Ayo. Pa tũudmã fãa n yaa sõma ye. Biiblã gomda tũudum wʋsg sẽn pa tat Wẽnnaam yam yelle. D tõe n pʋɩɩ tũudum toor-toorã zĩis a yiibu.

Pipi zĩigã: Wẽn-faad pʋʋsgo

 Biiblã gomda wẽn-faadã pʋʋsg yelle, n yetẽ tɩ yaa “belgre,” “zaalem,” la bũmb “sẽn pa tar yõodo.” (Zeremi 10:3-5; 16:19, 20) Wẽnnaam a Zeova a ra yeela pĩnd wẽndẽ Israyɛllã neb yaa: “Yãmb pa segd n tall wẽnnaam-dãmb a taab n zʋʋg maam ye.” (Yikri 20:3, 23; 23:24) Israyɛll nebã sã n da pʋʋs wẽn-faado, “a Zeova sũurã puugda ne-ba.”—Sõdbo 25:3; Maan-kʋʋre 20:2; Bʋ-kaoodbã 2:13, 14.

 Wẽnnaam tagsg ket n yaa woto ne neb nins sẽn pʋʋsd “b sẽn boond tɩ wẽnnaam-dãmba.” (1 Korẽnt rãmbã 8:5, 6; Galat-rãmbã 4:8) A yeelame tɩ neb nins sẽn dat n waoog yẽ wã pa segd n le maan lagem-n-taar ne sẽn waoogd-b wẽn-faadã, n yeele: “Bɩ y yi bãmb sʋk la y lak y mense.” (2 Korẽnt rãmbã 6:14-17) Tũudum toor-toorã fãa sã n da yaa sõma la b tat Wẽnnaam yam, Wẽnnaam ra na n kõo noor a woto sɩda?

Yiib-n-soab zĩigã: Wẽnnaam sɩd-sɩdã waoogr sẽn pa tat a yam

 Wakat kẽere, Israyɛll nebã tũnuga ne sẽn waoogd-b wẽn-fãadã sẽn tẽedã la b yel-maandɩ n waoog Wẽnnaam. La b sẽn mak n na n dɩk ziri n kalem tũudum hakɩɩkã pa yɩ a Zeova noog ye. (Yikri 32:8; Tõodo 12:2-4) A Zeezi ninga a wakatẽ tũudmã taoor dãmb taal b sẽn da tũud Wẽnnaam to-to wã yĩnga. B ra maandame tɩ nebã getẽ tɩ b yaa wẽn-tũudba, n yaool n yaa pʋ-lik rãmb n “pa sakd Tõogã bũmb nins sẽn tar yõod n yɩɩdã, sẽn yaa tɩrlem, nimbãan-zoeer la kɩs-sɩdã ye.”—Matiye 23:23.

 Rũndã-rũndã me, yaa tũudum ning sẽn tik sɩdã zugã bal n sõngd nebã tɩ b tat Wẽnnaam yam. Sɩdã bee Biiblã pʋgẽ. (Zã 4:24; 17:17; 2 Tɩmote 3:16, 17) Sɩd-sɩdã, tũudum nins sẽn zãmsd nebã bũmb toor-toor sẽn pa zems ne Biiblã sẽn yetã zãagd-b-la ne Wẽnnaam. Zãmsg wʋsg n be tɩ nebã tẽed tɩ b yita Biiblã pʋgẽ, tɩ yaool n yaa sẽn tũud-b wẽn-faadã nengẽ la b yita. Wala makre, Tãablem-sõngã zãmsgã, sɩɩg pa kiidã la bug-tẽngã. Tũudum sã n zãmsd nebã zãmsg a woto, a yaa “zaalem” bɩ a ka tar yõodo, bala a ledgda Wẽnnaam noyã ne tũudum minimdu.—Mark 7:7, 8.

 Wẽnnaam kisa b sẽn na n tũud-a ne pʋ-lika. (Tɩte 1:16) Sẽn na yɩl tɩ tũudum sõng nebã tɩ b kolg Wẽnnaam, a pa segd n wilgd-b tũudum yel-maandɩ bal ye. A segd n wilgd-b-la b sẽn tõe n maan to-to b vɩɩmã nens fãa pʋgẽ n ta Wẽnnaam yam. Wala makre, Biiblã yetame: “Ned sã n tagsdẽ t’a yaa wẽn-tũud n yaool n pa tõe a zɩlemde, a belgda a menga, la a sẽn tũud Wẽnnaamã yaa zaalem. Ad tũudum ning sẽn yaa yɩlemde, la sẽn pa tar rẽok tõnd Wẽnnaamã sẽn yaa d Ba me wã nifẽ: Yaa f ges kɩɩbsã la pʋg-kõapã yell b toogã pʋgẽ, la f kell n da bas tɩ dũniyã rẽgm-f ye.” (Zak 1:26, 27; notã) Sebr Sõngã pʋgẽ, b lebga tũudum sẽn yaa yɩlemdã tɩ “tũudum hakɩɩka,” rat n yeel tɩ tũudum sẽn pa naag ne pʋ-lika.