Ãnd dãmb n dabd saasẽ?
Biiblã sẽn yete
Wẽnnaam yãka kiris-neb sõor takɩ sẽn maand sɩd ne-a, tɩ b na n vʋʋg n kẽng saasẽ b kũumã poore. (1 Pɩyɛɛr 1:3, 4) Nin-kãensã yãkrã poore, b segd n modgame tɩ b tẽebã ket n tar pãnga, la b kell n yɩ yɩlem Wẽnnaam nifẽ, sẽn na yɩl n da wa bõn b saasẽ pʋɩɩrã ye.—Efɛɛz rãmbã 5:5; Filip rãmbã 3:12-14.
Bõe la neb nins sẽn na n kẽng saasẽ wã na n tɩ maane?
B na n tɩ naaga a Zeezi n lebg rĩm-dãmb la maan-kʋʋdb n dɩ naam yʋʋm tusri. (Vẽnegre 5:9, 10; 20:6) Yaa bãmb n na n yɩ “sa-paalsã” n dɩ naam “tẽn-paalgã” zugã. “Sa-paalsã” yaa saasẽ goosneema, tɩ “tẽn-paalgã” yaa neb nins sẽn na n zĩnd tẽngã zugã. Nin-kãensã sẽn na n zĩnd saasẽ n dɩ naamã na n sõnga ãdem-biisã, tɩ b vɩɩmã yɩ sõma wa Wẽnnaam sẽn da rat tɩ yɩ to-to sɩngrẽ wã.—Ezayi 65:17; 2 Pɩyɛɛr 3:13.
Neb a wãn n na n vʋʋg n kẽng saasẽ?
Biiblã wilgdame tɩ yaa neb tus-koabg la tus pis-naas la a naas n na n vʋʋg n kẽng saasẽ. (Vẽnegre 7:4) Vẽnegr 14:1-3 wã pʋgẽ, tẽn-tʋmd a Zã wilgame t’a yãa “Pe-bilã sẽn yas Siyõ tãngã zugu, tɩ neb tus-koabg la tus pis-naas la a naas be ne-a.” Bũmb ning a Zã sẽn yã wã pʋgẽ, “Pe-bilã” makda a Zeezi a vʋʋgrã poore. (Zã 1:29; 1 Pɩyɛɛr 1:19) “Siyõ tãngã” makda ziir-kãseng ning b sẽn kõ a Zeezi ne neb tus-koabg la tus pis-naas la a naasã sẽn naag-a saasẽ n dɩt naamã.—Yɩɩn-sõamyã 2:6; Ebre-rãmbã 12:22.
B boonda neb nins “b sẽn bool la b sẽn yãk” tɩ b na n naag Kiristã n dɩ naam a Rĩungã pʋgẽ wã tɩ “bãg-bila.” (Vẽnegre 17:14; Luk 12:32) Woto wilgdame tɩ d sã n mak-b ne a Zeezi piisã sõorã gilli, b pa waoog ye.—Zã 10:16.
Tags-kɛg neb kẽer sẽn tar sẽn na n kẽng-b saasẽ wã wɛɛngẽ
Tags-kɛgre: Nin-sõamyã wã fãa na n kẽnga saasẽ.
Sɩdã: Wẽnnaam pʋlmame tɩ nin-sõamyã wã fãa la bal na n vɩɩmda wakat sẽn kõn sa tẽngã zugu.—Yɩɩn-sõamyã 37:11, 29, 34.
A Zeezi yeelame tɩ ‘ned baa a ye nan pa rʋ saasẽ ye.’ (Zã 3:13) A gomdã wilgdame tɩ nin-sõamyã nins sẽn ki nand t’a wa tẽngã zugã pa kẽng saasẽ ye. Wala makre, a Abrahaam, a Moyiizi, a Zoob la a Davɩɩde. (Tʋʋma 2:29, 34) La b ra saagdame tɩ b na n wa vʋʋg-b lame tɩ b vɩɩmd tẽngã zugu.—Zoob 14:13-15.
B boonda sẽn na n kẽng-b saasẽ wã vʋʋgrã tɩ “pipi kũum vʋʋgrã.” (Vẽnegre 20:6) Woto wilgdame tɩ vʋʋgr a to n na n zĩndi. Vʋʋg-kãng na n yɩɩ vʋʋg n vɩɩmd tẽngã zugu.
Biiblã wilgame tɩ Wẽnnaam Rĩungã naam sasa, “kũum pa na n le zĩnd” ye. (Vẽnegre 21:3, 4) Pʋlen-kãngã na n pidsa tẽngã zugu, bala kũum zɩ n zĩnd saasẽ ye.
Tags-kɛgre: Yaa ned kam fãa n yãkd a sã n na n tɩ vɩɩmda saasẽ, pa rẽ bɩ a sã n na n vɩɩmda tẽngã zugu.
