“ബസ്സ്‌ പൊയ്‌ക്കോ​ട്ടേ, പക്ഷേ ഈ ചൈന​ക്കാ​രൻ ഇവിടെ നിൽക്കും!” തെക്കേ അമേരി​ക്ക​യി​ലെ ഒരു രാജ്യ​ത്തു​നിന്ന്‌ മറ്റൊരു രാജ്യ​ത്തേ​ക്കുള്ള യാത്ര​യ്‌ക്കി​ടെ അലക്‌സാൻഡ്ര കേട്ട വാക്കു​ക​ളാണ്‌ ഇത്‌. കാര്യം അറിയാൻ അവൾ ബസ്സിൽനിന്ന്‌ ഇറങ്ങി. ഒരു ചൈനീസ്‌ യുവാവ്‌ അതിർത്തി​യി​ലുള്ള ഉദ്യോ​ഗ​സ്ഥ​നോട്‌ തന്റെ നിരപ​രാ​ധി​ത്വം സ്‌പാ​നിഷ്‌ ഭാഷയിൽ പറഞ്ഞു​ബോ​ധി​പ്പി​ക്കാൻ പാടു​പെ​ടുന്ന കാഴ്‌ച​യാണ്‌ അലക്‌സാൻഡ്ര കണ്ടത്‌. യഹോ​വ​യു​ടെ സാക്ഷി​ക​ളു​ടെ ചൈനീസ്‌ ഭാഷയി​ലുള്ള മീറ്റി​ങ്ങി​നു പോയി​ട്ടു​ള്ള​തു​കൊണ്ട്‌ ആ ഭാഷ കുറ​ച്ചൊ​ക്കെ അറിയാ​മാ​യി​രുന്ന അലക്‌സാൻഡ്ര ആ ചൈന​ക്കാ​രനെ സഹായി​ക്കാൻ മുന്നോ​ട്ടു​വന്നു.

നിയമ​പ​ര​മാ​യി​ത്ത​ന്നെ​യാണ്‌ താൻ ഇവിടെ താമസി​ക്കു​ന്ന​തെ​ന്നും രേഖക​ളും പണവും കളവ്‌ പോയ​താ​ണെ​ന്നും ആ ചെറു​പ്പ​ക്കാ​രൻ ഉദ്യോ​ഗ​സ്ഥ​നോ​ടു പറഞ്ഞു. ആദ്യ​മൊ​ന്നും ഇതു വിശ്വ​സി​ക്കാൻ അദ്ദേഹം കൂട്ടാ​ക്കി​യില്ല. സഹായി​ക്കാൻ വന്ന അലക്‌സാൻഡ്ര​പോ​ലും മനുഷ്യ​ക്ക​ട​ത്തി​ന്റെ കണ്ണിയാ​ണെന്ന്‌ അദ്ദേഹം തെറ്റി​ദ്ധ​രി​ച്ചു. ഒടുവിൽ ആ ഉദ്യോ​ഗസ്ഥൻ ചെറു​പ്പ​ക്കാ​രൻ പറഞ്ഞ​തെ​ല്ലാം വിശ്വ​സി​ക്കാൻ തയ്യാറാ​യി. എന്നാൽ കൈവശം മതിയായ രേഖക​ളൊ​ന്നും ഇല്ലാത്ത​തു​കൊണ്ട്‌ പിഴ അടയ്‌ക്കാൻ ആവശ്യ​പ്പെട്ടു. ചില്ലി​ക്കാ​ശു​പോ​ലും കൈയി​ലി​ല്ലാ​തി​രുന്ന ആ ചെറു​പ്പ​ക്കാ​രന്‌ 20 ഡോളർ നൽകി അലക്‌സാൻഡ്ര സഹായി​ച്ചു. പറഞ്ഞറി​യി​ക്കാ​നാ​കാത്ത നന്ദിയാ​യി​രു​ന്നു ആ ചെറു​പ്പ​ക്കാ​രന്‌. 20 ഡോള​റിൽ കൂടുതൽ തിരി​ച്ചു​ത​രാ​മെ​ന്നും അലക്‌സാൻഡ്ര​യോ​ടു പറഞ്ഞു. പ്രതി​ഫലം പ്രതീ​ക്ഷി​ച്ചു​കൊ​ണ്ടൊ​ന്നു​മല്ല സഹായി​ച്ച​തെന്ന്‌ അലക്‌സാൻഡ്ര വിശദീ​ക​രി​ച്ചു. മറ്റുള്ള​വരെ സഹായി​ക്കു​ന്ന​തിൽ അവൾക്ക്‌ സന്തോ​ഷ​മേ​യു​ണ്ടാ​യി​രു​ന്നു​ള്ളൂ. കാരണം അതാണ്‌ ശരി​യെന്ന്‌ അവൾക്ക്‌ അറിയാ​മാ​യി​രു​ന്നു. ചില ബൈബിൾപ്ര​സി​ദ്ധീ​ക​ര​ണങ്ങൾ കൊടു​ത്തിട്ട്‌ സാക്ഷി​ക​ളോ​ടൊ​പ്പം ബൈബിൾ പഠിക്കാൻ അലക്‌സാൻഡ്ര ആ ചെറു​പ്പ​ക്കാ​ര​നോട്‌ ആവശ്യ​പ്പെട്ടു.

