ദൈവം എന്തുകൊണ്ടാണ് എല്ലാ പ്രാർഥനകൾക്കും ഉത്തരം തരാത്തത്?
നമ്മുടെ സ്വർഗീയ പിതാവിന്, ദൈവമായ യഹോവയ്ക്ക്, നമ്മുടെ ആത്മാർഥമായ പ്രാർഥനകൾ കേൾക്കാൻ സന്തോഷമാണ്. എന്നാൽ നമ്മുടെ എല്ലാ പ്രാർഥനകൾക്കും ദൈവം ഉത്തരം തരാത്തത് എന്തുകൊണ്ടാണ്? പ്രാർഥിക്കുമ്പോൾ നമ്മൾ എന്തൊക്കെ കാര്യങ്ങളാണു മനസ്സിൽപ്പിടിക്കേണ്ടത്? അതെക്കുറിച്ച് ബൈബിൾ നൽകുന്ന ചില നിർദേശങ്ങൾ നോക്കാം.
“പ്രാർഥിക്കുമ്പോൾ . . . ഒരേ കാര്യങ്ങൾ തന്നെയും പിന്നെയും ഉരുവിടരുത്.”—മത്തായി 6:7.
നമ്മൾ മനപ്പാഠമാക്കിയ ഒരു പ്രാർഥനയോ ഇനി ഒരു പുസ്തകത്തിൽ എഴുതിയ പ്രാർഥനയോ ആവർത്തിച്ച് ചൊല്ലാനല്ല ദൈവം ആഗ്രഹിക്കുന്നത്. പകരം ദൈവം ഇഷ്ടപ്പെടുന്നതു ഹൃദയത്തിൽനിന്ന് തന്നോടു സംസാരിക്കാനാണ്. ഉദാഹരണത്തിന്, ഒരു സുഹൃത്ത് നിങ്ങളെ വിളിച്ചിട്ട് എല്ലാ ദിവസവും ഒരേ കാര്യംതന്നെ പറഞ്ഞുകൊണ്ടിരുന്നാൽ നിങ്ങൾക്ക് ഇഷ്ടപ്പെടുമോ? ഒരിക്കലുമില്ല. നല്ല സുഹൃത്തുക്കൾ എപ്പോഴും ആത്മാർഥമായി തുറന്നുസംസാരിക്കും. അതുപോലെ യഹോവയോട് ഉള്ളുതുറന്ന് സംസാരിക്കുമ്പോൾ നമ്മളും യഹോവയുടെ ഒരു സുഹൃത്താണെന്നു കാണിക്കുകയാണ്.
“ചോദിക്കുന്നെങ്കിൽത്തന്നെ, നിങ്ങൾക്ക് ഒന്നും ലഭിക്കുന്നില്ല. കാരണം . . . ദുരുദ്ദേശ്യത്തോടെയാണു നിങ്ങൾ ചോദിക്കുന്നത്.”—യാക്കോബ് 4:3.
ദൈവത്തിന് ഇഷ്ടമല്ലാത്ത, നമ്മൾ ചെയ്തുകാണാൻ ദൈവം ആഗ്രഹിക്കാത്ത, ഒരു കാര്യത്തിനു വേണ്ടിയാണു നമ്മൾ പ്രാർഥിക്കുന്നതെങ്കിലോ? ആ പ്രാർഥന ദൈവം കേൾക്കുമെന്നു നമുക്ക് പ്രതീക്ഷിക്കാൻ കഴിയുമോ? ഉദാഹരണത്തിന്, ചൂതാട്ടത്തിലൂടെ പണം നേടാൻ ഒരാൾ പ്രാർഥിക്കുന്നു എന്നു വിചാരിക്കുക. അത്യാഗ്രഹം പാടില്ലെന്നും ഭാഗ്യപരീക്ഷണം നടത്തരുതെന്നും വ്യക്തമായ മുന്നറിയിപ്പു ദൈവം തന്നിരിക്കുന്ന സ്ഥിതിക്ക് ആ പ്രാർഥന ദൈവം കേൾക്കുമോ? (യശയ്യ 65:11; ലൂക്കോസ് 12:15) അങ്ങനെ ചിന്തിക്കുന്നതിൽ യാതൊരു അർഥവുമില്ലല്ലേ? അതുകൊണ്ട് പ്രാർഥനയ്ക്ക് ഉത്തരം കിട്ടണമെങ്കിൽ ബൈബിളിലൂടെ ദൈവം പറഞ്ഞിരിക്കുന്ന കാര്യങ്ങൾക്കു ചേർച്ചയിൽ പ്രാർഥിക്കണം.
“നിയമത്തിനു ചെവി കൊടുക്കാൻ മനസ്സില്ലാത്തവന്റെ പ്രാർഥനപോലും അറപ്പുണ്ടാക്കുന്നത്.”—
ബൈബിൾ കാലങ്ങളിൽ തന്റെ നിയമങ്ങൾ അനുസരിക്കാത്തവരുടെ പ്രാർഥനകൾക്കു ദൈവം ഉത്തരം നൽകിയിരുന്നില്ല. (യശയ്യ 1:15, 16) ഇന്നും ദൈവത്തിന് മാറ്റം വന്നിട്ടില്ല. (മലാഖി 3:6) നമ്മുടെ പ്രാർഥനകൾക്ക് ഉത്തരം കിട്ടണമെങ്കിൽ നമ്മൾ ദൈവത്തിന്റെ നിയമങ്ങൾ അനുസരിച്ച് ജീവിക്കണം. എന്നാൽ കഴിഞ്ഞ കാലത്ത് നമ്മൾ തെറ്റുകൾ ചെയ്തിട്ടുണ്ടെങ്കിലോ? അതിന്റെ അർഥം ദൈവം നമ്മുടെ പ്രാർഥനകൾ ഒരിക്കലും കേൾക്കില്ല എന്നാണോ? അല്ല. നമ്മൾ തെറ്റു തിരുത്തി ദൈവത്തെ സന്തോഷിപ്പിക്കാൻ പരമാവധി ശ്രമിക്കുന്നെങ്കിൽ ദൈവം നമ്മളോടു തീർച്ചയായും ക്ഷമിക്കും.—പ്രവൃത്തികൾ 3:19.