെ “അതു പ്രചോ​ദി​പ്പി​ക്കുന്ന പ്രവൃ​ത്തി​ക​ളിൽനി​ന്നേ അറിയാൻ കഴിയൂ.” നമ്മൾ നിസ്വാർഥ​സ്‌നേഹം കാണി​ക്കു​മ്പോ​ഴും നമ്മളോട്‌ അങ്ങനെ ആരെങ്കി​ലും ഇടപെ​ടു​മ്പോ​ഴും നമ്മുടെ ജീവി​ത​ത്തിന്‌ ഒരു അർഥമു​ണ്ടാ​കും, നമ്മൾ കൂടുതൽ സന്തോ​ഷ​മു​ള്ള​വ​രാ​കും.

2, 3. യഹോവ മനുഷ്യ​രോ​ടു നിസ്വാർഥ​സ്‌നേഹം കാണി​ച്ചത്‌ ഏതെല്ലാം വിധങ്ങ​ളിൽ?

² ആദാമി​നെ​യും ഹവ്വയെ​യും സൃഷ്ടി​ക്കു​ന്ന​തി​നും മുമ്പു​തന്നെ യഹോവ മനുഷ്യ​രോ​ടുള്ള സ്‌നേഹം കാണിച്ചു. മനുഷ്യർക്കുള്ള നിത്യ​ഭ​വ​ന​മാ​യി യഹോവ ഭൂമിയെ സൃഷ്ടിച്ചു. അവർ എങ്ങനെ​യെ​ങ്കി​ലും ജീവി​ച്ചു​പോ​കു​ക​യെന്ന ഉദ്ദേശ്യ​ത്തി​ലല്ല, പിന്നെ​യോ ജീവിതം പൂർണ​മാ​യി ആസ്വദി​ക്കാൻ കഴിയുന്ന വിധത്തി​ലാണ്‌ യഹോവ ഭൂമിയെ ഒരുക്കി​യത്‌. സ്വന്തം നേട്ടത്തി​നാ​ണോ യഹോവ ഇതൊക്കെ ചെയ്‌തത്‌? അല്ല, നമ്മുടെ സന്തോഷം മാത്ര​മാ​യി​രു​ന്നു യഹോ​വ​യു​ടെ മനസ്സിൽ. കൂടാതെ, അവർക്കു​വേണ്ടി ഒരുക്കിയ പറുദീ​സ​യിൽ എന്നും ജീവി​ക്കാ​നുള്ള പ്രത്യാശ കൊടു​ത്തു​കൊ​ണ്ടും യഹോവ ഭൂമി​യി​ലെ തന്റെ മക്കളോ​ടു നിസ്വാർഥ​സ്‌നേഹം കാണിച്ചു.

 ³ ആദാമും ഹവ്വയും ധിക്കാരം കാണി​ച്ച​ശേഷം യഹോവ മനുഷ്യ​രോ​ടുള്ള നിസ്വാർഥ​സ്‌നേഹം ഏറ്റവും ശ്രേഷ്‌ഠ​മായ വിധത്തിൽ പ്രകട​മാ​ക്കി. ആ മത്സരി​ക​ളു​ടെ ജനിക്കാ​നി​രി​ക്കുന്ന സന്തതി​പ​ര​മ്പ​ര​കളെ മോച​ന​വില കൊടുത്ത്‌ രക്ഷിക്കാ​നാ​യി യഹോവ ക്രമീ​ക​ര​ണങ്ങൾ ചെയ്‌തു. അവരിൽ ചിലർ തന്റെ സ്‌നേ​ഹ​ത്തോട്‌ അനുകൂ​ല​മാ​യി പ്രതി​ക​രി​ക്കു​മെന്ന്‌ യഹോ​വ​യ്‌ക്ക്‌ ഉറപ്പാ​യി​രു​ന്നു. (ഉൽപ. 3:15; 1 യോഹ. 4:10) വാസ്‌ത​വ​ത്തിൽ, മോച​ന​വി​ല​യെ​ക്കു​റി​ച്ചുള്ള വാഗ്‌ദാ​നം കൊടു​ത്ത​പ്പോൾമു​തൽ ആ ബലി അർപ്പി​ച്ച​താ​യി യഹോവ കണക്കാക്കി. പിന്നീട്‌ ഏകദേശം 4,000 വർഷങ്ങൾക്കു ശേഷം തനിക്കു​തന്നെ വലിയ നഷ്ടം വരുത്തി​വെ​ച്ചു​കൊണ്ട്‌ മനുഷ്യ​വർഗ​മാ​കുന്ന ലോക​ത്തി​നു​വേണ്ടി തന്റെ ഏകജാ​ത​മ​കനെ ബലിയാ​യി നൽകി. (യോഹ. 3:16) യഹോ​വ​യു​ടെ ആ നിസ്വാർഥ​സ്‌നേ​ഹ​ത്തി​നു നമ്മൾ എത്ര നന്ദിയു​ള്ള​വ​രാണ്‌!

4. നിസ്വാർഥ​സ്‌നേഹം കാണി​ക്കാൻ അപൂർണ​മ​നു​ഷ്യർക്കും കഴിയു​മെന്ന്‌ എന്തു സൂചി​പ്പി​ക്കു​ന്നു?

