মমাঙগী হীরমদা যীশুনা মাঙজৌননা হায়রম্বা থৌদোকশিংগী মতাংদা খন্নখ্রে। ঈশ্বরগী নিংথৌলৈবাক অসি স্বর্গদা লিংখৎখ্রে অমসুং মদুগী নিংথৌনা যীশু খৃষ্টনি হায়বসি থৌদোকশিং অদুদগী ঐখোয়না ময়েক শেংনা খঙবা ঙম্লে।

নিংথৌ ওইরবা মতুংদা যীশুনা সৈতান অমসুং মহাক্কী তুংইনবা স্বর্গদুতশিংবু স্বর্গদগী পৃথিবীদা হুন্থরকখি হায়না বাইবলনা খঙহল্লি। অদুনা শোক ১৯১৪ দগী পৃথিবীদা ফত্তবা খংহেন হেনগৎলকখিবগী মরুওইবা মরম অমদি মখোয়না পৃথিবীদা লাকখিবদগিনি।—ফোংদোকপিবা ১২:৭, ৯.

ঙসি তাইবংপানগী ফিভম হেন্না হেন্না ফৎচিল্লক্ত্রবসু ঈশ্বরগী নিংথৌলৈবাক্কী নিংথৌ ওইরিবা যীশুনা পৃথিবীদা লৈরিবা মীশিংবু মতেং পাংনবগীদমক থবক কয়া তৌরি। যীশুনা মাঙজৌননা হায়রম্বগুম্না ঙসি পৃথিবী শীনবা থুংনা বাইবল তাকপী তম্বীবগী থবক তৌরি। (যিশাইয়া ২:২-৪) তাকপী তম্বীবা অসিদগী মীওই কয়ানা বাইবলগী নিয়মশিং মখোয়গী পুন্সিদা ইল্লগা চৎনবা হোৎনরি। মীওই লাখ কয়ানা থবক ইনখাঙ অমসুং শেল থুমগী মতাংদা করম্বা ৱাখল্লোন লৈজগদগে, ইমুং মনুং করম্না নুংঙাইনা লৈমিন্নগদগে হায়বদু খঙলকপদগী মখোয়গী পুন্সিদা কান্নবা কয়া ফংলে। তুংদা ঈশ্বরগী নিংথৌলৈবাক্কী প্রজা অমমম ওইনবা মখোয়না হৌজিক্তগী শেম শারি।

স্বর্গদা যীশুনা শাসন তৌবা হৌখ্রে অদুবু পৃথিবীদদি মীওইবগী লৈঙাকশিং অদুমক লৈরি। অদুম ওইনমক, “নহাক্কী য়েক্নবশিংগী মরক্তা পাল্লু” হায়না ঈশ্বরনা যীশুদা য়াথং পীখ্রে। (থাগৎ ঈশৈ ১১০:২) থুনমক, যীশুনা ঈশ্বরগী মাইয়োক্তা লৈবশিংবু মপুংফানা মাঙহল্লগনি, অদুগা ঈশ্বরগী য়াথং হরাও হরাওনা ইঞ্জবশিংগী অৱা অনা পুম্নমক লৌথোকখ্রগনি।

মতম অদুদা ঈশ্বরগী নিংথৌলৈবাক্না তৌরক্কদবা থবকশিং

• অরানবা ধর্ম্ম মাঙহনবা। ঈশ্বরগী মরমদা অরানবা কয়া তাকপী তম্বীদুনা মীশিংগী পুন্সিবু ৱাহনবা ধর্ম্ম খুদিংমক মাঙহল্লগনি। বাইবলনা অরানবা ধর্ম্মবু ওক্তবী অমগা চাংদম্নৈ। মসি মাঙ তাকহনবা মতমদা মীওই কয়ানা য়াম্না ঙকপা ফাওগনি। —ফোংদোকপিবা ১৭:১৫, ১৬.

• মীওইবগী লৈঙাকশিং লৌথোকপা। ঈশ্বরগী নিংথৌলৈবাক্না ঙসি পাল্লিবা মীওইবগী লৈঙাক পুম্নমক লৌথোকখ্রগনি।—ফোংদোকপিবা ১৯:১৫, ১৭, ১৮.

