പ്രാണി​കൾ പരത്തുന്ന രോഗങ്ങൾ രൂക്ഷമാ​യി​ക്കൊ​ണ്ടി​രി​ക്കുന്ന ഒരു പ്രശ്‌നം

ഒരു ലാറ്റിൻ അമേരി​ക്കൻ ഭവനം. എല്ലാവ​രും ഉറങ്ങാൻപോ​കുന്ന നേരമാ​യി. അമ്മ വാത്സല്യ​പൂർവം തന്റെ കുഞ്ഞു​മ​കനെ പുതപ്പി​ച്ചു​കി​ട​ത്തി​യിട്ട്‌ ‘ഗുഡ്‌​നൈറ്റ്‌’ പറഞ്ഞു പിരിഞ്ഞു. അപ്പോ​ഴതാ ഇരുട്ടി​ന്റെ മറവിൽ, മൂന്നു സെന്റി​മീ​റ്റ​റോ​ളം നീളമുള്ള തിളങ്ങുന്ന ഒരു കറുത്ത പ്രാണി കിടക്ക​യു​ടെ മീതെ​യുള്ള മച്ചിന്റെ വിള്ളലിൽനി​ന്നു പുറത്തു​വ​രു​ന്നു. ‘ചുംബന പ്രാണി’ എന്നാണ്‌ അതിന്റെ പേര്‌. അത്‌ ഉറങ്ങി​ക്കി​ട​ക്കുന്ന കുട്ടി​യു​ടെ മുഖ​ത്തേക്കു വീഴു​ക​യും അവന്റെ മൃദു​ല​ചർമം തുളച്ച്‌ രക്തം ഊറ്റി​ക്കു​ടി​ക്കു​ക​യും ചെയ്യുന്നു. എന്നാൽ ഇതൊ​ന്നും ആരും അറിയു​ന്നില്ല. ആർത്തി​യോ​ടെ രക്തം വലിച്ചു​കു​ടി​ക്കു​ന്ന​തി​നി​ട​യിൽ അത്‌ പരാദങ്ങൾ അടങ്ങിയ വിസർജ്യം ചർമത്തിൽ നിക്ഷേ​പി​ക്കു​ന്നു. ഉറക്കത്തിൽത്തന്നെ കുട്ടി മുഖം ചൊറി​യു​ന്നു. അങ്ങനെ പ്രാണി കുത്തിയ മുറി​വി​ലാ​കെ രോഗാ​ണു​ക്കൾ നിറഞ്ഞ വിസർജ്യം പടരുന്നു.

ഈ കീടത്തി​ന്റെ ഒറ്റത്തവ​ണത്തെ ആക്രമണ ഫലമായി കുട്ടിക്ക്‌ ഷാഗസ്‌ രോഗം പിടി​പെ​ടു​ന്നു. ഒന്നോ രണ്ടോ ആഴ്‌ച​യ്‌ക്കകം കുട്ടിയെ കടുത്ത​പനി ബാധി​ക്കു​ന്നു, ശരീരം നീരു​വെ​ക്കു​ന്നു. ഇതിനെ അതിജീ​വി​ച്ചാ​ലും പരാദങ്ങൾ അവന്റെ ശരീര​ത്തിൽത്തന്നെ കുടി​പാർക്കും. ഹൃദയം, നാഡികൾ, ആന്തരിക കലകൾ എന്നിവയെ എല്ലാം ഇവ ആക്രമി​ക്കു​ന്നു. രോഗ​ല​ക്ഷ​ണങ്ങൾ പുറത്തു​വ​രാ​തെ 10 മുതൽ 20 വരെ വർഷങ്ങൾ ചില​പ്പോൾ കടന്നു​പോ​യെ​ന്നു​വ​രാം. പക്ഷേ അതു കഴിയു​മ്പോൾ മസ്‌തിഷ്‌ക അണുബാധ, ദഹനേ​ന്ദ്രി​യ​ത്തിൽ വ്രണങ്ങൾ എന്നിവ​യെ​ല്ലാം ഉണ്ടാകാൻ ഇടയുണ്ട്‌. ഒടുവിൽ ഹൃദയാ​ഘാ​തം മൂലം മരണവും സംഭവി​ക്കും.