⁴ നമുക്കും നിസ്വാർഥ​സ്‌നേഹം കാണി​ക്കാൻ കഴിവുണ്ട്‌, കാരണം ദൈവ​ത്തി​ന്റെ ഛായയി​ലാ​ണു നാം സൃഷ്ടി​ക്ക​പ്പെ​ട്ടി​രി​ക്കു​ന്നത്‌. എങ്കിലും നമ്മൾ പാപി​ക​ളാ​യ​തു​കൊണ്ട്‌ സ്‌നേഹം പ്രകടി​പ്പി​ക്കു​ന്നതു ബുദ്ധി​മു​ട്ടാ​യേ​ക്കാം, പക്ഷേ നമുക്ക്‌ അതിനു കഴിയും. ചില ഉദാഹ​ര​ണങ്ങൾ നോക്കാം. തനിക്കു​ള്ള​തിൽ ഏറ്റവും മികച്ചത്‌ യഹോ​വ​യ്‌ക്കു യാഗം അർപ്പി​ച്ചു​കൊണ്ട്‌ ഹാബേൽ നിസ്വാർഥ​സ്‌നേഹം കാണിച്ചു. (ഉൽപ. 4:3, 4) ആളുകൾ ശ്രദ്ധി​ക്കാ​തി​രു​ന്നി​ട്ടും ദൈവ​ത്തിൽനി​ന്നുള്ള സന്ദേശം പതിറ്റാ​ണ്ടു​ക​ളോ​ളം പ്രസം​ഗി​ച്ചു​കൊണ്ട്‌ നോഹ സഹമനു​ഷ്യ​രോ​ടു നിസ്വാർഥ​സ്‌നേഹം പ്രകട​മാ​ക്കി. (2 പത്രോ. 2:5) പ്രിയ​മ​ക​നായ യിസ്‌ഹാ​ക്കി​നെ യാഗം അർപ്പി​ക്കാൻ യഹോവ കല്‌പി​ച്ച​പ്പോൾ തന്റെ വികാ​ര​ങ്ങ​ളെ​ക്കാൾ ദൈവ​ത്തോ​ടുള്ള സ്‌നേ​ഹ​ത്തിന്‌ അബ്രാ​ഹാം പ്രാധാ​ന്യം കൊടു​ത്തു. (യാക്കോ. 2:21) വിശ്വ​സ്‌ത​രായ ആ മനുഷ്യ​രെ​പ്പോ​ലെ, എന്തൊക്കെ പ്രശ്‌ന​ങ്ങ​ളു​ണ്ടാ​യാ​ലും നമുക്കും നിസ്വാർഥ​സ്‌നേഹം കാണി​ക്കാം.

5. നമുക്ക്‌ ഏതൊക്കെ വിധങ്ങ​ളിൽ യഥാർഥ​സ്‌നേഹം കാണി​ക്കാം?

⁵ യഥാർഥ​സ്‌നേഹം കാണി​ക്കു​ന്നത്‌ “വാക്കു​കൊ​ണ്ടും നാക്കു​കൊ​ണ്ടും അല്ല, പ്രവൃ​ത്തി​യി​ലും സത്യത്തി​ലും” ആണെന്നു ബൈബിൾ പറയുന്നു. (1 യോഹ. 3:18) വാക്കു​കൾകൊണ്ട്‌ സ്‌നേഹം പ്രകടി​പ്പി​ക്കാൻ കഴിയു​കയേ ഇല്ല എന്നാണോ ഇതിന്‌ അർഥം? അല്ല. (1 തെസ്സ. 4:18) നമ്മുടെ സ്‌നേഹം വാക്കു​ക​ളിൽ മാത്ര​മാ​യി ഒതുങ്ങ​രുത്‌ എന്നാണ്‌ അതിന്‌ അർഥം, എന്തെങ്കി​ലും സഹായം ചെയ്യേ​ണ്ട​തു​ള്ള​പ്പോൾ പ്രത്യേ​കി​ച്ചും. ഉദാഹ​ര​ണ​ത്തിന്‌, ജീവി​ത​ത്തി​ലെ അടിസ്ഥാന ആവശ്യങ്ങൾ നിറ​വേ​റ്റാൻ വകയി​ല്ലാത്ത ഒരു സഹക്രി​സ്‌ത്യാ​നി​ക്കു സാന്ത്വ​നി​പ്പി​ക്കുന്ന നല്ല വാക്കുകൾ മാത്രം പോരാ. (യാക്കോ. 2:15, 16) അതു​പോ​ലെ​തന്നെ, യഹോ​വ​യോ​ടും അയൽക്കാ​ര​നോ​ടും സ്‌നേ​ഹ​മു​ള്ള​പ്പോൾ ‘വിള​വെ​ടു​പ്പി​നു പണിക്കാ​രെ അയയ്‌ക്കാൻ യാചി​ക്കുക’ മാത്രമല്ല, പ്രസം​ഗ​വേ​ല​യിൽ കഴിവി​ന്റെ പരമാ​വധി ചെയ്യാൻ നമ്മൾ ശ്രമി​ക്കു​ക​യും ചെയ്യും.—മത്താ. 9:38.

6, 7. (എ) “കാപട്യമില്ലാത്ത സ്‌നേഹം” എന്താണ്‌? (ബി) കപടസ്‌നേ​ഹ​ത്തി​ന്റെ ചില ദൃഷ്ടാ​ന്തങ്ങൾ പറയുക.

⁶ നമ്മൾ “പ്രവൃ​ത്തി​യി​ലും സത്യത്തി​ലും” സ്‌നേ​ഹി​ക്ക​ണ​മെന്ന്‌ അപ്പോ​സ്‌ത​ല​നായ യോഹ​ന്നാൻ എഴുതി. അതായത്‌, നമ്മുടെ സ്‌നേഹം ‘കാപട്യ​മി​ല്ലാ​ത്ത​താ​യി​രി​ക്കണം.’ (റോമ. 12:9; 2 കൊരി. 6:6) അപ്പോൾ ‘കാപട്യ​മുള്ള സ്‌നേഹം എന്ന ഒന്നുണ്ടോ’ എന്നു നമ്മൾ ചോദി​ച്ചേ​ക്കാം. ഇല്ല. അതിനെ സ്‌നേ​ഹ​മെന്നു വിളി​ക്കാ​നാ​കില്ല, ഒരു മൂല്യ​വു​മി​ല്ലാത്ത വെറും കപട​പ്ര​ക​ട​നങ്ങൾ മാത്ര​മാണ്‌ അത്‌. സ്‌നേ​ഹ​ത്തി​ന്റെ മുഖം​മൂ​ടി ധരിച്ച്‌ പ്രവർത്തി​ക്കുന്ന ഒരാൾ യഥാർഥ​സ്‌നേഹം കാണി​ക്കു​ക​യാ​ണെന്നു പറയാ​നാ​കില്ല.