• ফত্তবা মীশিং মাঙহনবা। ঈশ্বরনা হায়বা ইল্লু য়াদবা ফত্তবা তৌরগা লৈবশিংগী মরমদা বাইবলনা অসুম্না হায়: “ফত্তবা তৌবশিং মাঙহল্লগনি।”—থাগৎ ঈশৈ ৩৭:৯, ১০.

• সৈতান অমসুং মহাক্কী তুংইনবা স্বর্গদুতশিং মরু ফংনা মুত্থৎপা। সৈতান অমসুং মহাক্কী তুংইনবা স্বর্গদুতশিংনা ‘জাতিশিংবু অমুক হন্না মীনম্বা ঙম্লরোই।’—ফোংদোকপিবা ২০: ৩, ১০.

অসিগুম্বা অহোংবা কয়াশিং অসিনা ঈশ্বরগী নিংথৌলৈবাকপু য়াজবা মীশিংদা করি করি কান্নবা ফংহনগনি?

যীশুনা স্বর্গদা নিংথৌ ওইনা পান্দুনা মীওইবগী লৈঙাকপশিংনা কৈদৌনুংদা তৌবা ঙম্লরোইদবা থবক কয়া তৌরক্কনি। পৃথিবীদগী খনগৎখ্রবা মীওই ১,৪৪,০০০ গা লোয়ননা যীশুনা শাসন তৌগনি। (ফোংদোকপিবা ৫:৯, ১০; ১৪:১, ৩) মহাক্না পৃথিবীদা ঈশ্বরগী অনীংবদু শোয়দনা পাঙথোক্কনি। ঈশ্বরগী নিংথৌলৈবাক্না পৃথিবীদা লৈরিবা মীওইশিংগীদমক তৌরক্কদবা থবকশিংদু য়েংসি

• অশিবা অমসুং অনাবা লৈররোই। “খুন্দারিবা অদুনা হায়ররোই, “ঐ নারে””অমসুং “অমুক হন্না শিবা . . . লৈররোই।”—যিশাইয়া ৩৩:২৪; ফোংদোকপিবা ২১:৪.

• ঈঙথনা অমসুং অশোয় অঙাম য়াওদনা লৈগনি। “নহাক্কী নচাশিংদা য়াম্না ঈঙথবা লৈগনি” অমসুং “মখোয় মী খুদিংনা মাগী মাগী অঙ্গুর পাম্বী মখাদা অমসুং মাগী মাগী হৈয়িৎ পাম্বী মখাদা ফমথগনি, কনা অমতনা মখোয়বু কিহল্লোই।”—যিশাইয়া ৫৪:১৩; মীকা ৪:৪.

• নুংঙাইবা থবকশিং লৈগনি। “মখোয়গী মখূৎকী থবক্তা মতম কুইনা নুঙাইজগনি। মখোয়না অরেম্বদা নোম্লোই।”—যিশাইয়া ৬৫:২২, ২৩.

• অকোয়বগী ফিভম ফগৎহনগনি। “লমহাঙ অমসুং ইকং কংবা লম্না মখোয়গীদমক নুঙাইগনি, লৈকংলানা হরাউজগনি অমসুং গুলাপকুম্না শাৎকনি।”—যিশাইয়া ৩৫:১.

• লোম্বা নাইদনা হিংবা ফংজনবগীদমক করি তৌগদগে হায়বদু মীশিংদা তাকপীগনি। “অমতা ঙায়বা অচুম্বা ঈশ্বর নহাক অমসুং নহাক্না থারকপা যীশু খৃষ্টবু মখোয়না খঙবা অসি লোম্বা নাইদবা হিংবনি।”—যোহান ১৭:৩.

থৌজালশিং অসি নহাক্না ফংজবদু ঈশ্বরনা পাম্মী। (যিশাইয়া ৪৮:১৮) নুংঙাইরবা মতম অদুদা হিংবা ফংনবগীদমক নহাক্না হৌজিক করি করি তৌবা য়াবগে হায়বদু মথংগী হীরমদা শন্দোক্না তাক্কনি।