মীওইবা জাতি

বাইবলনা হায়রি: ঈশ্বরনা ‘মালেম্বু . . . অরেম্বদা শেম্বিদে, মসিবু খুন্দানবা শকওং লাকপি।’—যিশাইয়া ৪৫:১৮

মালেম পৃথিবী

বাইবলনা হায়রি: “মীরোন অমা চৎখি, অদুগা অতোপ্পা মীরোন অমা লাকই; অদুবু মালেমদি মতম পূম্নমক্তা লেঙদনা লৈ।” —পাউ শন্দোকপা ১:৪

মসিনা হায়নীংলিবদি: বাইবলদা হায়রম্বা মতুংইন্না, পৃথিবীসি কৈদৌনুংদসু মাঙ-তাকলোই অমসুং মসিদা মীওইবশিংনা মতমচুপ্পদা খুন্দা লৈতাদুনা লৈগনি। অদু ওইবা তারগদি, তাইবংপানসি লোইরগনি হায়রিবসিগী ৱাহন্থোক্তি করিনো?

খল্লগা য়েংসি: বাইবলনা তুংদা ওইগদৌরিবা তাইবংপান লোইবগী থৌদোক অসিগা মমাঙঙৈদা নোহাগী মতমদা থোকখিবা থৌদোক অদুগা চাংদম্নৈ। মতমদুদা তাইবংপানসি ‘হিংসানা থনবা’ হায়বদু ওইরম্মী। (মৈহৌরোন ৬:১৩) অদুবু নোহাদি ধর্ম্মচেনবা মীশক ওইরম্মী। মরম অদুনা, ঈশ্বরনা অচৌবা ঈশিং ঈচাউ অমা থোকহন্দুনা মতমদুগী ফত্তবা মীশিংদু মাঙহনবা মতমদা নোহা অমসুং মহাক্কী ইমুং মনুংবুদি কনবিখি। মতমদুদা থোকখিবা থৌদোক অদুগী মতাংদা বাইবলনা অসুম্না হায়: “ ঈশিং অসিনা মতম অদুদা লৈরম্বা তাইবংপানবু থূমহত্তুনা মাঙহনখি।” (২ পিতর ৩:৬) অসুম্না মতমদুগী তাইবংপান অদু লোইখি। মতমদুদা ঈশ্বরনা মাঙহনখ্রিবসি করিনো? পৃথিবী অসি মাঙহনখিবা নত্তে, মতমদুদা লৈরম্বা ফত্তবা মীশিংদুবু মাঙহনখিবনি। মরম অদুনা, বাইবলদা তাইবংপানগী অরোয়বা হায়রিবসি পৃথিবী কায়দুনা মাঙ-তাকখিবগী ৱাফম নত্তে অদুবু ফত্তবা মীশিং অমসুং নুংঙাইতবা থৌদোক ৱাথোকশিং মাঙহনখিবগী ৱাফমনি।

ফত্তবা অমসুং নুংঙাইতবা থৌদোক ৱাথোকশিং

বাইবলনা হায়রি: “মতম খরা লৈরগা ঈশ্বর নীংদবা মী অদু লৈররোই; হোয়, নহাক্না মহাক্কী লৈফম মুন্না য়েংগনি, অদুগা মহাক লৈররোই। অদুবু নোল্লুকপশিংনা মখোয়গী শরূক ওইনা মালেম্বু ফংজগনি, অদুগা য়াম্না ঈঙথবদা মখোয় মশামক নুঙাইজগনি।” —থাগৎ ঈশৈ ৩৭:৯-১১

মসিনা হায়নীংলিবদি: নোহাগী মতমদা থোকখিবা ঈশিং ঈচাউদুনা ফত্তবশিং মাঙহনবগী অরোয়বা ওইখিদে। ঈচাউদুগী মতুংদসু মীশিংনা অমুক হন্না ফত্তবা ওইরক্তুনা অতোপ্পশিংবু অৱাবা পীবা থবক কয়া তৌরকখি। থাগৎ ঈশৈগী লাইরিক্তা, “ফত্তবা তৌবশিং মাঙহল্লগনি” হায়রম্বগুম্না য়াম্না থুনমক ঈশ্বরনা ফত্তবশিং অসি লোইশিল্লগনি। ঈশ্বর মশামক্কী লৈঙাক্না ফত্তবশিং অসিগী অরোয়বদু পুরক্কনি। হায়রিবা লৈঙাক অসিনা স্বর্গদগী পৃথিবী পুম্বদা সাশন তৌগনি। মতম অদুদা ধর্ম্মচেনবা মীশিং খক্তনা পৃথিবীদা লৈগনি।