⁷ കപടസ്‌നേ​ഹ​ത്തി​ന്റെ ചില ദൃഷ്ടാ​ന്തങ്ങൾ നോക്കാം. ഏദെൻ തോട്ട​ത്തിൽവെച്ച്‌ ഹവ്വയുടെ നന്മയാണു തന്റെ ലക്ഷ്യം എന്നു തോന്നി​പ്പി​ക്കുന്ന വിധത്തി​ലാ​ണു സാത്താൻ സംസാ​രി​ച്ചത്‌. പക്ഷേ വാസ്‌ത​വ​ത്തിൽ അവന്റെ പ്രവൃ​ത്തി​കൾ സ്വാർഥ​വും കപടവും ആയിരു​ന്നു. (ഉൽപ. 3:4, 5) അതു​പോ​ലെ, അഹി​ഥോ​ഫെ​ലി​നു ദാവീദ്‌ രാജാ​വു​മാ​യി ഉണ്ടായി​രുന്ന സൗഹൃദം വെറും നാട്യ​മാ​യി​രു​ന്നെന്നു തെളിഞ്ഞു. സ്വാർഥ​ലാ​ഭ​ത്തി​നു​വേണ്ടി അഹി​ഥോ​ഫെൽ ദാവീ​ദി​നെ ചതിച്ചു. (2 ശമു. 15:31) സമാന​മാ​യി ഇന്നും, വിശ്വാ​സ​ത്യാ​ഗി​ക​ളും സഭയിൽ ഭിന്നി​പ്പു​ണ്ടാ​ക്കാൻ ശ്രമി​ക്കു​ന്ന​വ​രും തങ്ങൾക്കു സ്‌നേ​ഹ​മു​ണ്ടെന്നു വരുത്തി​ത്തീർക്കാൻ “ചക്കരവാ​ക്കും മുഖസ്‌തു​തി​യും” ഉപയോ​ഗി​ക്കു​ന്നു. പക്ഷേ യഥാർഥ​ത്തിൽ അവർക്കു സ്വാർഥ​ല​ക്ഷ്യ​ങ്ങ​ളാ​ണു​ള്ളത്‌.—റോമ. 16:17, 18.

8. നമ്മൾ നമ്മളോ​ടു​തന്നെ ഏതു ചോദ്യം ചോദി​ക്കണം?

⁸ ആത്മത്യാ​ഗം നിറഞ്ഞ സ്‌നേഹം ഒരു ദൈവി​ക​ഗു​ണ​മാ​യി​രി​ക്കെ, അതിനു പകരം ആളുകളെ വഞ്ചിക്കുന്ന കപടസ്‌നേഹം കാണി​ക്കു​ന്നത്‌ അങ്ങേയറ്റം ലജ്ജാക​ര​മാണ്‌. അത്തരം കപടത​കൊണ്ട്‌ മനുഷ്യ​രെ വിഡ്‌ഢി​ക​ളാ​ക്കാ​നാ​യേ​ക്കും, പക്ഷേ യഹോ​വയെ  കബളി​പ്പി​ക്കാ​നാ​വില്ല. വാസ്‌ത​വ​ത്തിൽ കപടഭ​ക്ത​രെ​പ്പോ​ലെ​യുള്ള ഇവരെ “കഠിന​മാ​യി” ശിക്ഷി​ക്കു​മെന്നു യേശു പറഞ്ഞു. (മത്താ. 24:51) യഹോ​വ​യു​ടെ ദാസന്മാർ കപടസ്‌നേഹം പ്രകടി​പ്പി​ക്കാൻ അശേഷം ആഗ്രഹി​ക്കു​ക​യില്ല. എന്നിരു​ന്നാ​ലും നമ്മോ​ടു​തന്നെ ചോദി​ക്കേണ്ട ഒരു ചോദ്യ​മുണ്ട്‌, ‘സ്വാർഥ​ത​യും വഞ്ചനയും അൽപ്പം​പോ​ലും കലരാത്ത യഥാർഥ​സ്‌നേ​ഹ​മാ​ണോ എല്ലായ്‌പോ​ഴും എന്റേത്‌?’ “കാപട്യ​മി​ല്ലാത്ത സ്‌നേഹം” കാണി​ക്കു​ന്ന​തിൽ കഠിന​ശ്രമം ചെയ്യാൻ കഴിയുന്ന ഒൻപതു വിധങ്ങൾ നമുക്കു പരിചി​ന്തി​ക്കാം.

9. യഥാർഥ​സ്‌നേഹം എന്തു ചെയ്യാൻ നമ്മളെ പ്രേരി​പ്പി​ക്കും?

