“Maram aduna miseng khaang-u, maramdi migi machanipa aduna lenglakkadaba numit nattraga pungpham adu nakhoina khangde.”—MAATHI 25:13

“Cheksillu, miseng khaang-u…maramdi matam adu karamba matamda oigadage haiba nakhoina khangde.”—MARK 13:33

Maram asina, prithibida leiriba meeoiba amattana ngasigi taibangpansi karamba matamda loigani haibadu khangba ngamde. Adubu Ishwornadi masigidamak akaknaba “numit amasung pungpham” ama lepkhrabani. (Maathi 24:36) Masi hai haiduna aroiba matam nakkhre haibasi khangnaba pambei amatta leitrabra? Adudi natte. Jishuna prithibida leiringeida mahakki tunginbasingda tongan tonganba thoudok kayagi maramda hairammi. Makhoina thoudoksingdu thokpa uba matamda aroibadu yamna nakkhre haiba khang-u hainasu hairammi.

Jishuna ngasigi phattaba taibangpansi loiramdaida karam karamba thoudoksing thokkadage haibadu mangjounana haidoklammi. Mahakna hairammi: “Jati amana jati amagi mathakta amasung ningthou leibak amana ningthou leibak amagi mathakta hourakkani. Aduga mapham kayada chaktangba, laichat amasung yuharaba thokkani.” (Maathi 24:3, 7) “Sathiba lainasing thokkani” hainasu mahakna hairammi. (Luke 21:11) Jishuna mangjounana haidoklamba thoudoksing asimak ngasidi eikhoigi mitmangda thokle haina khanbibra?

Ngasi eikhoigi matamsida tamthiraba laan, chaktangba, yuharaba amasung sathiraba laina kayana meeoibasingbu leppa leitana awaba piri. Khudam oina, sok 2004 da Bharat Mahasagarda yamna kanna yuhar hakhi. Maduda hourakkhiba tsunamigi achouba ithakna yamdrabada meeoi 2,25,000 romgi punsi manghankhi. Houkhiba chahi ahum asida COVID-19 gi laichatna maram oiraga malem pumbada chaorakna meeoi 69,00,000 gi punsi mangkhi. Asigumba thoudoksingsi thoklabadi ngasigi taibangpansi loigadaba matam naklabani haiba khang-u haina Jishuna hairammi.

Taibangpan loiramdai yamna naksillakpa matam asibu Bibleda “aroiba matam” kou-ee haina khanghalli. (2 Peter 3:3, 4) Aroiba matamda meesingna masa mathantabu nungsiba, meehouchaoba, sathiba, nungsiheitaba haibanachingba phattaba sajat lichat kaya chatlakkani hainasu Bibleda phongdok-ee. (2 Timothy 3:1-5; “ Taibangpansi Loidringeigi Hek Mamangda Oigadaba Phibhamsing” hairiba kakhal asi yengbiyu.) Asigumba sajat lichatsingsi ngasi eikhoigi imangmaktada uri haibasi yabiningbra? Adunadi eikhoina hingliba ngasigi taibangpansi loigadaba matam yamna nakle haibasi masinasu praman pi.

Aroiba matamsi kayam sanggadouribano? Biblegi matunginna, hairiba matamsi yamna “telli” haina khanghalli.—Phongdokpiba 11:15-18; 12:12

Ngasigi phattraba taibangpan asi loisingadaba numit amasung pungpham adu Ishworna mangjounana lepkhrabani. (Maathi 24:36) Adubu nungainingai oiba waphamdi, Ishworna “mee amatabu” manghanningde. (2 Peter 3:9) Ngasigi taibangpansi loisinba matamda eikhoi khudingmak hinghouba amasung leikolgum phajaraba anouba taibangpanduda nungaina leiba haibasi Ishworgi apambani. Maram asina, Ishworna eikhoi meeoiba khudingmakna mahakki maramda khangnaba amasung mahakki apamba touraga hingjanabagi tanja piri.

Taibangpansi loidringeigi mamangda Ishworgi Ningthou Leibakki aphaba wapao asi “taibangpan apumbada sandokkani” haina Jishuna hairammi. (Maathi 24:14) Prithibi pumbada Jehovahgi Sakhisingna hairiba Ishworgi leingak amasung masina sashan tougadouriba anouba taibangpanduda karamna hinghouba yagani haibagi maramda meesingda takpi tambiri. Makhoina meesingda paosi pinaba amasung masigi maramda takpi tambinabagidamak pung crore kaya kaya kaithokkhi. Jishuna hairambadumak houjik houjik oirabanina taibangpansi loigadaba matam yamna nakkhre haibasi eikhoina khangba ngamle.

Meeoibagi leingak sashan asi thunamak loikhragani. Adubu nungainingai oiba waphamdi ngasigi taibangpansi loisinba matamduda nahak hinghouba yagani amasung Ishworna pubirakkani haina washakpiriba leikolgum phajaraba anouba taibangpan aduda leiba phanggani. Madu karamna oithokpa yagani haibagi matangda mathanggi pandupta neinagani.