ഈ സാങ്കൽപ്പിക വിവരണം ഷാഗസ്‌ രോഗം പിടി​പെ​ടു​ന്നത്‌ എങ്ങനെ​യെന്ന്‌ വ്യക്തമാ​യി ചിത്രീ​ക​രി​ക്കു​ന്നു. ലാറ്റിൻ അമേരി​ക്ക​യി​ലുള്ള ദശലക്ഷ​ങ്ങളെ ഈ ‘മരണചും​ബനം’ ഏൽക്കാൻ സാധ്യ​ത​യു​ള്ള​വ​രു​ടെ പട്ടിക​യിൽ പെടു​ത്താം.

മനുഷ്യ​ന്റെ, അനേകം കാലുള്ള സഹജീ​വി​കൾ

“മനുഷ്യ​നു പിടി​പെ​ടുന്ന, പനി മുഖ്യ ലക്ഷണമാ​യി​ട്ടുള്ള രോഗ​ങ്ങ​ളിൽ മിക്കവ​യും കീടങ്ങൾ പരത്തുന്ന സൂക്ഷ്‌മാ​ണു​ക്കൾ മൂലം ഉണ്ടാകു​ന്ന​വ​യാണ്‌” എന്ന്‌ എൻ​സൈ​ക്ലോ​പീ​ഡിയ ബ്രിട്ടാ​നിക്ക പറയുന്നു. “പ്രാണി​കൾ” എന്നു പൊതു​വേ ആളുകൾ പറയു​ന്നത്‌ ഈച്ച, കൊതുക്‌, പേൻ, വണ്ട്‌ എന്നിങ്ങനെ ആറുകാ​ലുള്ള പ്രാണി​കളെ ഉദ്ദേശി​ച്ചു മാത്രമല്ല, എട്ടുകാ​ലു​ള്ള​വ​യായ മൈറ്റു​കൾ, ടിക്കുകൾ (വിവി​ധ​യി​നം ചെള്ളുകൾ, വട്ടൻ എന്നിവ ഈ വിഭാ​ഗ​ങ്ങ​ളിൽ പെടുന്നു) എന്നിവയെ എല്ലാം ഉദ്ദേശി​ച്ചാണ്‌. ശാസ്‌ത്ര​ജ്ഞ​ന്മാർ ഇവയെ എല്ലാം ആർ​ത്രോ​പ്പോഡ്‌ എന്ന വലിയ വിഭാ​ഗ​ത്തിൽ പെടു​ത്തി​യി​രി​ക്കു​ന്നു. ജന്തു​ലോ​ക​ത്തി​ലെ ഏറ്റവും വലിയ ഫൈല​മാ​ണിത്‌. ഇതുവരെ അറിയ​പ്പെ​ട്ടി​ട്ടുള്ള ജന്തുക്ക​ളിൽ കുറഞ്ഞതു പത്തു ലക്ഷം സ്‌പീ​ഷിസ്‌ ഈ ഫൈല​ത്തിൽ ഉൾപ്പെ​ടു​ന്ന​വ​യാണ്‌.

പ്രാണി​ക​ളിൽ ഭൂരി​പ​ക്ഷ​വും മനുഷ്യന്‌ ഉപദ്ര​വ​മൊ​ന്നും ചെയ്യാ​ത്ത​വ​യാണ്‌. ചിലതാ​ണെ​ങ്കിൽ വളരെ പ്രയോ​ജനം ചെയ്യു​ന്ന​വ​യും. ഇവയി​ല്ലാ​തെ മനുഷ്യ​നും മൃഗങ്ങ​ളും ഭക്ഷണത്തി​നാ​യി ആശ്രയി​ക്കുന്ന പല വൃക്ഷല​താ​ദി​ക​ളി​ലും പരാഗ​ണ​മോ ഫലോ​ത്‌പാ​ദ​ന​മോ നടക്കു​ക​യില്ല. ചില കീടങ്ങൾ ചപ്പുച​വ​റു​ക​ളു​ടെ പുനഃ​സം​സ്‌ക​ര​ണ​ത്തിൽ സഹായി​ക്കു​ന്നു. ഇവയിൽ അനേക​വും തികഞ്ഞ സസ്യഭു​ക്കു​ക​ളാണ്‌. എന്നാൽ ചിലവ മറ്റു കീടങ്ങളെ ഭക്ഷിച്ചു ജീവി​ക്കു​ന്നു.