⁹ നമ്മൾ ചെയ്യു​ന്നതു ശ്രദ്ധി​ക്ക​പ്പെ​ടാ​ത്ത​പ്പോ​ഴും സന്തോ​ഷ​ത്തോ​ടെ സേവി​ക്കുക. സഹോ​ദ​ര​ങ്ങൾക്കു സത്‌പ്ര​വൃ​ത്തി​കൾ ചെയ്യു​മ്പോൾ സാധി​ക്കു​മ്പോ​ഴൊ​ക്കെ “രഹസ്യ​മാ​യി” അഥവാ മറ്റുള്ള​വ​രു​ടെ ശ്രദ്ധ പിടി​ച്ചു​പ​റ്റാ​തെ അതു ചെയ്യാൻ മനസ്സു​ണ്ടാ​യി​രി​ക്കണം. (മത്തായി 6:1-4 വായി​ക്കുക.) ഇക്കാര്യ​ത്തിൽ അനന്യാ​സും സഫീറ​യും പരാജ​യ​പ്പെട്ടു. സ്ഥലം വിറ്റ പണം സംഭാ​വ​ന​യാ​യി കൊടു​ത്ത​പ്പോൾ മറ്റുള്ള​വ​രു​ടെ ശ്രദ്ധ പിടി​ച്ചു​പ​റ്റ​ണ​മെന്ന്‌ ആഗ്രഹി​ച്ചെന്നു മാത്രമല്ല, അവർ നുണ പറയു​ക​യും ചെയ്‌തു. ആ കപടത​യു​ടെ പരിണ​ത​ഫലം ദാരു​ണ​മാ​യി​രു​ന്നു. (പ്രവൃ. 5:1-10) യഥാർഥ​സ്‌നേ​ഹ​മു​ണ്ടെ​ങ്കിൽ പ്രശസ്‌തി​യോ അംഗീ​കാ​ര​മോ ഒന്നും പ്രതീ​ക്ഷി​ക്കാ​തെ​തന്നെ നമ്മൾ സന്തോ​ഷ​ത്തോ​ടെ സഹോ​ദ​ര​ങ്ങളെ സേവി​ക്കും. ഉദാഹ​ര​ണ​ത്തിന്‌, ആത്മീയ​ഭ​ക്ഷണം തയ്യാറാ​ക്കു​ന്ന​തിൽ ഭരണസം​ഘത്തെ സഹായി​ക്കുന്ന സഹോ​ദ​രങ്ങൾ പേര്‌ വെളി​പ്പെ​ടു​ത്താ​തെ​യാണ്‌ അതു ചെയ്യു​ന്നത്‌. തങ്ങൾ ഏതു പ്രത്യേ​ക​വേ​ല​യാ​ണു ചെയ്യു​ന്ന​തെന്നു മറ്റുള്ളവർ അറിയാൻ അവർ ആഗ്രഹി​ക്കു​ന്നില്ല.

10. മറ്റുള്ള​വരെ ബഹുമാ​നി​ക്കു​ന്ന​തിൽ എങ്ങനെ മുൻ​കൈ​യെ​ടു​ക്കാം?

¹⁰ മറ്റുള്ള​വരെ ബഹുമാ​നി​ക്കു​ന്ന​തിൽ മുൻ​കൈ​യെ​ടു​ക്കുക. (റോമർ 12:10 വായി​ക്കുക.) ഏറ്റവും എളിയ ജോലി​കൾ ചെയ്‌തു​കൊ​ണ്ടു​പോ​ലും മറ്റുള്ള​വരെ ബഹുമാ​നി​ക്കു​ന്ന​തിൽ യേശു നല്ല മാതൃക വെച്ചു. (യോഹ. 13:3-5, 12-15) ഈ വിധത്തിൽ മറ്റുള്ള​വരെ ബഹുമാ​നി​ക്കു​ന്ന​തി​നു താഴ്‌മ വേണം. അതു വളർത്തി​യെ​ടു​ക്കാൻ നമ്മൾ കഠിനാ​ധ്വാ​നം ചെയ്യേ​ണ്ട​തു​ണ്ടാ​യി​രി​ക്കാം. അപ്പോ​സ്‌ത​ല​ന്മാർക്കു​പോ​ലും പരിശു​ദ്ധാ​ത്മാവ്‌ ലഭിക്കു​ന്ന​തു​വരെ യേശു​വി​ന്റെ മാതൃക എങ്ങനെ അനുക​രി​ക്ക​ണ​മെന്നു വ്യക്തമാ​യി മനസ്സി​ലാ​യില്ല. (യോഹ. 13:7) നമുക്ക്‌ ഒരുപക്ഷേ മറ്റുള്ള​വ​രെ​ക്കാൾ വിദ്യാ​ഭ്യാ​സ​മോ വസ്‌തു​വ​ക​ക​ളോ സേവന​പ​ദ​വി​ക​ളോ ഒക്കെ ഉണ്ടായി​രി​ക്കാം. പക്ഷേ അക്കാര​ണ​ങ്ങ​ളാൽ നമ്മൾ മികച്ച​വ​രാ​ണെന്നു ചിന്തി​ക്കാ​തി​രു​ന്നു​കൊണ്ട്‌ മറ്റുള്ള​വ​രോ​ടു ബഹുമാ​നം കാണി​ക്കാം. (റോമ. 12:3) മറ്റുള്ള​വരെ ആളുകൾ പ്രശം​സി​ക്കു​മ്പോൾ അതിൽ അസൂയ​പ്പെ​ടു​ന്ന​തി​നു പകരം അവരോ​ടൊ​പ്പം സന്തോ​ഷി​ക്കുക, ഒരുപക്ഷേ ആ പ്രശംസ നമുക്കും അവകാ​ശ​പ്പെ​ട്ട​താ​ണെന്നു തോന്നി​യാൽപ്പോ​ലും.

11. അഭിന​ന്ദനം ആത്മാർഥ​മാ​യി​രി​ക്കേ​ണ്ടത്‌ എന്തു​കൊണ്ട്‌?

