ഹാൻബോക്ക്‌—കൊറി​യ​യു​ടെ ദേശീ​യ​വേ​ഷം

കൊറിയൻ റിപ്പബ്ലി​ക്കി​ലെ ഉണരുക! ലേഖകൻ

കൊറി​യ​ക്കാർക്ക്‌ വസ്‌ത്രങ്ങൾ ശരീരം മറയ്‌ക്കാ​നു​ള്ളവ മാത്രമല്ല. കൊറി​യ​യു​ടെ ഹാൻബോക്ക്‌ എന്ന പരമ്പരാ​ഗത വേഷം അടുത്തു​പ​രി​ശോ​ധി​ച്ചാൽ നമുക്കതു മനസ്സി​ലാ​കും.

ഒരു അനുപ​മ​മായ ഡിസൈൻ

ബൊ​ലേ​റോ സ്റ്റൈലി​ലുള്ള—അയഞ്ഞ, മുൻഭാ​ഗം തുറന്ന—ബ്ലൗസും നീണ്ട പാവാ​ട​യും തനതായ, ആനുപാ​തി​ക​മായ അളവിൽ ഒത്തിണക്കി തയ്‌ച്ചെ​ടുത്ത വേഷമാണ്‌ ഹാൻബോക്ക്‌. a ചില​പ്പോൾ പാവാ​ട​യ്‌ക്ക്‌ ബ്ലൗസിന്റെ നാലി​രട്ടി നീളം കണ്ടേക്കാം. അതു​കൊണ്ട്‌ ഇതു ധരിക്കുന്ന പൊക്കം കുറഞ്ഞ സ്‌ത്രീ​കൾക്കും പൊക്കം തോന്നി​ക്കും.

ഹാൻബോ​ക്കിന്‌ അത്ര വ്യക്തമാ​യി കാണാൻ പറ്റാത്ത നേർത്ത ചുളി​വു​ക​ളും വരകളു​മുണ്ട്‌. ബ്ലൗസിന്റെ കൈകൾ ചിറകു​കൾപോ​ലെ വിടരുന്ന തരത്തി​ലു​ള്ള​താണ്‌. മാറി​ട​ത്തിൽനി​ന്നു തറയി​ലൂ​ടെ ഒഴുകി​ക്കി​ട​ക്കുന്ന രീതി​യി​ലു​ള്ള​താണ്‌ പാവാട. അതു​പോ​ലെ​ത്തന്നെ ബ്ലൗസിന്‌ മാറിന്റെ മധ്യഭാ​ഗ​ത്താ​യി റിബൺകൊ​ണ്ടുള്ള മനോ​ഹ​ര​മായ ഒരു പ്രത്യേ​ക​തരം കെട്ടുണ്ട്‌. റിബണി​ന്റെ രണ്ടറ്റങ്ങ​ളും ഒരു വശത്തു​കൂ​ടെ താഴോ​ട്ടു കണങ്കാൽ വരെ നീണ്ടു​കി​ട​ക്കും. പല ഹാൻബോ​ക്കു​ക​ളു​ടെ​യും പാവാ​ട​യി​ലും ബ്ലൗസിന്റെ കഴുത്തി​ലും കൈക​ളി​ലും മറ്റും പൂക്കളു​ടെ എം​ബ്രോ​യ്‌ഡ​റി​ക​ളും ജ്യോ​മ​ട്രിക്‌ ഡി​സൈ​നു​ക​ളും ഉണ്ട്‌. അതേ, പിഴവറ്റ അനുപാ​ത​വും വരകളും നിറങ്ങ​ളും എല്ലാം കൂടി ഹാൻബോ​ക്കി​നെ നിശ്ചയ​മാ​യും കമനീ​യ​മാ​ക്കി​യി​രി​ക്കു​ന്നു!

സൗകര്യ​പ്ര​ദ​മായ ഒരു വേഷവി​ധാ​നം

ഹാൻബോക്ക്‌ പ്രാ​യോ​ഗി​ക​മായ വിധത്തി​ലാ​ണു ഡിസൈൻ ചെയ്‌തി​രി​ക്കു​ന്നത്‌. അത്‌ ഈ വേഷത്തി​ന്റെ അഴകിനു മിഴി​വേ​കു​ന്നു. ഇതു സാധാ​ര​ണ​മാ​യി പ്രകൃ​തി​യിൽനി​ന്നു കിട്ടുന്ന നാരുകൾ ഉപയോ​ഗി​ച്ചു നെയ്‌തെ​ടു​ക്കു​ന്നത്‌ ആയതി​നാൽ വർഷത്തി​ലു​ട​നീ​ളം ഏതു കാലാ​വ​സ്ഥ​യി​ലും ധരിക്കാ​വു​ന്ന​താണ്‌. ചൊറി​യ​ണ​ത്തി​ന്റെ ജനുസ്സിൽപ്പെട്ട നാരുള്ള ഒരുതരം ചെടി, ചണം എന്നിവ​യിൽനിന്ന്‌ എടുക്കുന്ന നാരു​കൾകൊണ്ട്‌ ഉണ്ടാക്കുന്ന ഹാൻബോക്ക്‌ ധരിച്ചാൽ ശരീര​ത്തിൽ നല്ല വായു​സ​ഞ്ചാ​രം കിട്ടും. അതിനാൽ, ഈ വസ്‌ത്രം ശരീരം മുഴു​വ​നും മൂടി​ക്കി​ട​ക്കു​ന്ന​താ​ണെ​ങ്കി​ലും വേനൽക്കാ​ലത്ത്‌ അതു ധരിക്കുന്ന ആൾക്കു കുളിർമ തോന്നും. ഹാൻബോ​ക്കു​കൾ തയ്‌ക്കാൻ ഉപയോ​ഗി​ക്കുന്ന മറ്റു ചിലയി​നം തുണികൾ ശരീര​ത്തി​ന്റെ ചൂടു നിലനി​റു​ത്തു​ന്നവ ആയതി​നാൽ ശൈത്യ​കാ​ല​ത്തി​നു കൂടുതൽ അനു​യോ​ജ്യ​മാണ്‌.