എന്നിരു​ന്നാ​ലും, മനുഷ്യ​നും മൃഗങ്ങൾക്കും ശല്യമു​ണ്ടാ​ക്കുന്ന ക്ഷുദ്ര​കീ​ടങ്ങൾ ഉണ്ട്‌. ഇവയുടെ കുത്തോ കടിയോ വേദനി​പ്പി​ക്കു​ന്ന​താ​യി​രി​ക്കാം. അല്ലെങ്കിൽ എണ്ണത്തിലെ പെരു​പ്പം​കൊ​ണ്ടു​തന്നെ അവ അസഹ്യത ഉളവാ​ക്കി​യേ​ക്കാം. കാർഷിക  വിളകൾക്കു സമൂല​നാ​ശം വരുത്തുന്ന കീടങ്ങ​ളും ഉണ്ട്‌. എന്നാൽ ചില കീടങ്ങൾ രോഗ​വും മരണവും വിതയ്‌ക്കു​ന്നു എന്നതാണ്‌ ഏറ്റവും കഷ്ടം. “മറ്റെല്ലാ കാരണ​ങ്ങ​ളും ഒന്നിച്ചു നിരത്തി​യാ​ലും 17-ാം നൂറ്റാണ്ടു മുതൽ 20-ാം നൂറ്റാ​ണ്ടി​ന്റെ തുടക്കം വരെ ഏറ്റവും കൂടുതൽ മനുഷ്യർ രോഗ​ബാ​ധി​ത​രാ​യി​ത്തീ​രു​ക​യും മരിക്കു​ക​യും ചെയ്‌തത്‌” കീടങ്ങൾ പരത്തുന്ന രോഗ​ങ്ങ​ളാൽ ആയിരു​ന്നു എന്ന്‌ യു.എസ്‌. രോഗ നിയന്ത്രണ-പ്രതി​രോധ കേന്ദ്ര​ങ്ങ​ളി​ലെ ഡ്വേൻ ഗുബ്ലെ പ്രസ്‌താ​വി​ക്കു​ന്നു.

ഇന്ന്‌, ആറിൽ ഒരാൾ വീതം പ്രാണി​കൾ പരത്തുന്ന ഒരു രോഗ​ത്തിന്‌ അടിമ​യാണ്‌. മനുഷ്യ​നു ദുരിതം വരുത്തു​ന്നതു കൂടാതെ, ഇവ പരത്തുന്ന രോഗങ്ങൾ നിമിത്തം വലിയ സാമ്പത്തിക നഷ്ടവും ഉണ്ടാകു​ന്നു. പ്രത്യേ​കിച്ച്‌, ഇതിനാ​യി പണം ചെലവ​ഴി​ക്കാൻ കഴിവി​ല്ലാത്ത വികസ്വര രാജ്യ​ങ്ങ​ളിൽ. ഒരൊ​റ്റ​ത്തവണ ഇത്തരം ഒരു വ്യാധി പൊട്ടി​പ്പു​റ​പ്പെ​ട്ടാൽ മതി ഭീമമായ തുക അതു വിഴു​ങ്ങി​ക്ക​ള​യും. അങ്ങനെ​യൊ​രു മഹാമാ​രി 1994-ൽ പശ്ചി​മേ​ന്ത്യ​യിൽ പടർന്നു​പി​ടി​ച്ച​പ്പോൾ, പ്രാ​ദേ​ശിക, ലോക ഖജനാ​വു​ക​ളിൽനി​ന്നും നൂറു​ക​ണ​ക്കി​നു കോടി ഡോളർ ചെലവ​ഴി​ക്കേണ്ടി വന്നതായി പറയ​പ്പെ​ടു​ന്നു. ഇത്തരം ആരോ​ഗ്യ​പ്ര​ശ്‌ന​ങ്ങളെ വരുതി​യിൽ നിറു​ത്താ​തെ ലോക​ത്തി​ലെ ദരിദ്ര രാഷ്‌ട്ര​ങ്ങൾക്കു സാമ്പത്തിക പുരോ​ഗതി നേടാ​നാ​വില്ല എന്നു ലോകാ​രോ​ഗ്യ സംഘടന അഭി​പ്രാ​യ​പ്പെ​ടു​ന്നു.