¹¹ സഹോ​ദ​ര​ങ്ങളെ ആത്മാർഥ​മാ​യി അഭിന​ന്ദി​ക്കുക. അഭിന​ന്ദ​ന​ത്തി​നുള്ള ഒരവസ​ര​വും വിട്ടു​ക​ള​യ​രുത്‌, കാരണം അത്‌ ആളുകളെ ‘ബലപ്പെ​ടു​ത്തും.’ (എഫെ. 4:29) എന്നാൽ ആത്മാർഥ​മാ​യി​ട്ടാ​യി​രി​ക്കണം നമ്മൾ അഭിന​ന്ദി​ക്കു​ന്നത്‌. അല്ലെങ്കിൽ നമ്മൾ വെറുതേ മുഖസ്‌തു​തി പറയു​ക​യോ ആവശ്യ​മായ ബുദ്ധി​യു​പ​ദേശം കൊടു​ക്കു​ന്ന​തിൽനിന്ന്‌ ഒഴിഞ്ഞു​നിൽക്കു​ക​യോ ആയിരി​ക്കും. (സുഭാ. 29:5) ഒരാളെ അഭിന​ന്ദ​നം​കൊണ്ട്‌ മൂടി​യിട്ട്‌ പിന്നീടു മാറി​നിന്ന്‌ അദ്ദേഹ​ത്തെ​ക്കു​റിച്ച്‌ കുറ്റം പറയു​ന്നതു കാപട്യ​മാണ്‌. ഇത്തരം കെണികൾ ഒഴിവാ​ക്കി​ക്കൊണ്ട്‌ സ്‌നേ​ഹ​ത്തോ​ടെ അഭിന​ന്ദി​ക്കുന്ന കാര്യ​ത്തിൽ പൗലോസ്‌ അപ്പോ​സ്‌തലൻ നല്ല മാതൃക വെച്ചു. ഉദാഹ​ര​ണ​ത്തിന്‌, കൊരി​ന്തി​ലെ ക്രിസ്‌ത്യാ​നി​കൾ ചെയ്‌ത ചില നല്ല കാര്യ​ങ്ങ​ളെ​പ്രതി പൗലോസ്‌ അവരെ ആത്മാർഥ​മാ​യി അഭിന​ന്ദി​ച്ചു. (1 കൊരി. 11:2) പക്ഷേ ബുദ്ധി​യു​പ​ദേശം കൊടു​ക്കേണ്ട സാഹച​ര്യ​ങ്ങ​ളിൽ ദയയോ​ടെ​യും വ്യക്തമാ​യും പൗലോസ്‌ അതു ചെയ്‌തു.—1 കൊരി. 11:20-22.

12. ആതിഥ്യം കാണി​ക്കു​മ്പോൾ നമുക്ക്‌ എങ്ങനെ യഥാർഥ​സ്‌നേഹം പ്രകടി​പ്പി​ക്കാം?

¹² ആതിഥ്യം കാണി​ക്കുക. സഹോ​ദ​ര​ങ്ങ​ളോട്‌ ഉദാര​മ​ന​സ്സോ​ടെ ഇടപെ​ടാൻ യഹോവ കല്‌പി​ച്ചി​രി​ക്കു​ന്നു. (1 യോഹ​ന്നാൻ 3:17 വായി​ക്കുക.) പക്ഷേ ശുദ്ധമായ ആന്തര​ത്തോ​ടെ വേണം അതു ചെയ്യാൻ, സ്വാർഥ​ത​യു​ടെ ഒരു കണിക​പോ​ലും ഉണ്ടായി​രി​ക്ക​രുത്‌. നമ്മളോ​ടു​തന്നെ ഇങ്ങനെ ചോദി​ക്കുക: ‘അടുത്ത സുഹൃ​ത്തു​ക്ക​ളെ​യും പ്രമു​ഖ​വ്യ​ക്തി​ക​ളെ​യും തിരിച്ച്‌ സഹായി​ക്കാൻ കഴിവു​ള്ള​വ​രെ​യും ആണോ ഞാൻ മിക്ക​പ്പോ​ഴും അതിഥി​ക​ളാ​യി ക്ഷണിക്കാ​റു​ള്ളത്‌? അതോ അത്ര അടുപ്പ​മി​ല്ലാ​ത്ത​വ​രും തിരികെ എന്തെങ്കി​ലും സഹായം ചെയ്യാൻ കഴിയാ​ത്ത​വ​രും ആയ സഹോ​ദ​ര​ങ്ങ​ളെ​യും ഉദാര​മാ​യി സഹായി​ക്കാ​റു​ണ്ടോ?’ (ലൂക്കോ. 14:12-14) ഇനി മറ്റു ചില സാഹച​ര്യ​ങ്ങൾ നോക്കാം. ഒരു സഹക്രി​സ്‌ത്യാ​നി മോശ​മായ ചില തീരു​മാ​ന​ങ്ങ​ളെ​ടു​ത്തതു കാരണം ഭൗതി​ക​സ​ഹാ​യം  ആവശ്യ​മാ​യി വന്നേക്കാം. മറ്റു ചിലരാ​കട്ടെ, നമ്മുടെ ആതിഥ്യം സ്വീക​രി​ച്ചിട്ട്‌ വിലമ​തി​പ്പു കാണി​ക്കാ​തി​രു​ന്നേ​ക്കാം. ഇതു​പോ​ലുള്ള സാഹച​ര്യ​ങ്ങ​ളിൽ “മുറു​മു​റു​പ്പു കൂടാതെ പരസ്‌പരം ആതിഥ്യ​മ​രു​ളുക” എന്ന ബുദ്ധി​യു​പ​ദേശം നമ്മൾ പ്രാവർത്തി​ക​മാ​ക്കണം. (1 പത്രോ. 4:9) അങ്ങനെ ചെയ്യു​മ്പോൾ ശരിയായ ആന്തര​ത്തോ​ടെ കൊടു​ക്കു​ന്ന​തി​ന്റെ സന്തോഷം നമ്മൾ അനുഭ​വി​ച്ച​റി​യും.—പ്രവൃ. 20:35.

