Ishworna phattaba meesing amasung ngasi thokliba phattaba thoudok wathok pumnamak thuna loisillagani haibasigi maramda mamanggi pandupsingdagi khangkhre. Mahakna hairibasi soidana pangthokkani haibasi eikhoina thajaba yai. Maramdi, Bibleda asumna hairi:

“Taibangpan...mangsillakli.”—1 JOHAN 2:17

Adubu Ishworna taibangpansi loisinba matamda meeoi kharadi soidana hinghougani haibasi eikhoina thajaba yai. Maramdi Bibleda asumnasu hairi:

“Ishworgi aningba touba mahak adu matam pumnamakta lengdana lei.”

Maram asina, aroiba lakpa matamda hinghounabagi maruoiba pambeidi Ishworgi apamba touba haibasini. Ishworgi apambadu karino haiba khangnabagidamak eikhoina mahakki maramda hanna phajana khangba tai.

Jishuna hairammi: “Amata ngaiba achumba Ishwor nahak...khangba asi lomba naidaba hingbani.” (Johan 17:3) Adunadi taibangpansi loiba matamda hinghounaba amasung anouba taibangpanduda lomba naidana hingba phangnabagidamak eikhoina Ishworbu “khangba” haibasi darkar oi. Ishwor khangba hairibasi Ishwor ama lei haina thajaba aduga magi maramda kharakhak khangbadu natte. Adubu channaraba marup amaga aphaba mari thambagumna Ishworga eikhoiga aphaba mari ama thamgadabani. Marup amaga aphaba mari thamnabagidamak eikhoina mahakka loinanaba matam kaithokpa darkar oi. Maduga chap mannana Ishworga marup oibagi achetpa mari thamnabagidamak matam kaithoktuna eikhoina mahakki maramda phajana khangnaba hotnagadabani. Masigi matangda Bibledagi achumba wapham khara yengsi.

Hingnabagidamak eikhoina numit khudinggi chang naina chinjak chai. Adubu Jishuna asumna hairammi: “Meeoibana taltana hingloi, adubu Ishworgi chindagi thoklakpa wahei khudinggi mapanna hinggani.”—Maathi 4:4

Ngasi eikhoina Ishwor Jehovahgi waheising Bibledagi khangba ngammi. Eikhoina asengba lairik asi paba amasung neinaba matamda mahakna meeoibasinggidamak mamangeida kari toukhibage, houjikna kari touribage amasung tungdana kari tourakkadouribage haibadu khangba ngamgani.

Karigumba nahakna Ishworna takpi tambiribasing asi illaga chatchaninglabasu mahakna yadaba thabak khara thadokpa ngamdana leirabadi, matangduda nahakna kari touba yabage? Ishworgi maramda munna khangnaba hotnabiyu. Adumna touba matamda nangonda mateng yamna phangjagani.

Sakura koubi nupi amagi matangda yengsi. Mahak lamchat oktabi oirammi. Adubu mahakna Bible neinaba hourakpa matamda Ishworna “nupa nupi lannabadagi chenthok-u” haina yathang piri haibasi khanglakkhi. (1 Corinthiya 6:18) Mahakna touriba phattaba thabaktu thadokpa ngamnaba panggal pibiyu haina Sakurana Ishworda haijakhi amasung thadokpasu ngamkhi. Adubu houjiksu mahak phattaba lamchatta amuk hanna tadanaba kanna hotnei. Mahakna hai, “Eingonda aranba wakhal hek phaorakpa matamda eina Ishwor Jehovahda haijei. Ei isagi panggalna oiriba phibamdu maiyoknaba ngamloi haiba khangjaba maramna eingonda phaoribasingdu mahakki maphamda thamoi sengna phongdokchei. Asumna toujabana eina Ishwor Jehovahda henna naksinjaba ngammi.” Sakuragumna ngasi meeoi lakh kayana Ishwor Jehovahgi maramda phajana khangnaba hotnari. Meeoising aduna makhoigi punsidu achumba lambida chatchanaba hotnaba amasung mahakna pamba thabaksing tounaba hotnajaba matamda Ishwor Jehovahna makhoida panggal thouna pibi.—Philippiya 4:13

Nahakna Ishworbu munna khangjaba hellimakhei Ishwornasu nahakpu henna khangbigani. Aduga nahak Ishworgi channaraba marup ama oibasu yagani. (Galatiya 4:9; Thagat Ishei 25:14) Adudagidi anouba taibangpandu lakpa matamda nahak hingba phanggani. Adubu hairiba taibangpanduda kari kari oigadage? Madugi matangda mathanggi pandupta sandokna takli.