പ്രാണി​കൾ നമ്മെ രോഗ​ബാ​ധി​ത​രാ​ക്കുന്ന വിധം

മുഖ്യ​മാ​യും രണ്ടു വിധങ്ങ​ളി​ലാണ്‌ പ്രാണി​കൾ രോഗാ​ണു​വാ​ഹി​കൾ ആയി വർത്തി​ക്കു​ന്നത്‌. ഒന്ന്‌, യാന്ത്രിക സംക്ര​മ​ണ​ത്തി​ലൂ​ടെ (mechanical transmission). ആളുകൾ ചെരി​പ്പി​ലൂ​ടെ പുറത്തെ അഴുക്കു​കൾ വീട്ടി​ലേക്കു ചവിട്ടി​ക്ക​യറ്റി കൊണ്ടു​വ​രു​ന്നതു പോലെ, “രോഗം വരുത്താൻ മതിയായ അളവിൽ, കോടി​ക്ക​ണ​ക്കി​നു സൂക്ഷ്‌മ​ജീ​വി​കളെ ഈച്ചകൾ അവയുടെ കാലു​ക​ളിൽ വഹിച്ചു​കൊ​ണ്ടു​വ​ന്നേ​ക്കാം” എന്ന്‌ എൻ​സൈ​ക്ലോ​പീ​ഡിയ ബ്രിട്ടാ​നിക്ക പറയുന്നു. ഉദാഹ​ര​ണ​ത്തിന്‌, രോഗാ​ണു​ക്ക​ളുള്ള വിസർജ്യ​ത്തിൽ പോയി​രു​ന്നിട്ട്‌ ഈച്ചകൾ നമ്മുടെ ഭക്ഷണപാ​നീ​യ​ങ്ങ​ളിൽ വന്നിരി​ക്കു​മ്പോൾ അവ അവിടെ രോഗാ​ണു​ക്കളെ നിക്ഷേ​പി​ക്കു​ന്നു. മനുഷ്യ​നെ തീർത്തും തളർത്തി​ക്ക​ള​യുന്ന മാരക രോഗ​ങ്ങ​ളായ ടൈ​ഫോ​യ്‌ഡ്‌, വയറു​കടി, കോളറ എന്നിവ ഇപ്രകാ​രം സംക്ര​മി​ക്കു​ന്ന​വ​യാണ്‌. ലോക​ത്തിൽ ഏറ്റവും അധികം അന്ധതയ്‌ക്കു കാരണ​മായ ട്രക്കോമ പരത്തു​ന്ന​തി​ലും ഈച്ചകൾ പങ്കുവ​ഹി​ക്കു​ന്നു. നേത്ര​പ​ട​ല​ത്തിൽ—ഐറി​സി​ന്റെ മുന്നിലെ സുതാ​ര്യ​മായ ഭാഗം—ക്ഷതം ഉണ്ടാകു​ന്ന​താണ്‌ ട്രക്കോമ രോഗി​ക​ളിൽ അന്ധതയ്‌ക്ക്‌ ഇടയാ​ക്കു​ന്നത്‌. ഈ മഹാവ്യാ​ധി പിടി​പെട്ട ഏതാണ്ട്‌ 50,00,00,000 ആളുകൾ ലോക​മെ​മ്പാ​ടു​മാ​യി ഉണ്ട്‌.

