Naoor a yiib semen fãa, a Zeova Kaset rãmbã tigimda taaba, zĩig b sẽn boond tɩ Rĩung rotẽ. Bõe la b maand be? F sã n kẽnd be, wãn to la na n naf foo?

•  Bõe la b maand Rĩung roogẽ?

•  Bõe yĩng tɩ f tog n kẽnd tigissã?

•  Kom-bɩɩs a taab sẽn yete

 Rĩung roog yaa zĩig neb sẽn paamd zãmsg sẽn tik Biiblã zugu. Tigs nins b sẽn maand be wã tõe n sõnga foo:

•   tɩ f bãng Wẽnnaam sõma.

• tɩ f wʋm yɛl nins sẽn maand dũniyã zugã võore.

• tɩ f lebg ned sẽn tar zʋg-sõma.

•   tɩ f paam zo-rãmb hakɩɩka.

Fo ra miime bɩ? B boonda zĩig ning a Zeova Kaset rãmbã sẽn tigimd taabã tɩ Rĩung roogo, bala be, yaa Wẽnnaam Rĩungã yell la b gomd n yɩɩda.—Matye 6:9, 10; 24:14; Luk 4:43.

Bũmb toor-toor sẽn na n sõng-fo. A Zeova Kaset rãmbã tigissã sasa, Biiblã saglsã b sẽn kõt be wã na n sõnga foo tɩ f paam “yam ne bãngre.” (Yel-bũnã 4:5) Woto rat n yeelame tɩ Biiblã tõe n sõnga foo tɩ f bãng n yãk yam-sõma f vɩɩmã pʋgẽ. A tõe n sõnga foo tɩ f paam sogs-kãsems leoore. Wala makre:

• Vɩɩmã võor yaa bõe?

• Yaa Wẽnnaam n kɩt tɩ tõnd namsdẽ bɩ?

• Ned kũum poore, bõe n maande?

Sibr bɩ hato, b wɛgsda sõssa. Ad sõs a wãn gom-zutu:

• Bõe yĩng tɩ d segd n bas tɩ Biiblã wilg-d sore?

• Yɛ la d tõe n paam sõngr toog wakate?

• Wẽnnaam Rĩungã sẽn maand bũmb nins n kõt tõnd rũndã-rũndã.

A Brenda yeelame: “Vugri, m karen-bi-taag n wa n kelg tigsg a ye. A zĩnda ne tõnd zakã rãmba, tɩ d ra naag taab n tũud zãmsgã d sɛbã pʋsẽ. Rẽ poore, a yeela maam tɩ neb toor-toorã sẽn kõ leoorã yɩ-a-la noog wʋsgo. A yeelame me tɩ bãmb egiliizẽ wã, b pa tar sɛb zãmsgã yĩng wa tõnd ye.”

Fo ra miime bɩ? Rĩungã roogẽ, kõomã yaa zaalem, b pa pɩʋʋgd ne lepr me n kot ligd ye.

Na n kenga f raoodo. Biiblã wilgame tɩ d sẽn tigimd taabã yaa sẽn na yɩl n keng taab raood me. (Ebre-rãmbã 10:24, 25) F sã n be ne neb sẽn lʋɩɩsd Wẽnnaam raabã la b taabã neer taoore, kengda f raoodo. Bala dũniyã pida ne rat-m-yembr dãmba.

A Elisa yeelame: “Daar ninga, zaabr sã ta, m yaame, tɩ m sũurã me pa noom ye. La m sã n ta Rĩungã roogẽ, neb nins m sẽn na n yã be wã na n kɩtame tɩ m le paam sũ-noogo. M sã n wa kuiisẽ, m le tara pãng beoog yĩnga.”

Fo ra miime bɩ? Dũniyã gill zugu, a Zeova Kaset rãmbã tigimsã yɩɩda 120 000. Zĩis nins b sẽn tigimd taabã yɩɩda 60 000. Yʋʋmd fãa, b meta sẽn ta Rĩung rot 1 500, nebã sõorã sẽn paasdã yĩnga. a