B maana vaeesg n mik tɩ Amerik kom-bɩɩs koabg zugu, yaa bãmb pis-nii n pʋʋsde. La nin-kãensã sʋka, yaa pʋɩ-sʋkã bal n pʋʋsd daar fãa. Yaa vẽeneg tɩ kom-bɩɩs kẽer sokda b mens yaa: Pʋʋsgã yaa bũmb sẽn sõngd maam tɩ m yamã gãe bãan bal bɩ, bɩ a yõodã yɩɩda rẽ?’

•  Pʋʋsgã yaa bõe?

•  Wẽnnaam kelgda pʋʋsg bɩ?

•  Bõe la m tõe n pʋʋs n kose?

•  Kom-bɩɩs kẽer sẽn yeele

 Pʋʋsgã yaa sõsg ne soab ning sẽn naanã bũmb fãa wã. Fo we n tags n ges rẽ sẽn dat n yɛɛlga! A Zeova yɩɩda ninsaalbã fãa hal zĩig sẽn zãre. Baa ne rẽ, “a pa zãr ne tõnd ned baa a yembr ye.” (Tʋʋma 17:27) Sɩd me, Biiblã yetame yaa: “Bɩ y kolg Wẽnnaam, tɩ yẽ me na n kolga yãmba.”—Zak 4:8.

 Wãn to la f tõe n kolg Wẽnnaam?

•   Pipi, ne pʋʋsgã maasem. Woto, fo gomda ne Wẽnnaam.

•   Yiibu, ne Biiblã zãmsgã maasem. Woto, Wẽnnaam “gomda” ne foo.

 Bõn-kãensã a yiibã maanego, rat n yeel tɩ pʋʋsgã la Biiblã zãmsgã na n sõnga foo tɩ f paam zood sẽn tar pãng ne Wẽnnaam.

 “Paam n gomd ne a Zeova sẽn yaa sẽn ka-a to wã yaa ziir-kãseng meng ninsaalbã sẽn tõe n paame.”—A Jeremy.

 “M sẽn togsd a Zeova bũmb nins sẽn be m sũurẽ wã sõngdame tɩ maam ne yẽ zoodã pãng paasdẽ.”—A Miranda.

 Baa fo sã n tẽeda Wẽnnaam, la baa f sã n pʋʋsd-a lame, tõe tɩ yaa toog ne foom tɩ f sak n deeg tɩ Wẽnnaam sɩd kelgda pʋʋsgo. La Biiblã pʋgẽ, b boonda a Zeova tɩ “Soab ning sẽn wʋmd pʋʋsgã.” (Yɩɩn-sõamyã 65:2) A pʋd n yetame tɩ f ‘sik f yɩɩrã fãa n bas ne-a.’ Bõe yĩnga? ‘Bala a geta fo yelle.’—1 Pɩyɛɛr 5:7.

 Tags n gese: Fo baooda sẽk n sõsd ne f zo-rãmb hakɩɩkã n pa vaandẽ bɩ? Fo tõe n maana woto me ne Wẽnnaam. Pʋʋsd-a wakat fãa. F sã n wa pʋʋsd-a, bɩ f pʋt a yʋʋrã sẽn yaa Zeova wã. (Yɩɩn-sõamyã 86:5-7; 88:9) Sɩd me, Biiblã sagend-f lame tɩ f ‘pʋʋsd wakat fãa.’—1 Tesalonik rãmbã 5:17.

 “M sã n pʋʋsd m saasẽ Ba wã, m sõsda ne-a, n togsd-a sẽn be m sũurẽ wã zãnga.”—A Moises.

 “Mam togsda a Zeova bũmb nins sẽn sɩd pak-mã, wa m sẽn maand to-to ne m ma la m zoa hakɩɩka.”—A Karen.

 Biiblã yetame yaa: “Bũmb fãa pʋgẽ, bɩ y tũnug ne pʋʋsg la se-yõkr ne bark pʋʋsgo, n wilg Wẽnnaam bũmb nins y sẽn kotã.”—Filip rãmbã 4:6.

 Woto rat n yeelame tɩ zemsame tɩ f pʋʋs Wẽnnaam f zu-loeesã yĩng bɩ? N-ye! Sɩd me, Biiblã yetame: “Lob f zɩɩbã a Zeova zugu, t’a na teel-fo.”—Yɩɩn-sõamyã 55:22.

 La f sã n wa pʋʋsd Wẽnnaam, fo pa segd n gomd f zu-loeesã yell bal ye. Pʋg-sad a ye yʋʋr sẽn boond t’a Chantelle yeelame: “M sã n pʋʋsd a Zeova n kot sõngr bal wakat fãa, d zoodã pa na n yɩ zood hakɩɩk ye. M tagsdame tɩ m segd n deng n pʋʋs-a-la barka. Bũmb nins yĩng m sẽn segd n pʋʋs-a barkã me waoogame.”

 Tags n gese: Bõe la fo tara, n tõe n pʋʋs Wẽnnaam bark rẽ yĩnga? Fo tõe n tagsa bũmb a tãab yĩng f sẽn na n pʋʋs a Zeova bark rũndã bɩ?

 “Baa bũmb sẽn wõnd pa bõn-kãseng tõe n kɩtame tɩ d pʋʋs a Zeova barka. Wala makre, d sã n maag d yĩng n ges fɩlɛɛr sẽn yaa neere.”—A Anita.

 “Bʋgs bũmb sẽn noom foo bũmb nins a Zeova sẽn naanã sʋka, pa rẽ bɩ Biiblã vɛrse goam sẽn kẽ f sũurã sõma zugu, tɩ rẽ poor bɩ f pʋʋs a Zeova bark rẽ yĩnga.”—A Brian.