പരിച​യ​മി​ല്ലാ​ത്ത​വ​രോട്‌ ആളുകൾ ദയ കാണി​ച്ച​തി​ന്റെ ഇത്തരം അനുഭ​വങ്ങൾ കേൾക്കു​ന്നത്‌ നമുക്ക്‌ സന്തോഷം നൽകുന്ന ഒന്നാണ്‌. എല്ലാ മതവി​ഭാ​ഗ​ത്തിൽപ്പെ​ട്ട​വ​രും, ഇനി പ്രത്യേ​കിച്ച്‌ ഒരു മതത്തി​ലും അംഗങ്ങ​ള​ല്ലാ​ത്ത​വ​രും ദയാ​പ്ര​വൃ​ത്തി​കൾ ചെയ്യാ​റുണ്ട്‌. അത്തരം വിശാ​ല​മായ മനസ്സോ​ടെ മറ്റുള്ള​വർക്കു കൊടു​ക്കാൻ നിങ്ങൾ ഒരുക്ക​മാ​ണോ? ഈ ചോദ്യം പ്രധാ​ന​മാ​യി​രി​ക്കു​ന്ന​തി​ന്റെ കാരണം യേശു പറഞ്ഞു: “വാങ്ങു​ന്ന​തി​നെ​ക്കാൾ സന്തോഷം കൊടു​ക്കു​ന്ന​തി​ലാണ്‌.” (പ്രവൃ​ത്തി​കൾ 20:35) ശാസ്‌ത്ര​വും ഇതി​നോ​ടു യോജി​ക്കു​ന്നു. കാരണം മറ്റുള്ള​വർക്ക്‌ എന്തെങ്കി​ലും മനസ്സോ​ടെ കൊടു​ക്കു​ന്നത്‌ ആരോ​ഗ്യ​ത്തി​നു നല്ലതാ​ണെന്ന്‌ ഗവേഷകർ അഭി​പ്രാ​യ​പ്പെ​ടു​ന്നു. അത്‌ എങ്ങനെ​യാ​ണെന്ന്‌ നമുക്കു നോക്കാം.