മാലി​ന്യം നിറഞ്ഞ ചുറ്റു​പാ​ടിൽ പെറ്റു​പെ​രു​കുന്ന പാറ്റയും മേൽപ്പറഞ്ഞ രീതി​യിൽ രോഗാ​ണു​സം​ക്ര​മണം നടത്തു​ന്നു​വെന്നു കരുത​പ്പെ​ടു​ന്നു. മാത്രമല്ല, അടുത്ത​കാ​ലത്ത്‌ ഉണ്ടായി​ട്ടുള്ള ആസ്‌തമ കേസു​ക​ളു​ടെ വർധനയെ—വിശേ​ഷി​ച്ചും കുട്ടി​ക​ളിൽ കണ്ടുവ​രു​ന്നു—പാറ്റ​യോ​ടുള്ള അലർജി​യു​മാ​യി വിദഗ്‌ധർ ബന്ധപ്പെ​ടു​ത്തി​യി​രി​ക്കു​ന്നു. ഉദാഹ​ര​ണ​ത്തിന്‌, 15 വയസ്സു​കാ​രി​യായ ആഷ്‌ലി​യു​ടെ കാര്യ​മെ​ടു​ക്കുക. ആസ്‌തമ നിമിത്തം പല രാത്രി​ക​ളി​ലും അവൾക്കു വലിയ ശ്വാസ​ത​ടസ്സം അനുഭ​വ​പ്പെ​ട്ടി​രു​ന്നു. ഡോക്ടർ അവളുടെ ശ്വാ​സോ​ച്ഛ്വാ​സം ശ്രദ്ധി​ക്കാൻ ഒരുങ്ങവേ ഒരു പാറ്റ ആഷ്‌ലി​യു​ടെ ഉടുപ്പിൽനി​ന്നും താഴെ​വീണ്‌ ഓടി​പ്പോ​യി.

പ്രാണി​കൾ രോഗാ​ണു​ക്കളെ ഉള്ളിൽ വഹിക്കു​മ്പോൾ

വൈറ​സു​കൾ, ബാക്ടീ​രി​യകൾ, പരാദങ്ങൾ എന്നിവയെ ശരീര​ത്തിൽ കുടി​പാർപ്പി​ക്കുന്ന കീടങ്ങൾക്ക്‌ മറ്റൊരു വിധത്തിൽ രോഗങ്ങൾ പരത്താൻ കഴിയും. അവയുടെ കുത്തോ കടിയോ ഏൽക്കു​മ്പോ​ഴോ മറ്റു വിധങ്ങ​ളി​ലോ ആണ്‌ ഇതു സംഭവി​ക്കു​ന്നത്‌. എന്നാൽ ഇത്തരത്തിൽ മനുഷ്യ​രിൽ രോഗം പരത്തുന്ന കീടങ്ങൾ ഒരു ചെറിയ ശതമാ​നമേ ഉള്ളൂ. ഉദാഹ​ര​ണ​ത്തിന്‌, കൊതു​കു​കൾ ആയിര​ക്ക​ണ​ക്കിന്‌ ഇനങ്ങൾ ഉണ്ടെങ്കി​ലും മലമ്പനി പരത്തു​ന്നത്‌ അനോ​ഫി​ലസ്‌ ജീനസിൽപ്പെട്ടവ മാത്ര​മാണ്‌. ക്ഷയരോ​ഗം കഴിഞ്ഞാൽ ലോക​ത്തി​ലെ ഏറ്റവും മാരക​മായ സാം​ക്ര​മിക രോഗ​മാണ്‌ ഇത്‌.

