ঈশ্বরনা ফত্তবা মীশিং অমসুং ঙসি থোক্লিবা ফত্তবা থৌদোক ৱাথোক পুম্নমক থুনা লোইশিল্লগনি হায়বসিগী মরমদা মমাঙগী পন্দুপশিংদগী খঙখ্রে। মহাক্না হায়রিবসি শোয়দনা পাঙথোক্কনি হায়বসি ঐখোয়না থাজবা য়াই। মরমদি, বাইবলদা অসুম্না হায়রি:

“তাইবংপান . . .মাঙশিল্লকলি।”—১ যোহান ২:১৭

অদুবু ঈশ্বরনা তাইবংপানসি লোইশিনবা মতমদা মীওই খরদি শোয়দনা হিংহৌগনি হায়বসি ঐখোয়না থাজবা য়াই। মরমদি বাইবলদা অসুম্নসু হায়রি:

“ঈশ্বরগী অনীংবা তৌবা মহাক অদু মতম পূম্নমক্তা লেঙদনা লৈ।”

মরম অসিনা, অরোয়বা লাকপা মতমদা হিংহৌনবগী মরুওইবা পাম্বৈদি ঈশ্বরগী অপাম্বা তৌবা হায়বসিনি। ঈশ্বরগী অপাম্বদু করিনো হায়বা খঙনবগীদমক ঐখোয়না মহাক্কী মরমদা হান্না ফজনা খঙবা তাই।

যীশুনা হায়রম্মী: “অমতা ঙায়বা অচুম্বা ঈশ্বর নহাক. . .খঙবা অসি লোম্বা নাইদবা হিংবনি।” (যোহান ১৭:৩) অদুনদি তাইবংপানসি লোইবা মতমদা হিংহৌনবা অমসুং অনৌবা তাইবংপান্দুদা লোম্বা নাইদনা হিংবা ফংনবগীদমক ঐখোয়না ঈশ্বরবু “খঙবা” হায়বসি দরকার ওই। ঈশ্বর খঙবা হায়রিবসি ঈশ্বর অমা লৈ হায়না থাজবা অদুগা মাগী মরমদা খরখক খঙবদু নত্তে। অদুবু চান্নরবা মরুপ অমগা অফবা মরী থম্বগুম্না ঈশ্বরগা ঐখোয়গা অফবা মরী অমা থমগদবনি। মরুপ অমগা অফবা মরী থম্নবগীদমক ঐখোয়না মহাক্কা লোয়ননবা মতম কাইথোকপা দরকার ওই। মদুগা চপ মান্ননা ঈশ্বরগা মরুপ ওইবগী অচেৎপা মরী থম্নবগীদমক মতম কাইথোক্তুনা ঐখোয়না মহাক্কী মরমদা ফজনা খঙনবা হোৎনগদবনি। মসিগী মতাংদা বাইবলদগী অচুম্বা ৱাফম খরা য়েংসি।

হিংনবগীদমক ঐখোয়না নুমিৎ খুদিংগী চাং নাইনা চিঞ্জাক চায়। অদুবু যীশুনা অসুম্না হায়রম্মী: “মীওইবনা তলতনা হিংলোই, অদুবু ঈশ্বরগী চীন্দগী থোক্লকপা ৱাহৈ খুদিংগী মপান্না হিংগনি।”—মাত্থি ৪:৪

ঙসি ঐখোয়না ঈশ্বর যোহোবাগী ৱাহৈশিং বাইবলদগী খঙবা ঙমই। ঐখোয়না অশেংবা লাইরিক অসি পাবা অমসুং নৈনবা মতমদা মহাক্না মীওইবশিংগীদমক মমাঙঙৈদা করি তৌখিবগে, হৌজিক্না করি তৌরিবগে অমসুং তুংদনা করি তৌরক্কদৌরিবগে হায়বদু খঙবা ঙমগনি।

করিগুম্বা নহাক্না ঈশ্বরনা তাকপী তম্বীরিবশিং অসি ইল্লগা চৎচনীংলবসু মহাক্না য়াদবা থবক খরা থাদোকপা ঙমদনা লৈরবদি, মতাংদুদা নহাক্না করি তৌবা য়াবগে? ঈশ্বরগী মরমদা মুন্না খঙনবা হোৎনবীয়ু। অদুম্না তৌবা মতমদা নঙোন্দা মতেং য়াম্না ফংজগনি।

সকুরা কৌবী নুপী অমগী মতাংদা য়েংসি। মহাক লমচৎ ওক্তবী ওইরম্মী। অদুবু মহাক্না বাইবল নৈনবা হৌরকপা মতমদা ঈশ্বরনা “নুপা নুপী লান্নবদগী চেন্থোকউ” হায়না য়াথং পীরি হায়বসি খঙলকখি। (১ কোরিন্থীয়া ৬:১৮) মহাক্না তৌরিবা ফত্তবা থবক্তু থাদোকপা ঙম্নবা পাঙ্গল পীবিয়ু হায়না সকুরানা ঈশ্বরদা হায়জখি অমসুং থাদোকপসু ঙমখি। অদুবু হৌজিকসু মহাক ফত্তবা লমচত্তা অমুক হন্না তাদনবা কন্না হোৎনৈ। মহাক্না হায়, “ঐঙোন্দা অরানবা ৱাখল হেক ফাওরকপা মতমদা ঐনা ঈশ্বর যেহোবাদা হায়জৈ। ঐ ইশাগী পাঙ্গলনা ওইরিবা ফিভমদু মাইয়োক্নবা ঙম্লোই হায়বা খঙজবা মরম্না ঐঙোন্দা ফাওরিবশিংদু মহাক্কী মফমদা থম্মোয় শেংনা ফোঙদোকচৈ। অসুম্না তৌজবনা ঐনা ঈশ্বর যেহোবাদা হেন্না নকশিঞ্জবা ঙম্মী।” সকুরাগুম্না ঙসি মীওই লাখ কয়ানা ঈশ্বর যেহোবাগী মরমদা ফজনা খঙনবা হোৎনরি। মীওইশিং অদুনা মখোয়গী পুন্সিদু অচুম্বা লম্বীদা চৎচনবা হোৎনবা অমসুং মহাক্না পাম্বা থবকশিং তৌনবা হোৎনজবা মতমদা ঈশ্বর যেহোবানা মখোয়দা পাঙ্গল থৌনা পীবী।—ফিলিপ্পীয়া ৪:১৩

নহাক্না ঈশ্বরবু মুন্না খঙজবা হেল্লিমখৈ ঈশ্বরনসু নহাকপু হেন্না খঙবীগনি। অদুগা নহাক ঈশ্বরগী চান্নরবা মরুপ অমা ওইবসু য়াগনি। (গালাতীয়া ৪:৯; থাগৎ ঈশৈ ২৫:১৪) অদুদগীদি অনৌবা তাইবংপান্দু লাকপা মতমদা নহাক হিংবা ফংগনি। অবুবু হায়রিবা তাইবংপান্দুদা করি করি ওইগদগে? মদুগী মতাংদা মথংগী পন্দুপতা শন্দোক্না তাক্লি।