കൊടു​ക്കു​ന്നത്‌ സന്തോഷം തരു​മെന്ന്‌ അനുഭ​വങ്ങൾ കാണി​ക്കു​ന്നു, അവ തമ്മിൽ അത്ര ബന്ധപ്പെ​ട്ടി​രി​ക്കു​ന്നു. “സന്തോ​ഷ​ത്തോ​ടെ കൊടു​ക്കു​ന്ന​വ​രെ​യാ​ണു ദൈവം സ്‌നേ​ഹി​ക്കു​ന്നത്‌” എന്ന്‌ അപ്പോ​സ്‌ത​ല​നായ പൗലോസ്‌ പറഞ്ഞു. സഹവി​ശ്വാ​സി​കൾക്കു ബുദ്ധി​മുട്ട്‌ വന്നപ്പോൾ ഉദാര​മാ​യി സംഭാ​വ​നകൾ നൽകിയ ക്രിസ്‌ത്യാ​നി​ക​ളെ​ക്കു​റിച്ച്‌ സംസാ​രി​ക്കു​ക​യാ​യി​രു​ന്നു പൗലോസ്‌. (2 കൊരി​ന്ത്യർ 8:4; 9:7) സന്തോ​ഷ​മു​ണ്ടാ​യി​രു​ന്ന​തു​കൊണ്ട്‌ അവർ മറ്റുള്ള​വർക്ക്‌ കൊടു​ത്തു എന്നല്ല പൗലോസ്‌ പറഞ്ഞത്‌. നേരെ​മ​റിച്ച്‌ മറ്റുള്ള​വർക്ക്‌ എന്തെങ്കി​ലും കൊടു​ത്ത​താണ്‌ അവരെ സന്തോ​ഷ​മു​ള്ള​വ​രാ​ക്കി​യത്‌.

ഒരു പഠനം സൂചി​പ്പി​ക്കു​ന്ന​തു​പോ​ലെ മറ്റുള്ള​വർക്കു കൊടു​ക്കു​ന്നത്‌ “സന്തോഷം, വിശ്വാ​സം, വ്യക്തി​ബ​ന്ധങ്ങൾ എന്നീ കാര്യ​ങ്ങ​ളു​മാ​യി ബന്ധപ്പെട്ട തലച്ചോ​റി​ലെ ഭാഗങ്ങളെ ഉത്തേജി​പ്പി​ച്ചു​കൊണ്ട്‌ നമുക്ക്‌ ഒരു ‘പുത്തൻ ഉണർവേ​കു​ന്നു.’” “സ്വന്തം ആവശ്യ​ത്തി​നു​വേണ്ടി പണം ചെലവാ​ക്കു​മ്പോൾ ലഭിക്കു​ന്ന​തി​നെ​ക്കാൾ കൂടുതൽ സന്തോഷം മറ്റുള്ള​വർക്കു​വേണ്ടി പണം ചെലവാ​ക്കു​മ്പോൾ ലഭിക്കു​ന്നു” എന്നാണ്‌ മറ്റൊരു പഠനം തെളി​യി​ക്കു​ന്നത്‌.

എന്റെ സാഹച​ര്യ​ങ്ങൾ നിമിത്തം എനിക്കു കാര്യ​മാ​യി ഒന്നും കൊടു​ക്കാൻ കഴിയു​ന്നി​ല്ലെന്ന്‌ എപ്പോ​ഴെ​ങ്കി​ലും നിങ്ങൾക്കു തോന്നി​യി​ട്ടു​ണ്ടോ? സത്യം പറഞ്ഞാൽ, ‘സന്തോ​ഷ​ത്തോ​ടെ കൊടു​ക്കു​ന്ന​തി​ന്റെ’ സംതൃ​പ്‌തി എല്ലാവർക്കും അനുഭ​വി​ച്ച​റി​യാ​നാ​കും. അതിന്‌ വലി​യൊ​രു തുക വേണ​മെ​ന്നില്ല, ശരിയായ മനോ​ഭാ​വം  മതി. യഹോ​വ​യു​ടെ സാക്ഷി​ക​ളിൽ ഒരാൾ ഈ മാസി​ക​യു​ടെ പ്രസാ​ധ​കർക്ക്‌ ചെറിയ ഒരു സംഭാ​വ​ന​യോ​ടൊ​പ്പം ഇങ്ങനെ​യൊ​രു സന്ദേശം അയച്ചു​കൊ​ടു​ത്തു: “കഴിഞ്ഞ വർഷങ്ങ​ളി​ലു​ട​നീ​ളം വലിയ തുക​യൊ​ന്നും എനിക്കു രാജ്യ​ഹാ​ളിൽ സംഭാവന ചെയ്യാൻ കഴിഞ്ഞി​ട്ടില്ല.” എന്നിട്ടും അവൾ പറയുന്നു: “ഞാൻ കൊടു​ത്ത​തി​നെ​ക്കാൾ അധികം യഹോവ എനിക്കു തിരികെ നൽകി. . . . സംഭാവന നൽകാൻ എനിക്ക്‌ ഒരു അവസരം തന്നതിന്‌ ഒരുപാട്‌ നന്ദി. എനിക്ക്‌ അത്‌ വലി​യൊ​രു ആശ്വാ​സ​മാ​യി.”