13. (എ) ബലഹീ​നരെ സഹായി​ക്കു​ന്നതു പ്രത്യേ​കി​ച്ചും ബുദ്ധി​മു​ട്ടാ​യി​രി​ക്കു​ന്നത്‌ എപ്പോൾ? (ബി) ബലഹീ​നരെ സഹായി​ക്കാൻ നമുക്കു പ്രാ​യോ​ഗി​ക​മാ​യി എന്തൊക്കെ ചെയ്യാം?

¹³ ബലഹീ​നരെ താങ്ങുക. “ബലഹീ​നർക്കു വേണ്ട പിന്തുണ കൊടു​ക്കുക. എല്ലാവ​രോ​ടും ക്ഷമ കാണി​ക്കുക” എന്ന ബൈബിൾക​ല്‌പന നമ്മുടെ സ്‌നേഹം എത്ര​ത്തോ​ളം നിസ്വാർഥ​മാ​ണെന്നു പരി​ശോ​ധി​ക്കാൻ നമ്മളെ സഹായി​ക്കും. (1 തെസ്സ. 5:14) വിശ്വാ​സ​ത്തിൽ ബലഹീ​ന​രായ മിക്കവ​രും പിന്നീട്‌ ആത്മീയ​മാ​യി ബലമു​ള്ള​വ​രാ​കും. എന്നാൽ ചിലരു​ടെ കാര്യ​ത്തിൽ ക്ഷമയോ​ടെ​യുള്ള പിന്തുണ കുറച്ച്‌ അധികം കാലം കൊടു​ക്കേ​ണ്ട​തു​ണ്ടാ​യി​രി​ക്കാം. നമുക്ക്‌ അത്‌ എങ്ങനെ ചെയ്യാം? ആത്മീയ​മാ​യി ബലപ്പെ​ടു​ത്തുന്ന തിരു​വെ​ഴു​ത്താ​ശ​യങ്ങൾ അങ്ങനെ​യു​ള്ള​വ​രു​മാ​യി ചർച്ച ചെയ്യുക, ശുശ്രൂ​ഷ​യിൽ നമ്മളോ​ടൊ​പ്പം പ്രവർത്തി​ക്കാൻ അവരെ ക്ഷണിക്കുക, അവർ പറയു​ന്നതു കേൾക്കാൻ സമയം കണ്ടെത്തുക. ഈ വിധങ്ങ​ളി​ലൊ​ക്കെ നമുക്ക്‌ അതു ചെയ്യാം. കൂടാതെ, സഹോ​ദ​ര​ങ്ങ​ളിൽ ചിലർ ആത്മീയ​മാ​യി ‘ശക്തരാ​ണെ​ന്നും’ മറ്റു ചിലർ ‘ബലഹീ​ന​രാ​ണെ​ന്നും’ കണക്കാ​ക്കു​ന്ന​തി​നു പകരം നമുക്ക്‌ എല്ലാവർക്കും കഴിവു​ക​ളും ബലഹീ​ന​ത​ക​ളും ഉണ്ടെന്നു മനസ്സി​ലാ​ക്കുക. അപ്പോ​സ്‌ത​ല​നായ പൗലോ​സു​പോ​ലും തനിക്കു ബലഹീ​ന​ത​ക​ളു​ണ്ടെന്ന്‌ അംഗീ​ക​രി​ച്ചു. (2 കൊരി. 12:9, 10) അതു​കൊണ്ട്‌ നമുക്ക്‌ എല്ലാവർക്കും സഹക്രി​സ്‌ത്യാ​നി​ക​ളു​ടെ പിന്തുണ ആവശ്യ​മാണ്‌.

14. സഹോ​ദ​ര​ങ്ങ​ളു​മാ​യി സമാധാ​നം നിലനി​റു​ത്തു​ന്ന​തിന്‌ എത്ര​ത്തോ​ളം പോകാൻ നമ്മൾ തയ്യാറാ​യി​രി​ക്കണം?

¹⁴ സമാധാ​ന​മു​ണ്ടാ​ക്കുക. സഹോ​ദ​ര​ങ്ങ​ളു​മാ​യി സമാധാ​ന​ത്തി​ലാ​യി​രി​ക്കാൻ നമ്മളെ​ക്കൊ​ണ്ടാ​കു​ന്ന​തെ​ല്ലാം ചെയ്യണം, ചില​പ്പോൾ നമ്മളെ തെറ്റി​ദ്ധ​രി​ച്ചി​രി​ക്കു​ക​യാ​ണെ​ന്നോ നമ്മളോ​ടു മോശ​മാ​യി പെരു​മാ​റി​യെ​ന്നോ തോന്നി​യാൽപ്പോ​ലും. (റോമർ 12:17, 18 വായി​ക്കുക.) നമ്മൾ ആരെ​യെ​ങ്കി​ലും മുറി​പ്പെ​ടു​ത്തി​യി​ട്ടു​ണ്ടെ​ങ്കിൽ ക്ഷമാപണം നടത്തു​ന്നതു മുറിവ്‌ ഉണങ്ങാൻ സഹായി​ക്കും, പക്ഷേ അത്‌ ആത്മാർഥ​മാ​യി​രി​ക്ക​ണ​മെന്നു മാത്രം. ഉദാഹ​ര​ണ​ത്തിന്‌, “നിങ്ങൾക്കു വിഷമം തോന്നി​യെ​ങ്കിൽ ക്ഷമിക്കുക” എന്നു പറയു​ന്ന​തി​നു പകരം “ഞാൻ പറഞ്ഞതു നിങ്ങളെ വേദനി​പ്പി​ച്ചെ​ങ്കിൽ ക്ഷമിക്കുക” എന്നു പറഞ്ഞു​കൊണ്ട്‌ നിങ്ങളു​ടെ തെറ്റ്‌ അംഗീ​ക​രി​ക്കുക. കുടും​ബ​ജീ​വി​ത​ത്തിൽ സമാധാ​നം വിശേ​ഷാൽ പ്രധാ​ന​മാണ്‌. ആളുക​ളു​ടെ മുമ്പിൽ സ്‌നേഹം അഭിന​യി​ച്ചിട്ട്‌ ആരും കാണാ​ത്ത​പ്പോൾ മിണ്ടാ​തി​രു​ന്നു​കൊ​ണ്ടോ ക്രൂര​മാ​യി സംസാ​രി​ച്ചു​കൊ​ണ്ടോ ശാരീ​രി​ക​മാ​യി ഉപദ്ര​വി​ച്ചു​കൊ​ണ്ടോ ദമ്പതികൾ പരസ്‌പരം മുറി​വേൽപ്പി​ക്കു​ന്നത്‌ ഒരിക്ക​ലും ഉചിതമല്ല.