എന്നിരു​ന്നാ​ലും, മറ്റു കൊതു​കു​ക​ളും പലതരം വ്യാധി​കൾ പരത്തുന്നു. ലോകാ​രോ​ഗ്യ സംഘടന ഇപ്രകാ​രം റിപ്പോർട്ടു ചെയ്യുന്നു: “രോഗം പരത്തുന്ന പ്രാണി​ക​ളിൽ ഏറ്റവും  ഭീഷണി ഉയർത്തു​ന്നത്‌ കൊതു​കു​ക​ളാണ്‌. മലമ്പനി, ഡെംഗി​പ്പനി, മഞ്ഞപ്പനി എന്നിവ​യെ​ല്ലാം പരത്തു​ന്നത്‌ അവയാണ്‌. ഇവ മൂന്നും​കൂ​ടി വർഷം​തോ​റും ലക്ഷക്കണ​ക്കി​നു ജീവൻ അപഹരി​ക്കു​ക​യും കോടി​ക്ക​ണ​ക്കിന്‌ ആളുകളെ രോഗ​ബാ​ധി​ത​രാ​ക്കു​ക​യും ചെയ്യുന്നു.” ഭൂമി​യി​ലെ ജനസം​ഖ്യ​യു​ടെ കുറഞ്ഞത്‌ 40 ശതമാനം മലമ്പനി​യു​ടെ ഭീഷണി​യി​ലാണ്‌. ഏതാണ്ട്‌ അത്രയും​തന്നെ ഡെംഗി​യു​ടെ ഭീഷണി​യെ​യും നേരി​ടു​ന്നു. പല സ്ഥലങ്ങളി​ലും ഒരു വ്യക്തി​ക്കു​തന്നെ ഈ രണ്ടു രോഗ​ങ്ങ​ളും പിടി​പെ​ട്ടേ​ക്കാം.

എന്നാൽ ശരീര​ത്തി​നു​ള്ളിൽ രോഗാ​ണു​ക്കളെ വഹിക്കു​ന്നത്‌ കൊതു​കു​കൾ മാത്രമല്ല. സെസി ഈച്ചകൾ പരത്തുന്ന പ്രോ​ട്ടോ​സോവ മൂലം ലക്ഷങ്ങൾക്കു നിദ്രാ​രോ​ഗം പിടി​പെ​ടു​ന്നു. ഈ ഈച്ചകളെ പേടിച്ച്‌, തങ്ങളുടെ ഫലഭൂ​യി​ഷ്‌ഠ​മായ വയലുകൾ ഉപേക്ഷി​ച്ചു പോകാൻ ചില സമൂഹങ്ങൾ നിർബ​ന്ധി​ത​രാ​യി​ത്തീർന്നി​ട്ടുണ്ട്‌. നദിയന്ധത ഉളവാ​ക്കുന്ന പരാദത്തെ പരത്തി​ക്കൊണ്ട്‌ കറുത്തീ​ച്ചകൾ ഏതാണ്ട്‌ 4,00,000 ആഫ്രി​ക്ക​ക്കാ​രെ ഇരുട്ടിൽ ആഴ്‌ത്തി​യി​രി​ക്കു​ന്നു. മണൽ ഈച്ച പരത്തുന്ന പ്രോ​ട്ടോ​സോവ, ആളുക​ളിൽ വൈക​ല്യ​വും വൈരൂ​പ്യ​വും വരുത്തി​വെ​ക്കുന്ന, പലപ്പോ​ഴും മരണത്തിന്‌ ഇടയാ​ക്കുന്ന ലിഷ്‌മ​നൈ​യാ​സിസ്‌ എന്ന വിഭാ​ഗ​ത്തിൽ പെടുന്ന വ്യാധി​കൾക്കു കാരണ​മാ​കു​ന്നു. ഇത്‌ ഇന്നു പ്രായ​ഭേ​ദ​മ​ന്യേ ലോക​മൊ​ട്ടാ​കെ​യുള്ള ദശലക്ഷ​ക്ക​ണ​ക്കിന്‌ ആളുകളെ പിടി​കൂ​ടി​യി​രി​ക്കു​ന്നു. വ്യാപ​ക​മാ​യി കണ്ടുവ​രുന്ന ചെള്ളിന്റെ ശരീര​ത്തിൽ നാടവിര കുടി​പാർക്കു​ന്നു. മസ്‌തിഷ്‌ക വീക്കം, ടുലാ​റീ​മിയ എന്നിവ പരത്താ​നും, മധ്യകാ​ല​ഘ​ട്ട​ത്തിൽ യൂറോ​പ്പി​ലെ ജനസം​ഖ്യ​യു​ടെ മൂന്നി​ലൊ​ന്നോ അതില​ധി​ക​മോ വരുന്ന ജനതതി​യെ ആറു വർഷം​കൊണ്ട്‌ ഭൂമു​ഖത്തു നിന്നു തുടച്ചു​മാ​റ്റിയ കറുത്ത മരണം പോലുള്ള പ്ലേഗുകൾ പരത്താ​നും ഇവയ്‌ക്കു കഴിയും.