പണം മാത്രമല്ല കൊടു​ക്കാൻ കഴിയു​ന്നത്‌. മറ്റു പലതും നമുക്കു കൊടു​ക്കാ​നാ​കും.

ബൈബിൾ പറയുന്നു: “ദയ കാട്ടു​ന്നവൻ തനിക്കു​തന്നെ ഗുണം ചെയ്യുന്നു; എന്നാൽ ക്രൂരത കാട്ടു​ന്നവൻ സ്വയം കഷ്ടങ്ങൾ വരുത്തി​വെ​ക്കു​ന്നു.” (സുഭാ​ഷി​തങ്ങൾ 11:17) ദയയു​ള്ളവർ ഉദാര​മ​തി​ക​ളാ​യി​രി​ക്കും. അവർ അവരുടെ സമയം, ഊർജം അങ്ങനെ അവർക്കു​ള്ള​തെ​ല്ലാം മനസ്സോ​ടെ കൊടു​ക്കാൻ തയ്യാറാ​യി​രി​ക്കും; തങ്ങളെ​ത്തന്നെ അവർ മറ്റുള്ള​വർക്കു​വേണ്ടി വിട്ടു​കൊ​ടു​ക്കും. ഈ ദയാ​പ്ര​വൃ​ത്തി​കൾ വ്യത്യസ്‌ത വിധങ്ങ​ളിൽ അവരുടെ ജീവി​ത​ത്തി​ന്റെ മാറ്റ്‌ കൂട്ടുന്നു. അത്തരം ദയാ​പ്ര​വൃ​ത്തി​ക​ളിൽ വളരെ ചെറി​യ​വ​പോ​ലും അവരുടെ ആരോ​ഗ്യ​ത്തി​നു ഗുണം ചെയ്യും.

മറ്റുള്ള​വ​രെ സഹായി​ക്കാൻ മുന്നോ​ട്ടു വരുന്ന​വർക്ക്‌ വേദന​ക​ളും വിഷമ​ങ്ങ​ളും വിഷാ​ദ​വും വിരള​മാ​യി​രി​ക്കു​മെ​ന്നാണ്‌ പഠനങ്ങൾ സൂചി​പ്പി​ക്കു​ന്നത്‌. ചുരു​ക്കി​പ്പ​റ​ഞ്ഞാൽ അവർക്ക്‌ നല്ല ആരോ​ഗ്യ​മാ​യി​രി​ക്കും. എയ്‌ഡ്‌സോ മൾട്ടി​പ്പിൾ സ്‌ക്ലീ​റോ​സി​സോ പോലുള്ള ഗുരു​ത​ര​മായ രോഗ​ങ്ങ​ളു​ള്ള​വർപോ​ലും മറ്റുള്ള​വർക്ക്‌ ദയാ​പ്ര​വൃ​ത്തി​കൾ ചെയ്യു​മ്പോൾ അവരുടെ ആരോ​ഗ്യം മെച്ച​പ്പെ​ടു​ന്നു. ഇനി, മദ്യപാ​ന​ത്തിൽനിന്ന്‌ പുറത്തു​വ​രാൻ ശ്രമി​ക്കു​ന്നവർ മറ്റുള്ള​വരെ സഹായി​ക്കാൻ മനസ്സു കാണി​ക്കു​മ്പോൾ വിഷാ​ദ​വും ഈ ദുശ്ശീലം വീണ്ടും തുടങ്ങാ​നുള്ള സാധ്യ​ത​യും അവരിൽ നന്നേ കുറയു​ന്ന​താ​യി തെളി​ഞ്ഞി​രി​ക്കു​ന്നു.