ഹാൻബോക്ക്‌ ധരിക്കാൻ സുഖക​ര​മാണ്‌. ഇതിനു ഫാഷൻ ലോക​വു​മാ​യി ബന്ധമൊ​ന്നു​മില്ല.  ഇതിന്റെ ഉത്ഭവം നൂറ്റാ​ണ്ടു​കൾക്ക​പ്പു​റ​ത്തു​നി​ന്നാണ്‌. ഈ പ്രദേ​ശത്തു കുതി​ര​കളെ വ്യാപ​ക​മാ​യി ഉപയോ​ഗി​ച്ചു​വ​ന്നി​രുന്ന ഒരു കാലഘ​ട്ട​ത്തിൽ കുതി​ര​സ​വാ​രി​ക്കു പറ്റിയ തരത്തിൽ ഡിസൈൻ ചെയ്‌ത വസ്‌ത്ര​മാ​ണിത്‌. സംസ്‌കാ​ര​വും ഞാനും (ഇംഗ്ലീഷ്‌) എന്ന മാസിക ഇപ്രകാ​രം പറയുന്നു: “അന്നത്തെ ശൈത്യ​കാ​ലാ​വസ്ഥ, വേട്ടയാ​ടൽ, നാടോ​ടി ജീവിതം ഇവയോ​ടൊ​ക്കെ ചേർന്നു​പോ​കത്തക്ക രീതി​യിൽ രൂപ​പ്പെ​ടു​ത്തി​യ​താ​ണിത്‌.” കൊറി​യ​യി​ലെ കുതി​ര​സ​വാ​രി​ക്കാർ തങ്ങളുടെ ചലനസ്വാ​ത​ന്ത്ര്യ​ത്തെ പരിമി​ത​പ്പെ​ടു​ത്താത്ത തരത്തി​ലുള്ള വസ്‌ത്ര​ങ്ങ​ളാ​ണു ധരിച്ചി​രു​ന്നത്‌. ഇന്ന്‌ ഹാൻബോക്ക്‌ ധരിക്കാൻ ഇഷ്ടപ്പെ​ടുന്ന കൊറി​യ​ക്കാർ ഈ വസ്‌ത്ര​ത്തി​ന്റെ സൗകര്യ​ത്തെ​യും സുഖ​ത്തെ​യും പ്രതി തങ്ങളുടെ പൂർവി​ക​രോ​ടു കടപ്പെ​ട്ടി​രി​ക്കു​ന്നു!

ഹാൻബോ​ക്കി​ന്റെ മറ്റൊരു രസകര​മായ സവി​ശേഷത, ഒരു പൗരാ​ണിക പാരമ്പ​ര്യ​ത്തോ​ടു ബന്ധപ്പെ​ട്ട​താണ്‌. ചില പ്രത്യേക കാര്യങ്ങൾ ദ്യോ​തി​പ്പി​ക്കു​ന്ന​തി​നാ​യി അവർ വ്യത്യസ്‌ത നിറത്തി​ലുള്ള ഹാൻബോക്ക്‌ ഉപയോ​ഗി​ച്ചി​രു​ന്നു. കഴിഞ്ഞ കാലങ്ങ​ളിൽ, കൊറി​യ​യു​ടെ ഭരണവർഗം തങ്ങളുടെ പ്രൗഢി​യും പ്രതാ​പ​വും വിളി​ച്ചോ​തുന്ന തരത്തി​ലുള്ള നിറങ്ങ​ളാണ്‌ തിര​ഞ്ഞെ​ടു​ത്തി​രു​ന്നത്‌. കർഷകർ ധരിച്ചി​രുന്ന ഹാൻബോ​ക്കു​കൾക്കാ​കട്ടെ മിക്കവാ​റും വെള്ളനി​റ​മാ​യി​രു​ന്നു. ഇനി, മഞ്ഞയും ചുവപ്പും ഇടകലർന്ന വസ്‌ത്രം ധരിക്കുന്ന പെൺകു​ട്ടി അവിവാ​ഹി​ത​യാ​ണെന്നു മനസ്സി​ലാ​ക്കാൻ കഴിയു​മാ​യി​രു​ന്നു. വിവാ​ഹ​ശേഷം അവളുടെ ഹാൻബോ​ക്കി​ന്റെ നിറം ഭർത്താ​വി​ന്റെ നിലയും വിലയും അനുസ​രി​ച്ചു​ള്ള​താ​യി​രി​ക്കും. ഇന്ന്‌, വിവാ​ഹ​വേ​ള​ക​ളിൽ വധുവി​ന്റെ അമ്മ ഇളം​റോസ്‌ നിറമുള്ള ഹാൻബോക്ക്‌ ധരിക്കാൻ പ്രതീ​ക്ഷി​ക്ക​പ്പെ​ടു​ന്നു. നീല നിറമു​ള്ള​താണ്‌ സാധാരണ വരന്റെ അമ്മ ധരിക്കാ​റു​ള്ളത്‌. ഏതായാ​ലും ഈ രീതി​മൂ​ലം അവരെ തിരി​ച്ച​റി​യാൻ വളരെ എളുപ്പ​മാണ്‌.