Sɩdã: Yaa Wẽnnaam n yãkd neb nins sẽn na n paam “saasẽ boollã keoorã,” kiris-neb nins sẽn maand sɩd ne-a wã sʋka. Woto rat n yeelame tɩ yaa Wẽnnaam n yãkd sẽn na n tɩ vɩɩmd-b saasẽ wã. (Filip rãmbã 3:14) Pa ned raabo, wall a sẽn tʋll naam yĩng n kɩtd tɩ b yãk-a ye.—Matiye 20:20-23.
Tags-kɛgre: Vɩɩmd wakat sẽn kõn sa tẽngã zugã pa tar yõod wʋsg ye. Yaa neb nins sẽn pa zems ne tɩ vɩɩmd saasẽ wã bal n saagd rẽ.
Sɩdã: Wẽnnaam boonda neb nins sẽn na n vɩɩmd wakat sẽn kõn sa tẽngã zugã tɩ “mam nebã,” “mam sẽn yãk b rãmbã,” la “a Zeova sẽn ning b rãmb barkã.” (Ezayi 65:21-23) B na n paam n sõngame tɩ bũmb ning Wẽnnaam sẽn da rat ninsaalbã yĩng sɩngrẽ wã pidsi, rat n yeel tɩ b na n lebga neb sẽn zems zãnga, n vɩɩmd wakat sẽn kõn sa tẽngã sẽn na n lebg arzãnã pʋgẽ.—Sɩngre 1:28; Yɩɩn-sõamyã 115:16; Ezayi 45:18.
Tags-kɛgre: Neb tus-koabg la tus pis-naas la a naasã yell b sẽn gom Vẽnegr sebrã pʋgẽ wã pa neb sõor sɩd-sɩd ye.
Sɩdã: Vẽnegr sebrã pʋgẽ, b wilga bũmb toor-toor sõore, tɩ yaool n pa sõor sɩd-sɩd ye. La baa ne rẽ, sõor kẽer b sẽn togs yaa sõor sɩd-sɩda. Wala makre, b gomda “Pe-bilã tẽn-tʋmdb piig la a yiibã yʋy piig la a yiibã” yelle. (Vẽnegre 21:14) Kaset buud toor-toor n tõe n sõng tɩ d bãng tɩ neb tus-koabg la tus pis-naas la a naasã yell b sẽn gomdã me yaa neb sõor sɩd-sɩda. Bɩ d gom rẽ yelle
Vẽnegr 7:4 yetame yaa: “Neb nins b sẽn ning bãndã sõore [pa rẽ bɩ sẽn tar-b kaset tɩ b na n tɩ vɩɩmda saasẽ wã], yaa neb tus-koabg la tus pis-naas la a naase.” Vɛrse a wɛ ne piigã pʋgẽ, b gomda neb sull a to yelle, n yetẽ tɩ yaa “kʋʋn-kãseng ned baa a ye sẽn pa tõe n sõd n sa.” “Kʋʋn-kãsengã” neb me na n paama fãagr sẽn yit Wẽnnaam nengẽ. (Vẽnegre 7:9, 10) Sã n mik tɩ neb tus-koabg la tus pis-naas la a naasã pa sõor sɩd-sɩda, la tɩ makda sõor d sẽn pa tõe n sõde, welgr ning sẽn be sul-kãng ne kʋʋn-kãsengã sʋkã pa na n yɩ vẽeneg ye. a
Sẽn paase, b goma neb tus-koabg la tus pis-naas la a naasã yelle, n yeel tɩ “b ra-b-la ninsaalbã sʋk tɩ b yaa dẽenem biisi.” (Vẽnegre 14:4) Ka wã “dẽenem biisã” bilgda neb sõor bilf b sẽn yãk neb ka tɛk sʋka. Yaa woto bal kɛpɩ ne neb nins b sẽn yãk tɩ b na n tɩ naag Kiristã saasẽ n dɩ naam tẽngã zugã. B na n dɩɩ naam neb ka tɛk zugu.—Vẽnegre 5:10.
a A Robert Thomas sẽn yaa porfesɛɛrã gʋlsa bũmb neb tus-koabg la tus pis-naas la a naasã yell b sẽn gomd Vẽnegr 7:4 wɛɛngẽ, n yeele: “Sõor ning b sẽn togs be wã yaa sõor takɩ, n yaa toor ne neb sõor ning yell b sẽn gomd Vẽnegr 7:9 pʋgẽ wã. A sã n pa sõor sɩd-sɩda, dẽnd Vẽnegr sebrã pʋgẽ, sõor pa be be n yaa sõor sɩd-sɩd ye.”—Vẽnegre 1–7: An Exegetical Commentary, seb-neng 474.
Découvrez aussi…
BIIBLÃ ZÃMSG SẼN TAR YÕOD WƲSGO
Wẽnnaam Rĩungã yaa bõe?
A Zeezi koe-moonegã sasa, a ra gomda Wẽnnaam Rĩungã yell n yɩɩd bũmb a taabã. Sẽn na maan yʋʋm kobs masã, a karen-biisã pʋʋsdame n kotẽ tɩ Rĩung-kãng wa
BIIBLÃ SẼN YETE
Kos-y Biibl zãmsgo
Y tõe n paamame t’a Zeova Kaset soab wa zãms yãmb Biiblã, yãmb y ye bala.