খল্লগা য়েংসি: পৃথিবীদা পাল্লিবা লৈঙাকপশিং অসিনা ঈশ্বরগী লৈঙাক অদুবু শৌগৎকদ্রা? মখোয়না লৈঙাক অদুবু শৌগৎলোই, মদুগী মাইয়োক্তা লৈগনি হায়না বাইবলনা হায়রি। (থাগৎ ঈশৈ ২:২) মদুগী মহৈদি করি ওইগনি? ঈশ্বরগী লৈঙাক্না হৌজিক পাল্লিবা মীওইবগী লৈঙাকশিং অসিবু তুম্না মাঙহনখ্রগনি অদুগা মদুনা “মতম পূম্নমক্তা লৈগনি।” (দানিয়েল ২:৪৪) অদুবু ঈশ্বরনা মীওইবগী লৈঙাকশিং অসিবু লোইশিনগদৌরিবসি করিগীনো?

বাইবলনা হায়রি: “তাইবং মীনা চৎনা চৎনা মশাগী খোঙথাং লেপ্পা ঙমদে।”—যিরেমিয়া ১০:২৩

মসিনা হায়নীংলিবদি: মীওইবশিং শেম্বীখিবসি মখোয় মশানা মশাগী মথক্তা সাশন তৌনবা শেম্বীখিবা নত্তে। মরম অসিনা মীওইবগী লৈঙাকশিং অসিনা ঙসি থোক্লিবা নুংঙাইতবা থৌদোক ৱাথোকশিংসি মপুংফানা কোকহনবা ঙমদে।

খল্লগা য়েংসি: বৃটান্নিকা একাদমিক হায়না খঙনবা ৱেবসাইত অমদা অসুম্না হায়, হৌজিক ফাওবদা পাল্লক্লিবা লৈঙাক অমত্তনা “তাইবংপানসিদা থোক্লিবা লৈত-লাইর, চাক্তাঙবা, লায়না-লাইচৎ, মহৌশাগী ওইনা থোকপা অমাঙ অতাগী থৌদোকশিং, লান অমসুং অতোপ্পা হিংসাগী ওইবা থৌদোকশিং অমত্তা কোকহনবা ঙমদে।” মসিদা মখা তানা অসুম্নসু হায়: “মীওই খরনদি তাইবংপানসিদা লৈরিবা লৈঙাকশিংসিনা অমত্তা ওইনা পুনশিল্লগা হোৎনরবদি অসিগুম্বা নুংঙাইতবা থৌদোকশিং অসি কোকহনবা ঙমগনি হায়না থাজৈ।” অদুম ওইনমক, লৈঙাকশিং অসিনা অমত্তা ওইনা পুনশিল্লবসু মথক্তা পনখ্রিবা অৱাবা থৌদোকশিং অসিদি কোকহনবা ঙম্লোই। মরমদি লৈঙাকপশিং অসি মপুংফাদবা মীওইবা ঙাক্তনি। মরম অসিনা, তাইবংপানসিদা থোক্লিবা অৱাবা থৌদোকশিংসিবু মতমচুপ্পগী ওইনা কোকহনবা ঙমগদবা অমত্তা ঙাইরবা লৈঙাক্তি ঈশ্বরগী লৈঙাকনি।

অদুনা বাইবলদা তাইবংপান লোইগনি হায়রিবসি ফত্তবা মীশিং অমসুং ফত্তবা থৌদোক ৱাথোকশিং লোইশিনখিবগী ৱাফমনি। মরম অসিনা মসিগী মতাংদা ঐখোয়না করিসু কিনীংঙাই ওইদে। অদুগী মহুত্তা, মসিদি ঐখোয়না খৌরাংনা ঙাইজগদবা থৌদোক অমনি। মরমদি ঙসিগী মাঙ-তাক্লবা তাইবংপান অসি ঈশ্বরনা পুবিরক্কদৌরিবা ফজরবা, নুংঙাইবনা থল্লবা তাইবংপান অদুনা মহুৎ শিল্লগদবনি!

হায়রিবা থৌদোকসি করম্বা মতমদা থোক্কদৌরিবনো? ৱাহংসিগী বাইবলগী ওইবা পাউখুমদি মথংগী পন্দুপতা কুপ্না নৈনগনি।