പേൻ, മൈറ്റു​കൾ, ടിക്കുകൾ എന്നിവ മറ്റു പല രോഗ​ങ്ങ​ളോ​ടൊ​പ്പം പലതരം ടൈഫ​സും പരത്തുന്നു. മിതോഷ്‌ണ മേഖല​യി​ലുള്ള ടിക്കിന്‌ മനുഷ്യ​നെ തളർത്തി​ക്ക​ള​യാ​നാ​കുന്ന ലൈം രോഗം പരത്തു​ന്ന​തി​നു കഴിയും. യൂറോ​പ്പി​ലും ഐക്യ​നാ​ടു​ക​ളി​ലും രോഗാ​ണു​വാ​ഹി​കൾ പരത്തുന്ന ഏറ്റവും സാധാ​ര​ണ​മായ രോഗ​മാ​ണിത്‌. ദേശാ​ട​ന​പ്പ​ക്ഷി​കൾ ഇവയെ ആയിര​ക്ക​ണ​ക്കി​നു കിലോ​മീ​റ്റർ അകലെ​യുള്ള പുതിയ പ്രദേ​ശ​ങ്ങ​ളിൽ എത്തിക്കു​ക​യും അങ്ങനെ അവിട​ങ്ങ​ളി​ലും രോഗങ്ങൾ പകരാൻ ഇടയാ​ക്കു​ക​യും ചെയ്‌തേ​ക്കാം എന്ന്‌ ഒരു സ്വീഡിഷ്‌ പഠനം വെളി​പ്പെ​ടു​ത്തു​ന്നു. “മറ്റെല്ലാ ആർ​ത്രൊ​പ്പോ​ഡു​ക​ളെ​ക്കാ​ളും (കൊതുക്‌ ഒഴിച്ച്‌) അധികം രോഗങ്ങൾ മനുഷ്യ​നിൽ പരത്തു​ന്നത്‌ ടിക്കു​ക​ളാണ്‌” എന്ന്‌ ബ്രിട്ടാ​നിക്ക പറയുന്നു. വാസ്‌ത​വ​ത്തിൽ,  ഒരൊറ്റ ടിക്കിന്‌ രോഗ​കാ​രി​ക​ളായ മൂന്നു​തരം സൂക്ഷ്‌മാ​ണു​ക്കളെ ഒരേസ​മയം അതിന്റെ ശരീര​ത്തിൽ വഹിക്കാൻ കഴിയും. ഒറ്റത്തവ​ണത്തെ കടിയി​ലൂ​ടെ ഇവയെ​ല്ലാം മനുഷ്യ ശരീര​ത്തി​ലേക്കു സംക്ര​മി​ക്കു​ക​യും ചെയ്‌തേ​ക്കാം!

രോഗ​ങ്ങൾക്ക്‌ “അവധി”