ഇത്തരം മാറ്റങ്ങൾക്കു പിന്നിലെ കാരണം എന്താണ്‌? “അനുകമ്പ, കരുണ, ദയ എന്നീ ഗുണങ്ങൾ പ്രകട​മാ​ക്കു​മ്പോൾ നിഷേ​ധാ​ത്മക ചിന്തക​ളി​ല്ലാ​താ​കും” എന്നാണ്‌ പറയ​പ്പെ​ടു​ന്നത്‌. മറ്റുള്ള​വർക്കു കൊടു​ക്കുന്ന ശീലം രക്തസമ്മർദ​വും പിരി​മു​റു​ക്ക​വും കുറയാൻ സഹായി​ക്കു​ന്നു. മറ്റുള്ള​വരെ സഹായി​ക്കാൻ ശ്രമി​ക്കു​മ്പോൾ ഇണയെ നഷ്ടപ്പെ​ട്ട​വർക്കു​പോ​ലും വിഷാ​ദ​ത്തി​ന്റെ പിടി​യിൽനിന്ന്‌ പെട്ടെന്ന്‌ പുറത്തു​വ​രാൻ കഴിഞ്ഞി​ട്ടുണ്ട്‌.

അതെ, കൊടു​ക്കു​ന്നത്‌ നിങ്ങൾക്കു ഗുണമേ ചെയ്യൂ. അതു തർക്കമറ്റ വസ്‌തു​ത​യാണ്‌.

തന്റെ അനുഗാ​മി​കളെ യേശു ഇങ്ങനെ പ്രോ​ത്സാ​ഹി​പ്പി​ച്ചു: “കൊടു​ക്കു​ന്നത്‌ ഒരു ശീലമാ​ക്കുക. അപ്പോൾ ആളുകൾ നിങ്ങൾക്കും തരും. അമർത്തി, കുലു​ക്കി​ക്കൊ​ള്ളിച്ച്‌, നിറഞ്ഞു​ക​വി​യു​ന്നത്ര അളവിൽ നിങ്ങളു​ടെ മടിയി​ലേക്ക്‌ ഇട്ടുത​രും. നിങ്ങൾ അളന്നു​കൊ​ടു​ക്കുന്ന അതേ അളവു​പാ​ത്ര​ത്തിൽ നിങ്ങൾക്കും അളന്നു​കി​ട്ടും.” (ലൂക്കോസ്‌ 6:38) മറ്റുള്ള​വർക്ക്‌ കൊടു​ക്കു​മ്പോൾ അവർ അതിനെ വിലമ​തി​ക്കു​ക​യും അവരും കൊടു​ക്കാൻ ശീലി​ക്കു​ക​യും ചെയ്യും. കൊടു​ക്കു​ന്നത്‌ ഐക്യ​വും സുഹൃ​ദ്‌ബ​ന്ധ​വും ശക്തമാ​ക്കും.