15. നമ്മുടെ ക്ഷമ ആത്മാർഥ​മാ​ണെന്ന്‌ എങ്ങനെ കാണി​ക്കാം?

¹⁵ ഉദാര​മാ​യി ക്ഷമിക്കുക. നമ്മളെ ആരെങ്കി​ലും മുറി​പ്പെ​ടു​ത്തി​യെ​ങ്കിൽ ആ വ്യക്തി​യോ​ടു ക്ഷമിക്കുക, നീരസം മനസ്സിൽ സൂക്ഷി​ക്കാ​തി​രി​ക്കുക. താൻ പറഞ്ഞതോ ചെയ്‌ത​തോ ആയ കാര്യം നമ്മളെ മുറി​പ്പെ​ടു​ത്തി​യെന്ന്‌ ആ വ്യക്തി അറിയു​ന്നു​ണ്ടാ​കില്ല. അപ്പോൾപ്പോ​ലും പിൻവ​രുന്ന വാക്യ​ത്തി​നു ചേർച്ച​യിൽ നമുക്ക്‌ അവരോട്‌ ഉദാര​മാ​യി ക്ഷമിക്കാം: “സ്‌നേ​ഹ​ത്തോ​ടെ എല്ലാവ​രു​മാ​യി ഒത്തു​പോ​കു​ക​യും നിങ്ങളെ ഒന്നിച്ചു​നി​റു​ത്തുന്ന സമാധാ​ന​ബന്ധം കാത്തു​കൊണ്ട്‌ ആത്മാവി​നാ​ലുള്ള ഐക്യം നിലനി​റു​ത്താൻ ആത്മാർഥ​മാ​യി ശ്രമി​ക്കു​ക​യും ചെയ്യുക.” (എഫെ. 4:2, 3) ആത്മാർഥ​മാ​യി ക്ഷമിച്ചി​ട്ടു​ണ്ടെ​ങ്കിൽ നമ്മൾ പിന്നെ ‘ദ്രോ​ഹ​ങ്ങ​ളു​ടെ കണക്കു സൂക്ഷി​ക്കില്ല,’ അതായത്‌, ആ വ്യക്തി ചെയ്‌ത​തി​നെ​ക്കു​റിച്ച്‌ ചിന്തി​ച്ചു​കൊ​ണ്ടി​രി​ക്കില്ല. (1 കൊരി. 13:4, 5) നമ്മൾ നീരസ​മോ പകയോ വെച്ചു​കൊ​ണ്ടി​രി​ക്കു​ന്നെ​ങ്കിൽ നമ്മുടെ സഹക്രി​സ്‌ത്യാ​നി​യു​മാ​യുള്ള ബന്ധം മാത്രമല്ല, യഹോ​വ​യു​മാ​യുള്ള ബന്ധവും എന്നേക്കു​മാ​യി തകർന്നേ​ക്കാം. (മത്താ. 6:14, 15) നമ്മളോ​ടു തെറ്റു ചെയ്‌ത​വർക്കു​വേണ്ടി  പ്രാർഥി​ച്ചു​കൊ​ണ്ടും നമ്മൾ ആത്മാർഥ​മാ​യി ക്ഷമി​ച്ചെന്നു കാണി​ക്കാം.—ലൂക്കോ. 6:27, 28.

16. യഹോ​വ​യു​ടെ സേവന​ത്തിൽ നമുക്കു ലഭിക്കുന്ന പ്രത്യേ​ക​നി​യ​മ​ന​ങ്ങളെ എങ്ങനെ വീക്ഷി​ക്കണം?