പ്രാണി​കൾ രോഗം പരത്തു​ന്നു​വെന്ന്‌ ശാസ്‌ത്രീ​യ​മാ​യി തെളി​ഞ്ഞത്‌ 1877-ൽ മാത്രം ആയിരു​ന്നു. അന്നുമു​തൽ, രോഗ​വാ​ഹി​ക​ളായ പ്രാണി​കളെ നിയ​ന്ത്രി​ക്കു​ന്ന​തി​നോ നിർമാർജനം ചെയ്യു​ന്ന​തി​നോ വേണ്ടി ബൃഹത്തായ ശ്രമങ്ങൾ നടത്താൻ തുടങ്ങി. 1939-ൽ പ്രാണി​ക​ളോ​ടു പൊരു​തു​ന്ന​തി​നുള്ള ശക്തി​യേ​റിയ ഒരു ആയുധ​മെന്ന നിലയിൽ ഡിഡിറ്റി എന്ന കീടനാ​ശി​നി രംഗ​ത്തെത്തി. 1960-കൾ ആയപ്പോ​ഴേ​ക്കും ആഫ്രി​ക്ക​യ്‌ക്കു പുറത്ത്‌, കീടങ്ങൾ പരത്തുന്ന രോഗങ്ങൾ മേലാൽ പൊതു​ജ​നാ​രോ​ഗ്യ​ത്തിന്‌ ഒരു വൻ ഭീഷണി അല്ലാതാ​യി​ത്തീർന്നു. രോഗ​വാ​ഹി​കളെ നിയ​ന്ത്രി​ക്കുന്ന കാര്യ​ത്തി​ലുള്ള ശ്രദ്ധ കുറയു​ക​യും അടിയ​ന്തിര സാഹച​ര്യ​ങ്ങ​ളിൽ മരുന്ന്‌ ഉപയോ​ഗിച്ച്‌ ചികിത്സ നടത്തു​ന്ന​തി​ലേക്കു ശ്രദ്ധ തിരി​യു​ക​യും ചെയ്‌തു. പ്രാണി​കളെ കുറി​ച്ചും അവയുടെ ആവാസ​വ്യ​വ​സ്ഥയെ കുറി​ച്ചും പഠിക്കു​ന്ന​തി​ലുള്ള താത്‌പ​ര്യം ക്ഷയിച്ചു. പുതിയ മരുന്നു​ക​ളും കണ്ടുപി​ടി​ക്കു​ക​യു​ണ്ടാ​യി. ഏതുതരം രോഗ​ത്തി​നും പറ്റിയ ഒരു “ഒറ്റമൂലി” ശാസ്‌ത്രം കണ്ടുപി​ടി​ച്ചേ​ക്കും എന്ന പ്രതീക്ഷ ഉണർന്നു. സാം​ക്ര​മിക രോഗ​ത്തിന്‌ ലോകം “അവധി” പ്രഖ്യാ​പി​ച്ചു. പക്ഷേ ആ അവധി ഏറെക്കാ​ലം നീണ്ടു​നി​ന്നില്ല. എന്തു​കൊ​ണ്ടെന്ന്‌ പിൻവ​രുന്ന ലേഖനം വ്യക്തമാ​ക്കും. (g03 5/22)

[3-ാം പേജിലെ ആകർഷക വാക്യം]

ഇന്ന്‌, ആറിൽ ഒരാൾ വീതം പ്രാണി​കൾ പരത്തുന്ന ഒരു രോഗ​ത്തിന്‌ അടിമ​യാണ്‌

[3-ാം പേജിലെ ചിത്രം]

ചുംബന പ്രാണി

[4-ാം പേജിലെ ചിത്രം]

ഈച്ച അതിന്റെ കാലു​ക​ളിൽ രോഗ​കാ​രി​കളെ വഹിക്കു​ന്നു

[5-ാം പേജിലെ ചിത്രങ്ങൾ]

പല പ്രാണി​ക​ളും രോഗാ​ണു​ക്കളെ അവയുടെ ശരീര​ത്തി​നു​ള്ളിൽ വഹിക്കു​ന്നു

കറുത്തീച്ച നദിയന്ധത പരത്തുന്നു

മലമ്പനി, ഡെംഗി, മഞ്ഞപ്പനി എന്നിവ പരത്തു​ന്നത്‌ കൊതു​കു​ക​ളാണ്‌

പേൻ ടൈഫസ്‌ പരത്തി​യേ​ക്കാം

ചെള്ളുകൾ മസ്‌തി​ഷ്‌ക​വീ​ക്ക​വും മറ്റു​രോ​ഗ​ങ്ങ​ളും പരത്തുന്നു

സെസി ഈച്ചകൾ നിദ്രാ​രോ​ഗം പരത്തുന്നു

[കടപ്പാട്‌]

WHO/TDR/LSTM

CDC/James D. Gathany

CDC/Dr. Dennis D. Juranek

CDC/Janice Carr

WHO/TDR/Fisher

[4-ാം പേജിലെ ചിത്ര​ങ്ങൾക്ക്‌ കടപ്പാട്‌]

Clemson University - USDA Cooperative Extension Slide Series, www.insectimages.org