മനുഷ്യ​ബ​ന്ധ​ങ്ങ​ളെ​ക്കു​റിച്ച്‌ പഠനം നടത്തുന്ന ഗവേഷകർ അഭി​പ്രാ​യ​പ്പെ​ട്ടത്‌ ഇങ്ങനെ​യാണ്‌: “പരോ​പ​കാ​രം ചെയ്യുന്ന ശീലമു​ള്ളവർ അങ്ങനെ ചെയ്യാൻ മറ്റുള്ള​വ​രെ​യും പ്രേരി​പ്പി​ക്കു​ന്നു.” സത്യം പറഞ്ഞാൽ, “ദയാ​പ്ര​വൃ​ത്തി​കൾ ചെയ്‌ത​തി​നെ​ക്കു​റിച്ച്‌ വായി​ച്ച​തു​തന്നെ ഉദാര​മ​തി​ക​ളാ​യി​രി​ക്കാൻ ആളുകളെ സഹായി​ച്ചി​ട്ടുണ്ട്‌.” മറ്റൊരു പഠനം കാണി​ക്കു​ന്ന​തു​പോ​ലെ, “ഒരു ശൃംഖ​ല​യി​ലെ ഓരോ വ്യക്തി​ക്കും പലരെ​യും, എന്തിന്‌ നൂറു​ക​ണ​ക്കിന്‌ ആളുക​ളെ​പ്പോ​ലും സ്വാധീ​നി​ക്കാൻ കഴിയും. ഒരുപക്ഷേ അവർ പരസ്‌പരം കാണു​ക​യോ അറിയു​ക​യോ പോലും ചെയ്‌തി​ട്ടു​ണ്ടാ​കില്ല.” മറ്റു വാക്കു​ക​ളിൽ പറഞ്ഞാൽ, ഉദാര​ത​യു​ടെ ഒരു ചെറിയ പ്രവൃ​ത്തിക്ക്‌ ഒരു തരംഗം​തന്നെ സൃഷ്ടി​ക്കാ​നാ​കും. അത്‌ ഒരാളിൽനിന്ന്‌ മറ്റൊ​രാ​ളി​ലേക്ക്‌, അങ്ങനെ ഒരു സമൂഹ​ത്തി​ലെ എല്ലാവ​രി​ലേ​ക്കും വ്യാപി​ക്കും. അങ്ങനെ​യൊ​രു സമൂഹ​ത്തിൽ ജീവി​ക്കു​ന്നത്‌ എന്തു രസമാ​യി​രി​ക്കും, അല്ലേ?  കൊടു​ക്കുന്ന ശീലം എത്ര ആളുകൾ വളർത്തി​യെ​ടു​ക്കു​ന്നു​വോ അത്രയും അനു​ഗ്ര​ഹങ്ങൾ ആസ്വദി​ക്കാ​നാ​കും!

ഇതു ശരി​വെ​ക്കു​ന്ന​താണ്‌ യു.എസ്‌.എ.-യിലെ ഫ്‌ളോ​റി​ഡ​യിൽനി​ന്നുള്ള ഒരു അനുഭവം. ഒരു കൊടു​ങ്കാറ്റ്‌ വിതച്ച നാശത്തി​നു ശേഷം സ്വമേ​ധാ​സേ​വ​ക​രായ ഒരു കൂട്ടം യഹോ​വ​യു​ടെ സാക്ഷികൾ ദുരി​താ​ശ്വാ​സ​പ്ര​വർത്ത​ന​ങ്ങൾക്കാ​യി അവി​ടെ​യെത്തി. ഒരു വീടിന്റെ അറ്റകുറ്റം തീർക്കാൻ ആവശ്യ​മായ സാധന​സാ​മ​ഗ്രി​കൾക്കാ​യി കാത്തു​നിൽക്കവെ അയൽപ​ക്ക​ത്തുള്ള വീടിന്റെ മതിൽ തകർന്നു​കി​ട​ക്കു​ന്നത്‌ അവരുടെ ശ്രദ്ധയിൽപ്പെട്ടു. അതു നന്നാക്കി​ക്കൊ​ടു​ക്കാൻ അവർ സന്നദ്ധരാ​യി. അതിൽ മതിപ്പു തോന്നിയ വീട്ടു​ട​മസ്ഥൻ കുറച്ച്‌ നാൾ കഴിഞ്ഞ​പ്പോൾ യഹോ​വ​യു​ടെ സാക്ഷി​ക​ളു​ടെ ലോകാ​സ്ഥാ​ന​ത്തേക്കു ഒരു കത്ത്‌ എഴുതി. അതിൽ ഇങ്ങനെ പറഞ്ഞി​രു​ന്നു: “ഞാൻ എന്നും നന്ദിയു​ള്ള​വ​നാ​യി​രി​ക്കും. പരിച​യ​പ്പെ​ട്ട​തിൽവെച്ച്‌ ഏറ്റവും നല്ല ആളുക​ളാ​യി​രു​ന്നു അവർ.” സാക്ഷി​ക​ളു​ടെ അസാധാ​ര​ണ​വേല എന്ന്‌ അദ്ദേഹം വിളിച്ച പ്രവർത്ത​ന​ങ്ങൾക്കു​വേണ്ടി ഉദാര​മായ സംഭാവന നൽകാൻ ഈ ദയാ​പ്ര​വൃ​ത്തി അദ്ദേഹത്തെ പ്രേരി​പ്പി​ച്ചു.

