“মরম অদুনা মীশেং খাঙউ, মরমদি মীগী মচা নিপা অদুনা লেঙলক্কদবা নুমিৎ নত্ত্রগা পুংফম অদু নখোয়না খঙদে।”—মাত্থি ২৫:১৩

“চেকশিল্লু, মীশেং খাঙউ . . . মরমদি মতম অদু করম্বা মতমদা ওইগদগে হায়বা নখোয়না খঙদে।”—মার্ক ১৩:৩৩

মরম অসিনা, পৃথিবীদা লৈরিবা মীওইবা অমত্তনা ঙসিগী তাইবংপানসি করম্বা মতমদা লোইগনি হায়বদু খঙবা ঙমদে। অদুবু ঈশ্বরনদি মসিগীদমক অককনবা “নুমিৎ অমসুং পুংফম” অমা লেপখ্রবনি। (মাত্থি ২৪:৩৬) মসি হায় হায়দুনা অরোয়বা মতম নকখ্রে হায়বসি খঙনবা পাম্বৈ অমত্তা লৈত্রব্রা? অদুদি নত্তে। যীশুনা পৃথিবীদা লৈরিঙৈদা মহাক্কী তুংইনবশিংদা তোঙান তোঙানবা থৌদোক কয়াগী মরমদা হায়রম্মী। মখোয়না থৌদোকশিংদু থোকপা উবা মতমদা অরোয়বদু য়াম্না নকখ্রে হায়বা খঙউ হায়নসু হায়রম্মী।

যীশুনা ঙসিগী ফত্তবা তাইবংপানসি লোইরমদাইদা করম করম্বা থৌদোকশিং থোক্কদগে হায়বদু মাঙজৌননা হায়দোক্লম্মী। মহাক্না হায়রম্মী: “জাতি অমনা জাতি অমগী মথক্তা অমসুং নিংথৌ লৈবাক অমনা নিংথৌ লৈবাক অমগী মথক্তা হৌরক্কনি। অদুগা মফম কয়াদা চাক্তাঙবা, লাইচৎ অমসুং য়ুহারাবা থোক্কনি।” (মাত্থি ২৪:৩, ৭) “শাথিবা লায়নাশিং থোক্কনি” হায়নসু মহাক্না হায়রম্মী। (লূক ২১:১১) যীশুনা মাঙজৌননা হায়দোক্লম্বা থৌদোকশিং অসিমক ঙসিদি ঐখোয়গী মীৎমাঙদা থোক্লে হায়না খনবীব্রা?

ঙসি ঐখোয়গী মতমসিদা তমথীরবা লান, চাক্তাঙবা, য়ুহারাবা অমসুং শাথিরবা লায়না কয়ানা মীওইবশিংবু লেপ্পা লৈতনা অৱাবা পীরি। খুদম ওইনা, শোক ২০০৪ দা ভারত মহাসাগরদা য়াম্না কন্না য়ুহার হাখি। মদুদা হৌরকখিবা সুনামিগী অচৌবা ঈথক্না য়ামদ্রবদা মীওই ২,২৫,০০০ রোমগী পুন্সি মাঙহনখি। হৌখিবা চহি অহুম অসিদা কোভিদ-১৯ গী লাইচৎনা মরম ওইরগা মালেম পুম্বদা চাওরাক্না মীওই ৬৯,০০,০০০ গী পুন্সি মাঙখি। অসিগুম্বা থৌদোকশিংসি থোক্লবদি ঙসিগী তাইবংপানসি লোইগদবা মতম নক্লবনি হায়বা খঙউ হায়না যীশুনা হায়রম্মী।