ഇന്നത്തെ ഹാൻബോക്ക്‌

കൊറി​യൻ യുദ്ധത്തെ (1950-53) തുടർന്ന്‌ ഒരു ആധുനി​ക​വ​ത്‌കരണ സംരംഭം അരങ്ങേ​റു​ക​യു​ണ്ടാ​യി. ഫലമോ? 1970-കളിൽ നമ്മുടെ ഹാൻബോ​ക്കി​നെ പഴഞ്ചനാ​യി തള്ളിക്ക​ളഞ്ഞു. പകരം പാശ്ചാത്യ വസ്‌ത്ര​ധാ​ര​ണ​രീ​തി​കൾ സ്ഥാനം​പി​ടി​ച്ചു. അങ്ങനെ, ഒരിക്കൽ നിത്യ​ജീ​വി​ത​ത്തി​ന്റെ ഭാഗമായ ഈ വസ്‌ത്രം അലമാ​ര​യിൽ ഒതുങ്ങി​ക്കൂ​ടി, വല്ലപ്പോ​ഴും വിവാ​ഹ​ങ്ങൾക്കോ ഉത്സവങ്ങ​ളി​ലോ വിശേ​ഷ​ദി​വ​സ​ങ്ങ​ളി​ലോ ഒന്നു മുഖം കാണി​ച്ചാ​ലാ​യി.

എന്നാൽ, അടുത്ത​കാ​ല​ത്താ​യി ഹാൻബോക്ക്‌ ഒരു തിരി​ച്ചു​വ​രവു നടത്തു​ക​യാണ്‌. ഉദാഹ​ര​ണ​ത്തിന്‌ 1996-ൽ, എല്ലാ മാസത്തി​ന്റെ​യും ആദ്യശ​നി​യാ​ഴ്‌ചയെ “ഹാൻബോക്ക്‌ ധരിക്കാ​നുള്ള ദിവസ​മാ​ക്കി.” ഈ വസ്‌ത്ര​ധാ​രണ രീതിക്കു ജനസമ്മി​തി നേടി​ക്കൊ​ടു​ക്കാ​നുള്ള ശ്രമത്തി​ന്റെ ഭാഗമാ​യി​രു​ന്നു ഇത്‌. വസ്‌ത്ര​നിർമാ​താ​ക്കൾ യുവഹൃ​ദ​യ​ങ്ങൾക്ക്‌ ഇഷ്ടപ്പെ​ടുന്ന രൂപത്തി​ലും ഭാവത്തി​ലും പുതിയ ഹാൻബോ​ക്കു​കൾ വിപണി​യി​ലി​റക്കി. പഴമയി​ലേക്കു തിരി​ച്ചു​പോ​കു​ന്ന​തിൽ ആളുകൾക്ക്‌ എന്തോ ഒരു വൈകാ​രിക സംതൃ​പ്‌തി ഉണ്ടെന്നു​തോ​ന്നു​ന്നു. കാരണം ഹാൻബോ​ക്കി​നെ ആളുകൾ ഇരു​കൈ​യും നീട്ടി സ്വീക​രി​ച്ചു. ആധുനിക ഫാഷൻ വസ്‌ത്ര​ങ്ങ​ളിൽ മിക്കവ​യും ലൈം​ഗി​ക​വി​കാ​രം ഉണർത്തുന്ന തരത്തി​ലു​ള്ളത്‌ ആയിരി​ക്കെ, ഹാൻബോക്ക്‌ മാന്യ​വും മനോ​ഹ​ര​വു​മായ ഉടയാ​ട​കൾക്കൊ​രു മകു​ടോ​ദാ​ഹ​ര​ണ​മാ​യി നില​കൊ​ള്ളു​ന്നു.—1 തിമൊ​ഥെ​യൊസ്‌ 2:9. (g04 11/8)

[അടിക്കു​റിപ്പ്‌]