ഒരു ഗവേഷ​ണ​ത്തിൽ കണ്ടെത്തിയ ശ്രദ്ധേ​യ​മായ കാര്യം ഇതാണ്‌: “മറ്റുള്ള​വരെ സഹായി​ക്കാ​നുള്ള സ്വതസി​ദ്ധ​മായ ഒരു വാഞ്‌ഛ മനുഷ്യ​രിൽ അന്തർലീ​ന​മാണ്‌.” ആ പഠനം പറയു​ന്ന​ത​നു​സ​രിച്ച്‌, കുട്ടികൾ “സംസാ​രി​ക്കാൻ തുടങ്ങു​ന്ന​തി​നു മുമ്പേ കൊടു​ക്കാൻ ശീലി​ക്കു​ന്നു.” എന്തു​കൊണ്ട്‌? ബൈബിൾ അതിന്‌ ഉത്തരം നൽകുന്നു. മനുഷ്യ​നെ സൃഷ്ടി​ച്ചത്‌ ‘ദൈവ​ത്തി​ന്റെ ഛായയി​ലാണ്‌.’ അതായത്‌, ദൈവ​ത്തി​ന്റെ ഗുണങ്ങൾ സഹിത​മാണ്‌ നമ്മൾ സൃഷ്ടി​ക്ക​പ്പെ​ട്ടത്‌.—ഉൽപത്തി 1:27.

നമ്മുടെ സ്രഷ്ടാ​വായ യഹോ​വ​യു​ടെ വിസ്‌മ​യ​ക​ര​മായ ഗുണങ്ങ​ളിൽ ഒന്നാണ്‌ ഉദാരത. നമുക്കു ജീവനും ജീവിതം ആസ്വദി​ക്കാൻ ആവശ്യ​മാ​യ​തും എല്ലാം ദൈവം നൽകി​യി​രി​ക്കു​ന്നു. (പ്രവൃ​ത്തി​കൾ 14:17; 17:26-28) നമ്മുടെ സ്വർഗീ​യ​പി​താ​വായ യഹോ​വ​യെ​യും ആ ദൈവ​ത്തി​ന്റെ ഉദ്ദേശ്യ​ങ്ങ​ളെ​യും കുറിച്ച്‌ അറിയാൻ ദൈവ​വ​ച​ന​മായ ബൈബിൾ നമുക്കു പഠിക്കാം. ദൈവം ഭാവി​യിൽ നമുക്കു സന്തോഷം നൽകു​ന്നത്‌ എങ്ങനെ​യാ​ണെ​ന്നും ബൈബിൾ പറയുന്നു. a (1 യോഹ​ന്നാൻ 4:9, 10) ഉദാര​ത​യു​ടെ ഉറവി​ട​മായ യഹോ​വ​യു​ടെ ഛായയിൽ സൃഷ്ടി​ച്ചി​രി​ക്കു​ന്ന​തി​നാൽ നമ്മൾ ആ ദൈവത്തെ അനുക​രി​ച്ചു​കൊണ്ട്‌ മറ്റുള്ള​വർക്കു കൊടു​ക്കു​ന്നെ​ങ്കിൽ അതു നമുക്കു നന്മ വരുത്തും, ദൈവ​ത്തി​ന്റെ അംഗീ​കാ​രം നേടി​ത്ത​രും, തീർച്ച.—എബ്രായർ 13:16.