তাইবংপান লোইরমদাই য়াম্না নকশিল্লকপা মতম অসিবু বাইবলদা “অরোইবা মতম”কৌই হায়না খঙহল্লি। (২ পিতর ৩:৩, ৪) অরোয়বা মতমদা মীশিংনা মশা মথন্তবু নুংশিবা, মীহৌচাওবা, শাথিবা, নুংশিহৈতবা হায়বনচিংবা ফত্তবা শাজৎ লীচৎ কয়া চৎলক্কনি হায়নসু বাইবলদা ফোঙদোকই। (২ তীমোথি ৩:১-৫; “ তাইবংপানসি লোইদ্রিঙৈগী হেক মমাঙদা ওইগদবা ফিভমশিং” হায়রিবা কাখল অসি য়েংবিয়ু।) অসিগুম্বা শাজৎ লীচৎশিংসি ঙসি ঐখোয়গী ইমাঙমক্তদা উরি হায়বসি য়াবিনিংব্রা? অদুনদি ঐখোয়না হিংলিবা ঙসিগী তাইবংপানসি লোইগদবা মতম য়াম্না নক্লে হায়বসি মসিনসু প্রমান পী।

অরোয়বা মতমসি কয়াম শাংগদৌরিবনো? বাইবলগী মতুংইন্না, হায়রিবা মতমসি য়াম্না “তেল্লি” হায়না খঙহল্লি।—ফোংদোকপিবা ১১:১৫-১৮; ১২:১২

ঙসিগী ফত্ত্রবা তাইবংপান অসি লোইশিনগদবা নুমিৎ অমসুং পুংফম অদু ঈশ্বরনা মাঙজৌননা লেপখ্রবনি। (মাত্থি ২৪:৩৬) অদুবু নুংঙাইনিংঙাই ওইবা ৱাফমদি, ঈশ্বরনা “মী অমতবু” মাঙহন্নীংদে। (২ পিতর ৩:৯) ঙসিগী তাইবংপানসি লোইশিনবা মতমদা ঐখোয় খুদিংমক হিংহৌবা অমসুং লৈকোলগুম ফজরবা, অনৌবা তাইবংপান্দুদা নুংঙাইনা লৈবা হায়বসি ঈশ্বরগী অপাম্বনি। মরম অসিনা, ঈশ্বরনা ঐখোয় মীওইবা খুদিংমক্না মহাক্কী মরমদা খঙনবা অমসুং মহাক্কী অপাম্বা তৌরগা হিংজনবগী তাঞ্জা পীরি।

তাইবংপানসি লোইদ্রিঙৈগী মমাঙদা ঈশ্বরগী নিংথৌ লৈবাক্কী অফবা ৱাপাউ অসি “তাইবংপান অপূম্বদা শন্দোক্কনি” হায়না যীশুনা হায়রম্মী। (মাত্থি ২৪:১৪) পৃথিবী পুম্বদা যেহোবাগী সাক্ষীশিংনা হায়রিবা ঈশ্বরগী লৈঙাক অমসুং মসিনা সাশন তৌগদৌরিবা অনৌবা তাইবংপান্দুদা করম্না হিংহৌবা য়াগনি হায়বগী মরমদা মীশিংদা তাকপী তম্বীরি। শোক ২০১৯ দা মখোয়না মীশিংদা পাউসি পীনবা অমসুং মসিগী মরমদা তাকপী তম্বীনবগীদমক পুং ক্রোর কয়া কয়া কাইথোকখি। যীশুনা হায়রম্বদুমক হৌজিক হৌজিক ওইরবনিনা তাইবংপানসি লোইগদবা মতম য়াম্না নকখ্রে হায়বসি ঐখোয়না খঙবা ঙমলে।

মীওইবগী লৈঙাক সাশন অসি থুনমক লোইখ্রগনি। অদুবু নুংঙাইনীংঙাই ওইবা ৱাফমদি ঙসিগী তাইবংপানসি লোইশিনবা মতমদুদা নহাক হিংহৌবা য়াগনি অমসুং ঈশ্বরনা পুবীরক্কনি হায়না ৱাশকপীরিবা লৈকোলগুম ফজরবা অনৌবা তাইবংপান অদুদা লৈবা ফংগনি। মদু করম্না ওইথোকপা য়াগনি হায়বগী মতাংদা মথংগী পন্দুপতা নৈনগনি।