¹⁶ ലഭിക്കാ​വുന്ന നേട്ടങ്ങൾ മറ്റുള്ള​വർക്കാ​യി വേണ്ടെ​ന്നു​വെ​ക്കുക. യഹോ​വ​യു​ടെ സംഘട​ന​യിൽ ലഭിക്കുന്ന നിയമ​നങ്ങൾ നമ്മുടെ സ്‌നേഹം നിസ്വാർഥ​മാ​ണെന്നു തെളി​യി​ക്കാ​നുള്ള അവസര​ങ്ങ​ളാ​യി കാണണം. ‘തനിക്ക്‌ എന്തു നേട്ടമു​ണ്ടെന്നല്ല, മറ്റുള്ള​വർക്ക്‌ എന്തു നേട്ടമു​ണ്ടാ​കു​മെന്നു നോക്കാ​നാ​ണു’ നമ്മൾ ശ്രമി​ക്കേ​ണ്ടത്‌. (1 കൊരി. 10:24) ഒരു ഉദാഹ​രണം നോക്കാം. സേവക​ന്മാ​രാ​യി നിയമനം ലഭിക്കുന്ന സഹോ​ദ​ര​ങ്ങൾക്കു സമ്മേള​ന​ങ്ങ​ളി​ലും കൺ​വെൻ​ഷ​നു​ക​ളി​ലും മറ്റും, നിശ്ചയി​ച്ചി​രി​ക്കുന്ന സമയത്തി​നു മുമ്പ്‌ ഹാളി​നു​ള്ളിൽ പ്രവേ​ശി​ക്കാൻ കഴിയും. ഇത്‌ അവർക്കും അവരുടെ കുടും​ബ​ത്തി​നും വേണ്ടി ഏറ്റവും നല്ല ഇരിപ്പി​ടം പിടി​ച്ചു​വെ​ക്കു​ന്ന​തി​നുള്ള അവസര​മാ​യി അവരിൽ ചിലർ കാണാൻ സാധ്യ​ത​യുണ്ട്‌. എന്നാൽ, മിക്ക സഹോ​ദ​ര​ന്മാ​രും അങ്ങനെയല്ല. അവർക്കു നിയമി​ച്ചു​കി​ട്ടി​യി​രി​ക്കുന്ന ഭാഗത്തെ ഏറ്റവും മികച്ച ഇരിപ്പി​ട​ങ്ങ​ളിൽ മറ്റുള്ളവർ ഇരിക്ക​ട്ടെ​യെന്നു വിചാ​രി​ക്കും. വ്യക്തി​പ​ര​മായ നേട്ടം വേണ്ടെ​ന്നു​വെ​ച്ചു​കൊണ്ട്‌ സ്‌നേ​ഹ​ത്തിൽ അൽപ്പം​പോ​ലും സ്വാർഥ​ത​യി​ല്ലെന്ന്‌ അവർ തെളി​യി​ക്കു​ന്നു. ഈ മാതൃക നിങ്ങൾക്ക്‌ എങ്ങനെ അനുക​രി​ക്കാം?

17. ഗുരുതരമായ പാപം ചെയ്‌തിട്ടുണ്ടെങ്കിൽ എന്തു ചെയ്യാൻ യഥാർഥ​സ്‌നേഹം ഒരു വ്യക്തിയെ പ്രേരി​പ്പി​ക്കും?

¹⁷ രഹസ്യ​പാ​പങ്ങൾ ഏറ്റുപ​റ​യുക, ഉപേക്ഷി​ക്കുക. ചില ക്രിസ്‌ത്യാ​നി​കൾ നാണ​ക്കേട്‌ ഒഴിവാ​ക്കാ​നോ മറ്റുള്ള​വരെ നിരാ​ശ​പ്പെ​ടു​ത്താ​തി​രി​ക്കാ​നോ തങ്ങൾ ചെയ്‌ത ഗുരു​ത​ര​മായ പാപം മൂടി​വെ​ക്കാൻ ശ്രമി​ക്കു​ന്നു. (സുഭാ. 28:13) അങ്ങനെ ചെയ്യു​ന്നതു സ്‌നേ​ഹ​മി​ല്ലാ​യ്‌മ​യാണ്‌. കാരണം അത്‌ അവരെ​യും മറ്റുള്ള​വ​രെ​യും ദോഷ​ക​ര​മാ​യി ബാധി​ക്കും. അതു ദൈവാ​ത്മാ​വി​ന്റെ ഒഴുക്കി​നെ തടസ്സ​പ്പെ​ടു​ത്തു​ക​യും മുഴു​സ​ഭ​യു​ടെ​യും സമാധാ​ന​ത്തി​നു ഭീഷണി​യാ​കു​ക​യും ചെയ്യും. (എഫെ. 4:30) ഗുരു​ത​ര​മായ പാപങ്ങൾ ചെയ്‌തി​ട്ടു​ണ്ടെ​ങ്കിൽ അതു മൂപ്പന്മാ​രോട്‌ ഏറ്റുപ​റ​യാൻ യഥാർഥ​സ്‌നേഹം ക്രിസ്‌ത്യാ​നി​കളെ പ്രേരി​പ്പി​ക്കും. അങ്ങനെ ആവശ്യ​മായ സഹായം കൊടു​ക്കാൻ മൂപ്പന്മാർക്കു കഴിയും.—യാക്കോ. 5:14, 15.

18. യഥാർഥ​സ്‌നേഹം എത്ര​ത്തോ​ളം പ്രധാ​ന​മാണ്‌?

¹⁸ സ്‌നേ​ഹ​മാണ്‌ ഏറ്റവും ശ്രേഷ്‌ഠ​മായ ഗുണം. (1 കൊരി. 13:13) സ്‌നേഹം നമ്മെ സ്‌നേ​ഹ​ത്തി​ന്റെ ഉറവായ യഹോ​വ​യു​ടെ അനുകാ​രി​ക​ളാ​യും യേശു​വി​ന്റെ അനുഗാ​മി​ക​ളാ​യും തിരി​ച്ച​റി​യി​ക്കു​ന്നു. (എഫെ. 5:1, 2) പൗലോസ്‌ എഴുതി: “സ്‌നേ​ഹ​മി​ല്ലെ​ങ്കിൽ ഞാൻ ഒന്നുമല്ല.” (1 കൊരി. 13:2) അതു​കൊണ്ട്‌ നമുക്കു സ്‌നേ​ഹ​ത്തി​ന്റെ പാതയിൽ തുടർന്നും നടക്കാം, വെറും ‘വാക്കു​കൊണ്ട്‌’ മാത്രമല്ല, “പ്രവൃ​ത്തി​യി​ലും സത്യത്തി​ലും.”