ഈ ലേഖന​ത്തി​ന്റെ തുടക്ക​ത്തിൽ പറഞ്ഞ അലക്‌സാൻഡ്രയെ നിങ്ങൾ ഓർക്കു​ന്നു​ണ്ടോ? അവളുടെ കഥയുടെ ബാക്കി അറിയണ്ടേ? സഹയാ​ത്രി​ക​രിൽ ഒരാൾ അവളോ​ടു പറഞ്ഞത്‌ ആ പണം ഇനി കിട്ടാ​നൊ​ന്നും പോകു​ന്നില്ല എന്നാണ്‌. എന്നാൽ ബസ്സ്‌ ഇറങ്ങിയ സ്ഥലത്ത്‌ ആ ചെറു​പ്പ​ക്കാ​രൻ പറഞ്ഞത​നു​സ​രിച്ച്‌ കൂട്ടു​കാർ 20 ഡോള​റു​മാ​യി നിൽപ്പു​ണ്ടാ​യി​രു​ന്നു. അങ്ങനെ ആ കടം പെട്ടെ​ന്നു​തന്നെ വീട്ടി. മാത്രമല്ല, അലക്‌സാൻഡ്ര പറഞ്ഞതു​പോ​ലെ ആ ചെറു​പ്പ​ക്കാ​രൻ ബൈബിൾ പഠിക്കാ​നും തുടങ്ങി. മൂന്നു മാസത്തി​നു ശേഷം പെറു​വിൽവെച്ച്‌ നടന്ന യഹോ​വ​യു​ടെ സാക്ഷി​ക​ളു​ടെ ചൈനീസ്‌ ഭാഷയി​ലുള്ള ഒരു കൺ​വെൻ​ഷ​നിൽവെച്ച്‌ അയാളെ വീണ്ടും കണ്ടപ്പോൾ അവൾക്ക്‌ എന്തെന്നി​ല്ലാത്ത സന്തോഷം തോന്നി. അലക്‌സാൻഡ്ര തനിക്കു​വേണ്ടി ചെയ്‌ത​തി​നോ​ടുള്ള നന്ദി കാണി​ക്കാൻ അദ്ദേഹം അലക്‌സാൻഡ്ര​യെ​യും അവളു​ടെ​കൂ​ടെ കൺ​വെൻ​ഷന്‌ വന്നവ​രെ​യും അദ്ദേഹ​ത്തി​ന്റെ റെസ്റ്റോ​റ​ന്റി​ലേക്കു കൊണ്ടു​പോ​യി.

മറ്റുള്ള​വർക്കു കൊടു​ക്കു​ന്ന​തും അവരെ സഹായി​ക്കു​ന്ന​തും വലിയ സന്തോഷം നൽകി​ത്ത​രു​ന്നു. എല്ലാ നല്ല ദാനങ്ങ​ളു​ടെ​യും ഉറവായ യഹോ​വയെ അടുത്ത​റി​യാൻ ആളുകളെ സഹായി​ക്കു​ന്ന​താണ്‌ നമുക്കു ചെയ്യാൻ കഴിയുന്ന ഏറ്റവും വലിയ നന്മ. (യാക്കോബ്‌ 1:17) അങ്ങനെ കൊടു​ക്കു​ന്ന​തി​ന്റെ പ്രയോ​ജ​നങ്ങൾ നിങ്ങൾ അനുഭ​വി​ച്ച​റി​യു​ന്നു​ണ്ടോ?